Search form

Lulkavq 14

Yeiqsul ovqmav lavqkhoel khe ulcuvq deq nail teevq gaq bhai, lav meeq bhiq-a nail ganl

1Jaol n n-gaol, Phaqliqsail munl lavqkhoel khe aqivq jiovq-ai thaq nail teevq gaq nail ilkhaol bhai Yeiqsul aoq jaq nail dai khi aol lai-u phao, aqyu juq Yeiqsul bhai khoiq heldaiq thailthaiq nail ngaol. 2Aq-u phao, ovqmav lavqkhoel-ai ulcuvq deq deq-ail nal nail teevq gaq, Yeiqsul nail sivtavq bhai jaol nail ngaol. 3“Jaol n n-gaol nal nail tsaol-aq bhai lav meeq bhiq khaoq-ail laiq, maq lav meeq bhiq khaoq-ail laiq” dai, Yeiqsul aoldaoq kovqdaoq cavq nail cov nail juq khi mail Phaqliqsail juq bhai naldaiq-a nail ngaol. 4Thailhai ngaol-aoq, aqyu juq aqtsi tsu dai jaol nail ngaol. Aq-u phao, Yeiqsul nal nail al gaq bhai aqlavq bavq dav khi, lav meeq bhiq khi, bhi kovq lai-a nail ngaol.

5Yeiqsul aqyu juq bhai ge bhiq-a nail: “Nuljuq nail lavqkhoel bhai teevq gaq ganav, nuljuq nail yaqyov maqkhaiq, nuljuq nail niaoqnel maqkhaiq, jaol n n-gaol lovduq bhai ga bhoel-ail haq neq, teevq pov taivq-ail maq he dov bhiq nail, khaq sil gaq jaol nail-aiq” dai, ge bhiq-a nail ngaol. 6Aqyu juq daoq al daoq bhai teevq phaq-ail maq ge kovq bhiq nia dai, pevq ail-a nail ngaol.

Daq-i hav nail dai khi, neenuq neebeiv aol nail ganl

7Khul-ai thaq nail tsaol-aq juq khaoqsail jiav nail jaol duq aqmeeq tsel thailthaiq nail bhai, Yeiqsul ya moel-u phao, aivq aqyu juq bhai daoqma uqhuq daoq nee mail cavq bhiq cov bhiq-a nail ngaol: 8“Tsaol-aq teevq gaq ganav, ‘Khaqma hevq jaq lal yaoq’ dai, naoq bhai khul lal-u phao, khaoqsail jiav nail doiqbev bhai thaq jaoldeel. Khul khi mail dai ngal-aq neq, naoq-ai nee mail maqtsil khaoqsail eeq nail gaq bhai iqsanl, aivq khul-ai thaq lao haq neq, nul-nq nvq gaq bhai khul-ai thaq nail gaq lal khi, 9‘Naoq nail jaol duq niil gaq bhai bhi jaoldeel yaoq’ dai, naoq bhai ge lal naol. Aq-u phao, naol ya haqsil deedee nail lavqkhoel yu nee mail maqtsil khaoqsail maq jiav nail jaol duq bhai ya jaoldeel nail ngaol. 10Tsaol-aq teevq gaq ganav naoq bhai khul lal-u phao, khaoqsail maq jiav nail jaol duq bhai jaoldeel yaoq. Alhai jaoldeel haq neq, naoq bhai khul-a nail gaq lal khi, ‘Aqtsaoq-ol, thoi dai nee maqtsil khaoqsail jiav nail jaol duq bhai jaoldeel lal yaoq’ dai, naoq bhai ge lal naol. Aq-u phao, naoq-ai nee mail jaoldeel-nvq thaq nail tsaol-aq iqsanl nail sivtavq bhai naol khaoqsail ya naol. 11Khul khi mail dai ngal-aq neq, yovqgavq bhai yovqgavq thaqeeq nail tsaol-aq yaoq gaq yaoq-ao nee mail, thaqtheq nail bhai ya daq naol. Yovqgavq bhai yovqgavq thaqtheq nail khul gaq maqkhaiq, thaqeeq nail bhai ya daq naol” dai, ge bhiq-a nail ngaol.

