Search form

Maqthaiq 21

Yeiqsul moeqphaq laljieiv jeeq khi Yeiqlulsaqlaiq meenq bha aol lai-a nail ganl

1Yeiqsul khi mail aivq nail yaqlaol juq Yeiqlulsaqlaiq meenq aqjail bhai tsao kel lavq khi, Saqloq gaoqjaoq aqjail bhai jiav nail Bheilphaqjeiq julgu bhai lai kev-u phao, Yeiqsul aivq nail yaqlaol nvq gaq bhai iqmoeq phao khoel gai-aivq-a nail ngaol. 2Aivq yaqlaol al nvq gaq bhai ge bhiq-a nail: “Nul-nq nvq gaq iqmoeq phao jiav nail julgu bhai lai yaoq. A bhai moeqphaq laljieiv aqma teevq maol khi aqyaq teevq maol pheethaiq-ai thaq nail bhai ya moel nail ngaol. Cevpheel khi ngal jaol nail bha tseel leevq yaoq. 3Tsaol-aq teevq gaq ganav nul-nq nvq gaq bhai teevq phaq ganav ge lal haq neq, ‘Heeqphaq loq nail ngaol’ dai, ge bhiq dei-eiq. Alhai ge bhiq haq neq, teevq pov taivq-ail aivq nul-nq nvq gaq bhai bhi tseel-aivq lavq nail ngaol” dai, ge bhiq-a nail ngaol.

4Miqyail nail haqbhoil gedan nail gaq nail daoq bhi bhee lal nail dai khi, alhai pevq lal-a nail ngaol.

5Aivq ge nail:

“Yeel-ovq nail yaqmiq+ bhai

niailhai ge bhiq yaoq.

‘Heldaiq dei-eiq.

Naoq nail Heeqphaq

neenuq neebeiv

aol nail lavqkhoel nee,

moeqphaq laljieiv

aqma teevq maol

khi mail aqyaq teevq maol

bhai jeeq khi,

naol jaol nail bha lee

thailthaiq nail ngaol’ ” dai,

ge-ai thaq nail ngaol.

6Yeiqsul aqyu nvq gaq bhai khoel nail khe-ai, yaqlaol al nvq gaq nl ail-a nail ngaol. 7Moeqphaq laljieiv al nvq maol Yeiqsul jaol nail bha tseel-aivq bhiq-a nail ngaol. A bhai nee ngal-aq, al nvq maol nail kovtavq bhai, aqyu juq nail aqgaq aqdoi kheq dav bhiq khi, Yeiqsul bhai bhi jeeq-a nail ngaol. 8Tsaol-aq munl munl ma juq yovqgavq nail aqgaq aqdoi yovqgavq gailkhaol bhai kheq-a nail ngaol. Teevq pav ganav juq neq, yaljail bhai bhuq tsil khi, gailkhaol bhai kheq-a nail ngaol. 9Yeiqsul nail iqmoeq khi mail haoqnao tsaothe jaol nail tsaol-aq munl munl ma juq neq,

“Hoqsaqnaq,

Daqbhil nail Yaqyov

bhai tsiq eeq bhel. +

Heeqphaq Miqyail nail

aqmil kov-uvq nee

lee nail gaq

geeqlaoq eeq dei-eiq.

Hoqsaqnaq!

Nqtavq kovtavq

bhai iqsanl,

aivq bhai

tsiq eeq dei-eiq” dai,

mailma-ail gul nail ngaol.

10Yeiqsul Yeiqlulsaqlaiq meenq bha aol lai thailthaiq-u phao, meenq bhai jaol nail tsaol-aq iqsanl mail suqsaq lal khi, “Tsaol-aq thoil gaq neq, khaq sil gaq” dai, naldaiq-a nail ngaol.

11“Niil gaq neq, Gaqliqlail milkhaoq bhai jiav nail Naqsaqlail meenq yaq, Miqyail nail haqbhoil gedan nail Yeiqsul ngaol” dai, tsaol-aq munl munl ma juq ge kovq bhiq-a nail ngaol.

