Search form

Heiqbhail 13

Miqyail neekhaol sil dai nl nail ganl

1Aqivq jaqbheq Khali yaq bhai khaq mao iqsanl gaiq-a yaoq. 2Maq nioil peivq dai, daq-i bhai aqmeeq-ai hav yaoq. Khul khi mail dai ngal-aq neq, tsaol-aq teevq pav ganav juq daq-i bhai hav-u phao, aqyu juq maq heeq nia-ail, nqtavq gaqkhoel bhai hav ya-a nail ngaol. 3Nuljuq thaonq bhai aol nail tsaol-aq nee mail aol nail khe-ai, saol-nvq-ai thaq khi, aqyu juq bhai thaq nioil peivq. Nuljuq iqsanl, aqsivq haqjoil phi-nq thaq nail ngel-i mail, khoeq nail jiovq nail bhai ya daq thailthaiq nail tsaol-aq bhai thaq nioil peivq.

4Tsaol-aq iqsanl mail hevq pheel maol pheel jaq nail phaq bhai thaqeeq yaoq. Miqyaq khaqma nail gaiqlaq bhai saljial ya ivq nail ngaol. Khul khi mail dai ngal-aq neq, khaqmiq sev nail tsaol-aq khi yu nee bheeq nail leel nail tsaol-aq bhai Miqyail dal bhiq nail ngaol. 5Phul heel oil movq nail neema taivq-ail aol khi aqdoevq thaq doevq. Nuljuq khal jiav nail juq bhai neekhaol sil yaoq. Khul khi mail dai ngal-aq neq,

“Ngal naoq bhai teevq thal-iq

maq gaoq maq gail ail.

Teevq thal-iq

maq khaonq ha-ail” dai,

Miqyail ge-ai thaq nail ngaol.

6Alheel ngel-i mail,

“Heeqphaq Miqyail neq,

ngaq bhai heldaiq

phail nail gaq ngaol.

Ngal khul teevq phaq

bhai iqsanl

geesil nail maq jiav.

Tsaol-aq yaq ngaq bhai

khul khi nia nail-aiq” dai,

ngadao geesil nail neema maq aol nail lavqkhoel nee ge kivq nail ngaol.

7Nuljuq nail kovtavq bhai aqivq jiovq khi nuljuq bhai Miqyail nail daoq cavq lavq cov lavq-a nail juq bhai thaq nioil peivq. Aqyu juq aqdoevq doevq-u phao, nl-a hal-a nail juq bhai nuljuq saol-nvq khi, aqyu juq nail neema thaqtsaol nail phaq bhai saol oil yaoq. 8Yeiqsul Khali neq, teevq thal-iq maq phal lal-ail, aivq neq, milgaol, yanqgaol khi nqmaq maqluv halyeel teevq phaq ngaol.

9Maq dul lai nail, maodai phaq cavq lavq cov lavq nail haoqnao thaq tsaothe. Miqyail nail geeqlaoq eeljaol bhaqda nee, neema ivq lal haq neq, meeq deedee nail ngaol. Jaq nail daol nail aol thaoq nail bhaqda nee mail neema ivq lal-a nail maq ngel-ail. Jaq nail daol nail aol thaoq nail tsaol-aq, al nail lavqkhoel nee geeqlaoq maq ya-ail. 10Ngadao laol duq teevq dao jiav nail ngaol. Saiqgov gov ma lavqkhoel-ai ganl nl nail Philma juq, al bhai laol bhiq-ai thaq nail phaq+ bhai maq jaq khaoq-ail.

11Philma aqivq gaq neq, meeq dee haol deedee nail jaol duq lavqkhoel jaiqyaq nail aqsivq tsiq bhoel laivq khi, oeqbal tsiqhaol nail haqbhoil laol bhiq lai-a nail ngaol. Thailhai ngaol-aoq, laol nail haqbhoil heivq-a nail jaiqyaq nail aqmaol neq, laolkhoiq lavq niil phao ya kheq haq nail ngaol. 12Alhai dul dai, Yeiqsul iqsanl aivq nail aqsivq-i mail tsaol-aq yaq bhai bhi meeq bhi haol lal nail dai khi, laolkhoiq lavq niil phao khanqsil-a nail ngaol. 13Yu-i mail khal nl movq-ail nl bhiq nail bhai Yeiqsul daq-a nail khe-ai, ngadao iqsanl daq daq-ail yu jaol nail jail-nq nee, Yeiqsul jaol nail phao dov-ail bhel. 14Khul khi mail dai ngal-aq neq, niil yeel bhai doevq-u phao, ngadao nail ivq nail meenq maq jiav-ail. Yaqhao khe jiav lee nail meenq bhai ngadao noeqthunq-ai thaq khi halpov thailthaiq nail ngaol.

