Search form

Lulkavq 13

Oeqbal maq noeq pov haq neq, ya luq ya seil-ail nail ngaol

1Aq-u phao, Yeiqsul nee jaol nail tsaol-aq teevq pav ganav juq ge nail, Heeqphaq Phillav neq, Gaqliqlail nail tsaol-aq teevq pav ganav juq bhai coevheivq khi, aqyu juq nail aqsivq khi mail aqyu juq-i mail laol bhiq-a nail jaiqyaq nail aqsivq nee bhi il kheq-a nail ganl, Yeiqsul bhai ge bhiq-a nail ngaol. 2Yeiqsul ge nail: “Gaqliqlail nail tsaol-aq juq alhai bhiq heivq-a nail ngel-i mail, aqyu juq Gaqliqlail tsaol-aq iqsanl nee maqtsil oeqbal eeq jaiq nail ngaol dai, nuljuq noeq nail laiq. 3Ngal nuljuq bhai ge lavq bhel. Aqyu juq oeqbal eeq jaiq nail maq ngel-ail. Nuljuq oeqbal maq noeq pov haq neq, aqyu juq khe-ai nuljuq iqsanl mail, ya luq ya seil-ail nail ngaol. 4Al ovqtavq, Silloq julgu lavqkhoel bhai mailma-ail moe nail ilkhaol teevq il tsuq peiv-ail khi, tsuq thaiq heil laivq-a nail tsaol-aq al tsel eivq gaq neq, Yeiqlulsaqlaiq meenq bha jaol nail tsaol-aq iqsanl nee maqtsil nl bheeq-a nail ngaol dai, nuljuq noeq nail laiq. 5Ngal nuljuq bhai ge lavq bhel. Aqyu juq nl bheeq jaiq-a nail maq ngel-ail. Nuljuq oeqbal maq noeq pov haq neq, aqyu juq khe-ai nuljuq iqsanl mail, ya luq ya seil-ail naol” dai, Yeiqsul aqyu juq bhai ge bhiq-a nail ngaol.

Aqheeq maq heeq nail heeqguq aqbhaol

6Yeiqsul daoqma uqhuq daoq nee mail, niailhai cavq bhiq cov bhiq-a nail: “Aq-u phao, aqheeq tsilju nail gaoqkhail jiav nail tsaol-aq teevq gaq jaol laoq thaq nail ngaol. Aivq nail gaoqkhail bhai, heeqguq aqbhaol teevq bhaol kha-ai thaq nail ngaol. Heeqguq aqbhaol al bhaol aqheeq heeq-ail laiq dai, aivq heldaiq ail-u phao, aqheeq maq heeq-ail. 7Alheel ngel-i mail, aivq gaoqkhail nl nail gaq bhai ge bhiq-a nail: ‘Hail kovq bhee dai ngal-aq, heeqguq aqbhaol niil bhaol nail aqheeq bhai heldaiq lee khi ngaol-aoq, aqheeq maq moel-al. Alheel ngel-i mail, aqbhaol niil bhaol thul ha yaoq. Khul khi mail, miltsaq niilniai aqnieivq-ail bhi jiav cov nail’ dai, ge bhiq-a nail ngaol.

8Gaoqkhail nl nail gaq ge kovq bhiq-a nail: ‘Heeqphaq-ol, ceevq nee teevq kovq neq, bhi doevq yaoq. Daoqthaoq bhai jaoq jaoq dai duq khi, miltsaq mil meeq hoel bhoel naol. 9Yaqhao aqheeq heeq lee haq neq, aqmeeq ngaol. Thailhai ngaol-aoq, aqheeq maq heeq lee haq neq, bhi thul ha naol’ dai, ge bhiq-a nail ngaol.”

Jaol n n-gaol, yaqmai-aq teevq gaq bhai lav meeq bhiq-a nail ganl

10Jaol n n-gaol, Yeiqsul uqhuq thaoq nail ilkhaol lavqkhoel bhai cavq bhiq cov bhiq-a nail ngaol. 11Aq-u phao, tsel eivq kovq bhee dai, neivq aol khi nal nail yaqmai-aq teevq gaq a bhai jaol nail ngaol. Aivq neq, kaolceevq aqkovq kovq dai pevq-ail khi, aivq bhai aivq teevq peivq-ail maq gaol daol nia-ail. 12Yeiqsul yaqmai-aq al gaq bhai ya moel-u phao, aivq bhai khul khi, “Yaqmiq-ol, naol naoq nail nalgoel nee jel-ail aoq naol” dai, ge bhiq-a nail ngaol. 13Yeiqsul yaqmai-aq al gaq nail kovtavq bhai aqlavq bavq dav-u phao, teevq pov nee yaqmai-aq al gaq kaolceevq gaol daol nia lal khi, Miqyail bhai tsiqeeq-a nail ngaol.