Uqhuq thaoq nail ilkhaol il ma bhai lav haol-a nail ganl

12A bhai nee ngal-aq, Yeiqsul uqhuq thaoq nail ilkhaol il ma nail khainl lavqkhoel bhai aol lai khi a bhai yalkav gaoq yalkav ul nail tsaol-aq iqsanl bhai the ha khi, phul dovq phal bhiq thailthaiq nail juq nail kovqkhail bhai maqkhaiq, khaoqkhoiq gaoq thailthaiq nail tsaol-aq juq nail doiqbev bhai maqkhaiq ngaoq ha-a nail ngaol.

13“ ‘Ngaq nail ilkhaol bhai

geeqlaoq hal nail ilkhaol dai,

ya khul nail ngaol’ dai,

gevq-ai thaq khi ngaol-aoq, nuljuq ilkhaol niil il bhai khoiqbhaoq tsaolpheel nail ilkhaol bhi pevq lal thaq nail niil” dai, Yeiqsul aqyu juq bhai ge bhiq-a nail ngaol.

14Maivpeivq peivq nail tsaol-aq khi mail aqkhil maq meeq nail tsaol-aq juq, uqhuq thaoq nail ilkhaol il ma bhai Yeiqsul jaol nail bha lal-a nail ngaol. Aq-u phao, aivq aqyu juq bhai, bhi meeq lai-a nail ngaol. 15Philma juq khi mail, aoldaoq kovqdaoq cavq nail cov nail juq, aivq-i mail nl nail noeq-u maq dov nail phaq bhai ya moel-a nail ngaol. Al ovqtavq, “Daqbhil nail Yaqyov Hoqsaqnaq bhi kev lee dei-eiq” dai, yaqnoil juq uqhuq thaoq nail ilkhaol il ma bhai mailma-ail gul nail bhai iqsanl, aqyu juq ya gaiq-a nail ngel-i mail, neema phail deedee lal bhiq-a nail ngaol.

16Alheel ngel-i mail, aqyu juq Yeiqsul bhai ge bhiq-a nail: “Yaq niil juq khul dai gul thailthaiq nail-aiq dai, naoq bhai maq gaiq lal-ail laiq” dai, naldaiq-u phao, Yeiqsul ge nail: “Ngaq bhai gaiq lal-ail nial.

‘Yaqnoil juq khi mail

aqtsil cuvq yaq juq nail

moeqthaoq

lavqkhoel nee mail

tsiqeeq nail daoq

Miqyail bhi

dov lal nail ngaol’ dai,

gevq-ai thaq nail bhai nuljuq teevq thal iqsanl maq ge daiq haq-al laiq” dai, Yeiqsul aqyu juq bhai ge bhiq-a nail ngaol.

17Aq-u phao, aivq aqyu juq jaol nail nee dov ail-a nail ngaol. A bhai nee ngal-aq, Yeiqlulsaqlaiq meenq lavqkhoel nee dov ail khi, Bheiqtaqnil julgu bhai yavq lai-a nail ngaol.

Heeqguq aqbhaol bhai iqkhail yavq-a nail ganl

18Yaoq n yaoq, nqbhaq bhaq lal khi, Yeiqlulsaqlaiq meenq bha aol lai thailthaiq-u phao, Yeiqsul aoq moevq lal bhiq-a nail ngaol. 19Aivq gailkhaol gailbhaq bhai doevq nail heeqguq aqbhaol teevq bhaol bhai ya moel khi heldaiq ail-a nail ngaol. Thailhai ngaol-aoq, aqheeq maq heeq dai, aqpavq taivq-ail maodai covq nail bhai ya moel-a nail ngaol. Alheel ngel-i mail, “Yanqgaol nee ngal-aq, naol aqheeq thaq gaoq heeq lee dei-eiq” dai, Yeiqsul aqbhaol al bhaol bhai ge bhiq-u phao, aqbhaol al bhaol teevq pov taivq-ail khuq-ail kov ail-a nail ngaol.

