Search form

2 Tilmolseiq 4

Miqyail nail daoq aqmeeq-ai cavq bhiq yaoq

1Miqyail nail sivtavq bhai maqkhaiq, aqdoevq doevq nail tsaol-aq khi sil nail tsaol-aq bhai yalkhaq dal nail Yeiqsul Khali nail sivtavq bhai maqkhaiq, aivq dov lee khi uvthaiq nail bhai ngal juq juq-ail, naoq bhai daoq niailhai bivq nail ngaol. 2Miqyail nail daoq cavq bhiq yaoq. Aqyanq tsaq maq tsaq khi ngaol-aoq, cavq bhiq yaoq. Aqyu juq-i mail nl laiq thaq nail juq bhai tsiqtsoe bhiq khi, yaqhao thailhai thaq gaoq nl dai, daoq bivq khi gaq iqsanl bivq yaoq. Ol ol-ail cavq bhiq cov bhiq yaoq. 3Khul khi mail dai ngal-aq neq, mao-ail meeq mao-ail bhee nail daoq cavq nail bhai maq naldaiq nail yanq kev lee nail ngaol. Aqyu juq neq, khul nail ganl iqsanl gaiq movq khi, aqyu juq neema tsaq nail khe-ai, cavq lavq cov lavq nail saqlaq mee nia gaq bhai aqyu juq nee mail bhi jaol nail ngaol. 4Yu maldil tsaq nail daoq cavq bhiq-u phao, aqyu juq yaoq phao yaoq tsiqphaol khi, ganqje taivq-ail naldaiq nail ngaol. 5Thailhai ngaol-aoq naol neq, yaoq phaq yaoq-ao nee nail lavqkhoel-ai yaolphaol nia nail tsaol-aq pevq yaoq. Khoeq lavq jiovq lavq nail phaq bhai daq yaoq. Lavqkhiq tsail nail geeqlaoq daoq cavq bhiq thailthaiq yaoq. Naol nl thail hal thailthaiq nail Miqyail nail ganl juq nl gil-u phao kev dai, aqmeeq-ai nl yaoq.

6Khul khi mail dai ngal-aq neq, laol duq kovtavq bhai hoeldav hoeldav-ail laol bhiq nail phaq khe-ai dul dai, niil aq-il ngal ya daq thailthaiq nail ngaol. Ngal kovq lai nail aqyanq aqjail jail lal-aoq nail ngaol. 7Ngal neq, aqmeeq-ai laijai-a nail ngaol. Tsaoq doel pheeljaq nail phaq bhai haoqnao naosaq-u n-gaol kev dai, tsaoq-a nail ngaol. Neema thaqtsaol nail phaq bhai ivqdao dai, nieivq thaiq-ai thaq nail ngaol. 8Niil aq-il iqsanl, tsaq nail daol nail heel uqtsaoq ngaq nail haqbhoil lainq-ai thaq nail ngaol. Aqn al n neq, tsaq nail daol nail lavqkhoel nee yalkhaq dal nail Heeqphaq Yeiqsul neq, uqtsaoq al tsaoq ngaq bhai bivq lavq nail ngaol. Ngaq bhai taivq-ail maq ngel-ail. Aivq dov lee nail bhai khal noeqthunq nail tsaol-aq juq bhai iqsanl, bivq nail ngaol.

