Search form

Gaqkhoel 4

Yuldav tsaol-aq nail aqivq aqtsu juq Bheiqtuvluv khi mail Yaolhaq bhai yalkhaq dal-a nail ganl

1Bheiqtuvluv khi mail Yaolhaq aqyu nvq gaq, tsaol-aq al juq bhai cavq bhiq cov bhiq thailthaiq-u phao, Philma juq, uqhuq thaoq nail ilkhaol il ma bhai lovqphail nail juq nail kovtavq bhai uvthaiq nail eeq nail heel nail gaq khi mail, Saqduqgail juq lee-a nail ngaol. 2Aqyu nvq gaq tsaol-aq al juq bhai cavq bhiq cov bhiq thailthaiq nail bhai maqkhaiq, Yeiqsul sil thaq nail tsaol-aq bhai gaoq bhi doevq kovq lal nia nail ganl cavq bhiq thailthaiq nail bhai maqkhaiq, lee kev-a nail tsaol-aq al juq ya gaiq-a nail ngel-i mail, neema phail nail ngaol. 3Alheel ngel-i mail, aqyu nvq gaq bhai nieivq khi, niaohao n-gaol kev dai, thaonq bhai laol-a nail ngaol. Khul khi mail dai ngal-aq neq, aq-u n-gaol neq, nqkivq kivq lee-aiq nail ngaol. 4Aqyu nvq gaq-i mail cavq bhiq cov bhiq-a nail daoq bhai ya gaiq-a nail tsaol-aq maodai gaq, Yeiqsul bhai neema thaqtsaol lal-a nail ngaol. Aqyu juq neq, yaqyov-aq taivq-ail ngaq hinl gaq bhee nail ngaol.

5Yaoq n yaoq, uvthaiq nail yovkav juq, aqivq aqtsu juq khi mail, aoldaoq kovqdaoq cavq nail cov nail juq, Yeiqlulsaqlaiq meenq bha jil lai-a nail ngaol. 6Philma Aqnaq, Gaqyaqphal, Yaolhaq, Aqleiqsaqdul khi mail, Philma nail jeq-e jaq-a iqsanl mail jil lal-a nail ngaol. 7Aqyu juq gaqkhoel al nvq gaq bhai aqyu juq nail gaoltsi bhai hevq thaq khi, “Nul-nq nvq gaq, khaq sil gaq nail bhaqaoq, khaq sil gaq nail aqmil bhai juq juq-ail, thailhai nl nail-aiq” dai, naldaiq-a nail ngaol.

8Aq-u phao, Bheiqtuvluv nail lavqkhoel Meeqnail Haolnail Aqhaqlal teevq bhee jaol khi, aqyu juq bhai ge bhiq-a nail: “Jeq-e jaq-a nail kovtavq bhai uvthaiq nail yovkav juq khi aqivq aqtsu juq-ol. 9Aqkhil maq meeq nail niil gaq bhai nl bhiq-a nail meeq nail ganl khi mail, aivq khalhai khi meeq lai-a nail ganl, nv-nvq gaq bhai naldaiq nail dai ngal-aq neq, 10nuljuq iqsanl khi mail Ilsaqleiqlal nail tsaol-aq iqsanl mail, niilniai aqmeeq-ai heeq kivq thaq-ai yaoq. Nuljuq-i mail lavqyavq kovtavq bhai tavq heivq khi, Miqyail-i mail gaoq bhi doevq kovq lal-a nail, Naqsaqlail meenq yaq Yeiqsul Khali nail aqmil bhaqda nee, tsaol-aq thoil gaq meeq lai khi, nuljuq nail sivtavq bhai thulphaol-nvq thaq nail ngaol. 11Yeiqsul neq, nuljuq ilkhaol cov nail tsaol-aq-i mail bavq ha-a nail lovmav al heeq pevq khi ngaol-aoq, jioivqloiv daoqthaoq bhai kaovq nail lovmav heeq ma pevq lal-a nail ngaol.

12Aivq maq ngel haq neq, yaoq gaq yaoq teevq gaq gail, maq hevqkovq nia-ail. Khul khi mail dai ngal-aq neq, ngadao hevqkovq nail phaq ya dai, aivq nail aqmil maq ngel haq neq, tsaol-aq bhai bivq-ai thaq nail aqmil yaoq mil yaoq maq jiav-ail” dai, Bheiqtuvluv ge bhiq-a nail ngaol.

