Search form

Maqthaiq 24

Uqhuq thaoq nail ilkhaol il ma luq-ail seil-ail nail ganl

1Yeiqsul uqhuq thaoq nail ilkhaol il ma nee dov ail thailthaiq-u phao, aivq nail yaqlaol juq lal khi, aivq bhai uqhuq thaoq nail ilkhaol il ma nail khainl lavqkhoel bhai jiav nail ilkhaol juq bhai cavq naq bhiq-a nail ngaol. 2Yeiqsul aqyu juq bhai ge bhiq-a nail: “Nuljuq ilkhaol niil juq iqsanl bhai moel thailthaiq-ail nial. Ngal nuljuq bhai maldil dai, ge lavq bhel. Ilkhaol niil juq nail lovmav teevq heeq nail kovtavq bhai teevq heeq maq jiav nia-u kev dai, yu deeq peiv deeq leiv lal nail ngaol” dai, ge bhiq-a nail ngaol.

Daoq loi loi lai nail yanq aqjail jail lal-u phao khe ganl

3Yeiqsul taivq-ail Saqloq gaoqjaoq bhai jaoldeel-nvq thaq-u phao, yaqlaol juq aivq jaol nail bha lal khi, “Al juq khaq mao pevq lal nail-aiq. Naol yavq kha lee nail khi mail miltsaq niil daoq loi loi lai-u phao pevq lal nail ganl juq bhai, nvjuq khalhai khi ya heeq kivq nail-aiq. Ge lavq yaoq” dai, Yeiqsul bhai naldaiq bhiq-a nail ngaol.

4Yeiqsul aqyu juq bhai ge bhiq-a nail: “Tsaol-aq teevq gaq iqsanl nuljuq bhai maq ya hevq bheel-aivq dai, yaolphaol yaoq. 5Khul khi mail dai ngal-aq, tsaol-aq maodai ngaq nail aqmil bhai juq juq-ail, ‘Ngal neq, Khali ngaol’ dai, yovqgavq bhai yovqgavq ge ge-ail, tsaol-aq maodai bhai hevq bheel-aivq nail ngaol. 6Aqjail bhai genl dev thailthaiq nail aqthel bhai maqkhaiq, eqyal bha genl dev nail bhai maqkhaiq, nuljuq ya gaiq naol. Thailhai ngaol-aoq, thaq geesil dei-eiq. Khul khi mail dai ngal-aq, al juq ya pevq lal nail ngaol. Al juq pevq lal khi ngaol-aoq, daoq loi loi lai nail yanq maq kev lal haq-al. 7Jeq-e teevq jeq-e khi mail teevq jeq-e, milkhaoq teevq khaoq khi mail teevq khaoq, genl dev pheeljaq lal nail ngaol. Moevq nail sivq nail khi mail milluv luv nail phaq teevq dao nee teevq dao pevq lal nail ngaol. 8Al juq pevq lal nail neq, haq dee aoq deedee nail phaq, iqmoeq khe teevq-eel ngel-ai haq nail ngaol.

9Aq-u phao, khoeq nail jiovq nail khi mail deeq heivq nail bhai ya daq dai, nuljuq bhai yu nail aqlavq lavqkhoel bhai av bhiq nail ngaol. Ngaq nail aqmil bhaqda nee, jeq-e jaq-a iqsanl mail nuljuq bhai neejiav jiav lal nail ngaol. 10Aq-u phao, tsaol-aq maodai gaq ngaq bhai khaonq ha nail ngaol. Aqyu juq teevq gaq nee teevq gaq av bhiq khi, teevq gaq nee teevq gaq neejiav jiav nail ngaol. 11‘Miqyail nail haqbhoil gedan naol’ dai, ge khi ngaol-aoq, maldil maq ngel nail juq maodai dov lal khi, tsaol-aq maodai gaq bhai hevq bheel-aivq nail ngaol. 12Haqeiv nail phaq mao lal nail ngel-i mail, tsaol-aq maodai goil nail gaiq-a nail phaq peivq-ail boev-ail nail ngaol. 13Thailhai ngaol-aoq, daoq loi loi lai-u kev dai, ivq nail tsaol-aq neq, hevqkovq nail phaq ya nail ngaol. 14Jeq-e jaq-a iqsanl nail haqbhoil salkhil pevq dai, Miqyail Milkhaoq nail ganl lavqkhiq tsail nail geeqlaoq daoq niil, milkhaoq doi dai cavq bhiq ail nail ngaol. Al jel-ail haq neq, daoq loi loi lai nail yanq kev lee nail ngaol” dai, ge bhiq-a nail ngaol.

