Search form

Eilpheilsu 1

Iqmoeq ilmoeq khe daoq

1Ngal neq, Miqyail neema tsaq nail ngel-i mail, Yeiqsul Khali nail gaqkhoel ya jiovq-a nail Paolluv ngaol. Eilpheilsu meenq bhai jaol nail Khali yaq juq bhai, haoqgavq niil gevq bhoel-ai leevq-a nail ngaol. Nuljuq neq, Yeiqsul Khali bhai neema thaqtsaol nail meeq nail haol nail juq ngaol.

2Ngadao nail Aqbhu Miqyail khi mail Heeqphaq Yeiqsul Khali nail geeqlaoq eeljaol khi mail neesal-ovq nail phaq, nuljuq nail kovtavq bhai jiav dei-eiq.

Yeiqsul Khali nail lavqkhoel ya-a nail aqhaqlal phao khe geeqlaoq

3Ngadao nail Heeqphaq Yeiqsul Khali nail Aqbhu Miqyail bhai tsiqeeq bhel. Aivq neq, Khali bhai juq khi, aqhaqlal phao tavq nail nqtavq khe geeqlaoq yaoq phaq yaoq-ao nee, ngadao juq bhai bivq lavq-a nail ngaol. 4Miltsaq maq teivq-u nee, Miqyail ngadao juq bhai gaiq-a nail ngel-i mail, Khali bhai juq khi ngadao bhai tsel dov lavq-a nail ngaol. Ngadao aivq nail sivtavq bhai tsaolmeeq tsaolhaol khi mail oeqbal thaq nail phaq maq jiav nail tsaol-aq pevq lal dai, Miqyail ngadao juq bhai tsel dov lavq-a nail ngaol. 5Miqyail Yeiqsul Khali bhaqda nee ngadao bhai iqmoeq-u nee mail aivq nail yaq bhi pevq lal nail haqbhoil noeqceiv-ai thaq nail ngaol. Alhai pevq lal dai, aivq neema tsaq nail ngaol. 6Ngadao Miqyail nail geeqlaoq eeljaol nee tavq nail seiqleiq khaoqsail bhai tsiqeeq bhel. Khul khi mail dai ngal neq, Miqyail aivq mailma-ail gaiq-a nail aivq nail Yaqyov ngadao nail haqbhoil bivq lavq-a nail ngaol.

7Yaqyov nail aqsivq bhaqda nee, Miqyail ngadao bhai hevqkovq lavq khi oeqbal phaiq lavq-a nail ngaol. Aivq nail geeqlaoq eeljaol eeq dee heel deedee nail ngel-i mail, alhai nl-a nail ngaol. 8Neenoeq neekha khi mail noeqheeq noeq dov nail lavqkhoel, Miqyail nail geeqlaoq eeljaol al, ngadao nail kovtavq bhai teevq pov nee teevq pov mao lal dai, aivq nl lavq thailthaiq nail ngaol. 9Khul khi mail dai ngal-aq neq, aq-u Miqyail aivq nail neenoeq oil-uvq-ai thaq khi ngaol-aoq, niil aq-il ngadao juq bhai phaodaiq lavq-a nail ngaol. Khali bhaqda nee aivq alhai nl nail, neema tsaq nail ngaol. 10Phaodaiq lavq-a nail al neq, yanq kev lal-u phao, nqtavq kovtavq bhai khal jaol khal jiav nail yaoq phaq yaoq-ao nee maqkhaiq, miltsaq kovtavq bhai khal jaol khal jiav nail yaoq phaq yaoq-ao nee maqkhaiq, Khali bhai bhi tsaq bhi jil lai nail ngaol.

11Ngadao iqsanl Khali bhaqda nee, aivq nail tsaol-aq pevq lal dai, iqmoeq-u nee mail Miqyail ngadao bhai tselpav-ai thaq nail ngaol. Miqyail neq, yaoq phaq yaoq-ao nee nail lavqkhoel aivq neema tsaq khi bhi bhee lal dai, noeqceiv-ai thaq nail ngaol. 12Aivq nail seiqleiq khaoqsail bhai bhi tsiqeeq nail dai khi, Khali bhai iqmoeq-u nee mail, noeqthunq-a nail ngadao bhai, Miqyail tselpav-ai thaq nail ngaol.

