Search form

Lulkavq 24

Yeiqsul gaoq doevq kovq lal-a nail ganl

1Jaol n jel-ail khi teevq n n-gaol, nqbhaq bhaq lal thao, yaqmai-aq al juq aqyu juq-i mail lainq-ai thaq nail huqbhiq nil nail phaq oil khi, luqdaol bha lai-a nail ngaol. 2Aqyu juq a bhai lai kev-u phao, luqdaol govkhoiq bhai ngaoq tsoiq-ai thaq nail lovmav al heeq, ngaoq ha-ai thaq nail bhai, ya moel-a nail ngaol. 3Aqyu juq luqdaol nail lavqkhoel bhai aol lai-u phao, Heeqphaq Yeiqsul nail aqmaol bhai maq moel-al. 4Aqyu juq ganl al bhai noeq-u maq dov dai jaol-u phao, nljeel coev lal nail aqgaq aqdoi doi-nq thaq nail tsaol-aq nvq gaq thaiqphuq dai dov lee khi, aqyu juq nail aqjail bhai thulphaol lee-a nail ngaol. 5Aq-u phao, yaqmai-aq al juq geesil deedee-ail khi, miltsaq bhai gaolbeiv-u phao, tsaol-aq al nvq gaq ge nail: “Khul khi mail, nuljuq doevq nail tsaol-aq bhai, sil nail tsaol-aq bavq thaq duq bhai heldaiq lee-a nail-aiq. 6Aivq niilniai maq jaol yaoq-aol. Aivq doevq kovq lal-aoq nail ngaol. Aivq Gaqliqlail milkhaoq bhai nuljuq nee mail jaol-u phao, nuljuq bhai ge lavq-a nail daoq al daoq bhai thaq nioilpeivq dei-eiq. 7Aivq niailhai ge-ai thaq nail ngaol: ‘Tsaol-aq nail Yaqyov neq, oeqbal yaq nail aqlavq lavqkhoel bhai av bhiq nail bhai ya daq naol. A bhai nee ngal-aq, lavqyavq kovtavq bhai, yu aivq bhai tavq heivq khi, hail n bhee lal haq neq, gaoq doevq kovq lal naol’ dai, nuljuq bhai ge bhiq-ai thaq nail ngaol” dai, nqtavq gaqkhoel aqyu juq bhai ge bhiq-a nail ngaol. 8Aq-u phao, aqyu juq Yeiqsul-i mail ge-ai thaq nail daoq al daoq bhai noeq dov lal bhiq thaq nail ngaol.

9A bhai nee ngal-aq, aqyu juq luqdaol nee kovq lee khi, gaqkhoel tsel teevq gaq bhai khi yaqlaol yaoq juq yaoq bhai iqsanl pevq lal-a nail ganl al juq ge bhiq-a nail ngaol. 10Gaqkhoel juq bhai pevq lal-a nail ganl ge bhiq-a nail yaqmai-aq al juq neq, Maqgaqdaqlal meenq bhai jaol nail Maqlil, Yaolhaqna, Yaqkov nail aqma Maqlil khi mail yaoq juq yaoq iqsanl aol nail ngaol. 11Gaqkhoel juq neq, yaqmai-aq juq-i mail ge nail daoq neq, “Teevq phaq-ail aqduq aqyal maq bhao nail daoq ngaol” dai, noeq khi aqyu juq neema maq thaqtsaol-ail. 12Thailhai ngaol-aoq, Bheiqtuvluv thul khi, luqdaol bha tsaol-aivq-a nail ngaol. Aivq tsaoq kel-aivq khi, luqdaol bhai heldaiq ail-u phao, maoltoev bhai taivq-ail ya moel-a nail ngaol. Aq-u phao, aivq noeq-u maq dov dai, ilkhaol bha kovq lai-a nail ngaol.