15Alheel ngel-i mail, ngadao Yeiqsul bhai juq khi, Miqyail bhai tsiq eeq nail phaq khaq mao iqsanl laol bhiq bhel. Alhai laol bhiq nail neq, ngadao nail moeqthaoq-i mail aivq nail aqmil bhai tsiq eeq nail bhai ge nail ngaol. 16Aqmeeq phaq teevq gaq nee teevq gaq tsaojao-ai bhi nail phaq bhai maq nioil peivq dai, nl yaoq. Khul khi mail dai ngal-aq neq, al neq, Miqyail neema tsaq nail laol bhiq nail phaq pevq nail ngaol. 17Nuljuq nail kovtavq bhai aqivq jiovq nail juq nail daoq naldaiq khi, aqyu juq nail kov-uvq bhai aqmeeq-ai jaol yaoq. Khul khi mail dai ngal-aq neq, aqyu juq-i mail nl-a hal-a nail ganl aqyu juq Miqyail bhai ya ge bhiq lai nail ngel-i mail, aqyu juq nuljuq bhai nqkiv n-gaol maqkhaiq, heldaiq phail nail ngaol. Aqyu juq alhai heldaiq phail-u phao, noeqhaq nail phaq maq jiav dai, lavqkhiq teevq tsail nl nia hal nia dai, aqyu juq nail daoq aqmeeq-ai naldaiq yaoq. Maq naldaiq haq neq, nuljuq nail haqbhoil teevq phaq-ail ganl maq tsoiq-ail.

18Ngaq nail haqbhoil geeqlaoq hal lavq yaoq. Ngaq nail heeq kivq nail neema maq laiq maq tsa-ail dai, ngal heeq kivq naol. Khul khi mail dai ngal-aq neq, ngal khaq mao iqsanl aqmeeq phaq taivq-ail nl movq-ail nial. 19Ngal nuljuq jaol nail bhai lavqtsail mail kovq lal nia dai, geeqlaoq hal lavq yaoq dai, ngal nuljuq bhai hal deedee nail ngaol.

Geeqlaoq bivq khi haoqnao naosaq khe daoq

20Neesal bhi ovq nail Miqyail, nqmaq maqluv halyeel ivq nail daoqma saljial nail aqsivq bhi dov lee-a nail bhaqda nee, ngadao nail Heeqphaq Yeiqsul bhai bhi doevq kovq lal-a nail ngaol. Yeiqsul neq, mao-ail eeq nail yaol lovq nail gaq pevq nail ngaol. 21Neesal bhi ovq nail Miqyail al gaq, nuljuq bhai, aivq neema tsaq nail khe-ai, aqmeeq phaq yaoq phaq yaoq-ao nee nl nia nail tsaol-aq bhi pevq lal dei-eiq. Yeiqsul Khali bhaqda nee, Miqyail nail neekhaol teevq sil nl nail tsaol-aq, aivq nuljuq bhai bhi pevq lal dei-eiq. Yeiqsul Khali bhai nqmaq maqluv halyeel tsiqeeq bhel. Aqmiq.

22Aqivq jaqbheq juq-ol, ngal nuljuq bhai haoqgavq davqnil nil dai, gevq bhoel-ai lavq-a nail ngaol. Ngal nuljuq bhai gaq bivq nail daoq bhai ol khi naldaiq yaoq dai, ngal nuljuq bhai hal nail ngaol.

23Ngadao nail jaqbheq Tilmolseiq bhai yu thaonq nee phaiq dov gaq-ao nail ngaol dai, nuljuq bhai bhi heeq kivq movq nail ngaol. Aivq lavqtsail mail lal kev haq neq, ngal iqsanl aivq nee mail nuljuq jaol nail bha lal khi mail, nuljuq bhai ya moel nail ngaol.

24Ngal nuljuq bhai noeq moel naol gaiq-a naol dei-eiq, nuljuq nail kovtavq bhai aqivq jiovq nail juq iqsanl bhai khi Khali yaq juq iqsanl bhai ge bhiq ail dei-eiq. Niai jaol nail Iqtaqliq milkhaoq khe aqivq jaqbheq juq iqsanl, nuljuq bhai noeq moel naol dai, daoq cavq cavq bhoel-ai lavq-a nail ngaol.

25Nuljuq iqsanl nail kovtavq bhai geeqlaoq eeljaol bhi jiav dei-eiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index