Search form

Lulkavq 7

Genl dev teevq yal gaq nail aqivq teevq gaq neema thaqtsaol lal nail ganl

1Yeiqsul al juq bhai cavq bhiq cov bhiq gaq khi, Gaqbheiqneiqoq meenq bhai ail-a nail ngaol. 2A bhai genl dev teevq yal gaq nail aqivq teevq gaq jaol nail ngaol. Aq-u phao, aivq mailma-ail gaiq-a nail yaqkav teevq gaq, nal kav khoeq deedee-ai bhiq nail ngaol. 3Genl dev nail aqivq al gaq, Yeiqsul nail ganl ya gaiq-u phao, Yuldav nail tsaol-aq nail aqivq aqtsu juq bhai khoel khi, “Ngaq nail yaqkav bhai, lav meeq lee lavq yaoq” dai, Yeiqsul jaol nail bha, bhi hal lai-a nail ngaol. 4Aqyu juq, Yeiqsul jaol nail bha lai kev-u phao, Yeiqsul bhai mailma-ail hal hal-ail ge nail: “Aivq neq, naol geeqlaoq nl bhiq nail bhai geel-nvq nail tsaol-aq ngaol. 5Khul khi mail dai ngal-aq neq, aivq neq, ngadao nail jeq-e jaq-a bhai gaiq-a khi, ngadao nail haqbhoil uqhuq thaoq nail ilkhaol cov lavq-a nail ngaol” dai, ge bhiq-a nail ngaol.

6Alheel ngel-i mail, Yeiqsul aqyu juq nee mail ail-a nail ngaol.

Genl dev nail aqivq al gaq nail ilkhaol nee al jaiq-ail maq eq nail bhai, ail kev-u phao, genl dev nail aqivq al gaq, aivq nail aqtsaoq bhai khoel gai-aivq khi, “Heeqphaq-ol, naoq nail aqmaol bhai, khoeq lal dai, thaq nl. Khul khi mail dai ngal-aq neq, naol ngaq nail ilkhaol-ai aol lee nail bhai, ngal maq geel-nvq-ail. 7Alheel ngel-i mail, ngal naol jaol nail bha lal nail maq geel-nvq ail dai, noeq nail ngaol. Naol daoq teevq daoq taivq-ail ge khi ngaol-aoq, ngaq nail yaqkav meeq lai nail ngaol. 8Khul khi mail dai ngal-aq neq, ngal yu nail pul-nvq bhai jaol nail khe-ai, ngaq nail pul-nvq bhai iqsanl, genl dev nail juq jaol nail ngaol. ‘Ail yaoq’ dai, teevq gaq bhai khoel haq neq, aivq ail nail ngaol. ‘Lal yaoq’ dai, teevq gaq bhai khul haq neq, aivq lal nail ngaol. ‘Niil phaq nl yaoq’ dai, ngaq nail yaqkav bhai ge bhiq haq neq, aivq nl nail ngaol” dai, ge bhiq lai-a nail ngaol.

9Yeiqsul daoq al daoq ya gaiq-u phao, noeq-u maq dov dai, pevq ail khi, aivq nail haoqnao tsaothe jaol nail tsaol-aq munl munl ma bhai, haoqnaol naolkovq kovq daiq khi, ge bhiq-a nail: “Ngal nuljuq bhai ge lavq bhel. Ngal Ilsaqleiqlal nail tsaol-aq nail lavqkhoel bhai iqsanl, niidai dai-ail neema thaqtsaol nail tsaol-aq, maq moel daiq haq-al” dai, ge bhiq-a nail ngaol. 10Khoel-ai lavq-a nail tsaol-aq al juq, ilkhaol bhai kovq kev ail-u phao, yaqkav al gaq meeq lai thaq nail bhai, ya moel-a nail ngaol.