Eilmaov nail julgu bha ail-a nail ganl

13Aq-u n-gaol, yaqlaol nvq gaq Yeiqlulsaqlaiq meenq nee mail naqli hail lavq eq nail bha jiav nail Eilmaov dai, khul nail julgu bhai ail-a nail ngaol. 14Aq-u phao, pevq lal-a nail ganl al iqsanl mail, aqyu nvq gaq ge thailthaiq nail ngaol. 15Aqyu nvq gaq alhai ge thailthaiq-u phao, Yeiqsul aqyu nvq gaq nail aqjail bha lal khi, aqyu nvq gaq nee mail ail-a nail ngaol. 16Thailhai ngaol-aoq, aqyu nvq gaq nail maivneev bhai doeqkhaiq-ai thaq nail khe-ai, Yeiqsul niidai, maq heldaiq heeq nia-al.

17Aq-u phao Yeiqsul ge nail: “Nul-nq nvq gaq khul nail ganl ge ge-ail, ail nail-aiq” dai, naldaiq-u phao, aqyu nvq gaq maivphaoq niaq laq khel dai, pevq-ail khi, naq lai-a nail ngaol. 18Aqyu nvq gaq nail lavqkhoel nee Gaqlaolphal dai mil-ai thaq nail gaq ge nail: “Niil aq-il mee nia n bhai, Yeiqlulsaqlaiq meenq nail lavqkhoel bhai pevq lal-a nail ganl juq maq heeq nia nail daq-i, naol teevq gaq teevq-eel nial” dai, Yeiqsul bhai ge bhiq-a nail ngaol.

19“Khul nail ganl pevq lal-a nail-aiq” dai, Yeiqsul aqyu nvq gaq bhai naldaiq bhiq-u phao, aqyu nvq gaq ge nail: “Naqsaqlail meenq khe Yeiqsul nail ganl ngaol. Tsaol-aq al gaq neq, Miqyail nail sivtavq bhai maqkhaiq, tsaol-aq nail sivtavq bhai maqkhaiq, aivq ge nail thail nail, nl nail hal nail lavqkhoel, bhaqaoq eeq nail Miqyail nail haqbhoil gedan nail gaq ngaol. 20Philma juq khi mail, ngadao nail aqivq aqtsu juq, aivq ya sil dai, yalkhaq dal yaoq dai, ge khi, yu nail aqlavq lavqkhoel bhai av bhiq khi mail lavqyavq kovtavq bhai bhi tavq heivq-a nail ngaol 21Thailhai ngaol-aoq, aivq neq, Ilsaqleiqlal nail jeq-e jaq-a bhai ul kovq nail gaq ngaol dai, nvjuq noeqthunq nail ngaol. Al ovqtavq, ganl niil juq pevq lal-a nail neq, yanqgaol hail n bhee lal-aoq nail ngaol. 22Niil aq-il, nvjuq nail lavqkhoel khe aol nail yaqmai-aq teevq pav ganav juq iqsanl, noeq-u maq dov nail ganl, nvjuq bhai ge lavq-a nail ngaol. Yanq-nl hao navqmav-ail aqyu juq luqdaol bhai ail thaq nail ngaol. 23Thailhai ngaol-aoq, Yeiqsul nail aqmaol bhai maq moel-a geiq. Aq-u phao, aqyu juq kovq lal khi, ‘Nvjuq nqtavq gaqkhoel bhai ya moel khi, Yeiqsul doevq nail ngaol dai, nqtavq gaqkhoel nvjuq bhai ge lavq-a nail ngaol’ dai, yaqmai-aq al juq ge nail ngaol. 24Nvjuq nail tsaol-aq teevq pav ganav juq iqsanl, luqdaol bhai heldaiq lai-u phao, yaqmai-aq al juq-i mail ge nail khe-ai, ya moel khi ngaol-aoq, aivq bhai maq moel-a geiq” dai, Yeiqsul bhai ge bhiq-a nail ngaol.

25Aq-u phao, Yeiqsul ge nail: “Neema gaol khi neenoeq neekha maq aol nail tsaol-aq juq-ol, Miqyail nail haqbhoil gedan nail juq-i mail ge-ai thaq nail iqsanl bhai neema maq thaqtsaol-ail laiq. 26Khali alhai ya daq gaq khi, aivq nail seiqleiq khaoqsail nail lavqkhoel bhai ya aol lai nail, maq ngel-ail laiq” dai, aqyu nvq gaq bhai naldaiq bhiq-a nail ngaol. 27A bhai nee ngal-aq, Jalliq lavqkhoel bhai, aivq nail ganl khal gevq-ai thaq nail yaoq phaq yaoq-ao nee, Molseiq-i mail gevq-a nail haoqgavq nee mail Miqyail nail haqbhoil gedan nail juq-i mail gevq-ai thaq nail haoqgavq bhai kev dai, aqyu nvq gaq bhai cavq bhiq cov bhiq-a nail ngaol.

