Search form

Heiqbhail 10

1Aoldaoq kovqdaoq neq, yaqhao khe kev lee nail aqmeeq juq bhi pevq lal nail maq ngel-ail. Al juq nail maolkhoel teevq-eel ngaol. Alheel ngel-i mail, yaoq kovq yaoq-ao nee, laol bhiq nail phaq laol nail neq, uqhuq thaoq lai nail tsaol-aq bhai teevq thal-iq maq bhi bhee lal nia-ail. 2Aqyu juq bhee-ail nul neq, aqyu juq laol bhiq nail phaq maq laol yaoq-aol, maq ngel-ail laiq. Uqhuq thaoq nail tsaol-aq teevq pov meeq lal haol lal gaq haq neq, oeqbal aol naol dai, aqyu juq teevq thal-iq maq noeq yaoq-aol. 3Thailhai ngaol-aoq, yaoq kovq yaoq-ao nee, laol bhiq nail phaq laol bhiq-u phao, “Nvjuq oeqbal aol lao thaq nail niil” dai, aqyu juq noeq dov lal nail ngaol. 4Khul khi mail dai ngal-aq neq, niaoqnel nail aqsivq khi civqmeiv nail aqsivq neq, oeqbal bhai teevq thal-iq maq tsiq haol nia-ail.

5Alheel ngel-i mail, Khali miltsaq kovtavq bhai doevq lee-u phao, Miqyail bhai ge bhiq-a nail:

“Miqyail-ol, naol neq,

laol bhiq nail phaq khi

danq nail phaq bhai,

oil movq nail maq ngel-ail.

Naol neq, ngaq nail haqbhoil

aqmaol lainq-ai thaq nail ngaol.

6Miqjaq jao poiv khi

laol bhiq nail phaq khi

oeqbal nail haqbhoil

laol bhiq nail juq bhai

naol neekhaol maq sil-ail.

7Alheel ngel-i mail,

ngal daoq niailhai

ge nail ngaol:

‘Heldaiq dei-eiq.

Aoldaoq kovqdaoq nail

haoqgavq lavqkhoel bhai

ngaq nail ganl

gevq-ai thaq nail khe-ai,

Miqyail-ol,

naol neema tsaq nail khe-ai,

nl nail dai khi,

ngal lee-a nail ngaol’ ” dai,

ge-ai thaq nail ngaol.

8Iqmoeq-u phao aivq-i mail ge-a nail: “Laol bhiq-a nail phaq khi danq nail phaq bhai maqkhaiq, miqjaq jaopoiv khi laol bhiq nail phaq khi oeqbal nail haqbhoil laol bhiq nail juq bhai maqkhaiq, naol maq oil movq nail nee ovqtavq, neema maq tsaq” dai, ge-ai thaq nail ngaol.

Laol bhiq nail phaq iqsanl aoldaoq kovqdaoq bhai tsaq lai dai, nl nail phaq pevq khi ngaol-aoq, aivq alhai ge nail ngaol. 9“Heldaiq dei-eiq. Naol neema tsaq nail khe-ai, nl nail dai khi, ngal lee-a nail ngaol” dai, aivq teevq pov gaoq ge-a nail ngaol.

Laol bhiq nail nvq phaq teevq phaq khaq mao iqsanl ya ivq dai, laol bhiq nail iqmoeq khe phaq bhai aivq khaonq ha-a nail ngaol. 10Alhai nl nail bhai Miqyail neema tsaq nail ngel-i mail, Yeiqsul Khali neq, aivq nail aqmaol teevq pov taivq-ail laol bhiq-a nail ngaol. Alhai laol bhiq-a nail ngel-i mail, ngadao meeq lal haol lal-a nail ngaol.

11Philyaq yaoq gaq yaoq-ao nee, yaoq n yaoq n nee laol duq bhai thulphaol khi, oeqbal bhai maq tsiq haol nia nail laol bhiq nail phaq bhai, laol nail ngaol. 12Thailhai ngaol-aoq, oeqbal phaiq bhiq nail khi, Yeiqsul nqmaq maqluv halyeel nail haqbhoil teevq pov taivq-ail laol bhiq nail phaq laol khi, Miqyail nail lavqmal phao jaoldeel-nvq thaq nail ngaol. 13Aivq a bhai jaoldeel-nvq thaq nail neq, aivq bhai neejiav jiav nail tsaol-aq bhai Miqyail aivq nail aqkhil kov-uvq bhai bhi jaol-u phao kev dai, daonq nail ngaol. 14Khul khi mail dai ngal-aq neq, laol bhiq nail teevq phaq taivq-ail laol nail lavqkhoel meeq lal haol lal nail tsaol-aq bhai nqmaq maqluv halyeel bhee nail tsaol-aq, aivq bhi pevq lal nail ngaol.