14Jaol n n-gaol, Yeiqsul nal nail tsaol-aq bhai lav meeq bhiq-a nail ngel-i mail, uqhuq thaoq nail ilkhaol khe aqivq gaq neema phail lal bhiq khi, tsaol-aq al juq bhai ge bhiq-a nail: “Nl nail hal nail aqn kovq n jiav nail ngaol. Nuljuq nail nalgoel meeq lai dai, al kovq n nail lavqkhoel-ai lal yaoq. Jaol n n-gaol thaq lal” dai, aqyu juq bhai ge bhiq-a nail ngaol.

15Aq-u phao, Yeiqsul aivq bhai ge bhiq-a nail: “Goiqbhaoq bhaoq nail tsaol-aq juq-ol, nuljuq yaoq gaq yaoq-ao nee, jaol n n-gaol yovqgavq nail niaoqnel khi mail moeqphaq laljieiv bhai pheel khi, ulcuvq tseeldaol-ail bhiq nail ngaol. 16Aqbhaqlaqhaq nail yaqmiq niil gaq bhai neivq Saqdaq-i mail tsel eivq kovq bhee dai, pheethaiq-ai thaq nail ngaol. Pheethaiq-ai thaq nail bhai, jaol n n-gaol pheel bhiq nail maq tsaq-ail laiq” dai, ge bhiq-a nail ngaol.

17Yeiqsul alhai ge bhiq-u phao, aivq bhai neejiav jiav nail tsaol-aq iqsanl mail, haqsil lal bhiq-a nail ngaol. Thailhai ngaol-aoq, tsaol-aq munl munl ma Yeiqsul-i mail nl-a nail seiqleiq khaoqsail teevq bhee aol nail ganl iqsanl bhai, lavqkhiq tsail deedee nail ngaol.

Gaoqpavq aqneev nail ganl daoqma uqhuq daoq

18Yeiqsul ge nail: “Miqyail Milkhaoq neq, khul phaq khe-ai dul nail ngel-aiq. Ngal khul phaq nee mail tsiqceiv daiq heeq meeq. 19Miqyail Milkhaoq neq, tsaol-aq teevq gaq aivq nail gaoqkhail bhai haiq-ai thaq nail gaoqpavq aqneev khe-ai dul nail ngaol. Aqneev al neq, aqjiiv jiiv lal eeq lal khi, aqbhaol bhaol ma ma lal-a nail ngaol. Nqtavq phao bhail nail keivq-avq lavqmeiv bhai deivq lee khi keivq-avq aqkheel kheel lee nail ngaol” dai, ge bhiq-a nail ngaol.

Khaqmul bhai oil bhoel nail deqtsiq nail ganl daoqma uqhuq daoq

20Yeiqsul teevq pov gaoq ge nail: “Miqyail Milkhaoq bhai ngal khul phaq nee mail tsiqceiv daiq heeq meeq. 21Miqyail Milkhaoq neq, deqtsiq khe-ai dul nail ngaol. Yaqmai-aq teevq gaq deqtsiq oil khi, khaqmul lav sav nail tsoelthoel hail deel bhai oil kheq khi mail, iqsanl bhai bhi bhaonq lal nail ngaol” dai, ge bhiq-a nail ngaol.

Govkhoiq bhaoqthaiq

22Aq-u phao, Yeiqsul Yeiqlulsaqlaiq meenq bha lai-a nail ngaol. Aivq gailphail lail ma bhai jiav nail meenq juq julgu juq bhai, cavq bhiq cov bhiq, cavq bhiq cov bhiq-ail, lai-a nail ngaol. 23Aq-u phao, tsaol-aq teevq gaq: “Heeqphaq-ol, hevqkovq nail phaq ya-a nail tsaol-aq micil teevq-eel laiq” dai, Yeiqsul bhai naldaiq-a nail ngaol. 24Yeiqsul aqyu juq bhai ge bhiq-a nail: “Govkhoiq khoiq yaq bhai ya aol lai dai, laijai deedee yaoq. Ngal nuljuq bhai ge lavq bhel. Tsaol-aq mee nia gaq ya aol lai dai, laijai khi ngaol-aoq, maq ya aol lai-ail. 25Ilheel gaq thul khi lolgov pheeqthaiq gaq-u phao, nuljuq lavqniil phao thulphaol khi, lolgov bhai kov nail ngaol. ‘Heeqphaq-ol, nvjuq bhai lolgov phao lavq yaoq’ dai, hal-u phao, ‘Nuljuq khaq bha nee lal thaq-al meeq, ngal maq heeq kivq’ dai, ilheel gaq nuljuq bhai ge kovq lavq nail ngaol.

