Search form

2 Theilsaqlolni 3

Geeqlaoq hal tsao nail ganl

1Aqivq jaqbheq juq-ol, haoqnao naosaq khe daoq neq, niailhai ngaol. Miqyail nail daoq nuljuq nail lavqkhoel bhai lavqtsail mail gaiq doi-ail khi seiqleiq khaoqsail ya-a nail khe-ai, yaoq dao yaoq bhai iqsanl alhai pevq lal dai, nvjuq nail haqbhoil geeqlaoq hal yaoq. 2Maq meeq maq jaq nail tsaol-aq khi haqeiv nail tsaol-aq juq nail aqlavq lavqkhoel nvjuq ya jel-ail dai iqsanl, geeqlaoq hal yaoq. Khul khi mail dai ngal-aq neq, tsaol-aq iqsanl mail Yeiqsul bhai neema thaqtsaol nail maq ngel-ail. 3Thailhai ngaol-aoq, Yeiqsul neq saljial ivq nail ngaol. Aivq nuljuq bhai bhi ivq lal khi nuljuq neivq Saqdaq nee ya jel-ail dai, aivq heldaiq phail lavq nail ngaol. 4Nvjuq-i mail daoq bivq-a nail khe-ai nuljuq nl nail nee ovqtavq, iqmoeq phao lai-u iqsanl nl nail ngaol dai, Yeiqsul bhaqda nee nvjuq neema thaqtsaol naol. 5Miqyail nail goil nail gaiq-a nail phaq bhai nuljuq heeq nia jaiq lal dai maqkhaiq, Khali khe-ai daq tsaol oltsaol dai maqkhaiq, Yeiqsul nuljuq nail neema bhai lav sav bhiq dei-eiq.

Yaoq gaq yaoq-ao nee ganl ya nl nail ganl

6Aqivq jaqbheq juq-ol, ngadao nail Heeqphaq Yeiqsul Khali nail aqmil kov-uvq nee, nvjuq nuljuq bhai daoq niailhai bivq nail ngaol. Nvjuq-i mail nuljuq bhai cavq bhiq cov bhiq-a nail bhai maq tsaothe mail, khul teevq phaq iqsanl maq nl maq hal nul nail aqivq jaqbheq Khali ya juq bhai aqtsaoq thaq tsaoq. 7Nvjuq-i mail nl-a hal-a nail juq bhai nuljuq saol oil heeq phaq-ail tsaq nail ngaol dai, nuljuq heeq nia nail ngaol. Nvjuq nuljuq nee mail jaol-u phao, ganl maq nl dai aqnieivq-ail jaol-a nail maq ngel-ail. 8Nvjuq aqphoiq maq bivq-ail nuljuq nail teevq phaq iqsanl maq jaq-al. Nuljuq teevq gaq bhai iqsanl maq ya dal dai, nvjuq nqkiv n-gaol maqkhaiq, ganl nl deedee-a nail ngaol. 9Yu-i mail bhi jaq lavq nail bhai nvjuq jaq kivq dai, aqkhaoqanq maq jiav nail ngel-i mail, maq jaq-a nail maq ngel. Nuljuq nvjuq bhai saol oil khi tsaothe nia dai, alhai nl-a nail ngaol. 10Nvjuq nuljuq nee mail jaol-u phao, nuljuq bhai daoq niailhai bivq-a nail ngaol. “Ganl maq nl nul nail tsaol-aq, aoq thaq jaq” dai, ge-ai thaq nail ngaol.

11Nuljuq nail lavqkhoel khe tsaol-aq teevq pav ganav juq khul teevq phaq iqsanl maq nl maq hal nul nail nee ovqtavq, yovqgavq nail ganl bhai neq, teevq peivq-ail maq nl dai, yu nail ganl bhai taivq-ail lav tsoiq lav lev nail ngaol geiq dai, nvjuq ya gaiq-a nail ngaol. 12Nvjuq alheel nail tsaol-aq bhai Heeqphaq Yeiqsul Khali nail aqmil kov-uvq nee daoq niailhai bivq khi, gaq niailhai bivq nail ngaol. Ivqdao dai doevq khi, yovqgavq ya jaq ya daol dai, nl yaoq hal yaoq. 13Aqivq jaqbheq juq-ol, aqmeeq phaq nl nail bhai, gaq thaq bhaq.

14Tsaol-aq teevq gaq ganav, nvjuq-i mail gevq-a nail daoq bhai maq naldaiq haq neq, aivq bhai noeq thaq-ai yaoq. Aivq ya haqsil dai, aivq bhai aqtsaoq thaq gaoq tsaoq. 15Thailhai ngaol-aoq, ngadao bhai neejiav jiav lal nail gaq bhai noeq thaq-a nail khe-ai aivq bhai thaq noeq thaq. Aqivq jaqbheq khe-ai saol-nvq khi, aqmeeq-ai cavq bhiq cov bhiq yaoq.

Haoqnao naoq saq khe geeqlaoq bivq-a nail daoq

16Neesal bhi ovq nail Heeqphaq, nuljuq bhai yaoq phaq yaoq-ao nee nail lavqkhoel khaq mao iqsanl neesal bhi ovq dei-eiq. Heeqphaq Yeiqsul nuljuq iqsanl nee mail jaol dei-eiq.

17Ngal neq, Paolluv ngaol. Nuljuq bhai noeq moel naol dai, ngaq nail aqlavq-i mail gevq bhoel-ai lavq-a nail ngaol. Ngaq-i mail khal gevq-a nail haoqgavq yaoq keiv yaoq-ao nee bhai nuljuq heeq nia dai, niailhai gevq-ai thaq nail ngaol. Ngaq-i mail gevq-a nail haoqgavq neq, niailhai ngaol.

18Ngadao nail Heeqphaq Yeiqsul Khali nail geeqlaoq eeljaol nuljuq iqsanl nail kovtavq bhai jiav dei-eiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index