Search form

Yaqkov 1

Iqmoeq ilmoeq khe daoq

1Ngal neq, Miqyail khi Heeqphaq Yeiqsul Khali nail yaqkav Yaqkov ngaol. Gaoq ail gail ail-a nail Miqyail nail tsaol-aq tsel-nvq jeq-e bhai haoqgavq niil gevq bhoel-ai leevq-a nail ngaol. Nuljuq iqsanl bhai daoq tsaoq phuq naol.

Miqyail bhai neenoeq neekha hal nail ganl

2Ngaq nail aqivq jaqbheq juq-ol, haq nail aoq nail phaq khi laonqdaiq nail maodai phaq nuljuq nail kovtavq bhai kev lee-u phao, lavqkhiq tsail yaoq. 3Khul khi mail dai ngal-aq, nuljuq nail neema thaqtsaol nail phaq bhai laonqdaiq nail phaq ya daq-u phao, gaq lai haq neq, ol nia jaiq lal nail ngaol dai, nuljuq heeq nia nail ngaol. 4Nuljuq khul teevq phaq iqsanl ge duq maq jiav nail nee ovqtavq, khul teevq phaq iqsanl maq ya theq-ail mail, yaoq phaq yaoq-ao nee bhee dai, oltsaol nail neema bhi maoq jaiq lal khi bhi bhee lal yaoq. 5Nuljuq nail lavqkhoel bhai teevq gaq ganav neenoeq neekha theq nail ngel haq neq, Miqyail bhai hal yaoq. Khul khi mail dai ngal-aq, Miqyail neq, tsaol-aq yaq iqsanl bhai, laoqniul maq niul dai, neema kev khi bivq nail ngaol. 6Thailhai ngaol-aoq, nuljuq geeqlaoq hal-u phao, neema thaqtsaol khi hal yaoq. Neema pov pov lav lav dai, thaq jiav. Neema pov pov lav lav dai aol nail tsaol-aq neq, lilmoel khal bhoe nail phao ail nail, iqyaq iqma eelkhaol thaoq nail khe-ai, dul nail ngaol. 7Alheel nail tsaol-aq bhai neq, “Miqyail ngaq bhai teevq phaq ganav bivq lavq nail ngaol” dai, thaq noeq. 8Khul khi mail dai ngal-aq aivq neq, neenoeq nvq phaq noeq khi, nl nail hal nail yaoq phaq yaoq-ao nee nail lavqkhoel saljial maq ivq nail tsaol-aq ngaol.

9Aqivq jaqbheq Khali yaq teevq gaq ganav, yu nail lavqovq theq khi ngaol-aoq, Miqyail nail sivtavq bhai neq, seiqleiq khaoqsail jiav nail ngel-i mail, lavqkhiq tsail heeq phaq-ail tsaq nail ngaol. 10Aqivq jaqbheq Khali ya teevq gaq ganav, hulmeeq meeq khi ngaol-aoq, Miqyail nail sivtavq bhai neq, yu nail lavqovq theq nail tsaol-aq khe-ai dul nail ngel-i mail, lavqkhiq tsail heeq phaq-ail tsaq nail ngaol. Khul khi mail dai ngal-aq, miltsaq kovtavq khe hulmeeq meeq nail tsaol-aq juq neq, moeqgaq nail aqeiv khe-ai peivq-ail gil nail ngaol. 11Nlma dov lal khi nltsal kav lal laol lal-u phao, moeqgaq neq, khuq-ail kov-ail nail ngaol. Aqeiv iqsanl ga-ail khi, heldaiq meeq nail phaq iqsanl peivq-ail gil nail ngaol. Alhai dul dai, hulmeeq meeq nail tsaol-aq juq iqsanl, yovqgavq nail ganl nl nl-ail jaol-u phao, luq-ail seil-ail gil nail ngaol. +

Laonqdaiq nail phaq khi mail jalmul mul nail phaq

12Haq nail aoq nail phaq khi laonqdaiq nail phaq bhai ya daq-u phao, oltsaol nail tsaol-aq neq, geeqlaoq eeq nail ngaol. Khul khi mail dai ngal-aq, laonqdaiq nail phaq bhai ya daq-u phao, gaq lai nail tsaol-aq neq, aqdoevq bhi doevq nail heel uqtsaoq kovpavq ya nail ngaol. Kovpavq al neq, “Ngaq bhai gaiq-a nail tsaol-aq bhai ngal bivq naol” dai, Miqyail-i mail saljial jaq-ai thaq nail heel uqtsaoq al tsaoq ngaol.