13Bheiqtuvluv khi mail Yaolhaq geesil nail neema maq aol nail bhai, aqyu juq ya moel-a nail ngel-i mail, noeq-u maq dov dai, pevq ail-a nail ngaol. Khul khi mail dai ngal-aq neq, aqyu nvq gaq haoqgavq maodai maq saol daiq thaq nail nl jaq keivq daol nail tsaol-aq ngaol. Aqyu nvq gaq Yeiqsul nee mail jaol daiq-a nail ngaol dai iqsanl, aqyu juq heeq nia nail ngaol. 14Al ovqtavq, aqkhil meeq lai-a nail al gaq, aqyu nvq gaq nee mail thulphaol-nvq thaq nail bhai, aqyu juq ya moel-a nail ngel-i mail, khul teevq phaq iqsanl, maq ge nia-ail. 15Aq-u phao, aqyu nvq gaq bhai maoqbhaoq nl nail aqduq nee mail bhi dov ail-a nail ngaol. A bhai nee ngal-aq, aqyu juq taivq-ail ge tsaoq pheeljaq-a nail ngaol. 16Aqyu juq ge nail: “Ngadao juq tsaol-aq niil nvq gaq bhai khalhai khi bhiq heeq. Khul khi mail dai ngal-aq neq, aqyu nvq gaq bhi heeq bhi moel nail niil phaq nl nail bhai, Yeiqlulsaqlaiq meenq bha jaol nail tsaol-aq juq iqsanl mail ya heeq ya moel-a nail ngel-i mail, ngadao juq khul teevq phaq iqsanl, maq ge kivq-ail. 17Thailhai ngaol-aoq, ganl niil ganl yu bhai maq bhi gaiq-ail dai, ‘Aqmil al mil bhai juq juq-ail teevq gaq bhai iqsanl thaq gaoq cavq bhiq cov bhiq dei-eiq’ dai, aqyu nvq gaq bhai aqkav kav dai ge bhiq naol” dai, ge tsaoq pheeljaq-a nail ngaol.

18A bhai nee ngal-aq, aqyu juq aqyu nvq gaq bhai khul kovq khi, “Yeiqsul nail aqmil bhai juq juq-ail teevq peivq-ail thaq gaoq ge thaq gaoq cavq thaq gaoq cov bhiq dei-eiq” dai, daoq bivq-a nail ngaol. 19Thailhai ngaol-aoq, Bheiqtuvluv khi mail Yaolhaq aqyu juq bhai ge bhiq-a nail: “Miqyail nail daoq naldaiq nail nee maqtsil nuljuq nail daoq naldaiq nail neq, Miqyail nail sivtavq bhai tsaq naol laiq. Nuljuq yovqgavq bhai yovqgavq saol-nvq daiq yaoq. 20Nv-nvq gaq neq, nv-nvq gaq-i mail ya gaiq ya moel-a nail ganl juq maq ge maq thail mail, maq jaol kivq-ail” dai, ge bhiq-a nail ngaol.

21Aqyu juq, aqyu nvq gaq bhai aqkav kav dai, gaoq ge bhiq khi, phaiq bhiq-a nail ngaol. Aqyu nvq gaq bhai khalhai ya khoeq ya jiovq bhiq nail dai, aqyu juq oeqbal maq halpov moel-al. Khul khi mail dai ngal-aq neq, tsaol-aq al gaq meeq lal-a nail ngel-i mail, tsaol-aq iqsanl mail Miqyail bhai tsiqeeq nail ngaol. 22Miqyail-i mail bhi heeq bhi moel nail phaq nl khi, lav meeq bhiq-a nail al gaq, liq tsel kovq jaiq ail-aoq nail ngaol.

Khali yaq juq gaq kav lal dai, geeqlaoq hal nail ganl

23Bheiqtuvluv khi mail Yaolhaq bhai phaiq bhiq-u phao, aqyu nvq gaq neq, aqyu nvq gaq nail aqtsaoq juq jaol nail bha kovq ail-a nail ngaol. Philma juq khi mail aqivq aqtsu juq aqyu nvq gaq bhai khal ge bhiq-a nail iqsanl mail, aqyu juq bhai ge bhiq-a nail ngaol. 24Aqyu juq ya gaiq-u phao, neema teevq heeq taivq-ail tavq khi, Miqyail bhai hal-a nail: “Iqsanl nail kovtavq bhai uvthaiq nail Heeqphaq-ol, naol neq, nq teivq mil teivq teivq-a nail gaq ngaol. Iqyaq iqma bhai iqsanl, teivq-a nail ngaol. Khal jaol khal jiav nail iqsanl mail, naoq-i mail teivq-ai thaq nail ngaol. 25Naol Meeqnail Haolnail Aqhaqlal bhai juq khi, naoq nail yaqkav Daqbhil nail moeqthaoq lavqkhoel nee mail niailhai bhi ge-a nail ngaol:

‘Khul khi mail

yu nail jeq-e juq,

neema phail

deedee nail ngel-aiq.