28Aqyu nvq gaq julgu aqjail bhai lai kev-u phao, Yeiqsul neq, julgu al gu bhai maq aol lai nail khe-ai khi, iqmoeq phao ail-a nail ngaol. 29Aq-u phao, aqyu nvq gaq ge nail: “Niilniai yavq yaoq. Nlma ga bhoel-aiq nial. Nqkivq iqsanl kivq lee-aiq nial” dai, ge ge-ail, aivq bhai hal deedee-a nail ngaol. Alheel ngel-i mail, aqyu nvq gaq nail ilkhaol bhai yavq nail khi aol lai-a nail ngaol.

30Aivq aqyu nvq gaq nee mail aoq jaq nail dai khi, jaoljaoq-u phao, aivq khaqmul oil khi, Miqyail bhai tsiqeeq-a nail ngaol. A bhai nee ngal-aq, khaqmul al ngaoqpav khi, aqyu nvq gaq bhai bhiq jaq-a nail ngaol. 31Aq-u phao, aqyu nvq gaq nail maivneev bhai doeqkhaiq-ai thaq nail khe-ai dul nail al phao lal khi, Yeiqsul niil dai, heeq nia lal-a nail ngaol. Aq-u phao, Yeiqsul aqyu nvq gaq nail sivtavq nee mail peivq ail-a nail ngaol. 32Aqyu nvq gaq nail gaiqlaq bhai ge nail: “Gailphail lail ma bhai ngadao nvq gaq kovq lee thailthaiq-u phao, ngadao nvq gaq bhai daoq ge tsaoq lal khi, Jalliq nail daoqceevq phaodaiq lavq-u phao, neema lavqkhoel bhai kev dai aol lal khi lavqkhiq tsail deedee lal-a naol” dai, ge nail ngaol.

33Aqyu nvq gaq teevq pov nee tsaoqthul khi, Yeiqlulsaqlaiq meenq bha gaoq lai-a nail ngaol. A bhai lai kev-u phao, gaqkhoel tsel teevq gaq khi mail aqyu juq nee mail jaol nail juq, teevq dao bhai taivq-ail jil lai khi jaol nail bhai ya moel-a nail ngaol. 34Tsaol-aq al juq aqyu nvq gaq bhai ge bhiq-a nail: “Heeqphaq Yeiqsul maldil doevq kovq lal-aoq nail ngaol. Aivq nail aqmaol Silmoq bhai bhi moel-a nail ngaol” dai, ge bhiq-a nail ngaol. 35Aq-u phao, aqyu nvq gaq iqsanl, gailphail lail ma bhai pevq lal-a nail ganl maqkhaiq, khaqmul ngaoq pav-u phao, Yeiqsul niil dai, heeq kivq lal-a nail ganl maqkhaiq, aqyu juq bhai ge bhiq-a nail ngaol.

Yeiqsul aivq nail aqmaol yaqlaol juq bhai bhiq moel-a nail ganl

36Aqyu juq alhai ge thailthaiq-u phao, Yeiqsul aqyu juq nail gaoltsi bhai thulphaol lee khi, “Nuljuq neesal-ovq dei-eiq” dai, aqyu juq bhai ge bhiq-a nail ngaol.

37Thailhai ngaol-aoq, aqyu juq teevq phaq ganav nail aqheel meeq dai, noeq nail ngel-i mail, geesil deedee lal bhiq-a nail ngaol. 38Yeiqsul aqyu juq bhai ge bhiq-a nail: “Khul khi mail, nuljuq nail neema suqsaq nail-aiq. Khul khi mail, neema lavqkhoel bhai pov pov lav lav dai, pevq nail-aiq. 39Maldil ngal ngaol. Ngaq nail aqkhil aqlavq bhai heldaiq yaoq. Ngaq bhai thoiqdaiq heivdaiq lal yaoq. Ngal neq, nuljuq moel nail khe-ai, aqmaol bhao nail ngaol. Aqheel neq, aqmaol maq bhao-ail” dai, ge bhiq-a nail ngaol.

