Search form

Eilpheilsu 4

Aqhaqlal Miqyail bhaqda nee neema teevq heeq taivq-ail tavq nail ganl

1Yeiqsul bhaqda nee thaonq bhai aol thailthaiq nail ngal, nuljuq bhai niailhai hal nail ngaol. Miqyail nuljuq bhai khul khi aqdoevq bhi doevq-a nail ngaol. A bhai geel-nvq dai, aqdoevq doevq yaoq. 2Khaq mao iqsanl yovqgavq bhai yovqgavq thaqtheq khi, neema neenuq neebeiv aol yaoq. Al ovqtavq, neema heelma ma dai thaq khi, goil nail gaiq-a nail lavqkhoel nee teevq gaq nee teevq gaq ol yaoq. 3Tsaq lai jil lai nail phaq-i mail nuljuq bhai leel jaoq-ai thaq nail lavqkhoel, Aqhaqlal Miqyail bhaqda nee khaq mao iqsanl neema teevq heeq taivq-ail tavq kivq lal dai, laijai deedee yaoq. 4Miqyail nuljuq bhai khul-u phao, nuljuq nail haqbhoil noeqthunq duq teevq phaq taivq-ail bivq lavq-a nail khe-ai, nuljuq aqmaol teevq maol taivq-ail bhao khi, Aqhaqlal Miqyail teevq gaq taivq-ail nuljuq nail lavqkhoel bhai jaol nail ngaol.

5Heeqphaq teevq gaq taivq-ail jaol khi, neema thaqtsaol nail teevq phaq taivq-ail, ulcuvq saol nail iqsanl teevq phaq jiav-ail teevq-eel ngaol. 6Ngadao juq iqsanl nail Aqbhu Miqyail teevq gaq teevq-eel ngaol. Aivq neq, iqsanl nail kovtavq bhai jaol khi iqsanl nail kovtavq bhai ganl nl nail khi, iqsanl nail lavqkhoel bhai jaol nail ngaol.

7Khali aivq-i mail ngadao bhai kovpavq khal bivq lavq-a nail khe-ai, ngadao teevq gaq nee teevq gaq geeqlaoq al ya nail ngaol. 8Alheel ngel-i mail, Jalliq lavqkhoel bhai niailhai gevq-ai thaq nail ngaol:

“Aivq daqmoe bhai

dav lai-u phao,

aivq bhai neejiav

jiav nail juq bhai

phee dal laivq-a nail ngaol.

A bhai nee ngal-aq,

aivq tsaol-aq yaq bhai

kovpavq bivq nail ngaol” dai,

gevq-ai thaq nail ngaol.

9Aivq dav lai-a nail dai ge nail al neq, iqmoeq-u phao miltsaq daoqthaoq bhai yavq kha ail-a nail bhai ge nail, maq ngel-ail laiq. 10Yavq kha ail-a nail al gaq, yaoq phaq yaoq-ao nee bhee lal dai, nqtavq kovtavq bhai iqsanl dav lai-a nail al gaq ngaol. 11Aivq-i mail bivq lavq-a nail kovpavq al juq neq, niil juq ngaol. Tsaol-aq teevq pav ganav juq bhai gaqkhoel bhi jiovq-a nail ngaol. Teevq pav ganav juq bhai Miqyail nail haqbhoil gedan nail juq bhi jiovq-a nail ngaol. Teevq pav ganav juq bhai, lavqkhiq tsail nail geeqlaoq daoq cavq nail juq bhi jiovq-a nail ngaol. Teevq pav ganav juq bhai Khali yaq munl bhai heldaiq phail khi cavq bhiq cov bhiq nail juq bhi jiovq-a nail ngaol. 12Khali nail aqmaol eeq lal heel lal nia dai, Miqyail nail haqbhoil ganl bhi nl nail dai khi, aivq nail tsaol-aq iqsanl bhai kovpavq al bivq-a nail ngaol. 13Alhai nl haq neq, ngadao juq iqsanl mail, neema thaqtsaol nail lavqkhoel nee maqkhaiq, Miqyail nail Yaqyov bhai heeq nia nail lavqkhoel bhai maqkhaiq, neema teevq heeq taivq-ail tavq nia lal nail ngaol. Al ovqtavq, ngadao iqsanl Khali bhee nail khe-ai bhee lal khi, yovkav eeq lal nail ngaol.

14Yovkav eeq lal haq neq, ngadao yaq maq ngel nail ngel-i mail, jalmul mul nail tsaol-aq juq, neenoeq neekha yuq khi goiqbhaoq bhaoq bhaoq-ail mee nia phaq cavq lal-u phao, lilmoel-i mail bhoe ha nail khe-ai, ngadao bhai maq bhoe pov maq bhoe lav nia-ail. 15Al ovqtavq, ngadao goil nail gaiq-a nail lavqkhoel nee tsaq nail daoq taivq-ail ge khi, ngadao nail uqhuq pevq nail Khali nail lavqkhoel bhai yaoq phaq yaoq-ao nee, ya bhiq eeq ya bhiq heel lal nail ngaol. 16Aivq bhaqda nee, aqmaol neq, uqhuq bhai covq cavq lai khi, aqmaol maol lao-ail eeq lal khi, goil nail gaiq-a nail lavqkhoel bhai eeq lal thailthaiq nail ngaol. Aqmaol al neq, khil ceevq lavq ceevq bhaqda nee, teevq khaoq nee teevq khaoq covq cavq khi, alsail yaoq sail yaoq-ao nee yovqgavq nail ganl yovqgavq nl nail ngel-i mail, aqmaol maol lao-ail eeq lal nail ngaol.

