Search form

Gaqkhoel 8

1Aivq bhai alhai heivq nail bhai Saolluv iqsanl, neema tsaq nail ngaol.

Saolluv Khali yaq munl bhai khoeq bhiq-a nail ganl

Aq-u n-gaol nee mail, Yeiqlulsaqlaiq meenq bha jaol nail Khali yaq nail munl, khoeq dee jiovq deedee nail bhai ya daq-a nail ngaol. Alheel ngel-i mail, gaqkhoel juq maq ngel nail neq, Khali yaq juq iqsanl mail, gaoq ail gail ail khi, Yuldav milkhaoq khi mail Saqmaqliv milkhaoq doi dai, phaol ail-a nail ngaol. 2Miqyail bhai ev nail tsaol-aq teevq pav ganav juq, Saqteiqphaq bhai duq pheeq-ail khi, nioilkhaoq khaoq-a nail ngaol. 3Thailhai ngaol-aoq, Saolluv neq, Khali yaq nail munl bhai lav peivq lav boev nail dai khi, nl thailthaiq nail ngaol. Aivq teevq il nee teevq il dav lai dav lai-ail, yaqyov-aq bhai maqkhaiq, yaqmai-aq bhai maqkhaiq, nieivq khi thaonq bhai laol-a nail ngaol.

Saqmaqliv milkhaoq bhai geeqlaoq daoq gaiq kev ail-a nail ganl

4Alheel ngel-i mail, gaoq ail gail ail-a nail Khali yaq al juq, doidoi-ai geeqlaoq daoq cavq ail-a nail ngaol. 5Pillilpuv iqsanl, Saqmaqliv nail milkhaoq khe meenq teevq meenq bhai ail khi, aqyu juq bhai Khali nail ganl cavq bhiq-a nail ngaol. 6Tsaol-aq al juq aivq cavq nail bhai ya gaiq khi, aivq-i mail nl-a nail noeq-u maq dov nail phaq bhai ya moel-u phao, neema teevq heeq taivq-ail thaq khi, aivq cavq nail daoq bhai naldaiq-a nail ngaol. 7Khul khi mail dai ngal-aq neq, neivq aol nail tsaol-aq mee nia gaq nail lavqkhoel nee, neivq juq gul gul-ail dov ail-a nail ngaol. Khil sil lavq sil sil nail tsaol-aq khi mail, aqkhil khil khoi khoi nail tsaol-aq mee nia gaq bhai iqsanl, lav meeq bhiq-a nail ngaol. 8Alheel ngel-i mail, meenq al meenq bhai jaol nail tsaol-aq juq lavqkhiq tsail deedee nail ngaol.

9Meenq al meenq nail lavqkhoel bhai Silmoq dai mil-ai thaq nail teevq gaq jaol nail ngaol. Aivq neq, maolovq lovq khi Saqmaqliv tsaol-aq bhai noeq-u maq dov dai, bhi pevq ail-a nail ngaol. “Ngal neq, eeq nail heel nail teevq gaq ngaol” dai, aivq ge nail ngaol. 10Meenq al meenq nail lavqkhoel bhai jaol nail tsaol-aq, eeq yaq nil yaq iqsanl mail ge nail: “Tsaol-aq niil gaq neq, eeq deedee nail bhaqaoq dai khul nail, Miqyail nail bhaqaoq nial” dai, ge ge-ail, aivq nail daoq naldaiq nail ngaol. 11Tsaol-aq al gaq, tsaq dai maolovq lovq daiq bhiq khi, aqyu juq bhai noeq-u maq dov nail phaq nl daiq bhiq-a nail, maoq lal-aoq nail ngel-i mail, aqyu juq aivq nail daoq naldaiq nail ngaol. 12Thailhai ngaol-aoq, Miqyail Milkhaoq nail ganl khi mail Yeiqsul Khali nail aqmil bhai tavq nail, lavqkhiq tsail nail geeqlaoq daoq nail ganl, Pillilpuv cavq nail cov nail bhai, aqyu juq neema thaqtsaol lal khi, yaqyov-aq iqsanl yaqmai-aq iqsanl ulcuvq saol-a nail ngaol. 13Aq-u phao, Silmoq al gaq iqsanl, Yeiqsul bhai neema thaqtsaol lal-a nail ngaol. Aivq ulcuvq saol khi, Pillilpuv nee mail maq gaoq ail dai, jaol-a nail ngaol. Bhi heeq bhi moel nail phaq khi mail, noeq-u maq dov nail phaq nl nail bhai ya moel-u phao, aivq noeq-u maq dov dai, pevq deedee ail-a nail ngaol.

