Search form

Heiqbhail 9

Miltsaq kovtavq khe saiqgov gov ma lavqkhoel bhai uqhuq thaoq nail ganl

1Iqmoeq-u phao nee ge bhiq-a nail daoqma saljial lavqkhoel bhai Miqyail bhai uqhuq thaoq nail aol juq aol nail ngaol. Tsaol-aq yaq-i mail cov-a nail uqhuq thaoq nail saiqgov gov ma iqsanl jiav nail ngaol. 2Saiqgov gov ma al nail lavqkhoel-ai, iqmoeq-u khe kev lee nail jaol duq bhai neq, phalmanq tsiq dav duq, kovqkhail khi laol bhiq-ai thaq nail khaqmul jiav nail ngaol. Jaol duq al duq bhai neq, meeq nail haol nail jaol duq dai, khul nail ngaol. 3Saiqgov gov ma nail lavqkhoel khe, thaoq pav-ai thaq nail haoqnao khe jaol duq neq, meeq dee haol deedee nail jaol duq dai, khul nail ngaol. 4Al nail lavqkhoel, heel leivq-ai thaq nail huqbhiq nil nail phaq laol bhiq duq khi, thunq heeq lao lao-ail heel leivq-ai thaq nail daoqma saljial nail thunq jiav nail ngaol. Thunq al heeq nail lavqkhoel bhai, maqnav khaqmul aol nail heel iqlaoq, daq tsuq tsuq nail Aqloq nail joiqniovq khi, daoqma saljial gevq-ai thaq nail lovmav dailpav aol nail ngaol. 5Thunq al heeq nail kovtavq bhai, seiqleiq khaoqsail eeq nail Kheiqlulbheiq dai khul nail maolkhoel nvq maol bhi jiav-a nail ngaol. Aivq nail aqdao neq, oeqbal phaiq duq dai khul nail thunq al thunq nail kovtavq bhai uvthaiq-ai thaq nail ngaol. Ganl niil juq iqsanl mail niil aq-il nuljuq bhai maq ge bhiq-ail.

6Al juq bhai alhai lav sav-ai thaq nail ngaol. Philyaq juq yovqgavq nail ganl nl dai, saiqgov gov ma iqmoeq khe kev lee nail jaol duq bhai khaq mao iqsanl, aol lai nail ngaol. 7Thailhai ngaol-aoq, nvq dao teevq dao bhai neq, Philma gaq taivq-ail aol lai nia nail ngaol. Aivq aol lai-u phao, aivq nail haqbhoil maqkhaiq, tsaol-aq yaq-i mail maq heeq nia dai, nl laiq-a nail oeqbal nail haqbhoil maqkhaiq, laol bhiq nail aqsivq oil laivq nail ngaol. A bhai neq, teevq kovq teevq pov taivq-ail ya aol lai-ail teevq-eel ngaol. 8Alhai nl-a nail bhaqda nee, iqmoeq-u phao nee cov-ai thaq nail saiqgov gov ma al maq peivq ha-u kev dai neq, meeq dee haol deedee nail jaol duq bhai aol lai nail gailkhaol maq daol lal haq-al dai, Meeqnail Haolnail Aqhaqlal phaodaiq lavq-a nail ngaol. 9Ganl al juq neq, niil yeel nail haqbhoil daoqma uqhuq daoq teevq-eel ngaol. Al bhai danq bhiq nail phaq danq bhi khi laol bhiq nail phaq laol bhiq khi ngaol-aoq, al juq neq, Miqyail bhai uqhuq thaoq lai nail tsaol-aq nail heeq nia nail neema bhai neekhaol teevq sil maq nl bhee nia-ail. 10Al juq neq, jaq nail daol nail phaq maqkhaiq, tsiq haol nail mee nia phaq maqkhaiq, aqsivq haqjoil phao taivq-ail tavq nail aol juq pevq nail ngaol. Aqsivq maq lav phal nail gaiqlaq bhai, aol al juq bhi thaoq-a nail ngaol.

Khali nail aqsivq nail ganl

11-12Thailhai ngaol-aoq, Khali neq, niil aq-il khe kev lee-a nail aqmeeq phaq bhai tavq nail Philma aqivq gaq khe-ai, lee-a nail ngaol. A bhai nee ngal-aq, aivq eeq jaiq bhee jaiq nail saiqgov gov ma bhai lai pav khi, teevq pov taivq-ail meeq dee haol deedee nail jaol duq bhai aol lai-a nail ngaol. Saiqgov gov ma al neq, aqlavq-i mail cov-a nail maq ngel-ail. Miltsaq nee tavq nail iqsanl maq ngel-ail. Aivq meeq dee haol deedee nail jaol duq bhai aol lai-u phao, civqmeiv khi niaoqnel niaoq yaq nail aqsivq oil khi aol lai-a nail maq ngel-ail. Aivq aivq nail aqsivq oil khi aol lai-a nail ngel-i mail, ngadao nqmaq maqluv halyeel hevqkovq nail phaq ya dai, aivq nl-a nail ngaol. 13Khul khi mail dai ngal-aq neq, civqmeiv khi niaoqnel laqsil nail aqsivq maqkhaiq, niaoqnel niaoqkhal laol bhiq-a nail lailmevq maqkhaiq, aolsaolkovq phao maq meeq maq haol nail tsaol-aq bhai haiq bav bhiq-u phao, aqsivq haqjoil phao meeq lal haol lal dai, nl nia haq neq, 14Khali nail aqsivq neq, a dai nee maqtsil khadai nl nia nail-aiq. Aivq neq, nqmaq maqluv halyeel doevq nail Aqhaqlal Miqyail bhai juq khi, malbavq teevq peivq-ail maq daol nail, aivq nail aqmaol Miqyail bhai laol bhiq-a nail ngaol. Aivq nail aqsivq neq, ngadao nail heeq nia nail neema lavqkhoel bhai aol nail bheeq nail leel nail juq bhai tsiq haol bhiq khi, aqdoevq doevq nail Miqyail nail haqbhoil nl nia hal nia dai, nl lavq-a nail ngaol.

