Search form

Heiqbhail 6

1Alheel ngel-i mail, ngadao juq neq, Khali nail ganl daoqthaoq thaoq nail phaq bhai oil thaq-ail ceevq khi, eeq lal heel lal khi bhee lal dai, nl-aivq bhel. Nl bheeq-a nail juq bhai, noeqpov nail phaq maqkhaiq, Miqyail bhai neema thaqtsaol nail phaq maqkhaiq, 2ulcuvq saol nail ganl cavq bhiq nail phaq bhai maqkhaiq, aqlavq bavq dav nail phaq bhai maqkhaiq, doevq kovq lal nail phaq maqkhaiq, nqmaq maqluv halyeel yalkhaq dal ceiv nail phaq bhai maqkhaiq, al juq bhai taivq-ail daoqthaoq thaoq thaoq-ail thaq gaoq jaol. 3Miqyail neema tsaq haq neq, ngadao al juq bhai khaonq ha-ail ceevq khi iqmoeq phao nl-aivq bhel.

4Khul khi mail dai ngal-aq, aqbhaq bhai teevq pov moel daiq-a nail nee ovqtavq, nqtavq kovtavq khe kovpavq bhai ya daiq khi, Meeqnail Haolnail Aqhaqlal bhai iqsanl ya-a nail tsaol-aq juq neq, 5Miqyail nail mao-ail meeq nail daoq bhai maqkhaiq, yaqhao khe yeel nail bhaqaoq bhai maqkhaiq, ya khi ngaol-aoq, 6aqyu juq al juq bhai khaonq ha haq neq, oeqbal teevq pov maq noeq pov kivq yaoq-aol. Khul khi mail dai ngal-aq, aqyu juq Miqyail nail Yaqyov bhai lavqyavq kovtavq-ai gaoq tavq heivq khi, milkhaoq yaq nail sivtavq bhai, teevq pov gaoq bhi haqsil nail khe-ai, dul nail ngaol.

7Mee nia pov aol lee nail maoq-aol bhai ya siv khi, nl jaq keivq daol nail tsaol-aq juq nail haqbhoil ganl tsoiq nail aqheeq allu bhi heeq lee nia nail miltsaq bhai, Miqyail geeqlaoq bivq nail ngaol. 8Thailhai ngaol-aoq, miltsaq al aqgoe khi moeqgaq taivq-ail doevq lal haq neq, ganl maq tsoiq nail ngel-i mail, iqkhail yavq nail bhai ya daq nail aqjail jail lal-aoq nail ngaol. Haoqnao naosaq-u phao, miqjaq-i mail kheq ha nail ngaol.

9Ngal mao-ail gaiq-a nail aqtsaoq juq-ol, nvjuq niailhai ge khi ngaol-aoq, nuljuq a dai nee maqtsil meeq nail phaq ya nail ngaol dai, nvjuq neema thaqtsaol nail ngaol. Meeq nail al phaq neq, hevqkovq nail phaq bhai tavq nail geeqlaoq ngaol. 10Khul khi mail dai ngal-aq neq, Miqyail neq, tsaq nail daol nail ngaol. Nuljuq-i mail nl-a hal-a nail juq bhai aivq maq nioil peivq-ail. Miqyail bhai gaiq-a nail lavqkhoel nuljuq-i mail Khali yaq juq bhai tsaojao-ai nail nee ovqtavq, niil aq-il iqsanl tsaojao-ai bhiq nail ganl bhai aivq maq nioil peivq-ail. 11Nuljuq-i mail noeqthunq nail khe-ai pevq lal bhee lal dai, nuljuq yaoq gaq yaoq-ao nee haoqnao naosaq-u phao kev dai, laijai khi nl-ail nail bhai nvjuq oil movq deedee-ail nial. 12Alheel ngel-i mail, aqdoil doil nail tsaol-aq thaq pevq lal. Neema thaqtsaol khi ol nail bhaqda nee, Miqyail-i mail saljial jaq-ai thaq nail bhai ya-a nail tsaol-aq bhai, saol oil yaoq.

13Miqyail Aqbhaqlaqhaq bhai saljial jaq-u phao, aivq bhai aivq juq khi khanq-a nail ngaol. Khul khi mail dai ngal-aq neq, aivq nee maqtsil eeq nail gaq maq jaol-ail. 14“Ngal naoq bhai maldil geeqlaoq bivq naol. Ngal naoq bhai maldil bhi jeq bhi ov lee naol” dai, Miqyail saljial jaq-ai thaq nail ngaol. 15Aqbhaqlaqhaq ol khi daonq-a nail ngel-i mail, Miqyail-i mail aivq bhai saljial jaq-ai thaq nail khe-ai, ya-a nail ngaol.

16Tsaol-aq nail gaiqlaq bhai, saljial jaq-u phao, yovqgavq nee maqtsil eeq nail gaq bhai juq khi jaq nail ngaol. Alhai jaq-a nail ngel-i mail, yaqhao jil pheeljaq nail phaq maq jiav yaoq-aol. 17Miqyail iqsanl, “Ngaq-i mail noeqceiv-ai thaq nail phaq maq phal lal-ail” dai, saljial ya-ai thaq nail tsaol-aq bhai bhi heeq kivq movq-u phao, aivq bhai aivq juq khi khanq-ai thaq nail ngaol. 18Miqyail-i mail saljial jaq-a nail phaq khi khanq-a nail al nvq phaq bhaqda nee, jel-ail nail phaq bhai tsaoq bhoel lavq khi iqmoeq phao jiav nail noeqthunq nail phaq bhai ivqdao dai, nieivq thaiq-ai thaq nail ngadao juq bhai, gaq bivq lavq-a nail ngaol. Maq phal lal nia nail al nvq phaq bhai Miqyail goiqbhaoq maq bhaoq-ail. 19Noeqthunq nail al neq, ngadao nail neema nail haqbhoil ivq khi maq phal ail nia nail hail nail khulu lu ma khe-ai, dul nail ngaol. Hail nail khulu lu ma al neq, haqphal phal ma thao pav-ai thaq nail meeq dee haol deedee nail lavqkhoel phao, khu tse-ai thaq nail ngaol. 20Maqlaqkhilsaqdaiv Philma nail joiqjaq ovq nail khe-ai, Yeiqsul nqmaq maqluv halyeel Philma pevq khi, ngadao nail haqbhoil al bhai iqmoeq aol lai-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index