Search form

Gaqlaqtil 6

Teevq gaq nail yalkav teevq gaq tsao phi yaoq

1Aqivq jaqbheq juq-ol, tsaol-aq teevq gaq ganav nl laiq haq neq, aivq meeq lal jaq lal dai, nuljuq nail lavqkhoel khe, aqhaqlal phao gaq kav nail juq, neema neenuq neebeiv aol nail lavqkhoel nee, aivq bhai tsaojao-ai bhiq yaoq. Thailhai ngaol-aoq, naol iqsanl jalmul mul nail haoqnao maq ya tsaothel-aivq dai, yaolphaol yaoq. 2Nuljuq teevq gaq nail yalkav teevq gaq tsao phi yaoq. Tsao phi haq neq, nuljuq Khali nail aoldaoq kovqdaoq bhai nl bhee thailthaiq nail ngaol. 3Tsaol-aq teevq gaq ganav, teevq phaq-ail maq nl nia khi ngaol-aoq, “Ngal nl kivq deedee naol” dai, noeq haq neq, aivq bhai aivq goiqbhaoq bhaoq nail ngaol. 4Tsaol-aq yaoq gaq yaoq-ao nee, yovqgavq-i mail nl-ai thaq nail juq bhai saol-nvq yaoq. Alhai saol-nvq haq neq, yu-i mail nl-a nail bhai neekhaol maq sil mail, yovqgavq-i mail nl-a nail bhai neekhaol sil nail ngaol. 5Khul khi mail dai ngal-aq neq, yaoq gaq yaoq-ao nee mail yovqgavq bhai dal nail ganl yovqgavq nl nail ngaol.

6Miqyail nail daoq ya saol-a nail gaq, aivq bhai cavq bhiq cov bhiq-a nail gaq bhai, aivq jiav nail aqmeeq phaq yaoq phaq yaoq-ao nee bivq nail tsaq naol.

7Thaq noeq bheeq dei-eiq. Tsaol-aq teevq gaq iqsanl, Miqyail bhai khal nl movq-ail maq nl nia-ail. Yovqgavq-i mail aqiq haiq-a nail khe-ai, yovqgavq ya gaiq nail ngaol. 8Aqsivq haqjoil bhai tavq nail phaq, haiq haq neq, aqsivq haqjoil buvq-ail tsiq-ail nail phaq ya gaiq naol. Thailhai ngaol-aoq, Aqhaqlal Miqyail bhai tavq nail phaq haiq haq neq, Aqhaqlal Miqyail bhaqda nee nqmaq maqluv halyeel doevq nail phaq ya gaiq nail ngaol. 9Alheel ngel-i mail gaq maq bhaq dai, aqmeeq phaq nl bhel. Ngadao neema maq cov haq neq, yanq kev lal-u phao, ya gaiq nail ngaol. 10Khal eivq lal-u phao, tsaol-aq iqsanl nail haqbhoil aqmeeq phaq nl bhel. Yeiqsul bhai neema thaqtsaol nail lavqkhoel aqivq jaqbheq pevq nail tsaol-aq juq nail haqbhoil, a dai nee maqtsil nl bhel.

Haoqnao naosaq khe daoq

11Ngaq nail aqlavq-i mail nuljuq bhai gevq bhiq thailthaiq nail haoqgavq aqgevq niil juq, khadai eeq nail-aiq dai, heldaiq daiq.

12Aqsivq haqjoil phao khe aol juq bhai heldaiq meeq lal dai, nl movq nail tsaol-aq juq neq, nuljuq bhai bavkov uqjaq oev nail aol thaoq yaoq dai, nuljuq bhai khoel deedee nail ngaol. Aqyu juq alhai nl nail neq, Khali nail lavqyavq bhaqda nee hevqkovq nail phaq ya naol dai, cavq bhiq cov bhiq haq neq, khoeq nail jiovq nail phaq aqyu juq ya daq nail bhai, geesil nail ngaol. 13Bavkov uqjaq oev nail tsaol-aq al juq iqsanl mail, aoldaoq kovqdaoq nail haoqnao maq tsaothe-ail, bavkov uqjaq oev nail aol niil phaq bhai nuljuq nl dai, aqyu juq nl kivq naol dai, khaoqsail he movq nail ngel-i mail, nuljuq bhai bavkov uqjaq bhi oev movq-ail teevq-eel ngaol. 14Thailhai ngaol-aoq, ngal neq, ngadao nail Heeqphaq Yeiqsul Khali nail lavqyavq bhai taivq-ail, neekhaol sil duq jiav nail ngaol. Yaoq phaq yaoq bhaqda nee, neekhaol sil duq maq jiav-ail. Lavqyavq al bhaqda nee, miltsaq bhai tavq nail phaq, ngaq nail haqbhoil sil gil-aoq nail ngaol. Ngal iqsanl miltsaq bhai tavq nail phaq nee sil-ail ceevq-ao nail ngaol. 15Bavkov uqjaq oev nail maqkhaiq, maq oev nail maqkhaiq, khul teevq phaq-ail, ganl maq tsoiq-ail. Tsaol-aq aqsivq pevq lal nail taivq-ail ganl tsoiq nail ngaol. 16Gaiq jel lavq-a nail daoq niil juq nail haoqnao tsaothe nail tsaol-aq iqsanl nail kovtavq bhai maqkhaiq, Miqyail Ilsaqleiqlal nail tsaol-aq nail kovtavq bhai maqkhaiq, neesal-ovq nail phaq khi mail gaoqhaq gaiq-a nail phaq jiav dei-eiq.

17Yanqgaol nee pultavq, tsaol-aq teevq gaq iqsanl ngaq bhai thaq gaoq suqsaq lal. Khul khi mail dai ngal-aq neq, ngal Yeiqsul nail haqbhoil khoeq nail jiovq nail phaq bhai ya daq-a nail malbavq jiav nail ngaol.

18Aqivq jaqbheq juq-ol, ngadao nail Heeqphaq Yeiqsul Khali nail geeqlaoq eeljaol nuljuq nail neema lavqkhoel bhai aol dei-eiq. Aqmiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index