Search form

Maqkul 15

Yeiqsul bhai heeqphaq Phillav nail sivtavq bhai hel laivq-a nail ganl

1Nqbhaq bhaq lal-u phao, Philma juq, aqivq aqtsu juq, Aoldaoq Kovqdaoq cavq nail cov nail juq khi mail maoqbhaoq nl nail bhai aol nail munl munl lao-ail maoqbhaoq nl-a nail ngaol. A bhai nee ngal-aq, Yeiqsul bhai pheethaiq khi, heeqphaq Phillav jaol nail bha hel-aivq khi aivq nail aqlavq lavqkhoel bhai av bhiq-a nail ngaol.

2Aq-u phao, Phillav Yeiqsul bhai “Naol Yuldav tsaol-aq nail heeqphaq ngaol laiq” dai, naldaiq-a nail ngaol. “Naol ge nail khe-ai, ngel naol” dai, Yeiqsul ge kovq bhiq-a nail ngaol.

3Philma juq neq, Yeiqsul nail kovtavq bhai oeqbal mee nia phaq thaq nail ngaol. 4“Naol teevq phaq iqsanl maq ge kovq bhiq laiq. Aqyu juq naoq nail kovtavq bhai oeqbal khadai thaq thailthaiq nail ngel-ail” dai, Phillav Yeiqsul bhai ge bhiq-a nail ngaol.

5Thailhai ngaol-aoq, Yeiqsul daoq teevq daoq iqsanl maq gaoq ge kovq bhiq-a nail bhaqda nee, Phillav noeq-u maq dov dai, pevq ail-a nail ngaol.

Yeiqsul bhai heivq yaoq dai, dal ceiv-a nail ganl

6Bhaqsaqkhaq bhaoqaiq lav sav thailthaiq-u phao, thaonq bhai aol nail tsaol-aq juq nail lavqkhoel khe, milkhaoq yaq neema tsaq khi hal dov nail tsaol-aq teevq gaq bhai, Phillav ya phaiq dov bhiq nail aol jiav nail ngaol. 7Yanq al yanq lavqkhoel, milkhaoq bhai suqsaq lal dai nl nail nee ovqtavq, tsaol-aq bhai heivq-a nail ngel-i mail, thaonq bhai laol-ai thaq nail tsaol-aq teevq munl jaol nail ngaol. Bhaqlaqbhal dai mil-ai thaq nail teevq gaq iqsanl aqyu juq nail munl bhai aol khi thaonq bhai laol-ai thaq nail ngaol. 8Aq-u phao, tsaol-aq munl munl ma Phillav jaol nail bha lal khi, “Yaoq kovq yaoq-ao nee mail, naol nl lavq nail khe-ai, nl lavq yaoq” dai, hal lai-a nail ngaol.

9“Nuljuq nail haqbhoil Yuldav nail tsaol-aq nail heeqphaq bhi phaiq movq-ail laiq” dai, Phillav aqyu juq bhai naldaiq-a nail ngaol. 10Khul khi mail dai ngal-aq neq, “Philma juq Yeiqsul bhai neekhaol maq sil-ai bhiq nail ngel-i mail, ngaq bhai av lavq thaq nail niil” dai, Phillav heeq nia nail ngaol. 11Thailhai ngaol-aoq, “Yeiqsul bhai maq phaiq-ail, Bhaqlaqbhal bhai phaiq yaoq dai, ge dei-eiq” dai, Philma juq tsaol-aq munl munl ma juq bhai gaq bivq-ai thaq nail ngaol.

12“Thailhai phal-iq neq, Yuldav nail tsaol-aq nail heeqphaq dai nuljuq khul nail gaq bhai ngal khalhai ya khi bhiq nail-aiq” dai, Phillav aqyu juq bhai naldaiq-u phao, 13“Aivq bhai lavqyavq kovtavq bhai tavq heivq yaoq” dai, aqyu juq mailma-ail gul nail ngaol.