Haq dee aoq deedee nail phaq kev lee nail ganl

15-16Yeiqsul gaoq ge nail: “Alheel ngel-i mail, Miqyail nail haqbhoil gedan nail Daqyeiqlal-i mail ge-ai thaq nail khe-ai, luq-ail seil-ail nail aqjiivq aqcavq phaq, uqhuq thaoq nail ilkhaol il ma nail lavqkhoel bhai nuljuq ya moel-u phao, Yuldav milkhaoq bhai jaol nail tsaol-aq juq gaoqjaoq phao tsaoq dal laivq yaoq. (Haoqgavq niilniai khal ge nail tsaol-aq juq neq, gov heeq nia dei-eiq.) 17Khaolpoiv bhai dav nail tsaol-aq juq yavq kha lee-u phao, tsaoq yaoq. Yalkav oil ail nail dai khi, ilkhaol bhai thaq aol ail. 18Yalgaol bhai jaol nail tsaol-aq juq iqsanl, ilkhaol bhai kovq ail khi, yovqgavq nail aqgaq aqdoi thaq he ail. 19Aqn aqyanq al kev lee-u phao, aqhaq aqmaol liq nail yaqmai-aq juq khi mail, aqtsil cuvq yaq jaol nail aqma juq neq, gaoqhaq khal haq-ail ya noeqhaq deedee nail ngaol. 20Nuljuq ya tsaoq nail yanq al yanq, coevqjieiv jieiv nail yanq+ bhai maqkhaiq, jaol n n-gaol bhai maqkhaiq, maq ya tsaq dai, geeqlaoq hal yaoq. 21Khul khi mail dai ngal-aq neq, miltsaq teivq-u n-gaol nee yanqgaol kev dai, maq pevq lal daiq-a nail nee ovqtavq, yaqhao iqsanl maq pevq lal nail, haq dee aoq deedee nail phaq kev lee nail ngaol. 22Miqyail yanq al yanq bhai maq lav nil lavq haq neq, tsaol-aq teevq gaq iqsanl maq jel-ail nia-ail. Thailhai ngaol-aoq, aivq-i mail tsel dov-ai thaq nail tsaol-aq nail haqbhoil Miqyail yanq al yanq bhai lav nil bhi nail ngaol. 23Aq-u phao, ‘Heldaiq lal yaoq. Khali niilniai jaol-ail nial. A bhai jaol-ail nail ngaol’ dai, tsaol-aq teevq gaq ganav nuljuq bhai ge lal khi ngaol-aoq, neema thaq thaqtsaol. 24Khul khi mail dai ngal-aq neq, maldil Khali maq ngel nail juq dov lal naol. Miqyail nail haqbhoil gedan naol dai, ge khi ngaol-aoq, maldil maq ngel nail juq iqsanl dov lal nail ngaol. Khi kivq haq neq, tsel dov-ai thaq nail tsaol-aq bhai iqsanl hevq bheeq nail dai, aqyu juq noeq-u maq dov nail phaq khi mail bhi heeq bhi moel nail juq nl daiq lavq nail ngaol. 25Naldaiq yaoq, ganl al maq pevq lal-u nee mail, yaoq phaq yaoq-ao nee ngal nuljuq bhai ge bhiq-ai thaq nail ngaol dei-eiq.

26Alheel ngel-i mail, ‘Heldaiq lal yaoq, Khali haqtsoiq haqyal bhai jaol nail ngaol’ dai, aqyu juq ge lal khi ngaol-aoq, thaq heldaiq ail. ‘Khali sunq lavqkhoel bhai jaol nail ngaol’ dai, aqyu juq ge lal khi ngaol-aoq, neema thaq thaqtsaol. 27Khul khi mail dai ngal-aq neq, nlma dov khoeq phao nqmeivq meivq nail nlma ga khoeq phao bhaq kev ail nail khe-ai, Tsaol-aq nail Yaqyov yavq kha lee nail ngaol. 28Sil-ai thaq nail aqmaol khal jiav nail bhai, joelma ga jil lee nail ngaol+ ” dai, ge bhiq-a nail ngaol.

Tsaol-aq nail Yaqyov yavq kha lee nail ganl

29Yeiqsul gaoq ge nail: “Haq dee aoq deedee nail yanq al jel-ail haq neq, teevq pov taivq-ail, nlma navtsee dai pevq-ail khi, bhala iqsanl aqbhaq maq bhaq dai, pevq ail nail ngaol. Aqgil juq nqtavq nee ga kha lee khi, nqtavq khe bhaqaoq juq iqsanl, luv luv dai, dao lal nail ngaol.

30Aq-u phao, Tsaol-aq nail Yaqyov nail bhi heeq bhi moel nail phaq nqtavq bha ya moel nail ngaol. Miltsaq kovtavq khe jeq-e jaq-a juq iqsanl mail nioilkhaoq khaoq nail ngaol. Tsaol-aq nail Yaqyov neq, eeq deedee nail seiqleiq khaoqsail khi mail bhaqaoq eeq nail lavqkhoel nee, nqtavq kovtavq nee mail nqdil jeeq khi yavq kha lee nail bhai, aqyu juq ya moel nail ngaol. 31Nqbho mailma-ail jiiv-u phao, nqtavq gaqkhoel juq mil ma liq phaoq liq khoel bhai, aivq khoel gai-aivq khi, nqjail miljail a phao nee nia phao dov dai jaol nail, aivq-i mail tsel dov-ai thaq nail tsaol-aq juq bhai bhi hevq jil lavq nail ngaol” dai, ge bhiq-a nail ngaol.