20Yaqlaol juq al bhai ya moel-u phao, noeq-u maq dov dai, pevq-ail khi, “Khul khi mail aqbhaol niil bhaol teevq pov taivq-ail bhagul gul ail-a nail-aiq” dai, Yeiqsul bhai naldaiq bhiq-a nail ngaol.

21Yeiqsul ge nail: “Ngal nuljuq bhai maldil dai, ge lavq bhel. Nuljuq neema thaqtsaol khi, neema pov pov lav lav dai, maq pevq haq neq, heeqguq aqbhaol niil bhaol bhai, ngaq-i mail nl bhiq-a nail khe-ai, nuljuq iqsanl nl nia nail ngaol. Al ovqtavq, gaoqjaoq niil jaoq bhai, ‘Naoq nail jaol duq nee dov ail khi, iqyaq iqma bhai ga puvq ail yaoq’ dai, ge bhiq-u phao, nuljuq-i mail khal ge nail khe-ai, pevq lal nail ngaol. 22Nuljuq neema thaqtsaol nail lavqkhoel nee, geeqlaoq hal haq neq, khal hal nail phaq iqsanl mail ya nail ngaol” dai, Yeiqsul aqyu juq bhai ge bhiq-a nail ngaol.

Khaq sil gaq naoq bhai alyaq bivq lavq-a nail dai, Yeiqsul bhai nal daiq bhiq-a nail ganl

23Yeiqsul uqhuq thaoq nail ilkhaol il ma bhai aol lai khi cavq bhiq cov bhiq thailthaiq-u phao, Philma juq khi mail Yuldav tsaol-aq nail aqivq aqtsu juq Yeiqsul jaol nail bha lal khi, “Naol khaq bha khe alyaq ya khi thailhai nl thailthaiq nail-aiq. Khaq sil gaq naoq bhai alyaq bivq lavq-a nail-aiq” dai, naldaiq bhiq-a nail ngaol.

24Yeiqsul aqyu juq bhai ge kovq bhiq-a nail: “Ngal nuljuq bhai teevq daoq naldaiq la dei-eiq. Nuljuq ge kovq lavq haq neq, ngal khaq bha khe alyaq ya khi niil juq nl thailthaiq nail ganl, nuljuq bhai ge bhiq naol. 25Yaolhaq khaq bha khe alyaq ya khi yu bhai ulcuvq saol bhiq-a nail-aiq. Miqyail-i mail bhi nl thaq nail laiq. Maq ngel haq neq, tsaol-aq-i mail bhi nl thaq nail laiq” dai, aqyu juq bhai naldaiq-a nail ngaol. Aq-u phao, aqyu juq nail gaiqlaq bhai niailhai ge tsaoq pheeljaq-a nail ngaol: “Miqyail-i mail bhi nl thaq nail ngaol dai, ngadao ge haq neq, ‘Thailhai phal-iq, nuljuq khul khi mail Yaolhaq bhai neema maq thaqtsaol nail-aiq’ dai, Yeiqsul ge lal nail ngaol. 26Tsaol-aq-i mail bhi nl thaq nail ngaol dai, ngadao ge haq neq, tsaol-aq niidai bhai geesil duq jiav nail ngaol. Khul khi mail dai ngal-aq, Yaolhaq neq, Miqyail nail haqbhoil gedan nail gaq ngaol dai, tsaol-aq iqsanl mail saol-nvq-ai thaq nail ngaol” dai, aqyu juq ge pheeljaq-a nail ngaol.

27Alheel ngel-i mail, “Nvjuq maq heeq kivq” dai, aqyu juq Yeiqsul bhai ge kovq bhiq-a nail ngaol.

Yeiqsul ge nail: “Alhai dul dai, khaq sil gaq-i mail ngaq bhai alyaq bivq lavq khi ganl niil juq nl thailthaiq nail bhai, nuljuq bhai ngal maq ge bhiq-ail” dai, aqyu juq bhai ge bhiq-a nail ngaol.

