Search form

Gaqkhoel 14

Paolluv khi mail Bhaqnaqbhal Ilgaolnil meenq bhai jaol-u phao khe ganl

1Aqyu nvq gaq Ilgaolnil meenq bhai lai kev-u phao, a bhai iqsanl, Yuldav nail tsaol-aq nail uqhuq thaoq nail ilkhaol bhai aol lai-a nail ngaol. A bhai aqyu nvq gaq aqmeeq-ai cavq bhiq cov bhiq-a nail ngel-i mail, Yuldav nail tsaol-aq khi mail Heiqlaqsal tsaol-aq maodai, Yeiqsul bhai neema thaqtsaol lal-a nail ngaol. 2Thailhai ngaol-aoq, neema maq thaqtsaol nail Yuldav nail tsaol-aq juq neq, yu nail jeq-e jaq-a bhai neema lav phail bhiq khi, neema thaqtsaol nail juq bhai neejiav jiav lal dai, nl-a nail ngaol. 3Aqyu nvq gaq a bhai tsaq dai jaol khi, Miqyail nail ganl maq geesil dai, cavq bhiq cov bhiq-a nail ngaol. Miqyail-i mail aqyu nvq gaq bhai bhi heeq bhi moel nail phaq khi mail noeq-u maq dov nail mee nia phaq nl nia nail bhaqaoq bivq-a nail lavqkhoel nee, aivq nail geeqlaoq eeljaol nail ganl cavq bhiq cov bhiq-a nail ganl al tsaq nail phaq pevq nail ngaol dai, Miqyail salkhil bhi dov lal-a nail ngaol. 4Meenq al meenq bhai jaol nail tsaol-aq juq nvq munl pevq ail-a nail ngaol. Teevq pav ganav juq neq, Yuldav nail tsaol-aq jaol nail phao phaoq khi, teevq pav ganav juq neq, gaqkhoel al nvq gaq jaol nail phao phaoq nail ngaol. 5-6A bhai nee ngal-aq, yu nail jeq-e jaq-a, teevq pav ganav juq khi mail Yuldav nail tsaol-aq teevq pav ganav juq neq, aqyu juq nail aqivq aqtsu juq nee mail jil lai khi, gaqkhoel al nvq gaq bhai khal nl movq-ail nl khi, lovmav-i mail liv nail dai khi bhai, aqyu nvq gaq heeq nia-a nail ngaol. Aq-u phao, Lulgaolnil milkhaoq bhai jiav nail Luldaqlal meenq, Deiqbheiq meenq khi mail, aqjail bhai jiav nail milkhaoq juq bhai tsaol-aivq-a nail ngaol. 7Aqyu nvq gaq milkhaoq al nail lavqkhoel bhai iqsanl, lavqkhiq tsail nail geeqlaoq daoq cavq bhiq-a nail ngaol.

Luldaqlal meenq bhai jaol-u phao, yu Paolluv bhai lovmav-i mail liv-a nail ganl

8Luldaqlal meenq bhai aqkhil khil khoi khoi nail teevq gaq jaoldeel-nvq thaq nail ngaol. Aivq neq, doevq lee-u nee mail khil khoi khoi nail ngel-i mail, teevq pov iqsanl gailkhaol maq tsao daiq thaq-al. 9Paolluv cavq nail cov nail bhai aivq naldaiq thailthaiq nail ngaol. Paolluv aivq bhai aqmeeq-ai heldaiq khi, aivq meeq lai dai neema thaqtsaol nail neema aol nail bhai, heeq nia-a nail ngaol. 10Aq-u phao, “Thul yaoq. Daolcoev dai thulphaol yaoq” dai, aqkav kav dai, ge bhiq-a nail ngaol. A bhai nee ngal-aq, aivq tsaoq thul khi, gailkhaol tsao-a nail ngaol.

11Paolluv alhai nl nail bhai tsaol-aq munl munl ma juq ya moel-u phao, aqyu juq Lulgaolnil nail daoq ge ge-ail: “miqyail juq neq, tsaol-aq khe-ai pevq lee khi, ngadao juq jaol nail bha yavq kha lee thaq nail niil” dai, aqyu juq mailma-ail ge nail ngaol. 12Aqyu juq Bhaqnaqbhal bhai Julsav dai mil bhiq-a nail ngaol. Paolluv neq, daoq ge jaiq nail ngel-i mail, aivq bhai Heiqmeiq dai mil bhiq-a nail ngaol. 13Meenq meenq jail bhai Julsav nail uqhuq thaoq nail ilkhaol teevq il jiav nail ngaol. Uqhuq thaoq nail ilkhaol al il bhai jaol nail Philma teevq gaq niaoqnel juq tseel khi, aqeiv dalkhaol oil lavq khi, meenq nail laolkhoiq bhai lal-a nail ngaol. Aivq tsaol-aq munl munl ma nee mail aqyu nvq gaq bhai danq bhiq laol bhiq nail khi mail ngaol.