26Aq-u phao, nuljuq niailhai ge naol: ‘Nvjuq neq, naoq-ai nee mail jaq tavq daol tavq daiq-a nail ngaol. Naol nvjuq nail meenq bhai jiav nail gailkhaol bhai tsao tsao-ail cavq lavq cov lavq-a nail ngaol’ dai, ge naol.

27‘Nuljuq khaq bha nee lal thaq-al meeq, ngal maq heeq kivq. Haqeiv nail phaq nl nail tsaol-aq iqsanl mail, ngaq-ai nee mail pav ail yaoq’ dai, ilheel gaq nuljuq bhai ge lal nail ngaol.

28Aqbhaqlaqhaq, Ilcav, Yaqkov khi mail Miqyail nail haqbhoil gedan nail tsaol-aq iqsanl mail, Miqyail Milkhaoq lavqkhoel-ai jaol nail bhai, nuljuq ya moel nail ngaol. Thailhai ngaol-aoq, nuljuq bhai neq, lavqniil phao the ha lavq nail ngaol. A bhai khal jaol nail tsaol-aq, noeqhaq deedee nail lavqkhoel nee nioil khi haoqgil keivq nail ngaol. 29Aq-u n-gaol, nlma dov khoeq ga khoeq, pul-nvq pultavq bhai jaol nail tsaol-aq lal khi, Miqyail Milkhaoq lavqkhoel bhai jaq tavq daol tavq nail ngaol. 30Yu nail haoqnao jaol nail tsaol-aq teevq pav ganav juq, yu nail iqmoeq ya jaol nail ngaol. Yu nail iqmoeq jaol nail tsaol-aq teevq pav ganav juq, yu nail haoqnao ya jaol nail ngaol” dai, ge bhiq-a nail ngaol.

Yeiqsul khi mail Heiqlol nail ganl

31Yanq yaq lao al nail lavqkhoel, Phaqliqsail teevq pav ganav juq lal khi, “Naol niilniai nee dov ail yaoq. Heeqphaq Heiqlol naoq bhai deeq heivq movq-ai bhiq nail ngaol” dai, Yeiqsul bhai ge bhiq-a nail ngaol.

32Yeiqsul aqyu juq bhai ge bhiq-a nail: “Nuljuq kheeqsiv+ al maol bhai niailhai ge bhiq ail yaoq: Yanqgaol khi mail niaohao ngal neivq bhai the dov khi, nal nail tsaol-aq bhai lav meeq bhiq naol. Halpha n-gaol nl gil naol dai, ge bhiq ail yaoq. 33Thailhai ngaol-aoq, yanqgaol, niaohao khi mail halpha n-gaol neq, ngal ya lai-ai haq naol. Khul khi mail dai ngal-aq neq, Yeiqlulsaqlaiq meenq nail lavqkhoel bhai maq ngel haq neq, Miqyail nail haqbhoil gedan nail gaq maq ya luq maq ya seil-ail” dai, ge bhiq-a nail ngaol.

Yeiqsul Yeiqlulsaqlaiq meenq nail haqbhoil noeqhaq deedee nail ganl

34Yeiqsul gaoq ge nail: “Yeiqlulsaqlaiq meenq-ol, Yeiqlulsaqlaiq meenq-ol, Miqyail nail haqbhoil gedan nail juq bhai naol khaq mao iqsanl heivq khi, naol jaol nail bha khoel-ai leevq nail juq bhai, naol khaq mao iqsanl lovmav-i mail liv heivq nail ngaol. Yavciv yav ma aivq nail yav yaq bhai uvthaiq-ai thaq nail khe-ai, ngal naoq nail yaq bhai khadai pov uvthaiq movq khi ngaol-aoq, nuljuq maq bhi uvthaiq lavq-al. 35Naldaiq yaoq. Miqyail nuljuq nail uqhuq thaoq nail ilkhaol il ma bhai khaonq ha nail ngaol dei-eiq. Ngal nuljuq bhai ge lavq bhel. ‘Heeqphaq Miqyail nail aqmil kov-uvq nee lee-a nail gaq neq, geeqlaoq eeq dei-eiq’ dai, nuljuq maq ge-u kev dai, nuljuq ngaq bhai maq ya moel-ail” dai, ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index