Search form

Gaqkhoel 13

1Aqdil-aoq Khali yaq munl lavqkhoel, Miqyail nail haqbhoil gedan nail juq khi mail, cavq bhiq cov bhiq nail juq jaol nail ngaol. Tsaol-aq al juq neq, Bhaqnaqbhal, Nilgaq dai khul nail Silmiqoq, Khulleiqniq milkhaoq bhai jaol nail Lulgil, heeqphaq Heiqlol Aqgilpav nee mail teevq gaq khe-ai eeq lal-a nail Maqneiq khi mail Saolluv niil juq ngaol. 2Aqyu juq Heeqphaq Miqyail bhai uqhuq thaoq thaoq-ail, maq jaq nail aol nl thailthaiq-u phao, Meeqnail Haolnail Aqhaqlal ge nail: “Ngal bhi nl nail khe-ai, Bhaqnaqbhal khi mail Saolluv nl dai, aqyu nvq gaq bhai ngaq nail haqbhoil bhi jaol yaoq” dai, ge bhiq-a nail ngaol. 3A bhai nee ngal-aq, aqyu juq maq jaq nail aol gaoq nl khi geeqlaoq hal-a nail ngaol. Hal gaq-al ngal-aq, aqyu nvq gaq nail kovtavq bhai aqlavq bavq dav khi khoel gai-aivq-a nail ngaol.

Bhaqnaqbhal khi Saolluv Gulbhaqlul nail eeljaol laol-n bhai Miqyail daoq cavq ail-a nail ganl

4Alheel ngel-i mail, Meeqnail Haolnail Aqhaqlal Bhaqnaqbhal khi Saolluv bhai bhi ail-a nail khe-ai, Seiqlulgil meenq bhai ail khi, Gulbhaqlul eeljaol laol-n bhai laovq jeeq khi ail-a nail ngaol. 5Aqyu nvq gaq Saqlaqmil meenq bhai ail kev-u phao, Yuldav nail tsaol-aq nail uqhuq thaoq nail ilkhaol juq nail lavqkhoel, Miqyail nail daoq cavq bhiq-a nail ngaol. Yaolhaq Maqkul iqsanl aqyu nvq gaq bhai tsaojao-ai bhiq-a nail ngaol.

6Aqyu juq milkhaoq al khaoq bhai doi doi dai ail khi, Bhaqphul meenq bhai ail kev-u phao, Bhaqyeiqsul dai mil-ai thaq nail Yuldav nail tsaol-aq teevq gaq bhai thaoqphuq-a nail ngaol. Aivq neq, maolovq lovq nia nail ngaol. Miqyail nail haqbhoil gedan nail ngaol dai, ge khi ngaol-aoq, maldil maq ngel nail teevq gaq ngaol. 7Tsaol-aq al gaq, Seiqlavqgil Paovluvq dai mil-ai thaq nail, Gulbhaqlul eeljaol laol-n khe heeqphaq nee mail jaol nail ngaol. Heeqphaq al gaq neq, neenoeq neekha aol khi, Miqyail nail daoq gaiq movq nail ngel-i mail, Bhaqnaqbhal khi mail Saolluv bhai khul-a nail ngaol. 8Thailhai ngaol-aoq, heeqphaq al gaq Khali bhai neema maq ya thaq tsaol lal dai, Eillulma al gaq Bhaqnaqbhal khi mail Saolluv bhai lav tsoiq nail ngaol. (Eillulma dai ge nail neq, maolovq lovq nia nail gaq dai, ge nail ngaol.) 9Aq-u phao, Paolluv dai mil-ai thaq nail Saolluv al gaq, Meeqnail Haolnail Aqhaqlal teevq bhee jaol khi, maolovq lovq nia nail al gaq bhai heldaiq cov-ai thaq khi, ge bhiq-a nail: 10“Neivq heeqphaq nail yaq-ol, naol neq, goiqbhaoq bhaoq nail khi mail haqeiv nail phaq teevq bhee aol nail niil. Tsaq nail daol nail phaq iqsanl bhai lav cov movq deedee nail gaq iqsanl ngel-ail nial. Miqyail nail gailkhaol aqdaol juq bhai lav govq nail dai khi, naol maq naq lai dai, nl nail laiq. 11Niil aq-il, Miqyail nail aqlavq naoq nail kovtavq bhai kev lee naol. Naol maivpeivq peivq-ail khi teevq yanq teevq lao nlma bhai maq ya moel-ail” dai, ge bhiq-a nail ngaol. Aq-u phao, teevq pov taivq-ail jaoqthuq khe-ai dul nail navtsee deel phaq maolovq lovq nia nail al gaq nail maivneev bhai thaoq tsoiq lee bhiq khi, aivq jaoq laol jaoq laol dai tsao tsao-ail, aivq nail aqlavq bhai nieivq thaiq khi bhi hevq daiq nail gaq bhai halpov-a nail ngaol. 12Alhai pevq lal-a nail bhai heeqphaq al gaq ya moel-u phao, aivq Yeiqsul bhai neema thaqtsaol lal-a nail ngaol. Khul khi mail dai ngal-aq neq, Miqyail nail ganl cavq bhiq cov bhiq-a nail bhai, aivq noeq-u maq dov dai, pevq ail-a nail ngaol.

