Search form

Lulkavq 3

Yaolhaq daoq cavq cavq nail ganl

1Gailsaq Deiqbheiqlil neq, Lolmav milkhaoq khaoq lao bhai uvthaiq nail, tsel ngaq kovq bhee lal-u phao, Ilthullail milkhaoq khi mail Daqlaqgaolnil milkhaoq bhai neq, Heiqlol Aqgilpav nail jaqbheq Pillilpuv joiqjaq nail ngaol. Aqbhilleiq milkhaoq bhai neq, Lulsaqnil joiqjaq nail ngaol. Gaqliqlail milkhaoq bhai neq, Heiqlol Aqgilpav joiqjaq nail ngaol. Bhoqthil Phillav neq, Heiqlol Aqgilpav nail pul-nvq bhai jaol khi, Yuldav milkhaoq bhai joiqjaq nail ngaol. 2Aqnaq khi mail Gaqyaqphal neq, Philma jiovq-ai thaq nail ngaol. Aq-u phao, haqtsoiq haqyal bha jaol nail Saqkhaqlil nail yaqyov Yaolhaq jaol nail bha Miqyail nail daoq kev lee-a nail ngaol. 3Yaolhaq neq, Yaoldaq laoljaol daolbhaq doidoi-ai ail khi, “Miqyail nuljuq nail oeqbal phaiq nia dai, oeqbal noeq pov khi, a bhai nee tavq nail, ulcuvq saol yaoq” dai, daoq cavq cavq nail ngaol.

4Miqyail nail haqbhoil gedan nail Ilsaqyal nail haoqgavq lavqkhoel bhai niailhai gevq-ai thaq nail ngaol:

“Tsaol-aq teevq gaq

haqtsoiq haqyal bhai

jaol khi mailma-ail gul nail:

‘Heeqphaq lee nail

haqbhoil

gailkhaol lav daol khi,

aivq nail gailkhaol

daolcoev dai

lav daol yaoq.

5Gaqlaovq yaoq laovq yaoq-ao nee ya di lal khi, gaoqjaoq jaoq yaq jaoq ma yaoq jaoq yaoq-ao nee ya maiq lee nail ngaol. Gailkhaol lavqgovq juq ya daol lal khi, maq di nail gailkhaol juq ya di lal nail ngaol.’ 6Tsaol-aq iqsanl mail, Miqyail nail hevqkovq nail phaq bhai ya moel nail ngaol” dai, gevq-ai thaq nail ngaol.

7Yaolhaq jaol nail bha ulcuvq saol lee-a nail tsaol-aq munl munl ma juq bhai, Yaolhaq ge bhiq-a nail: “Haqeiv nail eellel khe-ai dul nail yaq juq-ol, yaqhao kev lee nail Miqyail neema phail nail phaq bhai ya jel-ail dai, nuljuq bhai khaq sil gaq-i mail ge lavq-a nail-aiq. 8Maldil oeqbal noeq pov-aoq thaq nail dai dov lal dai, doevq yaoq jaol yaoq. ‘Aqbhaqlaqhaq neq, nvjuq nail aqbhu ngel-i mail, Miqyail neema phail nail phaq bhai ya jel-ail naol’ dai, nuljuq thaq noeq. Khul khi mail dai ngal-aq neq, Miqyail neq lovmav niil juq bhai gov khi, Aqbhaqlaqhaq nail aqjievq lilheel bhi pevq lal nia nail ngaol dai, ngal nuljuq bhai ge lavq bhel. 9Niil aq-il iqsanl, Miqyail neq, aqbhaol daoqthaoq bhai hailjaol bavq thaq-ai thaq nail ngaol. Alheel ngel-i mail, aqheeq aqmeeq maq heeq lee nail aqbhaol yaoq bhaol yaoq-ao nee thul ha khi, miqjaq nail lavqkhoel bhai bavq poiv bhiq nail ngaol” dai, ge bhiq-a nail ngaol.

10Aq-u phao, tsaol-aq munl munl ma juq ge nail: “Thailhai phal-iq neq, nvjuq khalhai ya khi nail-aiq” dai, aivq bhai naldaiq-a nail ngaol.

11Yaolhaq aqyu juq bhai ge bhiq-a nail: “Phailkhaoq nvq keiv jiav nail tsaol-aq, phailkhaoq maq jiav nail tsaol-aq bhai teevq keiv bivq yaoq. Jaqjaq daoldaol jiav nail tsaol-aq iqsanl, maq jiav nail tsaol-aq bhai bhoil bhiq yaoq” dai, ge bhiq-a nail ngaol.

12Khaon tavq nail tsaol-aq iqsanl, ulcuvq saol lee khi ge nail: “Saqlaq-ol, nvjuq khalhai ya khi nail-aiq” dai, Yaolhaq bhai naldaiq-a nail ngaol. 13“Nuljuq, khaon ya tavq nail nee, aljaiq thaq tavq jaiq” dai, aqyu juq bhai ge bhiq-a nail ngaol.

14Genl dev nail juq iqsanl, “Nvjuq khalhai ya khi nail-aiq” dai, aivq bhai naldaiq-u phao, “Teevq gaq nail yalkav bhai iqsanl, thaq khoiq thaq oil. Yu nail phul bhai goiqbhaoq thaq bhaoq jaq. Nuljuq-i mail ya nail bhala aqphoiq bhai, neekhaol sil yaoq” dai, aqyu juq bhai ge bhiq-a nail ngaol.