Yeiqsul miqtsiq miqma teevq gaq nail yaqyov bhai, bhiq doevq kovq lal-a nail ganl

11A bhai nee ngal-aq, mao-ail maq khaiq-ail mail, Yeiqsul Naqilnav meenq bhai, lai-a nail ngaol. Aivq nail yaqlaol juq khi mail tsaol-aq munl munl ma juq iqsanl, aivq nee mail lai-a nail ngaol. 12Aivq meenq nail laolkhoiq bhai lai kev-u phao, sil thaq nail tsaol-aq bhai, duqpheeq ail nail dai khi mail, yu bavq dol leevq thailthaiq nail ngaol. Sil thaq nail al gaq nail aqma neq, miqtsiq miqma ngaol. Aivq neq, yaqyov al teevq gaq jaol-ail teevq-eel ngaol. Miqtsiq miqma al gaq nee mail, meenq bhai jaol nail tsaol-aq mee nia gaq iqsanl, dov lee thailthaiq nail ngaol.

13Yeiqsul yaqmai-aq al gaq bhai ya moel-u phao, gaoqhaq deedee nail lavqkhoel, “Thaq nioil” dai, ge bhiq-a nail ngaol. 14Yeiqsul aqjail bhai lai khi, doiqpheq bhai aqlavq bavq dav-u phao, bavq-nvq thaq nail tsaol-aq al juq, naq lai-a nail ngaol. “Yaqyov-aq yaqnoil-ol, ngal naoq bhai ge lavq bhel, thul lal yaoq” dai, Yeiqsul aivq bhai ge bhiq-a nail ngaol. 15Aq-u phao, sil-ai thaq nail al gaq, jaoldeel lal khi, daoq ge lal-a nail ngaol. Yeiqsul tsaol-aq al gaq bhai, aivq nail aqma nail aqlavq lavqkhoel bhai av bhiq-a nail ngaol.

Yeiqsul nail ganl al, gaiq doi ail-a nail ngaol

16Aq-u phao, tsaol-aq iqsanl mail, geesil deedee lal bhiq khi, Miqyail bhai tsiqeeq tsiqeeq-ail ge nail: “Miqyail nail haqbhoil gedan nail eeq nail gaq, nvjuq nail lavqkhoel bhai, dov lee-aoq nial. Miqyail aivq nail tsaol-aq bhai, heldaiq lee-aoq nial” dai, aqyu juq ge nail ngaol. 17Yeiqsul-i mail nl-a nail ganl al, Yuldav milkhaoq khaoq lao bhai khi mail aqjail bhai jiav nail milkhaoq juq bhai iqsanl, gaiq doi ail-a nail ngaol.

Yeiqsul khi mail Yaolhaq nail ganl

18Yaolhaq nail yaqlaol juq ganl al iqsanl mail, Yaolhaq bhai ge gaiq bhiq lai-a nail ngaol. 19Yaolhaq, aivq nail yaqlaol nvq gaq bhai khul khi, “Lee naol dai, ge nail gaq naol ngaol laiq. Maq ngel haq neq, nvjuq yaoq gaq yaoq bhai, ya noeqthunq-ai haq nail laiq” dai, Yeiqsul bhai bhi naldaiq ail-a nail ngaol.

20Tsaol-aq al nvq gaq, Yeiqsul jaol nail bha lee kev khi, “ ‘Lee naol dai, ge nail gaq, naol ngaol laiq. Maq ngel haq neq, nvjuq yaoq gaq yaoq bhai ya noeqthunq-ai haq nail laiq’ dai, ulcuvq saol bhiq nail Yaolhaq nv-nvq gaq bhai, bhi naldaiq lee lavq-a nail ngaol” dai, ge bhiq-a nail ngaol.