13Tsaol-aq khul gaq maqkhaiq, jalmul mul nail phaq bhai ya daq-u phao, “Miqyail ngaq bhai jalmul mul nail niil” dai, teevq gaq iqsanl thaq ge. Khul khi mail dai ngal-aq, haqeiv nail phaq Miqyail bhai jalmul maq mul nia-ail. Alhai dul dai, Miqyail tsaol-aq teevq gaq bhai iqsanl, jalmul maq mul-ail. 14Thailhai ngaol-aoq, tsaol-aq khul gaq maqkhaiq, yovqgavq nail lavqkhoel bhai aol nail maivjeel jeel nail neema al oeqbal nl yaoq dai, aivq bhai jalmul mul khi, hel-aivq bhiq nail ngaol. 15A bhai nee ngal-aq, aivq nail lavqkhoel khe aol nail maivjeel jeel nail neema al, yaqbeiv uvq nail khe-ai uvq lai khi, oeqbal bhi doevq lee nail ngaol. Oeqbal iqsanl eeq lal khi, sil nail phaq bhi doevq lee nail ngaol.

16Ngal mailma-ail gaiq-a nail aqivq jaqbheq juq-ol, thaq noeq bheeq dei-eiq. 17Geeqlaoq aqmeeq iqsanl khi mail, bhee deedee nail kovpavq iqsanl mail, nqtavq kovtavq bhai jaol nail, aqbhaq nail Aqbhu nee mail dov lee nail ngaol. Aivq neq, teevq thal iqsanl maq pov maq phal lal-ail. Aivq nail aqbhaq lavqkhoel bhai bhi phaq lal nail aqhaiq maq aol-ail. 18Khal teivq-ai thaq nail yaoq phaq yaoq-ao nee nail lavqkhoel ngadao neq, iqmoeq ilmoeq heeq lee-a nail aqheeq+ khe-ai pevq lal dai, Miqyail neema tsaq nail ngel-i mail, maldil tsaq nail daoq bhai juq khi, ngadao bhai bhi doevq lavq-a nail ngaol.

Miqyail nail daoq bhai naldaiq khi nl tsao nail ganl

19Ngal mailma-ail gaiq-a nail aqivq jaqbheq juq-ol, nuljuq ganl niil juq bhai heeq kivq heeq phaq-ail tsaq nail ngaol. Yu daoq ge nail bhai aqmeeq-ai naldaiq yaoq. Daoq lavqtsail mail thaq ge. Neema lavqtsail mail thaq phail. 20Khul khi mail dai ngal-aq, tsaol-aq yaq-i mail neema phail nail phaq neq, Miqyail nail tsaq nail daol nail phaq maq bhi dov lal nia-ail. 21Alheel ngel-i mail, aqcavq phaq iqsanl khi mail, maq meeq maq jaq nail phaq iqsanl mail khaonq ha gil yaoq. Neenuq neebeiv aol nail lavqkhoel, nuljuq nail neema lavqkhoel bhai kha-ai thaq nail Miqyail nail daoq bhai hav bhoel yaoq. Daoq al neq, nuljuq bhai hevqkovq nia nail ngaol.

22Nuljuq neq, Miqyail nail daoq bhai hav bhoel khi nl tsao nail tsaol-aq pevq yaoq. Naqkhaol bhai taivq-ail gaiq nail tsaol-aq thaq pevq. Naqkhaol taivq-ail gaiq nail tsaol-aq pevq haq neq, yovqgavq bhai yovqgavq goiqbhaoq bhaoq nail tsaol-aq ngaol. 23Miqyail nail daoq bhai ya gaiq-a nail khe-ai, maq nl maq hal tsao nail tsaol-aq juq neq, phaoqdaiq bhai yovqgavq nail maivphaoq yovqgavq heldaiq nail tsaol-aq khe-ai dul nail ngaol. 24Aivq phaoqdaiq bhai heldaiq khi ngaol-aoq, dov ail haq neq, aivq nail maivphaoq khal heel dai, teevq pov taivq-ail nioilpeivq-ail nail ngaol. 25Thailhai ngaol-aoq, tsaol-aq yaq bhai bhi jel-ail nail bhee deedee nail aoldaoq kovqdaoq bhai khaq mao iqsanl heldaiq khi, khal ya gaiq-a nail phaq bhai maq nioilpeivq dai, aqmeeq-ai tsaothe khi nl tsao hal tsao nail tsaol-aq neq, aivq-i mail khal nl khal hal nail phaq bhai Miqyail geeqlaoq bivq nail ngaol.

26“Ngal uqhuq thaoq nail aolsaolkovq aqmeeq-ai thaoq thailthaiq naol” dai, tsaol-aq teevq gaq ganav noeq khi ngaol-aoq, aivq nail moeqthaoq bhai aivq maq gaq lai haq neq, yovqgavq bhai yovqgavq goiqbhaoq bhaoq nail tsaol-aq khe-ai dul nail ngaol. Aivq-i mail uqhuq thaoq nail al neq, khul nail ganl maq tsoiq-ail. 27Aqbhu Miqyail nail sivtavq bhai aqcavq phaq maq aol dai, haoltaiv deel uqhuq thaoq nail aolsaolkovq neq, niailhai ngaol. Aqbhu aqma maq jaol nail juq bhai khi mail miqtsiq miqma juq haq nail aoq nail juq bhai tsaojao-ai bhiq khi, miltsaq khe aqsivq haqjoil nail neekhaol-i mail maq bhi lav cov dai, yovqgavq bhai yovqgavq yaolphaol khi doevq nia nail juq pevq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index