Search form

Yaqkov 2

Maivphaoq eeq nil thaq tsel

1Ngaq nail aqivq jaqbheq juq-ol, seiqleiq khaoqsail eeq nail Heeqphaq pevq nail ngadao nail Heeqphaq Yeiqsul Khali bhai neema thaqtsaol nail nuljuq neq, maivphaoq eeq nil teevq peivq-ail thaq tsel. 2Nuljuq jil lal khi, uqhuq thaoq thailthaiq-u phao, heel nail noiltsaoq tsaoq khi aqgaq aqdoi iqsanl aqmeeq meeq dai doi-nq thaq nail hulmeeq teevq gaq khi mail, aqgaq aqdoi aqkhail aqlail doi-nq thaq nail haq yaq aoq yaq teevq gaq aol lal haq neq, 3aqgaq aqdoi aqmeeq doi-nq thaq nail gaq bhai hav khi, “Jaol duq aqmeeq niil dao bhai jaol lal yaoq” dai, ge bhiq nail ngaol. Haq nail aoq nail al gaq bhai neq, “Thoilthai thulphaol yaoq. Maq ngel haq neq, ngaq nail aqkhil tsaoqthaq duq bhai jaoldeel yaoq” dai, nuljuq ge bhiq haq neq, 4nuljuq yu bhai munl bhoilpav nail nee ovqtavq, maq meeq maq tsaq nail neenoeq nee yalkhaq dal nail tsaol-aq pevq nail maq ngel-ail laiq.

5Ngal mailma-ail gaiq-a nail aqivq jaqbheq juq-ol, aqmeeq-ai naldaiq yaoq. Neema thaqtsaol nail phao hulmeeq meeq lal dai, Miqyail neq, miltsaq yaq-i mail haq nail aoq nail tsaol-aq ngaol dai, saol-nvq ha-ai thaq nail juq bhai tsel dov-a nail maq ngel-ail laiq. “Ngaq bhai gaiq-a nail tsaol-aq juq bhai ngaq nail milkhaoq lavqkhoel bhi jaol lal naol” dai, Miqyail ge-ai thaq nail khe-ai aqyu juq neq, jaiqbhoil ovq nail tsaol-aq juq ngaol. 6Thailhai ngaol-aoq, nuljuq neq, haq nail aoq nail tsaol-aq juq bhai khal nl movq-ail nl bhiq nail ngaol. Nuljuq bhai khoeq lavq jiovq lavq khi yalkhaq dal duq bhai hel-aivq lavq-a nail tsaol-aq juq neq, hulmeeq hulbhao juq maq ngel-ail laiq. 7Nuljuq bhai uvthaiq nail gaq nail aqmil aqmeeq bhai khal khul movq-ail khul nail tsaol-aq neq, hulmeeq hulbhao juq maq ngel-ail laiq.

8“Yovqgavq nail aqmaol bhai gaiq-a nail khe-ai, yovqgavq nail aqjail bhai jaol nail tsaol-aq bhai gaiq-a yaoq” dai, Jalliq lavqkhoel bhai ge-ai thaq nail, Miqyail Milkhaoq bhai tavq nail aoldaoq kovqdaoq al daoq bhai nuljuq nl bhee haq neq, meeq deedee nail ngaol. 9Thailhai ngaol-aoq, nuljuq maivphaoq eeq nil tsel thailthaiq haq neq, oeqbal nl nail phaq pevq khi, nl bheeq thailthaiq nail tsaol-aq ngaol dai, aoldaoq kovqdaoq phaodaiq lavq-a nail ngaol. 10Khul khi mail dai ngal-aq, tsaol-aq khul gaq maqkhaiq, aoldaoq kovqdaoq iqsanl bhai tsaothe thailthaiq khi ngaol-aoq, aoldaoq kovqdaoq teevq daoq bhai nl laiq haq neq, iqsanl bhai nl laiq-a nail phaq pevq nail ngaol. 11“Yu nail khaqma bhai thaq bheeq thaq leel” dai, ge-a nail Miqyail neq, “Tsaol-aq bhai thaq lav heivq” dai, iqsanl ge-a nail ngaol. Alheel ngel-i mail, naol yu nail khaqma bhai maq bheeq maq leel khi ngaol-aoq, tsaol-aq bhai heivq haq neq, aoldaoq kovqdaoq bhai nl laiq-a nail phaq pevq nail ngaol.

12Nuljuq ge nail thail nail maqkhaiq, nl nail hal nail maqkhaiq, ngadao bhai bhi jel-ail lavq nail aoldaoq kovqdaoq bhai yuq khi, Miqyail yaqhao ngadao bhai yalkhaq dal lavq nail bhai thaq nioilpeivq dei-eiq. 13Yu bhai maq gaoqhaq maq gaiq-a bhiq nail tsaol-aq bhai, Miqyail maq gaoqhaq maq gaiq-a dai, yalkhaq dal nail ngaol. Thailhai ngaol-aoq, Miqyail nail gaoqhaq gaiq-a nail phaq neq, yalkhaq dal nail phaq bhai gaq lai nail ngaol.