12Aivq bhai khul-a nail gaq bhai iqsanl, Yeiqsul ge bhiq-a nail: “ ‘Aoqhaoq maq ngel haq neq, aoqkivq jaq lal yaoq’ dai, naol yu bhai khul-u phao, naoq nail aqtsaoq juq, naoq nail aqivq jaqbheq juq, naoq nail jeq-e jaq-a juq khi mail, naoq nail aqjail bhai jaol nail hulmeeq hulbhao juq bhai thaq khul. Alheel juq bhai khul haq neq, aqyu juq iqsanl, naoq bhai gaoq khul khi geeqlaoq nl kovq lavq nail ngaol. 13‘Jaq tavq daol tavq lal yaoq’ dai, naol yu bhai khul-u phao, haq nail aoq nail tsaol-aq, khil khoi khoi nail tsaol-aq, aqkhil maq meeq nail tsaol-aq khi mail, maivpeivq juq bhai khul yaoq. 14Alheel juq bhai khul haq neq, naol geeqlaoq ya naol. Khul khi mail dai ngal-aq neq, aqyu juq naoq bhai geeqlaoq maq nl kovq lavq nia-ail. Tsaq nail daol nail tsaol-aq doevq kovq lal nail yanq kev lal-u phao, Miqyail naoq bhai geeqlaoq nl kovq lavq naol” dai, Yeiqsul ge bhiq-a nail ngaol.

Aoq bhaol laol nail bhaoqaiq daoqma uqhuq daoq

15Yeiqsul nee mail teevq gaq khe-ai jaoljaoq khi jaq thailthaiq nail tsaol-aq teevq gaq, daoq al daoq ya gaiq-u phao: “Miqyail Milkhaoq lavqkhoel bhai ya jaq ya daol nail tsaol-aq neq, geeqlaoq eeq nail ngaol” dai, Yeiqsul bhai ge bhiq-a nail ngaol.

16Yeiqsul ge nail: “Tsaol-aq teevq gaq, aoqbhaol laol bhiq nail dai khi, tsaol-aq maodai bhai khul-ai thaq nail ngaol. 17Aoqbhaol laol nail aqyanq kev lal-u phao, ‘Lal yaoq dei-eiq. Iqsanl mail, lainq gil-ai thaq nail ngaol’ dai, aivq nail yaqkav bhai khoel khi, khul-ai thaq nail tsaol-aq juq bhai, bhi khul ail-a nail ngaol.

18Aqyu juq teevq gaq teevq phaq doeqleivq doeqleivq-ail, niailhai ge nail ngaol: ‘Ngal yalgaol teevq khoeq ul-ai thaq nail bhai, ya heldaiq ail nail ngel-i mail, ya hal nail nial’ dai, iqmoeq ilmoeq khe gaq ge nail ngaol.

19‘Ngal niaoqnel ngaq gu ul-ai thaq nail, ya tseqdaiq-ail nail ngel-i mail, ya hal nail nial’ dai, yaoq gaq yaoq gaoq ge nail ngaol.

20‘Ngal khaqma hevq-a nail aqsivq ngel-i mail, maq lal kivq-il’ dai, yaoq gaq yaoq ge nail ngaol.

21Yaqkav al gaq kovq lal khi, ganl al ilheel gaq bhai ge gaiq bhiq lal-a nail ngaol. Aq-u phao, ilheel gaq neema phail deedee lal bhiq khi, aivq nail yaqkav bhai ge bhiq-a nail: ‘Meenq lavqkhoel khe gailkhaol khaol ma khi mail gailtsil gaillavq juq bhai lavqtsail mail ail khi, haq nail aoq nail tsaol-aq, khil khoi khoi nail tsaol-aq, aqkhil maq meeq nail tsaol-aq, maivpeivq peivq nail tsaol-aq bhai, hel lavq yaoq’ dai, ge bhiq-a nail ngaol.

22Yaqkav al gaq kovq lal khi, ‘Heeqphaq-ol, naoq-i mail khoel-a nail khe-ai nl gil-aoq naol. Thailhai ngaol-aoq, jaol duq jiav-ai haq-il’ dai, yaqkav al gaq ilheel gaq bhai ge bhiq-a nail ngaol.

