Search form

Yaolhaq 15

Yeiqsul neq, maldil aqheeq tsilju nail aqjiav daoqthaoq ngaol

1Yeiqsul gaoq ge nail: “Ngal neq, maldil aqheeq tsilju nail aqjiav daoqthaoq ngaol. Ngaq nail Aqbhu neq, gaoqkhail lav sav nail aqheel ngaol. 2Aqheeq maq heeq nail ngaq nail lavqmeiv juq bhai, aivq he dil bhiq nail ngaol. Aqheeq heeq nail lavqmeiv juq bhai neq, gaoq bhi heeq jaiq lee nail dai khi, aivq ganl maq tsoiq nail lavqmeiv meiv yaq juq bhai thaiq ha nail ngaol. 3Ngaq-i mail cavq bhiq cov bhiq-a nail daoq bhaqda nee, nuljuq haol lal gaq-ao nail ngaol. 4Ngaq nail lavqkhoel bhai jaol yaoq. Ngal iqsanl, nuljuq nail lavqkhoel bhai jaol naol. Lavqmeiv juq neq, aqjiav daoqthaoq bhai maq covq cavq haq neq, aqyu juq bhai aqyu juq aqheeq maq heeq lee nia nail khe-ai, nuljuq iqsanl, ngaq nail lavqkhoel bhai maq jaol haq neq, aqheeq maq heeq lee nia-ail.

5Ngal neq, aqheeq tsilju nail aqjiav daoqthaoq ngaol. Nuljuq neq, lavqmeiv ngaol. Khaq sil gaq maqkhaiq, ngaq bhai covq cavq khi, ngal iqsanl aqyu juq bhai covq cavq nail gaq neq, aqheeq maodai heeq lee nail ngaol. Ngaq bhai maq covq cavq haq neq, nuljuq khul teevq phaq iqsanl, maq nl nia-ail. 6Ngaq bhai maq khal covq cavq nail tsaol-aq neq, miltsaq bhai ga ail khi gee lai nail lavqmeiv khe-ai dul nail ngaol. Alheel nail lavqmeiv juq bhai govjil khi, miqjaq jaibhoil bhai gov poiv khi, kheq ha nail ngaol. 7Nuljuq ngaq nail lavqkhoel bhai jaol khi, ngaq nail daoq nuljuq nail lavqkhoel bhai aol haq neq, nuljuq khal hal movq nail phaq hal yaoq. Khal hal nail phaq ya nail ngaol. 8Nuljuq aqheeq maodai heeq lee nail bhai heldaiq khi, ngaq nail Aqbhu nail seiqleiq khaoqsail bhai yu ya moel nail ngaol. Aq-u phao, nuljuq ngaq nail yaqlaol pevq lal-aoq nail ngaol dai, ge kivq nail ngaol.

9Aqbhu Miqyail ngaq bhai gaiq-a nail khe-ai, ngal iqsanl, nuljuq bhai gaiq-a naol. Ngaq nail goil nail gaiq-a nail lavqkhoel bhai ivqdao dai, jaol yaoq. 10Ngaq nail Aqbhu nail daoq bhai ngal naldaiq khi, ngaq nail Aqbhu nail goil nail gaiq-a nail lavqkhoel bhai ngal jaol nail khe-ai, nuljuq ngaq nail daoq bhai naldaiq haq neq, ngaq nail goil nail gaiq-a nail lavqkhoel bhai, nuljuq jaol nail ngaol.

11Ngaq nail lavqkhiq tsail nail phaq, nuljuq nail lavqkhoel bhai aol khi, nuljuq lavqkhiq tsail nail phaq bhee lal dai, nuljuq bhai ngal niailhai ge bhiq nail phaq pevq nail ngaol. 12Nuljuq bhai daoq niil daoq bivq nail ngaol. Ngal nuljuq bhai gaiq-a nail khe-ai, nuljuq iqsanl, teevq gaq nee teevq gaq gaiq-a yaoq. 13Yovqgavq nail aqtsaoq nail haqbhoil sildan nail nee maqtsil eeq jaiq nail goil nail gaiq-a nail phaq, maq jiav yaoq-aol. 14Ngaq-i mail daoq bivq-ai thaq nail khe-ai, nuljuq nl haq neq, nuljuq ngaq nail aqtsaoq ngaol. 15Niai nee pultavq neq, ngal nuljuq bhai yaqkav dai, maq khul yaoq-aol. Khul khi mail dai ngal-aq neq, ilheel khal nl nail phaq yaqkav maq heeq gil nia-ail. Ngal nuljuq bhai aqtsaoq dai, khul naol. Khul khi mail dai ngal-aq neq, ngaq nail Aqbhu-i mail khal ge lavq-a nail phaq, nuljuq bhai ngal ge bhiq gil-aoq nail ngaol. 16Nuljuq-i mail ngaq bhai tsel-a nail maq ngel-ail. Ngaq-i mail nuljuq bhai tsel-a nail ngaol. Nuljuq ail khi, aqheeq heeq lee nail nee ovqtavq, aqheeq al ivqdao dai pevq lal nail haqbhoil, ngal nuljuq bhai tsel dov-ai thaq nail ngaol. Alheel ngel-i mail, ngaq nail aqmil lavqkhoel nee, nuljuq hal nail phaq, Aqbhu Miqyail nuljuq bhai bivq lavq nail ngaol. 17Ngaq-i mail nuljuq bhai bivq nail daoq neq, niailhai ngaol. Nuljuq teevq gaq nee teevq gaq, gaiq-a yaoq” dai, ge bhiq-a nail ngaol.