21Yanq yaqlao al nail lavqkhoel, Yeiqsul neq, nal nail goel nail tsaol-aq khi mail, haq nail aoq nail nalgoel nal nail tsaol-aq mee nia gaq bhai, bhi meeq lai khi, haqeiv nail neivq juq bhai iqsanl, the dov thailthaiq nail ngaol. Maivpeivq peivq nail juq bhai iqsanl, maivneev bhi moel lal-a nail ngaol. 22Yeiqsul aqyu nvq gaq bhai ge bhiq-a nail: “Nul-nq nvq gaq-i mail ya gaiq ya moel-a nail khe-ai, Yaolhaq bhai ge bhiq ail yaoq. Maivpeivq juq maivneev moel nia lal-a nail ngaol. Aqkhil khil khoi juq, tsao nia lal-a nail ngaol. Niaoqbhaoq daol nail juq, meeq lal haol lal-a nail ngaol. Naqthaoq juq, gaiq nia lal-a nail ngaol. Sil-a nail juq, gaoq doevq kovq lal-a nail ngaol. Haq nail aoq nail juq, lavqkhiq tsail nail geeqlaoq daoq ya gaiq-a nail ngaol. 23Ngal bhaqda nee neema maq cov nail gaq neq, geeqlaoq eeq nail ngaol” dai, ge bhiq-a nail ngaol.

24Yaolhaq-i mail khoel-ai leevq-a nail al nvq gaq kovq ail jel-u phao, Yeiqsul Yaolhaq nail ganl tsaol-aq munl munl ma juq bhai, ge bhiq-a nail: “Nuljuq khul bhai heldaiq ail nail dai khi mail, haqtsoiq haqyal bhai ail nail-aiq. Lilmoel bhoe nail ngel-i mail, dao thailthaiq nail lunl aqkhaoq bhai, heldaiq ail-a nail laiq. 25Maq ngel haq neq, khul bhai heldaiq ail-a nail-aiq. Mao-ail meeq nail aqgaq aqdoi doi-nq thaq nail gaq bhai, heldaiq ail-a nail laiq. Maq ngel. Meeq dee jaq deedee nail aqgaq aqdoi doi khi, jaljaq aqkheel taivq-ail jaq nail tsaol-aq neq, heeqphaq nail jaol duq bhai jaol nail ngaol. 26Maq ngel haq neq, khul bhai heldaiq ail-a nail-aiq. Miqyail nail haqbhoil gedan nail gaq bhai laiq. Ngel naol. Miqyail nail haqbhoil gedan nail gaq bhai, heldaiq ail-a nail ngaol. Aivq neq, Miqyail nail haqbhoil gedan nail juq nee maqtsil, eeq jaiq nail gaq ngaol dai, ngal nuljuq bhai ge lavq bhel.

27‘Naoq nail iqmoeq nee,

naoq nail haqbhoil

gailkhaol bhi lav

daol-ail nail dai khi,

ngaq nail gaqkhoel

naoq nail iqmoeq nee mail

ngal khoel gai-aivq naol’ dai,

Jalliq lavqkhoel bhai gevq-ai thaq nail al gaq neq, Yaolhaq bhai ge nail ngaol.

28Ngal nuljuq bhai ge lavq bhel. Yaqmai-aq nail ovqmav lavqkhoel nee, khal doevq lee-a nail tsaol-aq juq nail lavqkhoel, Yaolhaq nee maqtsil, eeq nail gaq teevq gaq-ail maq jaol-ail. Thailhai ngaol-aoq, Miqyail Milkhaoq lavqkhoel nil jaiq nail gaq neq, aivq nee maqtsil, eeq nail ngaol” dai, ge bhiq-a nail ngaol.

Neema thaqtsaol nail tsaol-aq khi, neema maq thaqtsaol nail tsaol-aq

29Khaon tavq nail tsaol-aq khi mail, tsaol-aq iqsanl mail, al bhai ya gaiq-u phao, Miqyail nail daoq bhai, neema tsaq nail ngaol. Aqyu juq neq, Yaolhaq-i mail ulcuvq saol bhiq-a nail juq ngaol. 30Thailhai ngaol-aoq, Phaqliqsail juq khi mail, aoldaoq kovqdaoq cavq nail cov nail juq neq, Miqyail-i mail aqyu juq nail haqbhoil lav sav-ai thaq nail bhai, khaonq-ail ceevq-a nail ngaol. Aqyu juq neq, Yaolhaq-i mail ulcuvq maq bhi saol-a.