40Alhai ge gaq khi, aivq nail aqkhil aqlavq bhai bhi heldaiq-a nail ngaol. 41Aq-u phao, aqyu juq noeq-u maq dov dai pevq ail khi, lavqkhiq tsail deedee nail ngel-i mail, neema maq thaqtsaol-ai haq-al. Aq-u phao, “Nuljuq jaq nail teevq phaq ganav jiav naol laiq” dai, Yeiqsul aqyu juq bhai naldaiq-a nail ngaol. 42Aqyu juq-i mail poiv-ai thaq nail delgil teevq pav Yeiqsul bhai bivq-a nail ngaol. 43Aq-u phao Yeiqsul oil khi, aqyu juq nail sivtavq nee jaq-a nail ngaol.

Yeiqsul-i mail yaqlaol juq bhai khoel-ail ceevq-a nail daoq

44Aq-u phao, aivq ge nail: “Molseiq nail aoldaoq kovqdaoq nail lavqkhoel bhai maqkhaiq, Miqyail nail haqbhoil gedan nail juq nail haoqgavq lavqkhoel bhai maqkhaiq, Tsiqeeq nail Haoqgavq lavqkhoel bhai maqkhaiq, ngaq nail ganl gevq-ai thaq nail iqsanl mail, ya bhee lal naol dai, ngal nuljuq nee mail jaol-u phao, ge bhiq-ai thaq nail ngaol” dai, ge bhiq-a nail ngaol.

45Aq-u phao, aqyu juq Jalliq nail daoqceevq bhai heeq nia lal dai, Yeiqsul aqyu juq nail neema bhai bhi noeq dov lal-a nail ngaol. 46Yeiqsul ge nail: “Jalliq lavqkhoel bhai niailhai gevq-ai thaq nail ngaol: ‘Khali neq, haq dee aoq deedee nail phaq bhai ya daq khi ya sil nail ngaol. Thailhai ngaol-aoq, hail n bhee lal haq neq, gaoq doevq kovq lal nail ngaol. 47Oeqbal noeq pov yaoq, oeqbal noeq pov nail ngel-i mail, Miqyail oeqbal al phaiq lavq nail ganl, Yeiqlulsaqlaiq meenq nee mail, jeq-e jaq-a iqsanl bhai aivq nail aqmil kov-uvq nee ya cavq bhiq nail ngaol’ dai, gevq-ai thaq nail ngaol. 48Nuljuq neq, niil juq nail ganl salkhil khanq nail tsaol-aq ngaol. 49Ngaq nail Aqbhu-i mail bivq naol dai, saljial jaq-ai thaq nail al gaq, ngal nuljuq jaol nail bha khoel-ai leevq naol. Alheel ngel-i mail, nuljuq nqtavq kovtavq khe bhaqaoq al maq ya-u kev dai, meenq niil meenq bhai daonq yaoq” dai, aqyu juq bhai ge bhiq-a nail ngaol.

Yeiqsul kovq dav lai-a nail ganl

50A bhai nee ngal-aq, Yeiqsul aqyu juq bhai Bheiqtaqnil nail julgu aqjail bha hevq kel-aivq khi mail, aivq aqlavq bavq dil khi, aqyu juq bhai geeqlaoq bivq-a nail ngaol. 51Alhai geeqlaoq bivq thailthaiq-u phao, aivq aqyu juq nee pav-ail khi, nqtavq kovtavq bha bhi tsiqdal laivq-a nail ngaol. 52Aqyu juq neq, Yeiqsul bhai uqhuq thaoq khi mail, lavqkhiq tsail tav dai, Yeiqlulsaqlaiq meenq bha kovq ail-a nail ngaol. 53Aqyu juq khaq mao iqsanl uqhuq thaoq nail ilkhaol il ma bhai jaol khi, Miqyail bhai tsiqeeq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index