Khul khi mail

miltsaq tsaol-aq yaq juq

ganl maq tsoiq nail

phaq bhai

saol-nvq nail ngel-aiq.

26Heeqphaq Miqyail

khi mail

aivq-i mail aqtseel

hoeldav-ai thaq nail

Khali bhai

genl dev nail dai khi,

miltsaq nail heeqphaq juq

khi mail

uvthaiq nail juq iqsanl

thul lal khi

bhoi lal jil lal-a nail ngaol.’

27Naoq-i mail aqtseel hoeldav-ai thaq nail naoq nail Meeqnail Haolnail Yaqkav Yeiqsul bhai genl dev nail dai khi, heeqphaq Heiqlol khi mail, heeqphaq Bhoqthil Phillav, yu nail jeq-e juq khi mail Ilsaqleiqlal nail tsaol-aq iqsanl, meenq niil meenq nail lavqkhoel bhai teevq gaq khe-ai, jil lai-a nail ngaol. 28Aqyu juq neq, naoq nail bhaqaoq khi mail naol neema tsaq nail khe-ai pevq lal dai, aq-u nee naoq-i mail noeqceiv-ai thaq nail juq, jil lai khi nl-a nail ngaol. 29Heeqphaq-ol, aqyu juq nvjuq bhai lav cov nail dai khi, lainq-ai thaq nail bhai heldaiq khi, naoq nail yaqkav pevq nail nvjuq bhai naoq nail daoq ge bhiq thail bhiq-u phao, geesil nail neema maq aol dai, tsaojao-ai lavq yaoq. 30Nal nail goel nail bhai lav meeq nia dai, naoq nail aqlavq gaol tsaoq khi, naoq nail Meeqnail Haolnail Yaqkav Yeiqsul nail aqmil bhaqda nee bhi heeq bhi moel nail phaq khi mail noeq-u maq dov nail phaq nl yaoq” dai, aqyu juq geeqlaoq hal-a nail ngaol.

31Aqyu juq geeqlaoq hal gaq-u phao, aqyu juq-i mail jaol nail ilkhaol al il dao lal-a nail ngaol. Aqyu juq iqsanl mail, Meeqnail Haolnail Aqhaqlal bhee lal khi, geesil nail neema maq aol dai, Miqyail nail daoq ge bhiq thail bhiq-a nail ngaol.

Nlmaoq iqsanl mail teevq gaq khe-ai yuq-a nail ganl

32Yeiqsul bhai neema thaqtsaol nail munl mul lao-ail neema teevq heeq taivq-ail tavq khi, neenoeq teevq phaq taivq-ail noeq nail ngaol. Khul gaq maqkhaiq, yovqgavq jiav nail nlmaoq juq, yovqgavq nail ngaol dai maq ge dai, khal jiav nail nlmaoq juq iqsanl mail, teevq gaq khe-ai yuq-a nail ngaol. 33Heeqphaq Yeiqsul gaoq doevq kovq lal-a nail ganl, gaqkhoel juq eeq deedee nail bhaqaoq teevq bhee aol nail lavqkhoel nee salkhil khanq nail ngaol. Aqyu juq iqsanl nail kovtavq bhai Miqyail nail geeqlaoq eeljaol eeq deedee nail ngaol. 34-35Aqyu juq nail lavqkhoel haq nail aoq nail teevq gaq iqsanl maq jaol-ail. Khul khi mail dai ngal-aq neq, miltsaq khi mail ilkhaol khal jiav nail juq, miltsaq khi mail ilkhaol gaoq khi, ya-a nail phul gaqkhoel juq nail sivtavq bhai oil thaq lal-a nail ngaol. Aqyu juq nail munl lavqkhoel jaol nail teevq gaq nee teevq gaq loq nail khe-ai, bhoil bhiq-a nail ngaol.

36Gulbhaqlul eeljaol laol-n bhai doevq lee-a nail Leiqbhil nail jeq-e jaq-a, Yaolsai dai mil-ai thaq nail teevq gaq jaol nail ngaol. Gaqkhoel juq aivq bhai Bhaqnaqbhal dai mil phal bhiq-a nail ngaol. Bhaqnaqbhal dai ge nail neq, gaq bivq nail gaq dai, ge movq nail ngaol. 37Aivq neq, aivq nail miltsaq gaoq khi, ya-a nail phul al gaqkhoel juq nail sivtavq bhai oil thaq lal-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index