Search form

Heiqbhail 12

Miqyail aivq nail yaq juq bhai cavq bhiq cov bhiq nail ganl

1Neema thaqtsaol nail ganl salkhil khanq nail tsaol-aq al juq ngadao nail teevq jaoq jaol bhee-ai thaq nail ngaol. Alheel ngel-i mail, ngadao bhai lav tsoiq lal nail yaoq phaq yaoq-ao nee bhai khaonq ha-ail ceevq bhel. Ngadao bhai leel thaiq-ai thaq nail oeqbal iqsanl bhai pheel ha-ail ceevq khi, ngadao nail sivtavq bhai lav sav-ai thaq nail gailkhaol bhai neema ivqdao dai thaq khi, tsaol-aivq bhel. 2Tsaol-aivq-u phao, Yeiqsul bhai heldaiq cov-ai thaq yaoq. Aivq neq, ngadao neema thaqtsaol nail phaq bhai iqmoeq ilmoeq khe bhi bhee lal nail gaq ngaol. Aivq nail sivtavq bhai jiav nail lavqkhiq tsail nail phaq bhaqda nee, haqsil nail phaq bhai maq saol-nvq dai, lavqyavq kovtavq-ai khanq sil-a nail ngaol. Niil aq-il, aivq Miqyail nail doiqbev bev ma nail lavqmal phao jaoldeel-nvq thaq nail ngaol. 3Aivq bhai neejiav jiav nail oeqbal yaq juq aivq bhai khal nl movq-ail nl bhiq-u phao, aivq oltsaol nail bhai saol-nvq daiq yaoq dei-eiq. Alhai saol-nvq dai haq neq, gaq maq bhaq nail nee ovqtavq, neema iqsanl maq cov-ail.

4Nuljuq oeqbal nee dev pheel jaq nail ngaol. Thailhai ngaol-aoq, aqsivq dov lee-u kev dai, maq khanq daiq haq-al. 5Aqbhu yaqyov juq bhai cavq bhiq cov bhiq nail khe-ai, Miqyail nuljuq bhai cavq lavq cov lavq nail daoq bhai nuljuq nioil peivq ail-aoq nail laiq. Aivq ge nail:

“Ngaq nail yaqyov-ol,

Heeqphaq Miqyail-i mail

cavq lavq cov lavq nail bhai

aqmeeq-ai naldaiq yaoq.

Aivq naoq bhai khaq khaq-ail

cavq lavq cov lavq-u phao,

neema thaq cov.

6Khul khi mail dai ngal-aq neq,

Miqyail neq,

aivq gaiq-a nail tsaol-aq bhai

cavq bhiq cov bhiq khi,

aivq-i mail

khal hav bhoel nail yaq

yaoq gaq yaoq-ao nee bhai

deeq deeq-ail, cavq bhiq

cov bhiq nail ngaol” dai,

ge-ai thaq nail ngaol.