14Tsaol-aq al juq alhai nl nail ganl bhai, Bhaqnaqbhal khi mail Paolluv aqyu nvq gaq ya gaiq-u phao, aqyu nvq gaq-i mail doi-nq thaq nail phailkhaoq he pav khi, niailhai gul gul-ail tsaol-aq munl munl ma nail gaiqlaq bhai tsaoq bhoel laivq-a nail ngaol: 15“Nuljuq khul khi mail thailhai nl nail-aiq. Nv-nvq gaq iqsanl nuljuq khe-ai, tsaol-aq yaq ngaol. Ganl maq tsoiq nail niil juq bhai nuljuq khaonq ha khi, nqtavq, miltsaq, iqyaq iqma khi a bhai khal jaol khal jiav nail yaoq phaq yaoq-ao nee bhai, teivq-a nail gaq pevq nail doevq nail Miqyail jaol nail phao bhi kovq lal nail dai khi, nv-nvq gaq niilniai lavqkhiq tsail nail geeqlaoq daoq cavq lal-a nail ngaol. 16Jel lal-a nail yanq lavqkhoel, jeq-e jaq-a iqsanl bhai yovqgavq nail neenoeq taivq-ail nl dai, Miqyail bhi doevq-a nail ngaol. 17Thailhai ngaol-aoq, jel lal-a nail yanq lavqkhoel, aivq meeq nail jaq nail ngaol dai, nuljuq heeq nia lal dai, Miqyail aivq nail ganl salkhil bhi jiav-a nail ngaol. Khul phaq dai ge haq neq, aivq maoq-aol bhi aol lee khi, aqheeq allu bhi heeq lee-a nail nee ovqtavq, jaqjaq daoldaol teevq bov bhi jaq lavq khi, neekhaol sil-u kev dai, bivq lavq-a nail ngaol” dai, aqyu nvq gaq mailma-ail ge bhiq-a nail ngaol. 18Aqyu nvq gaq a dai ge kev khi, aqyu juq-i mail aqyu nvq gaq bhai maq bhi laol nail haqbhoil maq gavq maq nav-ail ge gaq-a nail ngaol.

19Aq-u phao, Bhilsildil milkhaoq bhai jiav nail Aqdil-aoq meenq khi mail Ilgaolnil meenq bhai jaol nail Yuldav nail tsaol-aq teevq pav ganav juq lal khi, tsaol-aq munl munl ma bhai aqyu juq jaol nail phao, jalmul mul ya khi, aqyu juq teevq gaq khe-ai, Paolluv bhai lovmav-i mail liv-a nail ngaol. Aivq sil-aoq thaq nail niil dai, noeq khi aqyu juq aivq bhai meenq lavqniil phao he ha ail-a nail ngaol. 20Thailhai ngaol-aoq, yaqlaol juq aivq ga nail teevq jaoq thulphaol-nvq thaq-u phao, aivq thul khi, meenq bhai aol lai-a nail ngaol. Yaoq n yaoq Bhaqnaqbhal aqyu nvq gaq, Deiqbheiq meenq bhai ail-a nail ngaol.

Aqdil-aoq meenq bhai kovq lal-a nail ganl

21Deiqbheiq meenq bhai jaol nail tsaol-aq juq bhai lavqkhiq tsail nail geeqlaoq daoq cavq bhiq khi, tsaol-aq maodai yaqlaol bhi pevq lal-a nail ngaol. A bhai nee ngal-aq, aqyu nvq gaq Luldaqlal meenq, Ilgaolnil meenq khi mail Aqdil-aoq meenq bhai kovq lai-a nail ngaol. 22“Neema thaqtsaol nail lavqkhoel nee neema ivqdao dai jaol yaoq” dai, meenq al meenq bhai jaol nail yaqlaol juq bhai gaq bivq-a nail ngaol. “Miqyail Milkhaoq lavqkhoel bhai, ngadao aol lai kivq dai, haq nail aoq nail mee nia phaq bhai ya lai pav naol” dai, aqyu juq bhai cavq bhiq cov bhiq-a nail ngaol. 23Aqyu juq Khali yaq munl yaoq munl yaoq-ao nee nail haqbhoil aqivq jiovq nail juq bhai tsel dov-a nail ngaol. Aq-u phao, aqyu juq maq jaq nail aol nl nl-ail geeqlaoq hal-a nail lavqkhoel nee aqyu juq neema thaqtsaol nail Miqyail nail aqlavq lavqkhoel bhai av bhiq-a nail ngaol. 24A bhai nee ngal-aq, aqyu nvq gaq Bhilsildil milkhaoq bhai ail pav khi Paqbhullil milkhaoq bhai ail kev-a nail ngaol. 25Aqyu nvq gaq Bheiqlaqgeiq meenq bhai geeqlaoq daoq cavq bhiq khi, Aqdaqlil meenq bhai ail-a nail ngaol.

26A bhai nee laovq jeeq khi, Aqdil-aoq meenq bhai kovq lai-a nail ngaol. Meenq al meenq nail lavqkhoel, aqyu nvq gaq Miqyail nail ganl nl nail haqbhoil, geeqlaoq eeljaol bivq nail Miqyail nail aqlavq lavqkhoel, yu aqyu nvq gaq bhai av bhiq-ai thaq nail ngaol. Niil aq-il aqyu nvq gaq ganl al bhai nl bhee-a nail ngaol. 27Aqyu nvq gaq kovq kev lai khi, Khali yaq munl juq bhai khul jil-a nail ngaol. Miqyail aqyu nvq gaq bhai juq juq-ail, khal nl khal hal-a nail ganl maqkhaiq, yu nail jeq-e jaq-a Yeiqsul bhai neema thaqtsaol lal dai, Miqyail gailkhaol lav daol lavq-a nail ganl maqkhaiq, aqyu juq bhai ge bhiq-a nail ngaol. 28Aqyu nvq gaq a bhai yaqlaol juq nee mail tsaq dai jaol-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index