15Tsaol-aq iqsanl mail Khali bhai noeqthunq-ai thaq-u phao, Yaolhaq bhai, “Khali ngel-ail meeq, maq ngel-ail meeq” dai, aqyu juq yovqgavq nail neema lavqkhoel bhai yovqgavq saol-nvq nail ngaol. 16Aq-u phao, Yaolhaq aqyu juq iqsanl bhai ge bhiq-a nail: “Ngal nuljuq bhai ulcuvq lavqkhoel bhai ulcuvq saol bhiq nail ngaol. Thailhai ngaol-aoq, ngaq-ai nee maqtsil bhaqaoq eeq nail teevq gaq, lee thailthaiq nail ngaol. Ngal neq, aivq nail saiqnaov neeqtsaq bhai pheel nail iqsanl maq geel-nvq-ail. Aivq neq, Meeqnail Haolnail Aqhaqlal lavqkhoel nee maqkhaiq, miqjaq lavqkhoel nee maqkhaiq, nuljuq bhai ulcuvq saol lavq nail ngaol. 17Aivq aqlavq bhai, gov bhoehaol nail tsalbhoe nieivq thaiq-ai thaq nail ngaol. Aivq aivq nail govbhoi bhai bhoehaol khi gov aqmal juq bhai neq, govjil lavqkhoel bhai phi bhoel nail ngaol. Thailhai ngaol-aoq, maq miv-ail nail miqjaq nee mail, gov gov koevq bhai kheq ha nail ngaol” dai, Yaolhaq ge nail ngaol. 18Aq-u phao, Yaolhaq tsaol-aq al juq bhai mee nia phaq nail ganl nee mail gaq bivq nail lavqkhoel, lavqkhiq tsail nail geeqlaoq daoq cavq bhiq-a nail ngaol.

Yaolhaq bhai thaonq bhai laol bhiq-a nail ganl

19Aq-u phao, Heiqlol Aqgilpav neq, Yaolhaq aivq bhai khaq bhiq-a nail ngel-i mail, Yaolhaq bhai thaonq bhai laol-a nail ngaol. Khul khi mail dai ngal-aq neq, Heiqlol neq, aivq nail jaqbheq nail khaqma Heiqloldil bhai hevq-a nail ganl nee maqkhaiq, aivq-i mail nl-a nail haqeiv nail ganl iqsanl nee mail maqkhaiq, Yaolhaq aivq bhai khaq-a nail ngaol. 20Heiqlol neq, jel lal-u phao, aivq haqeiv nail phaq maodai nl-ai thaq nail nee ovqtavq, Yaolhaq bhai thaonq bhai laol-a nail, aqdoil niil phaq iqsanl gaoq nl laoq-a nail ngaol.

Yeiqsul ulcuvq saol-a nail ganl

21Yaolhaq tsaol-aq al juq iqsanl bhai ulcuvq saol gaq bhiq-u phao, Yeiqsul iqsanl ulcuvq saol-a nail ngaol. Aivq geeqlaoq hal thailthaiq-u phao, nqtavq phao lal khi, 22Meeqnail Haolnail Aqhaqlal, khaoqkhoiq khe-ai bhaqlaoq kheq dai, Yeiqsul nail kovtavq bhai yavq kha lee-a nail ngaol. “Naol neq, ngal mailma-ail gaiq-a nail, ngaq nail Yaqyov ngaol. Ngal naoq bhai neekhaol sil deedee naol” dai, nqtavq nee mail aqthel gul dov-ai leevq-a nail ngaol.

Yeiqsul nail aqceevq

23Yeiqsul iqmoeq ilmoeq ganl nl-u phao, hail tsel kovq niidai bhee lal-aoq nail ngaol. Aivq nail aqbhu neq, Yaolsai ngaol dai, tsaol-aq noeq nail ngaol. Yaolsai nee mail aqceevq ge dal laivq haq neq, niailhai ngaol:

Yaolsai, Illil,

24Maqsal,

Leiqbhil, Meiqlaqkhil,

Yaolnav, Yaolsai,

25Maqdaqthil,

Aqmol, Naqhoq,

Ilsaqlil, Naqgail,

26Maqav,

Maqdaqthil, Seiqmil,

Yaolsai, Yaoda,

27Yaolhaqna, Leiqsal,

Seiqlulbheiqlal,

Saqlaqdeiqlal, Neiqlil,

28Meiqlaqkhil,

Aldil, Gaolsaq,

Illaqmaoldav, Illav,

29Yaolsu,

Illeiqsaq, Yaolleiq,

Maqsal, Leiqbhil,

30Silmiqoq,

Yuldav, Yaolsai,

Yaolnaq, Illaqjeiq,

31Meiqleiq,

Mailnaq, Maqdaqdal,

Noqdaq, Daqbhil,

32Yeiqsail,

Aolbhail, Bhaolsav,

Saqlaqmol, Naqsaq,

33Aqmiqnaqdal,

Aqlaq, Heiqyaqloq,

Phaqyail, Yuldav,

34Yaqkov, Ilcav,

Aqbhaqlaqhaq,

Deiqlav, Naqkhaoq,

35Seiqlol,

Laqgaol, Phaqlail,

Heiqbhal, Saqlav,

36Gaqilnav,

Aqphaqyal, Seiqmal,

Nol-avq, Laqmail,

37Maqthulseiqlal,

Ilnaov, Yaqlail,

Maqhaqleiqlal, Gaqilnav,

38Ilnol, Seiqtav,

Aqdaq, Miqyail,

niil juq ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index