Yaqyov nvq gaq nail ganl daoqma uqhuq daoq

28Yeiqsul gaoq ge nail: “Nuljuq khalhai noeq nail-aiq, tsaol-aq teevq gaq yaqyov nvq gaq jaol lao thaq nail ngaol. Aq-u phao, aqbhu gaq yaqyov aqivq gaq jaol nail bha lai khi, ‘Yaqyov-ol, yanqgaol naol aqheeq tsilju nail gaoqkhail bhai ganl nl ail dei-eiq’ dai, ge bhiq-a nail ngaol.

29Aq-u phao, ‘Ngal maq ail’ dai, yaqyov al gaq ge kovq bhiq thaq nail ngaol. Thailhai ngaol-aoq, aivq gaoq noeq pov lal bhiq khi ganl nl ail thaq nail ngaol.

30A bhai nee ngal-aq, yaqyov jaqbheq gaq jaol nail bha ail khi, aqivq gaq bhai khoel bhiq-u khe-ai, aivq bhai iqsanl khoel bhiq-u phao, ‘Aqbhu-ol, ngal ail naol’ dai, ge bhiq-a nail ngaol. Thailhai ngaol-aoq, aivq maq ail-al.

31Yaqyov al nvq gaq nail lavqkhoel khul gaq neq, aqbhu nail neema tsaq dai nl-a nail-aiq” dai, Yeiqsul naldaiq-u phao,

“Aqivq gaq nial” dai, aqyu juq ge kovq bhiq-a nail ngaol.

Yeiqsul ge nail: “Ngal nuljuq bhai maldil dai, ge lavq bhel. Khaon tavq nail tsaol-aq khi mail maimaqlal juq nuljuq nail iqmoeq nee Miqyail Milkhaoq bhai ya aol lai nail ngaol. 32Khul khi mail dai ngal-aq, Yaolhaq nuljuq jaol nail bha lee khi, tsaq nail daol nail gailkhaol bhai khalhai ya doevq nail ganl cavq naq lee khi ngaol-aoq, nuljuq aivq bhai neema maq thaqtsaol-ail. Thailhai ngaol-aoq, khaon tavq nail tsaol-aq khi mail maimaqlal juq neq, aivq bhai neema thaqtsaol-a nail ngaol. Nuljuq alhai ya moel khi ngaol-aoq, oeqbal maq noeq pov-al. Aivq bhai iqsanl neema maq thaqtsaol-al” dai, ge bhiq-a nail ngaol.

Aqheeq tsilju nail gaoqkhail khi mail al nail lavqkhoel bhai ganl nl nail juq nail ganl

33Yeiqsul gaoq ge nail: “Daoqma uqhuq daoq yaoq daoq yaoq bhai gaoq naldaiq yaoq. Aq-u phao, tsaol-aq teevq gaq jaol lao thaq nail ngaol. Teevq n neq, aqheeq tsilju nail aqjiiv kha khi, gaoqkhail aqmeeq-ai nl tsoiq-a nail ngaol. Aqheeq tsilju nail ullul naoq dov duq lav sav khi, gaoqkhail bhai lovq nail ilkhaol daqmoe teevq il iqsanl cov-a nail ngaol. A bhai nee ngal-aq, gaoqkhail nl nail juq bhai ngaq bhiq-ail ceevq khi, aivq neq, yaoq khaoq yaoq mil yaoq bhai ail-a nail ngaol. 34Aqheeq tsilju nail aqheeq mi lal khi koevq nail yanq tsaq lal-u phao, gaoqkhail al khail khe aqheeq tsilju aqheeq aivq bhai ovq nail juq ya dai, gaoqkhail nl nail juq jaol nail bha aivq nail yaqkav juq bhai bhi lai-a nail ngaol.