15Meeqnail Haolnail Aqhaqlal iqsanl ngadao bhai alhai salkhil khanq lavq-a nail ngaol. Iqmoeq ilmoeq aivq ge nail:

16“Yaqhao ngal

aqyu juq bhai ge bhiq nail

daoqma saljial neq,

niailhai ngaol.

Ngaq nail aoldaoq kovqdaoq

aqyu juq nail

neema lavqkhoel bhai

oil bhoel bhiq khi,

aqyu juq nail

neenoeq needul nail

kovtavq bhai

gevq bhiq naol dai,

Heeqphaq Miqyail

ge nail ngaol.

17Ngal aqyu juq nail oeqbal khi

aqyu juq nail bheeq nail

leel nail juq bhai

maq noeq thaq-ail” dai,

Meeqnail Haolnail Aqhaqlal gaoq ge nail ngaol.

18Oeqbal al juq bhai phaiq gaq haq neq, oeqbal nail haqbhoil laol bhiq nail phaq maq loq yaoq-aol.

Miqyail nail aqjail bhai jiiv bhoel laivq yaoq

19Alheel ngel-i mail, aqivq jaqbheq juq-ol, Yeiqsul nail aqsivq bhaqda nee, ngadao geesil nail neema maq aol dai, meeq dee haol deedee nail jaol duq bhai aol lai kivq nail ngaol. 20Ngadao juq nail haqbhoil Yeiqsul haqphal phal ma nee jel lai khi aqdoevq bhi doevq nail gailkhaol aqsivq khaol lavq daol lavq-a nail ngaol. Ngadao gailkhaol al khaol nee mail aol lai kivq nail ngaol. Haqphal phal ma al neq, Yeiqsul nail aqmaol bhai ge nail ngaol. 21Miqyail nail ilkhaol lavqkhoel bhai, aqivq jiovq-ai thaq nail, eeq dee heel deedee nail Philma, ngadao jaol nail ngaol. 22Alheel ngel-i mail, daolcoev deel neema khi ivqdao deel neema thaqtsaol nail phaq aol nail lavqkhoel, Miqyail nail aqjail bhai ngadao jiiv bhoel laivq bhel. Oeqbal bhai khaoqlaol nail phaq bhi tsiq haol gaq-a nail neema khi, haoltaiv deel ulcuvq-i mail bhi tsiq haol gaq-a nail aqmaol lavqkhoel ngadao jiiv bhoel laivq bhel. 23Ngadao-i mail hav bhoel-ai thaq nail noeqthunq-ai thaq nail phaq bhai pov pov lav lav-ail maq pevq mail, ivqdao dai nieivq thaiq-ai thaq bhel. Khul khi mail dai ngal-aq neq, saljial jaq lavq-a nail Miqyail neq, saljial ivq nail ngaol. 24Al ovqtavq, goil nail gaiq-a nail neema aol khi aqmeeq phaq nl dai, teevq gaq nee teevq gaq saol-nvq khi gaq bivq bhel. 25Tsaol-aq teevq pav ganav juq geeqlaoq maq hal lai dai, jaol nail khe-ai, nuljuq alhai thaq jaol. Yalkhaq dal nail aqn al n kev lee nail aqjail jail lal-aoq thaq nail ngaol dai, nuljuq heeq nia nail ngel-i mail, teevq gaq nee teevq gaq gaq bivq thailthaiq yaoq.