23Ilheel gaq ge nail: ‘Ngaq nail ilkhaol bhai tsaol-aq bhi bhee lal movq-ail nial. Meenq meenq jail bhai daol nail, gailkhaol khaol ma khi mail gailbhaq gailheiv juq bhai gaoq ail khi, lal-u kev dai, aqyu juq bhai hel lavq yaoq. 24Ngal nuljuq bhai ge lavq bhel. Iqmoeq-u nee mail ge gaiq-ai thaq nail tsaol-aq al juq, teevq gaq gail ngaq nail aqjal niilniai maq ya mevqdaiq-ail’ dai, yaqkav al gaq bhai ge bhiq-a nail ngaol.”

Yaqlaol jiovq kivq dai, ya noeq daiq ya saol-nvq daiq nail ganl

25Tsaol-aq munl munl ma juq aivq nail haoqnao tsaothe thailthaiq-u phao, Yeiqsul haoqnaol naolkovq kovqdaiq khi, aqyu juq bhai ge bhiq-a nail: 26“Ngaq nail haoqnao tsaothel lavq nail tsaol-aq khul gaq maqkhaiq, yovqgavq nail aqbhu aqma, yovqgavq nail miqsaol yovyaq, yovqgavq nail aqivq jaqbheq bhai maqkhaiq, a dai nee maqtsil, yovqgavq nail doevq nail phaq bhai maqkhaiq, maq khaonq ha haq neq, ngaq nail yaqlaol maq jiovq nia-ail. 27Tsaol-aq khul gaq maqkhaiq, yovqgavq nail lavqyavq yovqgavq bavq khi ngaq nail haoqnao maq lal haq neq, ngaq nail yaqlaol maq jiovq nia-ail.

28Nuljuq nail lavqkhoel bhai teevq gaq ganav, moe deedee nail ilkhaol teevq il cov movq haq neq, ilkhaol al il cov gaq kivq dai, phul lovq lai-ail laiq, maq lovq lai-ail laiq dai, khadai gil lai ngel-ail dai, jaoldeel khi maq saol-nvq daiq nail tsaol-aq teevq gaq ganav jaol naol laiq. 29Alhai maq saol-nvq daiq haq neq, cov khoel khoel-ai khi, cov ngaiq ngaiq-ai thaq khi mail, maq cov gaq nia-a nail bhai ya moel-a nail tsaol-aq juq neq, aivq bhai helsil helsil-ail, niailhai ge nail ngaol: 30‘Niil gaq neq, ilkhaol cov khoel khoel-ai khi, cov ngaiq ngaiq thaq nail bhai maq cov gaq nia-il thoq’ dai, meelnaq lal naol.

31Teevq phaq neq, heeqphaq teevq gaq, heeqphaq yaoq gaq yaoq bhai genl dev ail nail khi-u phao, ‘Yu nail genl dev nail tsaol-aq, nvq meel-nvq gaq lal nail bhai, ngaq nail genl dev nail tsaol-aq teevq meel-nvq gaq taivq-ail, genl dev gaq nia-ail laiq, maq dev gaq nia-ail laiq’ dai, jaoldeel khi mail, maq saol-nvq daiq nail heeqphaq teevq gaq ganav jaol naol laiq. 32Maq gaq lai-ail dai, heeq kivq haq neq, heeqphaq al gaq eqyal bha lal-u phao nee mail, aivq nail haqbhoil teevq gaq bhai khoel gai-aivq khi, tsaq lai jil lai dai, aivq nl nail ngaol. 33Alhai dul dai, nuljuq nail lavqkhoel khe khul gaq maqkhaiq, yovqgavq khal jiav nail iqsanl mail maq khaonq-ail ceevq haq neq, ngaq nail yaqlaol maq jiovq nia-ail” dai, ge bhiq-a nail ngaol.

Cavqdevq niai nail phaq deq ail-a nail ganl

34Yeiqsul gaoq ge nail: “Cavqdevq neq, ganl tsoiq nail ngaol. Thailhai ngaol-aoq, cavqdevq niail nail phaq deq-ail haq neq, khalhai khi gaoq bhi niail lal nia nail-aiq. 35Cavqdevq al neq, miltsaq nail haqbhoil maqkhaiq, miltsaq mil meeq nail haqbhoil maqkhaiq, ganl maq tsoiq nail ngel-i mail, yu lavqniil bhai hoel ha-ai thaq nail ngaol. Naqkhaol khal covq nail tsaol-aq, naldaiq yaoq” dai, ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index