7Nuljuq-i mail haq nail aoq nail phaq ya daq nail neq, Aqbhu Miqyail-i mail cav lavq cov lavq nail phaq bhai ya nail phaq pevq nail ngaol. Aqbhu yaqyov juq bhai nl bhiq nail khe-ai, Miqyail nuljuq bhai nl lavq nail ngaol. Khul khi mail dai ngal-aq neq, aqbhu maq cavq maq cov bhiq nail yaqyov maq jaol-ail. 8Yaq juq iqsanl mail cavq bhiq cov bhiq nail bhai ya daq nail khe-ai, nuljuq maq ya daq haq neq, nuljuq aivq nail yaq maq ngel-ail. Govbha lavqniil khe yaq ngaol. 9Al ovqtavq, ngadao bhai cavq lavq cov lavq nail dai khi, aqsivq haqjoil phao aqbhu juq jaol nail ngaol. Ngadao aqyu juq bhai ev nail ngaol. A dai nee maqtsil, aqdoevq doevq nail phaq ya dai, aqhaqlal phao khe Aqbhu nail kov-uvq bhai aqmeeq-ai ya jaol nail ngaol. 10Aqsivq haqjoil phao khe ngadao nail aqbhu neq, aqyu juq neema tsaq nail khe-ai teevq yanq lavqkhoel taivq-ail, ngadao bhai cavq lavq cov lavq nail ngaol. Thailhai ngaol-aoq, Miqyail neq, aivq meeq nail haol nail khe-ai, ngadao iqsanl meeq lal haol lal dai, ngadao nail haqbhoil aqmeeq phaq saol-nvq khi, cavq lavq cov lavq nail ngaol. 11Cavq lavq cov lavq nail yaoq phaq yaoq-ao nee bhai ya daq-u phao, lavqkhiq tsail nail phaq maq ngel-ail, noeqhaq nail phaq jiav nail ngaol. Thailhai ngaol-aoq, cavq lavq cov lavq-a nail phaq bhai ya daq-a nail tsaol-aq nail haqbhoil, yaqhao tsaq nail daol nail khi neesal-ovq nail phaq ya nail ngaol.

Miqyail nail geeqlaoq bhai thaq khaonq ha

12Alheel ngel-i mail, gaq maq aol nail nuljuq nail aqlavq gaoqdil khi, gaq maq aol nail nuljuq nail peevqceevq gaq bhi aol kovq lal yaoq. 13Aqkhil maq meeq nail tsaol-aq, khil ceevq maq ya pov-ail mail cavq lai dai, nuljuq nail aqkhil nail haqbhoil gailkhaol daolcoev dai, lav daol yaoq.

14Tsaol-aq yaq iqsanl nee tsaq lai jil lai dai, laijai yaoq. Meeq lal haol lal dai iqsanl, laijai yaoq. Khul khi mail dai ngal-aq neq, maq meeq maq haol nail khul gaq maqkhaiq, Miqyail bhai maq ya moel-ail. 15Nuljuq nail lavqkhoel tsaol-aq teevq gaq ganav Miqyail nail geeqlaoq eeljaol maq ya-ail maq ya pevq-ail dai, yaolphaol yaoq. Aqkhaq khaq deedee nail aqbhaol meeq lal khi, aivq nail dovq-i mail tsaol-aq maodai bhai lav bheeq lav leel nail khe-ai, tsaol-aq teevq gaq-ail alhai maq ya pevq-ail dai, yaolphaol yaoq. 16Ilsaol neq, yaqyov aqivq pevq khi ngaol-aoq, aoq teevq bhaol-i mail aivq nail alyaq phal jaq-a nail ngaol. Aivq khe-ai thaq khi. Aivq neq, khaqmiq iqsanl sev, Miqyail bhai iqsanl maq ev nail tsaol-aq ngaol. Alheel nail tsaol-aq teevq gaq-ail nuljuq nail lavqkhoel bhai maq ya dov lal dai, yaolphaol yaoq. 17Nuljuq heeq nia nail khe-ai, aivq bhai geeqlaoq bivq nail bhai Ilsaol oil movq lal bhiq-u phao, khaonq ha nail bhai ya daq-a nail ngaol. Maivbhil dov dov-ail mailma-ail hal khi ngaol-aoq, noeqpov nail aqyanq maq jiav-ail.