Bhilsildil milkhaoq bhai jiav nail Aqdil-aoq meenq bhai jaol-u phao khe ganl

13Paolluv khi mail aivq nail aqtsaoq juq neq, Bhaqphul meenq nee mail Paqbhullil milkhaoq bhai jiav nail Bheiqlaqgeiq meenq bhai laovq jeel-aivq-a nail ngaol. A bhai nee ngal-aq, Yaolhaq Maqkul aqyu nvq gaq nee mail pav-ail khi, Yeiqlulsaqlaiq meenq bha kovq lai-a nail ngaol. 14Aq-u phao, aqyu nvq gaq Bheiqlaqgeiq meenq nee mail Bhilsildil milkhaoq bhai jiav nail Aqdil-aoq meenq bhai lai kev-a nail ngaol. A bhai jaol n n-gaol kev lal-u phao, aqyu nvq gaq uqhuq thaoq nail ilkhaol bhai dav lai khi, jaoldeel lai-a nail ngaol. 15Aoldaoq kovqdaoq khi mail Miqyail nail haqbhoil gedan nail juq nail haoqgavq bhai yu ge gaq-u phao, uqhuq thaoq nail ilkhaol khe aqivq juq, aqyu nvq gaq jaol nail bha khoel gai-aivq khi, “Aqivq jaqbheq-ol, tsaol-aq niil juq bhai gaq bivq movq haq neq, bivq yaoq” dai, ge bhiq-a nail ngaol.

16Aq-u phao, Paolluv thul lal khi, aqlavq wanq khi ge bhiq-a nail: “Ilsaqleiqlal nail tsaol-aq khi mail Miqyail bhai ev nail yu nail jeq-e juq-ol, naldaiq yaoq. 17Ilsaqleiqlal nail jeq-e jaq-a nail Miqyail neq, ngadao nail aqphiq aqbhal bhai tsel dov khi, aqyu juq Iljiltuv milkhaoq bhai jaol-u phao, aqyu juq bhai thaqeeq thaqheel bhiq-a nail ngaol. A bhai nee ngal-aq, aivq nail bhaqaoq eeq deedee nail lavqkhoel nee aqyu juq bhai hevq dol leevq-a nail ngaol. 18Haqaiq mildai haqtsoiq haqyal bhai liq tsel kovq bhee dai, aqyu juq nl nail hal nail juq bhai Miqyail ol-a nail ngaol. 19Khaqnaq milkhaoq bhai jaol nail jeq-e sivq jeq-e bhai Miqyail lav luq lav seil khi, tsaol-aq al juq nail milkhaoq Ilsaqleiqlal nail tsaol-aq bhai bhoil bhiq-a nail ngaol. 20Alhai pevq lal-u phao kev dai, liq yal ngaq tsel kovq ma lai-a nail ngaol. A bhai nee ngal-aq, Miqyail nail haqbhoil gedan nail Saqmeqlal nail yeel bhai kev dai, Miqyail yalkhaq dal nail juq bhai khoel khi bhi uvthaiq-a nail ngaol. 21Aq-u phao, aqyu juq heeqphaq hal-a nail ngaol. Aqyu juq hal-a nail khe-ai, Bheiqyaqmiq nail jeq-e jaq-a Gilsav nail yaqyov Saolluv aqyu juq bhai bhi uvthaiq-a nail ngaol. Aivq liq tsel kovq bhee dai uvthaiq-a nail ngaol. 22A bhai nee ngal-aq, Miqyail Saolluv bhai oil ha khi, Daqbhil bhai heeqphaq bhi jiovq-a nail ngaol. Miqyail Daqbhil nail ganl niailhai salkhil khanq-ai thaq nail ngaol: ‘Ngal neema tsaq nail tsaol-aq, Yeiqsail nail yaqyov Daqbhil bhai, ngal moel-aoq nail ngaol. Aivq neq, ngaq nail neenoeq teevq bhee nl naol.’