Khali nail lavqkhoel nee aqsivq doevq phal lal-a nail ganl

17Alheel ngel-i mail, Yeiqsul nail lavqkhoel nee ngal nuljuq bhai niailhai aqduq aqtsil tsil dai, ge lavq bhel. Laolkivq yaq aqdoevq doevq nail khe-ai, nuljuq thaq doevq. Aqyu juq nail neenoeq neq, khul teevq phaq iqsanl ganl maq tsoiq-ail. 18Aqyu juq nail neema neq, navtsee deel ngaol. Aqyu juq khul teevq phaq iqsanl maq heeq nia nail nee ovqtavq, neema aqgaol ngel-i mail, Miqyail-i mail bivq-a nail aqdoevq doevq nail phaq bhai teevq peivq-ail maq tavq-ail. 19Aqyu juq khul teevq phaq bhai iqsanl haqsil nail maq bhaoq dai, aqjiivq aqcavq khaqmiq sev nail phaq nl nail haqbhoil aqmaol av bhiq gaq khi, aqjiivq aqcavq phaq iqsanl bhai, neekhaol teevq sil nl nail ngaol.

20Thailhai ngaol-aoq, nuljuq Khali bhai saol oil-a nail neq, alhai nl nail haqbhoil maq ngel-ail. 21Nuljuq Yeiqsul nail ganl ya gaiq-a nail ngel haq neq, aivq nail lavqkhoel maldil tsaq nail phaq aol nail bhai, ya saol-a nail ngaol. 22Nuljuq-i mail ya saol-a nail al neq, neema aqlil loev ha-ail ceevq yaoq dai, ya saol-a nail ngaol. Neema aqlil al neq, jel lal-u phao, nuljuq-i mail nl nail hal nail aol juq bhai tavq khi, bhi laiq-ail nia nail jalmul mul nail juq bhaqda nee, luq-ail seil-ail thailthaiq nail ngaol. 23Nuljuq nail neema aqsivq bhi phal lal yaoq. 24Maldil tsaq nail phaq pevq nail, tsaq nail daol nail khi mail meeq nail haol nail lavqkhoel, Miqyail khe-ai dul lai dai, teivq-ai thaq nail aqdoevq doevq nail aqsivq phaq doi yaoq.

25Alheel ngel-i mail, goiqbhaoq bhaoq nail phaq bhai khaonq ha-ail ceevq khi, teevq gaq nee teevq gaq maldil tsaq nail daoq taivq-ail ge tsaoq yaoq. Khul khi mail dai ngal-aq, ngadao neq, aqmaol teevq maol bhai taivq-ail covq nail alsail juq ngaol. 26Nuljuq neema phail khi ngaol-aoq, oeqbal thaq nl. Nlma maq ga bhoel ail-u nee mail neema phail nail phaq bhi sivq ail yaoq. 27Neivq heeqphaq nail haqbhoil jaol duq thaq bhi ya. 28Khoiqbhaoq bhaoq nail tsaol-aq juq neq, maq bhaoq daiq khaonq khi, yovqgavq doevq nia jaol nia nail nee ovqtavq, haq yaq aoq yaq juq bhai tsaojao-ai kivq dai, aqsee aqdaol daol dai, ganl nl jaq keivq daol yaoq.

29Nuljuq nail moeqthaoq lavqkhoel nee maq meeq nail daoq teevq daoq-ail thaq bhi dov lal. Ya gaiq nail tsaol-aq nail haqbhoil ganl tsoiq dai, yu loq nail bhai tsaq lai nail daoq taivq-ail ge khi, yu bhai bhi eeq bhi heel lal nail daoq aqmeeq taivq-ail ge yaoq. 30Miqyail nail Meeqnail Haolnail Aqhaqlal bhai thaq bhi noeqhaq. Hevqkovq nail aqn bhai kev dai, Miqyail nuljuq bhai Aqhaqlal Miqyail nail lavqkhoel nee aqtsaq cov-ai thaq nail ngaol. 31Yu bhai neema nal nail, yu bhai neema bhao nail, yu bhai neema phail nail, yu nee mail iqdaiq iqtsai dov nail, yu bhai khal ge movq-ail ge nail, niil juq iqsanl bhai khaonq ha yaoq. Yu bhai khoeq lai dai nl movq nail yaoq phaq yaoq-ao nee iqsanl, khaonq ha-ail ceevq yaoq. 32Nuljuq teevq gaq nail gaiqlaq teevq gaq aqmeeq phaq nl khi, teevq gaq nail gaiqlaq teevq gaq gaoqhaq gaiq-a nail neema aol yaoq. Miqyail Khali bhai juq khi nuljuq nail oeqbal bhai phaiq-a nail khe-ai, nuljuq iqsanl teevq gaq nee teevq gaq oeqbal phaiq bhiq yaoq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index