14“Khul khi mail bhi tavq heivq movq nail-aiq, aivq haqeiv nail phaq khul nl-a nail-aiq” dai, Phillav aqyu juq bhai naldaiq bhiq-a nail ngaol. Aq-u phao, “Aivq bhai lavqyavq kovtavq bhai tavq heivq yaoq” dai, aqyu juq iqmoeq-u nee maqtsil gul kav lal-a nail ngaol.

15Phillav tsaol-aq munl munl ma neema tsaq dai, nl movq nail ngel-i mail, Bhaqlaqbhal bhai phaiq bhiq-a nail ngaol. A bhai nee ngal-aq, “Yeiqsul bhai neeqtsaq-i mail jiivq khi lavqyavq kovtavq bhai tavq heivq yaoq” dai, daoq bivq khi, genl dev nail juq nail aqlavq lavqkhoel bhai av bhiq-a nail ngaol.

Genl dev nail juq Yeiqsul bhai khal nl movq-ail nl bhiq-a nail ganl

16Genl dev nail juq-i mail Yeiqsul bhai genl dev nail aqivq juq jaol nail ilkhaol lavqkhoel bhai hevq bhoel-aivq khi genl dev teevq munl munl lao-ail, a bhai bhi jil lal-a nail ngaol. 17Aqyu juq Yeiqsul bhai nel nav nav nail heeqphaq nail phailkhaoq heelma bhi doi-a nail ngaol. A bhai nee ngal-aq, aqgoe aqjiav oil khi, heel uqtsaoq khe-ai jievq khi, aivq bhai nieivq tsaoq bhiq-a nail ngaol. 18Aqyu juq aivq bhai ev nail khe-ai tavq khi, “Yuldav nail tsaol-aq nail heeqphaq-ol, naol geeqlaoq eeq dei-eiq” dai, meelnaq bhiq-a nail ngaol. 19A bhai nee ngal-aq, aqyu juq lunl aqkhaoq-i mail aivq nail uqhuq bhai deeq deedee-a nail ngaol. Aivq bhai thaiqkhaq thaiqbav bhiq khi, peevqceevq kovdoiq doiq khi mail, aivq bhai uqhuq thaoq bhiq-a nail ngaol. 20Aqyu juq aivq bhai khal nl movq-ail nl bhiq gaq-al nee ngal-aq neq, aivq-i mail doi-nq thaq nail nel nav nav nail phailkhaoq heelma nieivq loev khi, aivq nail aqgaq aqdoi gaoq bhi doi-a nail ngaol. A bhai nee ngal-aq, lavqyavq kovtavq bhai tavq heivq nail dai khi, aivq bhai hevq dol-aivq-a nail ngaol.

Yeiqsul bhai lavqyavq kovtavq bhai tavq heivq-a nail ganl

21A bhai nee ngal-aq, Khulleiqniq meenq bhai jaol nail Silmoq dai mil-ai thaq nail gaq, yalgaol nee kovq lal thailthaiq nail ngaol. Aivq neq, Aqleiqsaqdul khi mail, Lulphul nail aqbhu ngaol. Genl dev nail juq aivq bhai nieivq khi, Yeiqsul nail lavqyavq bhi bavq-a nail ngaol. 22Aqyu juq Gaollaqgaoldav dai khul nail dao, Yeiqsul bhai hel-aivq-a nail ngaol. Aqmil al mil neq, uqcov bhai khul nail ngaol. 23Mullaq dai khul nail huqbhiq nil nail aqtseel kheq-ai thaq nail aqheeq tsilju nail ullul aqyu juq aivq bhai bhi daol khi ngaol-aoq, aivq maq daol-al. 24Aqyu juq aivq bhai lavqyavq kovtavq bhai tavq thaiq gaq khi mail, aivq nail aqgaq aqdoi khul gaq khul keiv ya nail dai, eellaoq bheq khi bhoilpav khi oil-a nail ngaol.