23Miqyail-i mail saljial jaq-ai thaq nail khe-ai, Daqbhil nail jeq-e jaq-a lavqkhoel Ilsaqleiqlal nail tsaol-aq nail haqbhoil Hevqkovq nail gaq bhi dov lee-a nail ngaol. Aivq neq, Yeiqsul ngaol. 24Yeiqsul maq dov lee-u nee, tsaol-aq iqsanl mail, oeqbal noeq pov khi, ulcuvq saol nail haqbhoil, Yaolhaq Ilsaqleiqlal nail tsaol-aq bhai cavq bhiq-a nail ngaol. 25Aivq nail ganl nl gil nail kev lal-u phao, Yaolhaq ge nail: ‘Ngal khaq sil gaq ngel-ail dai, nuljuq noeq nail. Ngal neq, al gaq maq ngel. Tsaol-aq al gaq, ngaq nail haoqnao lee thailthaiq nail ngaol. Ngal neq, aivq nail saiqnaov neeqtsaq bhai pheel nail iqsanl maq geel-nvq-ail’ dai, ge bhiq-a nail ngaol.

26Aqbhaqlaqhaq nail jeq-e jaq-a khi mail nuljuq nail lavqkhoel Miqyail bhai uqhuq thaoq nail yu nail jeq-e juq-ol, Hevqkovq nail gaq niil neq, ngadao juq nail haqbhoil ngaol. 27Thailhai ngaol-aoq, Yeiqlulsaqlaiq meenq bha jaol nail tsaol-aq khi mail aqyu juq nail aqivq aqtsu juq neq, aivq bhai maq heeq nia-ail. Jaol n yaoq jao yaoq-ao nee ge nail, Miqyail nail haqbhoil gedan nail juq-i mail gevq-ai thaq nail haoqgavq bhai iqsanl maq heeq nia-ail. Alheel ngel-i mail, Yeiqsul bhai yalkhaq dal nail lavqkhoel gevq-ai thaq nail daoq al juq nl bhee-a nail ngaol. 28Aqyu juq Yeiqsul nail lavqkhoel sil heeq phaq-ail tsaq nail oeqbal maq moel khi ngaol-aoq, aivq bhai bhi tavq heivq lavq yaoq dai, heeqphaq Phillav bhai hal-a nail ngaol. 29Yeiqsul nail ganl khal gevq-ai thaq nail khe-ai aqyu juq nl bhee gil-a nail ngaol. A bhai nee ngal-aq, aivq bhai lavqyavq kovtavq nee bavq kha khi, luqdaol lavqkhoel bhai bavq pheeq ail-a nail ngaol. 30Thailhai ngaol-aoq, Miqyail aivq bhai sil nail lavqkhoel nee, gaoq bhi doevq kovq lal-a nail ngaol. 31Gaqliqlail milkhaoq nee mail Yeiqlulsaqlaiq meenq bha kev dai, aivq nee mail tsao thaq nail juq bhai, aivq nail aqmaol mee nia n bhi moel-a nail ngaol. Tsaol-aq al juq neq, niil aq-il Ilsaqleiqlal nail tsaol-aq nail sivtavq bhai salkhil khanq thailthaiq nail juq ngaol.