15Iqmoeq-u phao jaq-ai thaq nail daoqma saljial nail kov-uvq bhai ngadao jaol-u phao, bheeq nail leel nail juq nail lavqkhoel ngadao bhai bhi jel-ail nail dai khi, Yeiqsul khanq sil-a nail ngaol. Alheel ngel-i mail, khul-ai thaq nail tsaol-aq bhai, “Ngal nuljuq bhai bivq naol” dai, Miqyail-i mail ge-ai thaq nail nqmaq maqluv halyeel ivq nail jaiqbhoil ya dai, Yeiqsul neq, daoqma saljial aqsivq nail gaiqlaq khe tsaol-aq ngaol.

16Jaiqbhoil bivq naol dai, ge ceiv-ai thaq nail haoqgavq jiav haq neq, jaiqbhoil bivq nail gaq maldil sil-aoq thaq nial dai, iqmoeq-u phao nee ya heeq kivq nail ngaol. 17Khul khi mail dai ngal-aq neq, jaiqbhoil niailhai bivq naol dai, haoqgavq gevq-ai thaq nail khe-ai, bivq nail aqheel gaq sil haq neq, jaiqbhoil bivq nia nail ngaol. Bivq nail aqheel gaq maq sil nail gaiqlaq, gevq-ai thaq nail khe-ai jaiqbhoil maq bhoil bhiq kivq-ail. 18Iqmoeq-u phao jaq-ai thaq nail daoqma saljial al iqsanl, aqsivq maq dov dai, nl khal leevq-a nail maq ngel-ail. 19Khul khi mail dai ngal-aq neq, aoldaoq kovqdaoq lavqkhoel-ai ge bhiq-a nail daoq yaoq daoq yaoq-ao nee, Molseiq Ilsaqleiqlal tsaol-aq iqsanl bhai ge bhiq khi, niaoqnel niaoq yaq khi civqmeiv nail aqsivq ulcuvq kheq khi, neltsaiq deel yaol yaq nail aqmevq khi lunl nail aqnaiq-i mail haoqgavq pavqjiov khi tsaol-aq al juq bhai maqkhaiq, aivq jiivq bav bhiq-a nail ngaol. 20“Aqsivq al neq, nuljuq bhi tsaothe nail haqbhoil, Miqyail-i mail nuljuq bhai jaq-ai thaq nail daoqma saljial bhai tavq nail aqsivq ngaol” dai, ge bhiq-a nail ngaol. 21Saiqgov gov ma khi a bhai khal yuq nail nlmaoq iqsanl bhai, alhai dul dai, aivq aqsivq jiivq bav-a nail ngaol. 22Aoldaoq kovqdaoq bivq-ai thaq nail khe-ai, iqsanl mail dai ge kivq dai, aqsivq-i mail tsiq haol-a nail ngaol. Aqsivq dov nail phaq maq jiav haq neq, oeqbal phaiq nail phaq maq jiav-ail.

Oeqbal bhai oil ha nail dai khi, Yeiqsul aivq nail aqmaol laol bhiq-a nail ganl

23Nqtavq kovtavq khe maolkhoel juq bhai tsiq haol nail dai khi, alheel juq ya nl haq neq, nqtavq kovtavq khe maldil juq bhai tsiq haol dai, a dai nee maqtsil meeq nail laol bhiq nail phaq ya jiav nail ngaol. 24Khul khi mail dai ngal-aq neq, aqlavq-i mail lav sav-ai thaq nail meeq nail haol nail jaol duq bhai Khali aol lai-a nail maq ngel-ail. Jaol duq al neq, maldil deel jaol duq al nail maolkhoel teevq-eel ngaol. Aivq niil aq-il ngadao nail haqbhoil Miqyail nail sivtavq bhai aqmaol moel dai, nqtavq kovtavq bhai aol lai-a nail ngaol. 25Philma neq, yovqgavq nail aqsivq maq oil dai, jaiqyaq nail aqsivq oil khi, meeq dee haol deedee nail jaol duq bhai yaoq kovq yaoq-ao nee aol lai nail ngaol. Thailhai ngaol-aoq, Khali neq, aivq nail aqmaol alhai mee nia pov ya laol bhiq nail maq ngel-ail. 26Alhai ya laol bhiq nail kheel nul neq, nqtavq khi miltsaq teivq-u phao nee aivq mee nia pov ya khanq sil nail ngaol. Thailhai ngaol-aoq, oeqbal oil ha nail dai khi, haoqnao naosaq khe aqyanq niil nail lavqkhoel, aivq teevq pov taivq-ail dov lee khi, aivq nail aqmaol laol bhiq-a nail ngaol. 27Ngadao tsaol-aq teevq pov ya sil khi, yaqhao yalkhaq dal nail bhai ya daq nail ngaol. 28Alhai dul dai, tsaol-aq nail oeqbal bhai phi ha nail dai khi, Khali aivq nail aqmaol teevq pov taivq-ail laol bhiq nail bhai ya daq-a nail ngaol. Aivq nvq pov teevq pov yavq kha lee-u phao, oeqbal bhai teevq peivq-ail maq tavq-ail yavq kha lee khi, aivq bhai noeqthunq nail tsaol-aq bhai hevqkovq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index