25Aqyu juq aivq bhai lavqyavq kovtavq bhai tavq thaiq-a nail yanq neq, nqhao laoma phao naqli goiq lavq bhai ngaol. 26Yuldav nail tsaol-aq nail heeqphaq ngaol dai, aivq bhai oeqbal thaq nail haoqgavq gevq khi, aivq nail kovtavq bhai tavq thaiq-ai thaq nail ngaol. 27Yeiqsul nee mail teevq gaq khe-ai, khoiqbhaoq nvq gaq bhai iqsanl, lavqmal phao teevq gaq, lavqtsel phao teevq gaq dai, tavq thaiq-a nail ngaol.

28[“Haqeiv nail tsaol-aq juq nee mail aivq bhai saol-nvq bhoel-ai thaq nail ngaol” dai, ge-ai thaq nail Jalliq daoq al daoq bhee lal-a nail ngaol.]

29Khal ail khal lal nail tsaol-aq juq, uqhuq jiivq jiivq-ail, aivq bhai meelnaq meelnaq-ail khi ge nail: “Al lal naol neq, uqhuq thaoq nail ilkhaol il ma bhai peiv ha khi hail n nail lavqkhoel bhai cov phal kivq naol dai, ge lao nail, maq ngel-ail laiq. 30Naol naoq nail aqmaol bhai bhi jel-ail khi lavqyavq kovtavq nee yavq kha lee yaoq thoq” dai, ge bhiq-a nail ngaol.

31Alhai dul dai, Philma juq khi mail Aoldaoq Kovqdaoq cavq nail cov nail juq iqsanl, Yeiqsul bhai meelnaq bhiq-a nail ngaol: “Aivq aqyu juq bhai hevqkovq kivq naol geiq. Aivq nail aqmaol bhai neq, aivq maq hevq kovq nia-il laq. 32Ilsaqleiqlal jeq-e nail heeqphaq pevq nail Khali thoil gaq, niil aq-il lavqyavq kovtavq nee, yavq kha lee nail bhai ya moel ail nul neq, ngadao juq aivq bhai neema thaqtsaol naol laq” dai, aqyu juq nail gaiqlaq bhai ge nail ngaol. Yeiqsul nee mail lavqyavq kovtavq bhai tavq thaiq-ai thaq nail al nvq gaq iqsanl, aivq bhai meelnaq meelnaq-ail, ge nail ngaol.

Yeiqsul aqhaq ceiv-a nail ganl

33Aq-u phao, n-gaol gaolkav kav nail yanq nee mail, kivq hail lail ma phao naqli hail lavq bhai kev dai, miltsaq heeq lao lao-ail navtsee dai, pevq ail-a nail ngaol. 34Kivq hail lail ma phao naqli hail lavq bhee lal-u phao, Yeiqsul aqthel aqkav kav dai, niailhai gul-a nail ngaol: “Eilohi, Eilohi, laqmaq saqbhaq taqnil” dai, gul-a nail ngaol. Daoq al daoq neq, “Ngaq nail Miqyail-ol, ngaq nail Miqyail-ol, khul khi mail naol ngaq bhai khaonq ha lavq nail-aiq” dai, ge nail ngaol.

35Aqjail bhai thulphaol nail tsaol-aq teevq pav ganav juq daoq al daoq bhai ya gaiq-u phao, “Aivq Eillilya bhai khul nail niil” dai, ge nail ngaol.

36Aq-u phao, tsaol-aq teevq gaq lavqtsail mail, iqyaq iqma khe mullul khe-ai dul nail niaqpeovq teevq khai cev-ail khi, aqtsel tsel nail aqheeq tsilju nail ullul bhai oil deev-a nail ngaol. A bhai nee ngal-aq, lunl aqkhaoq bhai soiq tsaoq khi, Yeiqsul bhai bhi siv daol-a nail ngaol. Tsaol-aq al gaq ge nail: “Thaq tsal lao. Eillilya aivq bhai lavqyavq kovtavq nee bhi jel-ail meeq. Daonq daiq bhel” dai, ge bhiq-a nail ngaol.