32-33Lavqkhiq tsail nail geeqlaoq daoq niil nuljuq jaol nail bha, nv-nvq gaq cavq gaiq lal-a nail ngaol. Ngadao nail aqphiq aqbhal juq bhai Miqyail-i mail saljial jaq-ai thaq nail phaq, Yeiqsul bhai gaoq bhi doevq kovq lal-a nail lavqkhoel, aqyu juq nail yaq pevq nail ngadao juq nail yeel bhai bhee lal-a nail ngaol. Pevq lal-a nail ganl al, Tsiqeeq nail Haoqgavq lavqkhoel bhai niailhai gevq-ai thaq nail ngaol:

‘Naol neq,

ngaq nail Yaqyov ngaol.

Yanqgaol ngal

naoq nail Aqbhu

pevq lal-aoq

nail ngaol’ dai,

gevq-ai thaq nail ngaol.

34Al ovqtavq, luqdaol lavqkhoel bhai, maq ya buvq-ail dai, sil gaq-a nail aivq bhai gaoq bhi doevq kovq lal-a nail ganl, Miqyail-i mail ge-ai thaq nail, niailhai jiav nail ngaol:

‘Daqbhil bhai

bivq naol dai,

ngaq-i mail saljial

jaq-ai thaq nail

meeq nail haol nail

ivqdao deel geeqlaoq,

ngal nuljuq bhai

bivq naol’ dai,

ge nail ngaol.

35Tsiqeeq nail Haoqgavq yaoq dao yaoq bhai:

‘Naoq nail

Meeqnail Haolnail

Gaq bhai

luqdaol bhai

maq bhi buvq-ail’ dai,

ge-ai thaq nail jiav nail ngaol.

36Daqbhil neq, aivq nail teevq yeel Miqyail nail neekhaol sil dai, nl khi aivq sil-u phao, aivq nail aqphiq aqbhal juq nee mail bavq pheeq khi, aivq nail aqmaol luqdaol lavqkhoel bhai buvq ail-a nail ngaol. 37Thailhai ngaol-aoq, sil gaq-a nail bhai Miqyail-i mail gaoq bhi doevq kovq lal-a nail al gaq neq, alhai maq dul-ail.

38Alheel ngel-i mail, aqivq jaqbheq juq-ol, nuljuq niilniai aqmeeq-ai heeq kivq duq thaq-ai yaoq. Yeiqsul bhaqda nee oeqbal phaiq nia nail ganl nuljuq bhai cavq lavq bhel. 39Aivq bhai neema khal thaqtsaol nail tsaol-aq yaoq gaq yaoq-ao nee mail, Molseiq-i mail bivq-a nail Aoldaoq Kovqdaoq nee maq bhi jel-ail nia nail oeqbal yaoq phaq yaoq-ao nee bhai, ya jel-ail khi tsaq nail daol nail tsaol-aq pevq lal nail ngaol. 40Alheel ngel-i mail, Miqyail nail haqbhoil gedan nail juq-i mail ge-ai thaq nail al, nuljuq nail kovtavq bhai maq bhi kev lee dai, yaolphaol yaoq.

41Miqyail nail haqbhoil gedan nail juq niailhai ge nail ngaol:

‘Khal ge movq-ail

ge nail tsaol-aq juq-ol,

heldaiq.

Noeq-u maq dol dai,

pevq-ail khi,

peivq-ail boev-ail yaoq.

Khul khi mail dai

ngal-aq neq,

nuljuq nail aqn

aqyanq lavqkhoel

ngal teevq phaq nl naol.

Ganl niil

teevq gaq ganav

nuljuq bhai ge bhiq

khi ngaol-aoq,

nuljuq neema

maq thaqtsaol-ail’ dai,

ge-ai thaq nail ngaol.”