14Saqmaqliv tsaol-aq Miqyail nail daoq hav bhoel nail ganl, Yeiqlulsaqlaiq meenq bha jaol nail gaqkhoel juq ya gaiq-a nail ngaol. Alheel ngel-i mail, aqyu juq Bheiqtuvluv khi mail Yaolhaq bhai, a bhai khoel gai-aivq-a nail ngaol. 15Aqyu nvq gaq a bhai lai kev khi, tsaol-aq al juq Meeqnail Haolnail Aqhaqlal ya dai, aqyu juq nail haqbhoil geeqlaoq hal bhiq-a nail ngaol. 16Khul khi mail dai ngal-aq neq, aqyu juq teevq gaq iqsanl, Meeqnail Haolnail Aqhaqlal maq ya haq-al. Aqyu juq Heeqphaq Yeiqsul nail aqmil kov-uvq nee ulcuvq saol-a teevq-eel ngaol. 17Bheiqtuvluv khi mail Yaolhaq aqyu juq nail kovtavq bhai aqlavq bavq dav bhiq-u phao, aqyu juq Meeqnail Haolnail Aqhaqlal ya-a nail ngaol.

18Gaqkhoel al nvq gaq, yu nail kovtavq bhai aqlavq bavq dav bhiq-a nail ngel-i mail, yu Meeqnail Haolnail Aqhaqlal ya-a nail bhai Silmoq al gaq ya moel-a nail ngaol. Aq-u phao, aivq phul oil lavq khi niailhai ge nail ngaol: 19“Khaq sil gaq nail kovtavq bhai maqkhaiq, ngal aqlavq bavq dav bhiq-u phao, tsaol-aq al gaq Meeqnail Haolnail Aqhaqlal ya dai, bhaqaoq thoil, ngaq bhai iqsanl bivq lavq yaoq” dai, hal nail ngaol.

20Thailhai ngaol-aoq, Bheiqtuvluv aivq bhai ge bhiq-a nail: “Miqyail nail kovpavq bhai phul-i mail ul naol dai, naol noeq nail ngel-i mail, naol naoq nail phul nee mail luq-ail seil-ail yaoq. 21Miqyail nail sivtavq bhai naoq nail neema maq daol nail ngel-i mail, ganl niil ganl naoq-ai nee teevq peivq-ail maq tavq-ail.

22Alheel ngel-i mail, haqeiv deedee nail naoq nail neenoeq thoil noeq, noeq phal yaoq. Alhai noeq nail phaq bhai, oeqbal phaiq lavq dai, Miqyail bhai geeqlaoq hal yaoq. 23Khul khi mail dai ngal-aq neq, neema lavqkhoel khe oil uvq-ai thaq nail maq meeq nail phaq naoq nail lavqkhoel bhai teevq bhee aol khi, oeqbal-i mail naoq bhai pheethaiq-ai thaq nail bhai, ngal ya moel-a naol” dai, ge bhiq-a nail ngaol.

24Aq-u phao, Silmoq ge nail: “Nul-nq nvq gaq-i mail khal ge-a nail niil juq, teevq phaq-ail ngaq nail kovtavq bhai maq ya kev lee dai, ngaq nail haqbhoil Miqyail bhai geeqlaoq hal lavq yaoq” dai, ge bhiq-a nail ngaol.

25Aqyu nvq gaq salkhil khanq khanq-ail, Miqyail nail daoq cavq bhiq cov bhiq gaq khi mail, Yeiqlulsaqlaiq meenq bha kovq ail-a nail ngaol. Kovq ail thailthaiq-u phao, Saqmaqliv nail julgu mee nia gu bhai lavqkhiq tsail nail geeqlaoq daoq cavq bhiq-a nail ngaol.

Pillilpuv khi mail Aildaqyaolphil milkhaoq bhai jaol nail eeq nail heel nail teevq gaq nail ganl

26Aq-u phao, Heeqphaq Miqyail nail nqtavq gaqkhoel teevq gaq Pillilpuv bhai ge bhiq lee-a nail: “Pul-nvq phao kovq dov ail yaoq. Yeiqlulsaqlaiq meenq nee mail Gaqsaq meenq bhai ail nail gailkhaol bhai ail yaoq” dai, khoel bhiq-a nail ngaol. Gailkhaol al khaol neq, haqaiq mildai haqtsoiq haqyal bhai daol nail ngaol. 27Alhai khoel nail ngel-i mail, Pillilpuv lav dan khi dov ail-a nail ngaol. Aq-u phao, Aildaqyaolphil milkhaoq khe heeqphaqma nail phul heel yalkav juq bhai lainq khi heldaiq phail nail eeq nail heel nail Aildaqyaolphil milkhaoq yaq teevq gaq Yeiqlulsaqlaiq meenq bha uqhuq thaoq lai khi kovq lee thailthaiq nail bhai, Pillilpuv ya moel-a nail ngaol. 28Tsaol-aq al gaq neq, aivq nail moeqphaq lalaoq jeeq khi, Miqyail nail haqbhoil gedan nail Ilsaqyal-i mail gevq-ai thaq nail haoqgavq ge ge-ail, kovq lee thailthaiq nail ngaol. 29“Moeqphaq lalaoq al kovq lee thailthaiq nail bhai ail yaoq” dai, Aqhaqlal Miqyail Pillilpuv bhai ge bhiq-a nail ngaol.