13Nuljuq iqsanl, nuljuq jaol nail bhai hevqkovq nail phaq bhi kev lee-a nail, lavqkhiq tsail nail geeqlaoq daoq pevq nail, maldil tsaq nail daoq ya gaiq khi, Miqyail nail tsaol-aq pevq lal-a nail ngaol. Nuljuq Khali bhai neema thaqtsaol nail ngel-i mail, Miqyail-i mail saljial jaq-ai thaq nail khe-ai, Meeqnail Haolnail Aqhaqlal bhai juq khi, aivq nail tsaol-aq bhi pevq ceiv nail haqbhoil, nuljuq bhai junq deeq-ai thaq nail ngaol. 14Aqhaqlal Miqyail neq, ngadao Miqyail nail jaiqbhoil teevq bhee ya naol dai, ya heeq kivq nail haqbhoil bivq lavq-a nail ngaol. Ngadao aivq nail seiqleiq khaoqsail bhai tsiqeeq nia dai, Miqyail alhai nl lavq-a nail ngaol.

Paolluv geeqlaoq hal-a nail ganl

15Nuljuq Heeqphaq Yeiqsul bhai neema thaqtsaol nail ganl maqkhaiq, Khali yaq iqsanl bhai gaiq-a nail ganl maqkhaiq, ngal ya gaiq-a nail ngaol. 16Alheel ngel-i mail, ngal Miqyail bhai khaq mao iqsanl, geeqlaoq hal-u phao, nuljuq nail haqbhoil iqsanl, tsiqeeq tsiqeeq-ail Miqyail bhai geeqlaoq hal nail ngaol. 17Ngal geeqlaoq hal-u phao, ngadao nail Heeqphaq Yeiqsul Khali nail Miqyail bhai niailhai hal nail ngaol: “Seiqleiq khaoqsail eeq deedee nail Aqbhu-ol, aqyu juq naoq nail ganl heeq nia lal dai, noeq heeq noeq moel nia nail neema khi, noeq heeq noeq dov nia nail neema aqyu juq bhai bivq yaoq” dai, hal nail ngaol. 18Ngal nuljuq nail haqbhoil geeqlaoq hal-u phaoq, Khali yaq juq ya nail jaiqbhoil bhai tavq nail seiqleiq khaoqsail khadai eeq nail bhai maqkhaiq, Miqyail nuljuq bhai khul nail ngel-i mail, noeqthunq nail phaq khalhai jiav nail bhai maqkhaiq, nuljuq nail neema lavqkhoel bhai noeq moel nia lal nail haqbhoil, ngal geeqlaoq hal nail ngaol. 19Neema thaqtsaol nail tsaol-aq pevq nail ngadao nail lavqkhoel bhai ganl nl thailthaiq nail aivq nail bhaqaoq, khadai eeq nail ganl juq nuljuq heeq nia lal dai iqsanl, hal nail ngaol. Ngadao nail lavqkhoel bhai ganl nl nail bhaqaoq al neq, gaq kav deedee nail bhaqaoq pevq nail ngaol. 20Miqyail bhaqaoq al bhai juq khi, Khali bhai bhi doevq kovq lal nail ngaol. A bhai nee ngal-aq, Miqyail nqtavq kovtavq bhai aivq nail lavqmal phao bhi jaoldeel-a nail ngaol. 21Miqyail nail lavqmal phao jaol nail Khali neq, uvthaiq nail juq nail kovtavq bhai maqkhaiq, bhaqaoq eeq nail juq nail kovtavq bhai maqkhaiq, gaq kav nail juq nail kovtavq bhai maqkhaiq, heeqphaq iqsanl nail kovtavq bhai maqkhaiq, aqmil khal mil-ai thaq nail iqsanl nail kovtavq bhai maqkhaiq, niil yeel nail lavqkhoel bhai maqkhaiq, yaqhao khe yeel nail lavqkhoel bhai maqkhaiq, eeq dee heel deedee nail ngaol. 22Miqyail-i mail yaoq phaq yaoq-ao nee bhai Khali nail kov-uvq bhai bhi jaol bhi jiav-a nail ngaol. Al ovqtavq, Khali yaq munl nail haqbhoil aivq iqsanl nail kovtavq bhai uqhuq bhi jiovq-a nail ngaol. 23Khali yaq munl neq, Khali nail aqmaol ngaol. Aivq aqmaol al nail lavqkhoel bhai teevq bhee jaol nail khe-ai, yaoq phaq yaoq-ao nee bhee lal dai iqsanl, aivq nl nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index