42Bhaqnaqbhal khi mail Paolluv uqhuq thaoq nail ilkhaol nee dov ail-u phao, “Ganl niil yaqhao khe jaol n n-gaol iqsanl cavq lavq cov lavq yaoq” dai, tsaol-aq al juq aqyu nvq gaq bhai hal-a nail ngaol. 43Aqyu juq uqhuq thaoq nail ilkhaol nee kovq ail-u phao, Yuldav nail tsaol-aq khi mail Miqyail bhai uqhuq thaoq khi Yuldav nail aol thaoq nail yu nail jeq-e maodai, Paolluv khi mail Bhaqnaqbhal nail haoqnao tsaothel-aivq-a nail ngaol. “Miqyail nail geeqlaoq eeljaol lavqkhoel bhai ivqdao dai doevq yaoq” dai, aqyu nvq gaq aqyu juq bhai cavq bhiq cov bhiq khi, gaq bivq-a nail ngaol.

44Jaol n yaoq jao yaoq gaoq kev lal-u phao, meenq bhai jaol nail tsaol-aq jemao, Miqyail nail daoq naldaiq nail dai khi, jil lal-a nail ngaol. 45Yuldav tsaol-aq nail aqivq aqtsu juq neq, tsaol-aq munl munl ma bhai ya moel-u phao, neema phail lal bhiq-a nail ngaol. Alheel ngel-i mail, aqyu juq Paolluv ge nail bhai jil jil-ail, Paolluv bhai khal ge movq-ail ge bhiq-a nail ngaol.

46Paolluv khi mail Bhaqnaqbhal maq geesil dai, ge nail: “Miqyail nail daoq nuljuq bhai iqmoeq ya cavq bhiq nail ngaol. Thailhai ngaol-aoq, nuljuq Miqyail nail daoq bhai khaonq-ail ceevq khi, nqmaq maqluv halyeel doevq nail phaq ya nail neq, nvjuq maq geel-nvq ail dai, nuljuq noeq nail ngel-i mail, nv-nvq gaq yu nail jeq-e jaq-a bhai cavq ail naol. 47Khul khi mail dai ngal-aq neq,

‘Nqjail miljail

bhai kev dai

jaol nail juq,

naol bhaqda nee

hevqkovq nail

phaq ya dai,

yu nail jeq-e

jaq-a nail haqbhoil

aqbhaq bhi

bhaq nail dai khi,

ngal naoq bhai bhi

jaol-a nail ngaol’ dai,

Miqyail nv-nvq gaq bhai daoq niailhai bivq lavq-a nail ngaol” dai, Paolluv aqyu juq bhai ge bhiq-a nail ngaol.

48Yu nail jeq-e jaq-a juq daoq al daoq ya gaiq-u phao, lavqkhiq teevq tsail Miqyail nail daoq bhai tsiqeeq-a nail ngaol. Nqmaq maqluv halyeel doevq nail phaq ya dai, tsel dov-ai thaq nail juq neq, Yeiqsul bhai neema thaqtsaol lal-a nail ngaol.

49Alheel ngel-i mail, Miqyail nail daoq milkhaoq khaoq lao gaiq doi ail-a nail ngaol. 50Thailhai ngaol-aoq, Miqyail bhai uqhuq thaoq nail eeq nail heel nail yaqmai-aq juq khi mail, meenq al meenq bhai jaol nail aqivq jiovq nail juq bhai, Yuldav nail tsaol-aq aqivq aqtsu juq-i mail Paolluv khi Bhaqnaqbhal bhai, yu neema phail lal dai, nl-a nail ngaol. A bhai nee ngal-aq, aqyu nvq gaq bhai bhi khoeq khi, milkhaoq al khaoq nee mail the dov-a nail ngaol. 51Aqyu nvq gaq tsaol-aq al juq nail sivtavq bhai salkhil bhi pevq nail dai khi, aqkhil pavq-uvq khe khaqlail naoq khal-ail ceevq khi, Ilgaolnil meenq bhai lai-a nail ngaol. 52Thailhai ngaol-aoq, Aqdil-aoq meenq bhai jaol nail yaqlaol juq neq, lavqkhiq tsail nail phaq khi mail Meeqnail Haolnail Aqhaqlal teevq bhee aol nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index