37Thailhai ngaol-aoq, Yeiqsul aqthel aqkav kav dai, teevq pov gaoq gul khi, aqhaq ceiv-a nail ngaol.

38Aq-u phao, uqhuq thaoq nail ilkhaol il ma lavqkhoel khe thao pav-ai thaq nail haqphal phal ma, uqhuq nee mail daoqthaoq bhai dov dai, nvq pav pav ail-a nail ngaol. 39Yeiqsul alhai aqhaq ceiv-a nail bhai aivq nail sivtavq bhai thulphaol nail genl dev teevq yal gaq nail aqivq teevq gaq ya moel-u phao, “Tsaol-aq niil gaq neq, maldil Miqyail nail Yaqyov ngel lao thaq nial” dai, ge nail ngaol.

40A bhai nee al jaiq-ail maq eq nail bhai, yaqmai-aq teevq pav ganav juq iqsanl jaol khi heldaiq thailthaiq nail ngaol. Aqyu juq nail lavqkhoel Maqgaqdaqlal meenq bhai jaol nail Maqlil, Yaqkov yaqnoil gaq khi mail Yaolseiq nail aqma Maqlil khi mail, Saqloqmeiq aqyu juq jaol nail ngaol. 41Aqyu juq neq, Yeiqsul Gaqliqlail milkhaoq bhai jaol-u phao, aivq nail haoqnao tsaothe tsaothe-ail, tsaojao-ai bhiq-a nail juq ngaol. Yeiqlulsaqlaiq meenq bha aivq nee mail dav lal-a nail yaqmai-aq maodai gaq iqsanl, a bhai jaol khi heldaiq thailthaiq nail ngaol.

Yeiqsul bhai bavq duq ail-a nail ganl

42Aq-u n-gaol neq, jaol n n-gaol nail iqmoeq phao khe n pevq nail lainq nail aqn ngaol. Alheel ngel-i mail, kivq hail hail lee-u phao, 43Aqlilmaqthaiq meenq bhai jaol nail, Yaolsai dai mil-ai thaq nail teevq gaq lal-a nail ngaol. Aivq neq, maoqbhaoq nl nail munl lavqkhoel bhai yu ev nail teevq gaq pevq nail ngaol. Aivq iqsanl, Miqyail Milkhaoq kev lee nail bhai noeqthunq nail ngaol. Aivq maq geesil dai, Phillav jaol nail bhai Yeiqsul nail aqmaol hal lai-a nail ngaol. 44Yanq a dai kev lal-a teevq-eel ngaol-aoq, Yeiqsul sil-a nail ngel-i mail, Phillav noeq-u maq dov dai, pevq ail-a nail ngaol. Alheel ngel-i mail, Yeiqsul sil-u phao khe jaol nail genl dev teevq yal gaq nail aqivq al gaq bhai khul khi, “Aivq maldil sil-aoq nail ngaol laiq” dai, naldaiq-a nail ngaol. 45“Sil-aoq nail ngaol” dai, genl dev teevq yal gaq nail aqivq aivq bhai ge bhiq-u phao, “Yeiqsul nail aqmaol bhai bal-aivq kivq naol” dai, Phillav Yaolsai bhai ge bhiq-a nail ngal. 46Yaolsai neq, haqphal phal phul ul-aivq khi, Yeiqsul nail aqmaol bhai bavq kha gaq-u phao, maoltoev toev khi mail, lovmav-i mail tavq-ai thaq nail luqdaol bhai bavq duq ail-a nail ngaol. A bhai nee ngal-aq, luqdaol nail moeqkhoeq bhai lovmav heeq ma teevq heeq ngaoq tsoiq-ail ceevq-a nail ngaol. 47Maqgaqdaqlal meenq bhai jaol nail Maqlil khi mail Yaolseiq nail aqma Maqlil Yeiqsul bhai bavq duq-a nail dao bhai ya moel-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index