26Ngadao maldil tsaq nail phaq bhai heeq kivq khi ngaol-aoq, yovqgavq nail neenoeq neelov taivq-ail oil khi oeqbal gaoq nl haq neq, oeqbal nail haqbhoil laol bhiq nail phaq maq jiav yaoq-aol. 27Mao-ail geesil lal nail yalkhaq dal nail phaq bhai daonq-ail teevq-eel ngaol. Aq-u phao, Miqyail bhai neejiav jiav nail tsaol-aq bhai neema phail deedee nail lavqkhoel miqjaq-i mail kheq ha nail ngaol. 28Miqyail-i mail Molseiq bhai bivq-a nail aoldaoq kovqdaoq bhai maq naldaiq dai, khaonq ha-a nail tsaol-aq neq, aivq-i mail khaonq ha-a nail ganl bhai salkhil khanq nail tsaol-aq nvq gaq hail gaq jaol haq neq, maq gaoqhaq dai, heivq nail bhai ya daq nail ngaol. 29Thailhai phal-iq neq, Miqyail nail Yaqyov bhai naoqthaiq khi, yovqgavq nail oeqbal bhai tsiq haol lavq nail Miqyail nail daoqma saljial bhai aqphoiq maq bhao dai saol-nvq khi, Miqyail nail geeqlaoq eeljaol bivq lavq nail Aqhaqlal Miqyail bhai khal ge movq-ail ge nail tsaol-aq bhai neq, khadai doil nail khoeq nail jiovq nail phaq bhai yaq daq nail ngel-ail dai, saol-nvq daiq yaoq. 30Khul khi mail dai ngal-aq neq, “Nl kovq bhiq nail phaq neq, ngaq nail ganl ngaol. Ngal dal bhiq naol” dai, ge-ai thaq nail daoq bhai maqkhaiq, “Miqyail aivq nail tsaol-aq bhai yalkhaq dal bhiq nail ngaol” dai, ge-ai thaq nail daoq bhai maqkhaiq, khaq sil gaq-i mail ge-a nail bhai ngadao heeq kivq naol. 31Aqdoevq doevq nail Miqyail nail aqlavq lavqkhoel bhai kev lai haq neq, mailma-ail geesil lal nail phaq pevq nail ngaol.

32Jel lal-a nail aqn aqyanq bhai saol-nvq daiq yaoq. Aq-u phao, nuljuq Miqyail nail aqbhaq bhai moel gaq-al ngal-aq neq, khoeq nail jiovq nail maodai phaq bhai ol ol-ail ya daq-a nail ngaol. 33Tsaol-aq iqsanl nail sivtavq bhai, khal nl movq-ail nl lavq nail bhai maqkhaiq, khoeq lavq jiovq lavq nail bhai maqkhaiq, nuljuq ya daq daiq-a nail ngaol. Al ovqtavq, alhai daq thailthaiq nail tsaol-aq nee mail teevq gaq khe-ai, nuljuq iqsanl tsao daq-a nail ngaol. 34Nuljuq thaonq bhai aol nail tsaol-aq bhai noeq kev nail nee ovqtavq, yu nuljuq nail nlmaoq bhai luv dov lal khi ngaol-aoq, nuljuq lavqkhiq teevq tsail daq-a nail ngaol. Khul khi mail dai ngal-aq neq, ngadao juq a dai nee maqtsil meeq jaiq ivq jaiq nail nlmaoq jiav nail ngaol dai, nuljuq heeq nia nail ngaol.

35Alheel ngel-i mail, nuljuq neema ivqdao deel phaq bhai thaq khaonq ha. Khul khi mail dai ngal-aq neq, al bhaqda nee nuljuq kovpavq laiq ma ya nail ngaol. 36Miqyail neema tsaq nail khe-ai, nuljuq nl nail nee ovqtavq, aivq-i mail saljial jaq-ai thaq nail phaq bhai ya kivq dai, nuljuq ol nail neema loq nail ngaol. 37Khul khi mail dai ngal-aq neq, Jalliq lavqkhoel bhai niailhai gevq-ai thaq nail ngaol.

“Lee nail dai,

lainq-ai thaq nail al gaq

aivq maq naq dai,

mao-ail maq maoq lal mail,

kev lee nail ngaol.

38Ngaq nail tsaq nail

daol nail tsaol-aq

neema thaqtsaol nail

bhaqda nee,

aqdoevq ya doevq nail ngaol.

Aivq haoqnaol phao

jiiv kovq haq neq,

ngal aivq bhai teevq peivq-ail

neekhaol maq sil-ail” dai,

ge-ai thaq nail ngaol.

39Thailhai ngaol-aoq, ngadao neq, haoqnao phao jiiv kol-aivq khi luq-ail seil-ail nail tsaol-aq maq ngel. Neema thaqtsaol nail ngel-i mail, hevqkovq nail phaq bhai ya-a nail tsaol-aq ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index