Paolluv Tilmolseiq bhai hal nail ganl

9Naol ngal jaol nail bha lavqtsail mail lal kivq dai, laijai yaoq. 10Khul khi mail dai ngal-aq neq, Deiqmav neq, miltsaq niilniai gaiq-a nail ngel-i mail, ngaq bhai khaonq ha-ail ceevq khi, Theilsaqlolni meenq bha ail-a nail ngaol. Gaqleiqgeiq neq, Gaqlaqtil milkhaoq bhai lai-a nail ngaol. Tiltuv iqsanl, Daqlaqmaqdil milkhaoq bhai ail-a nail ngaol. 11Lulkavq taivq-ail ngaq-ai nee jaol nail ngaol. Naol lee-u phao, Maqkul bhai iqsanl hel leevq dei-eiq. Khul khi mail dai ngal-aq neq, aivq neq, ngal Miqyail nail ganl nl nail bhai tsao nl nia nail ngaol. 12Duljil bhai neq, ngaq-i mail Eilpheilsu meenq bha bhi ail-a nail ngaol. 13Naol lal-u phao, Daqlol meenq khe jaol nail Gaqphul jaol nail bhai ngaq-i mail bhi jiav-ail ceevq-a nail phailkhaoq heelma khi haoqgavq juq oil lavq yaoq. A dai nee maqtsil, bavkov bhai gevq-ai thaq nail haoqgavq al juq, maq nioil peivq dai, oil lavq yaoq dei-eiq.

14Bhajiq Aqleiqsaqdul neq, ngaq bhai haqeiv nail mee nia phaq nl lavq-a nail ngaol. Aivq-i mail nl lavq nail bhai geel-nvq dai, Heeqphaq Yeiqsul aivq bhai nl kovq bhiq nail ngaol. 15Naol iqsanl aivq bhai yaolphaol yaoq. Khul khi mail dai ngal-aq neq, ngal cavq nail daoq bhai lav tsoiq deedee nail ngaol.

16Ngaq nail ganl iqmoeq-u phao yalkhaq dal duq bhai, ge kovq bhiq-u phao, tsaol-aq teevq gaq-ail ngal jaol nail phao maq jaol-ail. Tsaol-aq iqsanl mail ngaq bhai khaonq ha-a nail ngaol. Thailhai ngaol-aoq, aqyu juq nail kovtavq bhai oeqbal thaq bhi kev lee dei-eiq. 17Tsaol-aq iqsanl mail ngaq bhai khaonq ha lavq khi ngaol-aoq, ngal lavqkhiq tsail nail geeqlaoq daoq teevq bhee cavq bhi khi, jeq-e jaq-a iqsanl mail ya gaiq dai, Heeqphaq Yeiqsul ngaq-ai nee mail jaol khi, gaq bivq lavq thailthaiq nail ngaol. Alheel ngel-i mail, allaqjaqsil nail moeqthaoq lavqkhoel nee ngal ya jel ail-a nail ngaol. 18Yeiqsul neq, haqeiv nail yaoq phaq yaoq-ao nee nail lavqkhoel ngaq bhai bhi jel-ail lavq nail nee ovqtavq, nqtavq milkhaoq lavqkhoel bhai ngal ya jaol lai-u phao kev dai, aivq ngaq bhai bhi jel-ail lavq nail ngaol. Nqmaq maqluv halyeel aivq bhai tsiqeeq yaoq. Aqmiq.

Haoqnao naosaq khe daoq

19Bhilgillav khi Aqgullav bhai maqkhaiq, Aoqneiqsiqphaol nail phaqyaq mayaq bhai maqkhaiq, ngal noeq moel naol geiq dai, cavq bhiq ail dei-eiq. 20Eillaqdul neq, Gaolliqthu meenq bhai jaol-ail ceevq-a nail ngaol. Daqlolbheiq neq, nal nail ngel-i mail, Meiqleiqdul meenq bhai bhi jaol-ail ceevq-a nail ngaol. 21Aqcoevq coevq nail yanq maq kev lal-u phao nee mail, naol ngal jaol nail bha lal kivq dai, laijai yaoq. Ulbhullul, Phuldeiq, Lilnul, Gaqlaoldil khi aqivq jaqbheq Khali yaq iqsanl mail, naoq bhai noeq moel naol dai, daoq cavq cavq bhoel-ai leevq-a nail ngaol.

22Heeqphaq Yeiqsul naoq nail neema lavqkhoel bhai bhi jaol dei-eiq. Geeqlaoq eeljaol iqsanl, naoq nail kovtavq bhai bhi jiav dei-eiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index