31Yeiqsul gaoq ge nail: “Alheel ngel-i mail, niil yeel khe tsaol-aq neq, khul phaq nee tsiq ceiv daiq heeq meeq. 32Niil yeel khe tsaol-aq juq neq, julgu leivkeiv bhai aoltavq tavq nail yaqnoil juq, teevq gaq nee teevq gaq, gul tsaoq pheeljaq nail khe-ai, dul nail ngaol. ‘Nuljuq nail haqbhoil, nvjuq laiqgaiq jiiv khi ngaol-aoq, nuljuq bhoeloe maq nioi-ail. Nvjuq nioilkhaoq khaoq khi ngaol-aoq, nuljuq maq nioil-ail’ dai, yaqnoil juq gul tsaoq pheeljaq nail ngaol.

33Khul khi mail dai ngal-aq neq, ulcuvq saol bhiq nail Yaolhaq lee-u phao, aoq maq jaq nail nee ovqtavq, aqheeq tsilju nail ullul maq daol nail ngel-i mail, ‘Aivq neq, neivq aol nail tsaol-aq niil’ dai, nuljuq ge nail ngaol. 34Tsaol-aq nail Yaqyov lee-u phao neq, jaq nail daol nail ngel-i mail, ‘Tsaol-aq niil gaq neq, al jaiq jaq jel daol jel nail tsaol-aq, aqheeq tsilju nail ullul al jaiq daol jel nail tsaol-aq, khaon tavq nail tsaol-aq khi oeqbal yaq juq nee mail, aqtsaoq tsaoq nail tsaol-aq niil’ dai, nuljuq ge nail ngaol. 35Thailhai ngaol-aoq, Miqyail nail neenoeq neekha neq, tsaq nail daol nail ngaol dai, aivq nail yaqlaol juq bhaqda nee, yu ya heeq nia nail ngaol” dai, aqyu juq bhai ge bhiq-a nail ngaol.

Yeiqsul Silmoq dai khul nail Phaqliqsail teevq gaq nail ilkhaol bhai jaol-u phao khe ganl

36“Ngaq nail ilkhaol bhai, aoq jaq lee yaoq” dai, Phaqliqsail teevq gaq Yeiqsul bhai khul-a nail ngaol. Al heel ngel-i mail, Yeiqsul Phaqliqsail al gaq nail ilkhaol bhai aol lai khi, aoq jaq nail dai khi, jaoljaoq lai-a nail ngaol. 37Phaqliqsail nail ilkhaol bhai, Yeiqsul aoq jaq thailthaiq nail ngaol dai, meenq al meenq nail lavqkhoel bhai jaol nail, oeqbal aol nail yaqmai-aq teevq gaq, heeq nia-u phao, aivq neq, mao-ail phoiq nail huqbhiq nil nail ulcuvq deq nail phulleq deel lovmav malcavq teevq cavq tsiq khi lal-a nail ngaol. 38Aivq Yeiqsul nail haoqnaol phao, aqkhil daoqthaoq bhai thulphaol khi nioil-a nail ngaol. Aivq nail maivbhil, Yeiqsul nail aqkhil kovtavq bhai jiavdav khi, aivq nail tsailkheel-i mail, siv bhiq-a nail ngaol. A bhai nee ngal-aq, aivq Yeiqsul nail aqkhil bhai, moeqsaol saol khi, huqbhiq nil nail ulcuvq al leivq bhiq-a nail ngaol.

39Yeiqsul bhai khul-a nail Phaqliqsail al gaq, al bhai ya moel-u phao, neema lavqkhoel bhai niailhai noeq nail ngaol: “Tsaol-aq niil gaq, Miqyail nail haqbhoil gedan nail gaq ngel haq neq, aivq bhai thoiqtsi thailthaiq nail yaqmai-aq thoil gaq, khaq sil gaq ngel-ail, khalheel nail yaqmai-aq ngel-ail dai, aivq heeq nia nail ngaol. Yaqmai-aq thoil gaq, oeqbal yaq ngaol dai iqsanl, aivq heeq nia nail ngaol” dai, Phaqliqsail al gaq noeq nail ngaol.