35Thailhai ngaol-aoq, gaoqkhail nl nail juq aivq nail yaqkav al juq bhai nieivq thaiq khi teevq gaq bhai deeq-a nail ngaol. Teevq gaq bhai deeq heivq-a nail ngaol. Teevq gaq bhai neq, lovmav-i mail liv bhiq-a nail ngaol. 36Yaoq pov yaoq, iqmoeq-u pov nee maqtsil aivq nail yaqkav juq bhai gaoq bhi lai-a nail ngaol. Gaoqkhail nl nail juq iqmoeq-u phao khe-ai, aqyu juq bhai iqsanl nl bhiq-a nail ngaol. 37Ilheel gaq ge nail: ‘Aqyu juq ngaq nail yaqyov bhai neq, ev naol’ dai, ge khi, haoqnao naosaq khe pov neq, aivq nail yaqyov bhai bhi lai-a nail ngaol.

38Thailhai ngaol-aoq, gaoqkhail nl nail juq, yaqyov al gaq bhai ya moel-u phao, ‘Aivq neq, jaiqbhoil ovq nail gaq ngaol. Yaoq. Aivq bhai heivq khi, ngadao juq aivq nail jaiqbhoil bhoilpav jaq bhel’ dai, aqyu juq nail gaiqlaq bhai ge pheeljaq-a nail ngaol. 39A bhai nee ngal-aq, aqyu juq aivq bhai nieivq khi, gaoqkhail lavqniil phao he dol-aivq khi, heivq-a nail ngaol.

40Gaoqkhail nail ilheel gaq kovq kev lal-u phao, gaoqkhail nl nail tsaol-aq al juq bhai khalhai nl bhiq nail-aiq dai, nuljuq bhai noeq lal-ail” dai, Yeiqsul aqyu juq bhai naldaiq bhiq-a nail ngaol.

41Aqyu juq ge kovq bhiq-a nail: “Haqeiv nail tsaol-aq al juq bhai aivq heivq nail aqduq bhao nail ngaol. A bhai nee ngal-aq, aqheeq tsilju nail aqheeq mi lal-u phao, aivq bhai ovq nail juq aqmeeq-ai bivq kovq lavq nia nail tsaol-aq yaoq juq yaoq-ao bhai, aivq gaoq ngaq bhiq nail ngaol” dai, ge bhiq-a nail ngaol.

42Yeiqsul aqyu juq bhai ge bhiq-a nail: “Jalliq lavqkhoel bhai niailhai gevq-ai thaq nail bhai nuljuq teevq thal-iq maq ge daiq haq-al laiq.

‘Ilkhaol cov nail

tsaol-aq-i mail

bavq ha-a nail

lovmav al heeq,

jioivqloiv daoqthaoq bhai

kaovq-a nail

lovmav heeq ma

pevq lal nail ngaol.

Heeqphaq Miqyail-i mail

alhai nl-ai thaq nail al neq,

ngadao nail sivtavq bhai

noeq-u maq dov nail phaq

pevq nail ngaol’ dai,

gevq-ai thaq nail ngaol.

43Alheel ngel-i mail, ngal nuljuq bhai ge lavq bhel. Miqyail Milkhaoq nuljuq nail aqlavq nee oil dov khi, al nail lavqkhoel bhai aol lai nail geel-nvq dai, aqheeq heeq lee nail jeq-e teevq jeq-e bhai av bhiq nail ngaol. 44Lovmav al heeq nail kovtavq bhai ga tsuq ail nail tsaol-aq keivq-ail khoi-ail nail ngaol. Tsaol-aq khul gaq nail kovtavq bhai maqkhaiq, lovmav al heeq ga dav-ail haq neq, tsaol-aq al gaq peivq-ail leiv-ail nail ngaol” dai, ge bhiq-a nail ngaol.

45Philma juq khi mail Phaqliqsail juq, Yeiqsul-i mail ge-a nail daoqma uqhuq daoq juq bhai ya gaiq-u phao, “Aivq ngadao juq bhai ge nail niil” dai, aqyu juq heeq nia-a nail ngaol. 46Aqyu juq Yeiqsul bhai nieivq movq khi ngaol-aoq, tsaol-aq munl munl ma juq bhai geesil nail ngaol. Khul khi mail dai ngal-aq, Yeiqsul neq, Miqyail nail haqbhoil gedan nail gaq ngaol dai, tsaol-aq maodai saol-nvq-ai thaq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index