Search form

Yaqkov 3

Moeqlal nail ganl

1Ngaq nail aqivq jaqbheq juq-ol, nuljuq cavq bhiq cov bhiq nail tsaol-aq maodai thaq jiovq. Khul khi mail dai ngal-aq, cavq bhiq cov bhiq nail ngadao juq, aqmeeq meeq dai, maq nl haq neq, yu nee maqtsil Miqyail yalkhaq dal lavq nail bhai ya daq nail ngaol dai, nuljuq heeq nia nail ngaol. 2Ngadao yaoq gaq yaoq-ao nee mee nia pov nl laiq nail ngaol. Tsaol-aq teevq gaq ganav teevq thal-iq maq ge laiq haq neq, aivq neq, bhee nail tsaol-aq pevq khi, aivq nail aqmaol teevq maol maol lao bhai gaq lai nail tsaol-aq ngaol.

3Ngadao moeqphaq bhai gaq lai kivq dai, moeqphaq nail moeqthaoq bhai moeqkeivq oil tsaoq bhiq nail ngaol. Alhai oil tsaoq bhiq gaq haq neq, moeqphaq nail aqmaol maol lao-ail ngadao-i mail khal bhi ail movq nail phao ail nail ngaol. 4Laovq laovq ma nail ganl saol-nvq daiq yaoq. Laovq khadai eeq khi lilmoel khadai bhoe lal khi ngaol-aoq, laovq e nail gaq mao-ail nil nail daillav-i mail, laovq laovq ma al bhai el-aivq movq nail phao el-aivq nia nail ngaol. 5Moeqlal neq, aqmaol teevq maol maol lao nail lavqkhoel khal nil nail alsail pevq khi ngaol-aoq, “Ngal neq, mailma-ail eeq nail phaq nl kivq naol” dai, ge nail ngaol. Miqjaq miqjiiv neq, milgaoq gaoq lao bhai poiv jaq gil nia nail bhai, saol-nvq daiq yaoq. 6Moeqlal neq, miqjaq khe-ai dul nail ngaol. Moeqlal neq, ngadao nail aqmaol lavqkhoel bhai jiav nail haqeiv nail milkhaoq teevq khaoq pevq khi, ngadao nail neema aqmaol iqsanl nail lavqkhoel bhai haqeiv nail phaq bhi bhee lal nail ngaol. Moeqlal al neq, daqovq laoma eeltsul bhai tovq nail miqjaq oil khi, ngadao aqdoevq doevq nail phaq iqsanl bhai bhi poiv jaq nail ngaol.

7Tsaol-aq yaq neq, jaiqyaq, keivq-avq, soiq soiq-ail tsao nail jaiqyaq khi mail, ulcuvq lavqkhoel bhai jaol nail jaiqyaq yaoq phaq yaoq-ao nee bhai, lav goil nia nail ngaol. 8Thailhai ngaol-aoq, tsaol-aq yaq nail moeqlal bhai neq, maq lav goil nia-ail. Moeqlal neq, aqtsi tsu dai maq jaol nia nail haqeiv nail phaq pevq nail ngaol. Bhi sil nia nail dovq iqsanl teevq bhee aol nail ngaol.

9Ngadao nail moeqlal nee, Aqbhu khi Heeqphaq Miqyail bhai tsiqeeq nail ngaol. Alhai dul dai, Miqyail-i mail aivq khe-ai dul lai dai, teivq-ai thaq nail tsaol-aq juq bhai iqsanl, ngadao nail moeqlal nee iqkhail yavq nail ngaol. 10Moeqthaoq teevq thaoq nail lavqkhoel nee taivq-ail tsiqeeq nail daoq iqsanl, iqkhail yavq nail daoq iqsanl dov lal nail ngaol. Ngaq nail aqivq jaqbheq juq-ol, alhai bhi dov lal nail neq, maq tsaq-ail. 11Ulcuvq eelbev teevq bev nee taivq-ail ulcuvq aqkheel khi mail ulcuvq aqkhaq teevq gaq khe-ai dov lee nia naol laiq. 12Ngaq nail aqivq jaqbheq juq-ol. Heeqguq aqbhaol bhai saqloq aqheeq heeq lee nia naol laiq Aqheeq tsilju nail aqjiav bhai, heeqguq aqheeq heeq lee nia naol laiq. Alhai dul dai, ulcuvq aqkhaq dov lal nail ulcuvq eelbev iqsanl ulcuvq aqkheel maq dov lal nia-ail.

Neenoeq neekha nvq phaq nail ganl

13Nuljuq nail lavqkhoel neenoeq neekha aol khi mailma-ail heeq nia nail tsaol-aq khaq sil gaq. Tsaol-aq al gaq neenoeq neekha aol nail khe-ai, neema neenuq neebeiv aol nail lavqkhoel meeq nail nlmaoq hal dao juq nl nl-ail, aivq nia nail al bhi dov lal yaoq. 14Thailhai ngaol-aoq, yu bhai neema nal nail maivjeel jeel nail phaq khi mail, yovqgavq nail haqbhoil taivq-ail saol-nvq nail phaq nuljuq nail neema lavqkhoel bhai aol haq neq, neenoeq neekha aol naol dai, khaoqsail he he-ail, goiqbhaoq thaq bhaoq. 15Alheel nail neenoeq neekha neq, nqtavq nee mail dov lee-a nail maq ngel-ail. Miltsaq bhai tavq nail neenoeq neekha pevq khi, aqsivq haqjoil nail neenoeq neekha khi mail, neivq bhai tavq nail neenoeq neekha pevq nail ngaol. 16Maivjeel jeel nail phaq khi mail, yovqgavq nail haqbhoil taivq-ail saol-nvq nail phaq khal jiav nail bhai, maq tsaq maq jil lai nail phaq khi mail, haqeiv nail mee nia phaq jiav nail ngaol.

17Thailhai ngaol-aoq, nqtavq nee mail dov lee-a nail neenoeq neekha phaq neq, meeq nail haol nail phaq ngaol. Nvq phaq teevq phaq neq, tsaq lai jil lai nail phaq ngaol. Al ovqtavq, neema neenuq neebeiv aol khi, hav bhoel nia nail ngaol. Neenoeq neekha al neq, gaoqhaq gaiq-a nia nail phaq maqkhaiq, aqmeeq phaq nl nail maqkhaiq, teevq bhee aol nail ngaol. Maivphaoq eeq nil tsel nail phaq khi mail, goiqbhaoq bhaoq nail phaq maq aol-ail. 18Tsaq lai jil lai dai, nl nail tsaol-aq, neesal ya nail lavqkhoel aqiq haiq khi tsaq nail daol nail phaq ya gaiq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index