40“Silmoq-ol, ngal naoq bhai teevq phaq ge bhiq movq-ail nial” dai, Yeiqsul Phaqliqsail al gaq bhai, ge bhiq-u phao, “Saqlaq-ol, ge lavq yaoq” dai, aivq ge kovq bhiq-a nail ngaol.

41Yeiqsul Silmoq bhai ge bhiq-a nail: “Phul phal bhiq nail tsaol-aq bhai, gailjiov bavq nail nvq gaq jaol nail ngaol. Teevq gaq neq, ngaq yal bavq bavq khi, teevq gaq neq, ngaq tsel bavq bavq nail ngaol. 42Aqyu nvq gaq, khul teevq phaq-ail, bivq kovq nail maq jiav nail ngel-i mail, phul phal bhiq-a nail gaq, aqyu nvq gaq nail gailjiov iqsanl mail, khaonq bhiq-a nail ngaol. Aqyu nvq gaq nail lavqkhoel khe khul gaq, phul khaonq bhiq-a nail gaq bhai, gaiq-a jaiq nail-aiq” dai, naldaiq bhiq-a nail ngaol.

43“Ngal noeq nail neq, ya jel ail-a nail gailjiov bavq jaiq nail gaq, aivq bhai gaiq-a jaiq nail ngaol” dai, Silmoq ge kovq bhiq-u phao: “Naol noeq nail tsaq naol” dai, Yeiqsul aivq bhai ge bhiq-a nail ngaol.

44A bhai nee ngal-aq, Yeiqsul yaqmai-aq al gaq bhai, haoqnaol naolkovq kovq daiq khi, Silmoq bhai ge bhiq-a nail: “Yaqmai-aq niil gaq bhai, naol moel-aoq naol laiq. Ngal naoq nail ilkhaol bhai aol lal-u phao, aqkhil tsiq nail haqbhoil, naol ulcuvq maq tsiq lavq-al. Thailhai ngaol-aoq, yaqmai-aq niil gaq, aivq nail maivbhil ngaq nail aqkhil bhai jiav dav khi, aivq nail tsailkheel-i mail siv lavq-a nail ngaol. 45Naol ngaq bhai moeqsaol saol khi, maq hav lavq-al. Thailhai ngaol-aoq, yaqmai-aq niil gaq neq, ngal aol lal-u nee mail, niil aq-il kev dai, ngaq nail aqkhil bhai, moeqsaol saol nail ngaol. 46Naol ngaq nail uqhuq bhai, aqtseel maq leivq lavq-al. Thailhai ngaol-aoq, aivq ngaq nail aqkhil bhai, huqbhiq nil nail ulcuvq leivq lavq-a nail ngaol. 47Alheel ngel-i mail, ngal naoq bhai ge lavq bhel. Aivq neq, oeqbal maodai ya jel ail-a nail ngel-i mail, gaiq-a deedee nail ngaol. Oeqbal micil taivq-ail aol khi, ya jel ail-a nail tsaol-aq neq, micil taivq-ail gaiq-a nail ngaol” dai, ge bhiq-a nail ngaol.

48Yeiqsul yaqmai-aq al gaq bhai iqsanl, “Naoq nail oeqbal phaiq-ao naol” dai, ge bhiq-a nail ngaol.

49Aivq nee mail jaol khi jaq nail tsaol-aq juq ge nail: “Oeqbal phaiq nia nail tsaol-aq niil gaq neq, khaq sil gaq meeq” dai, aqyu juq nail gaiqlaq bhai, teevq gaq nee teevq gaq, ge pheeljaq nail ngaol.

50Yeiqsul yaqmai-aq al gaq bhai ge bhiq-a nail: “Naol ngaq bhai neema thaqtsaol nail ngel-i mail, hevqkovq nail phaq ya nail ngaol. Naol neesal-ovq nail lavqkhoel nee, kovq ail yaoq” dai, ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index