Search form

Eilpheilsu 5

Aqbhaq nail yaq khe-ai aqdoevq doevq yaoq

1Nuljuq neq, Miqyail gaiq-a nail aivq nail yaq pevq nail ngel-i mail, aivq khe-ai dul lal dai, aqdoevq doevq yaoq. 2Khali ngadao juq bhai gaiq-a nail khe-ai, goil nail gaiq-a nail lavqkhoel aqdoevq doevq yaoq. Khali ngadao nail haqbhoil laol bhiq nail dai khi, aivq nail aqmaol Miqyail bhai av bhiq-a nail ngaol. Laol bhiq-a nail al neq, Miqyail neekhaol sil nail huqbhiq nil nail phaq ngaol.

3Nuljuq neq, Miqyail nail tsaol-aq pevq nail ngel-i mail, khaqmiq sev nail, aqjiivq aqcavq yaoq phaq yaoq-ao nee nl nail, neekhaol jiav nail, niil heel nail ganl juq bhai maq ya nl-ail. Nuljuq nail gaiqlaq bhai al juq ge-ail taivq-ail ge khi ngaol-aoq, maq tsaq-ail. 4Aqjiivq aqcavq cavq nail daoq, ganl maq tsoiq nail daoq khi mail, ceivqleivq kha nail daoq, daoq niil juq bhai nuljuq teevq peivq-ail thaq ge thaq thail. Miqyail bhai tsiqeeq nail daoq taivq-ail ge yaoq thail yaoq. 5Khul khi mail dai ngal-aq neq, khaqmiq sev nail tsaol-aq, aqjiivq aqcavq phaq nl nail tsaol-aq, neekhaol jiav nail tsaol-aq khul gaq maqkhaiq, Khali khi mail Miqyail Milkhaoq lavqkhoel bhai maq ya aol lai-ail dai, nuljuq heeq kivq yaoq. Neekhaol jiav nail tsaol-aq, thaoqphaoq aqma maolkhoel bhai uqhuq thaoq nail tsaol-aq khe-ai dul nail ngaol.

6Tsaol-aq teevq gaq-ail ganl maq tsoiq nail daoq ge ge-ail, nuljuq bhai jalmul maq ya mul ya dai, yaolphaol yaoq. Al juq bhaqda nee Miqyail neema phail nail phaq, aivq nail daoq maq naldaiq nail tsaol-aq nail kovtavq bhai kev lee nail ngaol. 7Alheel ngel-i mail, aqyu juq bhai gaoqceiv ceiv yaoq.

8Jel lal-u phao, nuljuq iqsanl, aqnav nail lavqkhoel bhai doevq daiq-a nail tsaol-aq juq ngaol. Thailhai ngaol-aoq, niil aq-il neq, Yeiqsul bhaqda nee aqbhaq nail lavqkhoel bhai jaol lal-aoq nail ngaol. Alheel ngel-i mail aqbhaq nail yaq khe-ai aqdoevq doevq yaoq. 9Aqbhaq al neq, maldil tsaq nail phaq, aqmeeq phaq khi mail tsaq nail daol nail phaq, bhi dov lal nail ngaol. 10Nuljuq Miqyail neema tsaq nail phaq bhai halpov moel kivq dai, laijai yaoq. 11Aqnav phaq bhai tavq nail ganl maq tsoiq nail nl nail hal nail juq bhai teevq peivq-ail thaq nl thaq hal. Ganl al juq khadai haqeiv nail ngel-ail dai, bhi dov lal yaoq. 12Miqyail nail daoq maq naldaiq nail juq-i mail, bhallal bhai nl-a nail ganl juq bhai, ngadao ge-ail taivq-ail ge khi ngaol-aoq, haqsil duq jiav nail ngaol. 13Khul phaq ngaol-aoq, aqbhaq bhaq nail lavqkhoel bhai, oil dov gil lavq-u phao, aqyu juq khalheel nail tsaol-aq pevq nail bhai, bhaqlaoq kheq dai, moel duq lal nail ngaol. 14Alheel ngel-i mail:

“Iqthaiq kov-ai thaq nail

tsaol-aq juq-ol,

noeq lal yaoq.

Sil nail phaq nee

gaoq doevq kovq lal yaoq.