Maq nl maq hal nail neema thaqtsaol nail phaq neq, aqsil ngaol

14Ngaq nail aqivq jaqbheq juq-ol, “Ngal neema thaqtsaol naol” dai, tsaol-aq teevq gaq ganav ge khi ngaol-aoq, aivq maq nl maq hal dol lavq haq neq, khul nail ganl tsoiq nail-aiq. Alheel nail neema thaqtsaol nail phaq neq, aivq bhai hevqkovq nia nail laiq. 15Aqivq jaqbheq Khali yaq juq nail lavqkhoel yaqmai-aq maqkhaiq, yaqyov-aq maqkhaiq, teevq gaq ganav, aqgaq aqdoi maq jiav nail nee ovqtavq, teevq n nee teevq n jaqjaq daoldaol maq jiav dai haq nail bhai, 16nuljuq nail lavqkhoel khe teevq gaq ganav aivq bhai, “Lavqkhiq tsail tsail-ail kovq ail yaoq. Aqloil loil dai jaol-ail yaoq. Teevq bov jaq-ail yaoq” dai, ge bhiq khi ngaol-aoq, aivq-i mail loq nail khe-ai, nuljuq maq bivq haq neq, khul nail ganl tsoiq nail-aiq. 17Alhai dul dai, neema thaqtsaol nail phaq iqsanl maq nl maq hal haq neq, aqsil ngaol.

18“Teevq gaq ganav neq, neema thaqtsaol nail ngaol. Teevq gaq ganav neq, nl nail hal nail ngaol” dai, nuljuq teevq gaq ganav ge movq-ail jaol-aq. Khul teevq phaq iqsanl maq nl maq hal dai, naoq-i mail neema thaqtsaol nail phaq cavq naq lavq yaoq. Ngal neq, nl nail hal nail lavqkhoel nee ngal neema thaqtsaol nail phaq naoq bhai cavq naq bhiq naol dai, ngal nuljuq bhai ge kovq bhiq movq-ail nial. 19Miqyail teevq gaq taivq-ail jaol nail ngaol dai, naol neema thaqtsaol-ail nial lavq. Naoq-i mail alhai neema thaqtsaol nail neq, tsaq nail ngaol. Thailhai ngaol-aoq, neivq juq iqsanl Miqyail teevq gaq taivq-ail jaol nail bhai neema thaqtsaol khi geesil deedee nail lavqkhoel nee aqjuq juq-ai bhiq nail ngaol.

20Maq saol-nvq nia nail tsaol-aq juq-ol, maq nl maq hal mail neema thaqtsaol nail phaq neq, khul teevq phaq iqsanl ganl maq tsoiq-ail dai, aqmeeq-ai heeq kivq movq-ail laiq. 21Ngadao nail aqbhu Aqbhaqlaqhaq, aivq nail yaqyov Ilcav bhai laol duq kovtavq bhai laol bhiq-u phao, nl-a hal-a nail bhaqda nee, Miqyail aivq bhai tsaq nail daol nail tsaol-aq bhi pevq lal-a nail maq ngel-ail laiq. 22Aivq neema thaqtsaol nail phaq nee teevq gaq khe-ai, nl-a hal-a nail ngaol. Nl-a hal-a nail bhaqda nee, aivq-i mail neema thaqtsaol nail phaq bhee lal-a nail ngaol dai, naol ya moel-a nail ngaol. 23“Aqbhaqlaqhaq Miqyail bhai neema thaqtsaol nail ngel-i mail, Miqyail aivq bhai tsaq nail daol nail tsaol-aq ngaol dai, saol-nvq-ai thaq nail ngaol” dai, gevq-ai thaq nail Jalliq daoq al daoq bhee lal-a nail ngaol. Al ovqtavq, Aqbhaqlaqhaq bhai Miqyail nail aqtsaoq ngaol dai iqsanl, ge-ai thaq nail ngaol. 24Alheel ngel-i mail, tsaol-aq teevq gaq neema thaqtsaol nail ngel-i mail taivq-ail, tsaq nail daol nail tsaol-aq pevq lal nail maq ngel-ail. Nl nail hal nail phaq iqsanl aol nail bhaqda nee, tsaq nail daol nail tsaol-aq pevq lal nail ngaol dai, nuljuq ya moel-a nail ngaol.

25Alhai dul dai, Laqhal dai mil-ai thaq nail aqmaol gaoq nail yaqmai-aq teevq gaq iqsanl, Ilsaqleiqlal nail tsaol-aq-i mail khoel-ai leevq-a nail tsaol-aq juq bhai hav bhoel khi gailkhaol yaoq khaol yaoq nee bhi kovq ail-a nail ngaol. Aivq alhai nl-a nail ngel-i mail, Miqyail aivq bhai tsaq nail daol nail tsaol-aq bhi pevq lal-a nail, maq ngel-ail laiq. 26Aqmaol bhai aqhaqlal maq aol haq neq, sil nail ngaol. Alhai dul dai, neema thaqtsaol nail phaq iqsanl maq nl maq hal haq neq, aqsil ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index