30Aq-u phao, Pillilpuv tsaol-aivq-a nail ngaol. Aivq tsaoq kel-aivq-u phao, eeq nail heel nail al gaq Miqyail nail haqbhoil gedan nail Ilsaqyal-i mail gevq-ai thaq nail haoqgavq ge thailthaiq nail bhai ya gaiq-a nail ngaol. “Naol ge thailthaiq nail ganl thoil, naol heeq kivq naol laiq” dai, Pillilpuv aivq bhai naldaiq bhiq-a nail ngaol. 31Aivq ge nail: “Yu ngaq bhai daoqceevq maq ge daiq lavq haq neq, ngal khalhai khi heeq kivq nail-aiq” dai, ge kovq bhiq-a nail ngaol. A bhai nee ngal-aq, “Ngaq-ai nee mail jeeq lal yaoq” dai, Pillilpuv bhai ge bhiq-a nail ngaol.

32Aivq-i mail ge daiq thailthaiq nail Jalliq neq, niil dao ngaol:

“Heivq nail haqbhoil

tseel-aivq nail

yaol khe-ai, aivq bhai

tseel-aivq-a nail ngaol.

Yaol nail aqmevq

thaiq nail tsaol-aq nail

sivtavq bhai

yaol yaq maq meel dai

jaol nail khe-ai,

aivq iqsanl moeqthaoq

maq gaolpav dai,

aqtsi tsu dai,

jaol nail ngaol.

33Yu aivq bhai

thaqtheq khi,

maq tsaq maq daol

nail lavqkhoel

yalkhaq dal

bhiq-a nail ngaol.

Aivq nail aqceevq

khaq sil gaq

ge nia nail-aiq.

Khul khi mail dai

ngal-aq neq,

miltsaq kovtavq bhai

aivq nail

doevq nail phaq

oil ha-a nail ngaol” dai,

gevq-ai thaq nail ngaol.

34Eeq nail heel nail al gaq Pillilpuv bhai naldaiq nail: “Miqyail nail haqbhoil gedan nail niil gaq, khaq sil gaq nail ganl ge nail ngel-aiq. Aivq nail ganl ge nail ngel-ail laiq. Maq ngel haq neq, yu nail ganl ge nail laiq dai, ngal naoq bhai naldaiq movq-ail nial” dai, ge bhiq-a nail ngaol. 35Aq-u phao, Pillilpuv Jalliq al dao nee mail, Yeiqsul nail ganl lavqkhiq tsail nail geeqlaoq daoq, aivq bhai cavq bhiq cov bhiq-a nail ngaol.

36Aqyu nvq gaq ail thailthaiq-u phao, ulcuvq deq nail bhai kev lee khi, eeq nail heel nail al gaq ge nail: “Heldaiq. Niilniai ulcuvq deq-ail nial. Naol ulcuvq thaq saol dai, ngaq bhai lav tsoiq nail khul phaq jiav nail-aiq” dai, ge nail ngaol.

37[Pillilpuv ge nail: “Naol neema lavqkhoel bhai kev dai neema thaqtsaol haq neq, ulcuvq saol kivq naol” dai, ge bhiq-a nail ngaol. Eeq nail heel nail al gaq ge nail: “Yeiqsul Khali neq, Miqyail nail Yaqyov ngaol dai, ngal neema thaqtsaol naol” dai, ge bhiq-a nail ngaol.]

38Aq-u phao, eeq nail heel nail al gaq moeqphaq lalaoq la naq khi mail, aqyu nvq gaq ulcuvq lavqkhoel bhai aol ail khi, Pillilpuv aivq bhai ulcuvq saol bhiq-a nail ngaol. 39Aqyu nvq gaq ulcuvq lavqkhoel nee dov lal-u phao, Miqyail nail Aqhaqlal teevq pov taivq-ail Pillilpuv bhai tsiq kol-aivq-a nail ngaol. Eeq nail heel nail al gaq aivq bhai maq moel khi ngaol-aoq, lavqkhiq tsail deedee nail lavqkhoel kovq ail-a nail ngaol. 40Pillilpuv neq, Aqcovq meenq bhai kev dai, tsiq kol-aivq-a nail ngaol. A bhai nee ngal-aq, aivq Gailsaqlil meenq bhai lai-a nail ngaol. Gailphail lail ma bhai khal jiav nail meenq yaoq meenq yaoq-ao nee bhai aivq lavqkhiq tsail nail geeqlaoq daoq cavq bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index