Khali naoq bhai

aqbhaq bhaq lavq naol” dai,

ge-ai thaq nail ngaol.+

15Alheel ngel-i mail, nuljuq aqdoevq doevq nail aqmeeq-ai yaolphaol yaoq. Neenoeq neekha maq aol nail tsaol-aq khe-ai thaq doevq. Neenoeq neekha aol nail tsaol-aq khe-ai doevq yaoq. 16Niil yeel neq, haqeiv nail yeel ngel-i mail, yanq khal ya-u phao teevq peivq-ail maq bhi sunq-ail dai, nl thailthaiq yaoq. 17Neenoeq neekha maq aol nail tsaol-aq thaq bhi pevq. Miqyail neema khalhai tsaq nail ngel-ail dai, heeq nia nail tsaol-aq pevq yaoq. 18Jilpheeq thaq daol bov. Al neq, nuljuq bhai bhi cov-ail nail teevq-eel ngaol. Thailhai ngaol-aoq, nuljuq nail lavqkhoel bhai Meeqnail Haolnail Aqhaqlal teevq bhee bhi jaol yaoq. 19Miqyail bhai tsiqeeq nail daoq yaoq phaq yaoq-ao nee, daoqsel gul khi, teevq gaq nee teevq gaq tsiq eeq yaoq. Nuljuq nail neema lavqkhoel bhai kev dai, gul gul-ail Miqyail bhai tsiqeeq yaoq. 20Ngadao nail Heeqphaq Yeiqsul Khali nail aqmil bhai juq juq-ail, yaoq phaq yaoq-ao nee nail haqbhoil, Aqbhu Miqyail bhai khaq mao iqsanl tsiqeeq yaoq.

Khaqma khi mail yovjil aqdoevq khalhai ya doevq nail ganl

21Khali bhai ev nail lavqkhoel, teevq gaq nail kov-uvq teevq gaq aqmeeq-ail jaol yaoq.

22Khaqma juq-ol, Yeiqsul nail kov-uvq bhai jaol nail khe-ai, yovqgavq nail yovjil nail kov-uvq bhai jaol yaoq. 23Khul khi mail dai ngal-aq neq, Khali neq, Khali yaq munl nail uqhuq pevq nail khe-ai, yovjil iqsanl yovqgavq nail khaqma nail uqhuq ngaol. Khali neq, aivq nail aqmaol pevq nail Khali yaq munl bhai Hevqkovq nail gaq pevq nail ngaol. 24Alheel ngel-i mail, Khali yaq munl juq Khali nail kov-uvq bhai jaol nail khe-ai, khaqma juq iqsanl, yovqgavq nail yovjil nail kov-uvq bhai ya jaol nail ngaol.

25Yovjil juq-ol, Khali yaq munl bhai Khali gaiq-a nail ngel-i mail, aqmaol laol bhiq-a nail khe-ai, nuljuq iqsanl yovqgavq nail khaqma bhai gaiq-a yaoq. 26Aivq nail aqmaol laol bhiq-a nail al neq, Khali yaq nail munl meeq lal haol lal nail haqbhoil ngaol. Khali neq, ulcuvq khi geeqlaoq daoq-i mail, aqyu juq bhai tsiq haol-a nail ngaol. 27Khul khi mail tsiq haol-a nail dai ngal-aq, malbavq malyal maq bhao-ail ge duq maq jiav nail nee ovqtavq, meeq nail haol nail, oeqbal thaq duq maq jiav nail Khali yaq munl pevq lal khi, seiqleiq khaoqsail teevq bhee aol nail lavqkhoel, munl al munl aivq nail sivtavq bhai jaol nia dai, Yeiqsul tsiq haol-a nail ngaol. 28Alhai dul dai, yovjil juq iqsanl yovqgavq nail aqmaol bhai gaiq-a nail khe-ai, yovqgavq nail khaqma bhai ya gaiq-a naol. Yovqgavq nail khaqma bhai gaiq-a nail tsaol-aq neq, yovqgavq nail aqmaol bhai gaiq-a nail ngaol. 29Tsaol-aq teevq gaq iqsanl, yovqgavq nail aqmaol bhai yovqgavq maq bhe-ail. Yovqgavq nail aqmaol bhai yovqgavq bhi jaq bhi daol khi heldaiq phail nail ngaol. Khali iqsanl alhai dul dai, Khali yaq munl bhai heldaiq phail nail ngaol. 30Ngadao neq, Khali nail aqmaol bhai covq nail alsail juq pevq nail ngaol.

31“Alheel ngel-i mail, yovjil juq neq, yovqgavq nail aqbhu aqma nee pavq-ail khi, yovqgavq nail khaqma nee ya doevq tavq nail lavqkhoel, nvq gaq teevq gaq taivq-ail pevq lal nail ngaol” dai,

Jalliq lavqkhoel bhai gevq-ai thaq nail ngaol.

32Ganl niil neq, daoqceevq navq deedee nail ngaol. Ngal niailhai ge nail neq, Khali khi aivq nail munl nail ganl ge nail ngaol. 33Alheel ngel-i mail, yovjil juq-ol, yovqgavq nail aqmaol bhai gaiq-a nail khe-ai, yovqgavq nail khaqma bhai gaiq-a yaoq. Khaqma juq iqsanl, yovqgavq nail yovjil bhai ev yaoq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index