Miltsaq yaq nuljuq bhai neejiav jiav nail ngaol

18Yeiqsul gaoq ge nail: “Miltsaq yaq nuljuq bhai neejiav jiav lal-u phao, nuljuq bhai neejiav maq jiav lal-u phao nee mail, ngaq bhai iqmoeq neejiav jiav-aoq nail ngaol dai, heeq kivq thaq-ai yaoq. 19Nuljuq miltsaq niilniai tavq haq neq, miltsaq yaq niil nuljuq bhai aivq nail yaq khe-ai gaiq-a lavq nail ngaol. Thailhai ngaol-aoq, miltsaq niil nail lavqkhoel nee nuljuq bhai ngaq-i mail tsel dov gaq-ai thaq nail ngaol. Miltsaq niilniai nuljuq maq tavq yaoq-aol. Alheel ngel-i mail, miltsaq yaq juq nuljuq bhai neejiav jiav nail ngaol. 20Yaqkav neq, yovqgavq nail ilheel nee maqtsil maq eeq-ail dai, ngaq-i mail nuljuq bhai ge bhiq-a nail daoq bhai, thaq nioilpeivq. Miltsaq yaq juq ngaq bhai khoeq lavq jiovq lavq nail ngaol. Nuljuq bhai iqsanl, khoeq lal jiovq lal nail ngaol. Aqyu juq ngaq nail daoq bhai naldaiq haq neq, nuljuq nail daoq bhai iqsanl, naldaiq nail ngaol. 21Thailhai ngaol-aoq, nuljuq ngaq nail tsaol-aq pevq nail ngel-i mail, aqyu juq nuljuq bhai nl khoeq lal nail ngaol. Khul khi mail dai ngal-aq neq, ngaq bhai khoel-ai leevq-a nail gaq bhai, aqyu juq maq heeq nia-ail. 22Ngal lee khi aqyu juq bhai maq ge bhiq lee-al nul neq, aqyu juq oeqbal maq aol-ail dai, ge kivq nail ngaol. Thailhai ngaol-aoq, niil thal khe pov neq, aqyu juq-i mail nl nail phaq oeqbal dai maq dul-al dai, maq jil nia yaoq-aol. 23Ngaq bhai neejiav jiav nail tsaol-aq, ngaq nail Aqbhu bhai iqsanl, neejiav jiav nail khe-ai, dul nail ngaol. 24Tsaol-aq teevq gaq iqsanl, maq nl daiq-a nail ganl niil juq bhai, aqyu juq jaol nail bha ngal maq nl-a nail nul neq, aqyu juq oeqbal maq aol-ail. Thailhai ngaol-aoq, ngaq-i mail nl-a nail ganl bhai aqyu juq ya moel khi, ngaq bhai maqkhaiq, ngaq nail Aqbhu bhai maqkhaiq, aqyu juq neejiav jiav nail ngaol. 25Aqyu juq nail aoldaoq kovqdaoq lavqkhoel bhai, ‘Khul nail ganl maq jiav nail bhai, aqyu juq ngaq bhai neejiav jiav nail ngaol’ dai, gevq-ai thaq nail jiav nail ngel-i mail, daoq al bhee lal dai, pevq lal-a nail ngaol.

26Aqbhu Miqyail nee dov lee nail Tsaojao-ai nail gaq ngal nuljuq jaol nail bha khoel-ai leevq naol. Aivq neq, tsaq nail phaq pevq khi tsaq nail phaq bhai phaodaiq lavq nail Aqhaqlal Miqyail ngaol. Aivq lee kev haq neq, ngaq nail ganl, salkhil khanq nail ngaol. 27Nuljuq iqsanl, iqmoeq-u nee mail ngaq-ai nee jaol nail ngel-i mail, ngaq nail haqbhoil salkhil khanq nail ngaol” dai, ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index