18Nuljuq nail aqphiq aqbhal juq khe-ai, aqlavq iqsanl thoiqtsi nia khi miqjaq iqsanl tovq nail Silnaq gaoqjaoq bhai nuljuq ail kev-a nail maq ngel-ail. Gaoqjaoq al jaoq neq, navtsee dai pevq khi, al nail teevq jaoq bhai nqdil uvthaiq-ai thaq nail nee ovqtavq, lilmoel lil ma bhoe nail ngaol. 19Nqbho jiiv nail aqthel khi daoq ge nail aqthel dov lee nail gaoqjaoq pevq nail ngaol. Ilsaqleiqlal tsaol-aq juq neq, daoq al daoq bhai haoqnao teevq pov ma ya gaiq nail haqbhoil, Molseiq bhai hal-a nail ngaol. 20Khul khi mail dai ngal-aq neq, jaiqyaq iqsanl gaoqjaoq bhai thaoq tuv lal haq neq, lovmav-i mail liv heivq yaoq dai, bivq-ai thaq nail daoq al daoq bhai, aqyu juq maq khanqtsaol-ail. 21Al juq bhai ya moel-u phao, mao-ail geesil lal nail ngel-i mail, “Ngal gee iqsanl geesil, aqjuq iqsanl juq deedee nail ngaol” dai, Molseiq ge nail ngaol.

22Thailhai ngaol-aoq, nuljuq Yeel-ovq gaoqjaoq bhai lal kev-ai thaq nail ngaol. Gaoqjaoq niil jaoq neq, aqdoevq doevq nail Miqyail nail meenq ngaol. Nqtavq kovtavq khe Yeiqlulsaqlaiq meenq iqsanl ngel nail ngaol. Maq ge gil tsaol nail nqtavq gaqkhoel juq lavqkhiq teevq tsail jil lai duq iqsanl, ngel nail ngaol. 23Nqtavq kovtavq khe haoqgavq phaldoiq lavqkhoel-ai aqmil gevq bhoel-ai thaq nail iqmoeq ilmoeq doevq lee-a nail tsaol-aq juq jil lai duq iqsanl, pevq nail ngaol. Tsaol-aq iqsanl bhai yalkhaq dal nail Miqyail nail jaol duq iqsanl pevq nail ngaol. Bhee lal-a nail tsaq nail daol nail tsaol-aq nail aqhaqlal iqsanl al bhai jaol nail ngaol. 24Daoqma saljial aqsivq nail tsaolkhaiq Yeiqsul iqsanl jaol nail ngaol. Aqbheiqlal nail aqsivq daoq ge nail nee maqtsil, hoel ha-ai thaq nail Yeiqsul nail aqsivq al, mao-ail meeq nail daoq ge nail ngaol.

25Nuljuq bhai daoq ge lavq nail Miqyail nail daoq bhai naldaiq nail tsaol-aq pevq yaoq. Khul khi mail dai ngal-aq neq, miltsaq kovtavq bhai cavq lavq cov lavq nail Molseiq nail daoq bhai maq naldaiq-a nail ngel-i mail, maq ya jel ail-a nail ngaol. Thailhai phal-iq neq, nqtavq nee mail cavq lavq cov lavq nail Miqyail nail daoq bhai ngadao khaonq ha haq neq, teevq thal-iq maq ya jel-ail. 26Aq-u phao, aivq nail aqthel-i mail miltsaq bhai bhi luv lal-a nail ngaol. Thailhai ngaol-aoq, niil aq-il aivq-i mail saljial jaq-ai thaq nail neq, “Ngal miltsaq bhai teevq pov gaoq bhi luv lal nail nee ovqtavq, nqtavq bha iqsanl bhi luv lal nail ngaol” dai, jaq-ai thaq nail ngaol. 27Teevq pov gaoq bhi luv lal naol dai, ge-ai thaq nail neq, maq luv lal nia nail juq neq khaq mao iqsanl ivqdao dai jiav khi, luv lal nia nail juq neq, oil haq nail ngaol dai, ge movq nail ngaol. Luv lal nia nail al juq neq, teivq-ai thaq nail juq ngaol.

28Kaovciv maq dao lal nia nail milkhaoq ngadao ya thaq-ai thaq nail ngel-i mail, Miqyail bhai tsiqeeq bhel. Ev khi, geesil nail lavqkhoel, Miqyail neema tsaq nail khe-ai, aivq bhai uqhuq thaoq bhel. 29Khul khi mail dai ngal-aq neq, ngadao nail Miqyail neq, poiv jaq thailthaiq nail miqjaq pevq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index