Heeqguq aqbhaol bhai heldaiq khi, yanq bhai heeq kivq yaoq

32Yeiqsul gaoq ge nail: “Heeqguq aqbhaol bhai heldaiq khi, ganl niil bhai noeq thaq yaoq. Aqbhaol al lavqmeiv meiv lal khi, bhoenaiq naiq lal haq neq, jaolla yanq dov lee-aiq nial dai, nuljuq heeq nia nail ngaol. 33Alhai dul dai, nuljuq ganl al juq iqsanl mail pevq lal thailthaiq nail bhai ya moel-u phao, Tsaol-aq nail Yaqyov kovq kha lee nail yanq aqjail jail lal-aoq thaq nial dai, heeq kivq-ai thaq yaoq. 34Ngal nuljuq bhai maldil dai, ge lavq bhel. Yeel niil yeel maq gil-u nee mail, al juq iqsanl mail pevq lal nail ngaol. 35Nqtavq khi miltsaq peivq-ail nail ngaol. Thailhai ngaol-aoq, ngaq nail daoq neq, maq peivq-ail dei-eiq” dai, ge bhiq-a nail ngaol.

Tsaol-aq nail Yaqyov yavq kha lee nail aqn teevq gaq iqsanl maq heeq nia ail

36Yeiqsul gaoq ge nail: “Tsaol-aq teevq gaq iqsanl aqn aqyanq al maq heeq nia-ail. Nqtavq gaqkhoel iqsanl, Tsaol-aq nail Yaqyov iqsanl maq heeq nia-ail. Aqbhu Miqyail taivq-ail heeq nia nail ngaol. 37Nol-avq nail yeel bhai kev lee thel lee-a nail khe-ai, tsaol-aq nail Yaqyov yavq kha lee nail neq, alhai kev lee thel lee nail ngaol. 38Nol-avq laovq laovq ma nail lavqkhoel bhai aol lai-u n-gaol kev dai, ulcuvq maq deq pheeq lal nail gaiqlaq bhai, tsaol-aq yaq juq neq, jaq thail daol thailthaiq nail nee ovqtavq, hevq pheel maol pheeljaq-ai haq nail ngaol. 39Ulcuvq deq pheeq lal khi, aqyu juq bhai deq pheeq heivq gil-u kev dai, aqyu juq maq heeq nia-ail. Tsaol-aq nail Yaqyov yavq kha lee nail iqsanl, alhai dul nail ngaol. 40Yanq al yanq nail lavqkhoel, yaqyov-aq nvq gaq yalgaol bhai jaol-u phao, teevq gaq bhai hel-aivq khi teevq gaq bhai bhi jaol-ail ceevq nail ngaol. 41Yaqmai-aq nvq gaq gov thaoq thailthaiq-u phao, teevq gaq bhai hel-aivq khi, teevq gaq bhai bhi jaol-ail ceevq nail ngaol.

42Alheel ngel-i mail, nuljuq nail Heeqphaq khul n n-gaol lee kev nail dai, nuljuq maq heeq nia nail ngel-i mail, aqgeel geel dai, jaol yaoq. 43Ilheel gaq khoiqbhaoq bhaoq lee nail bhai heeq nia lao-aol kheel nul neq, aivq nail ilkhaol bhai khoiqbhaoq maq bhi aol lal dai, lovq nail ngaol dai, nuljuq heeq nia nail ngaol. 44Alhai dul dai, nuljuq aqmeeq-ai lainq-ai thaq yaoq. Khul khi mail dai ngal-aq neq, nuljuq maq noeq maq dul dai jaol-u phao, Tsaol-aq nail Yaqyov yavq kha lee nail ngaol” dai, ge bhiq-a nail ngaol.

Maq lainq-ai thaq nail yaqkav

45Yeiqsul gaoq ge nail: “ ‘Ngaq nail yaqkav juq bhai heldaiq phail khi, aqyanq tsaq dai, jaqjaq daoldaol bivq dei-eiq’ dai, ilheel gaq-i mail khoel-ai thaq nail saljial ivq khi neenoeq neekha aol nail yaqkav neq, khul gaq pevq nail-aiq. 46Ilheel gaq kovq lal-u phao, alhai nl thailthaiq nail yaqkav bhai ya moel haq neq, yaqkav al gaq geeqlaoq eeq nail ngaol. 47Ngal nuljuq bhai maldil dai, ge lavq bhel. Ilheel gaq yaqkav al gaq bhai aivq nail ildaoq maoqgaiq iqsanl bhai heldaiq phail nail aqivq gaq bhi jiovq nail ngaol. 48Thailhai ngaol-aoq, yaqkav al gaq haqeiv nail gaq ngel lao haq neq, ‘Ngaq nail ilheel gaq lavqtsail mail maq kovq lal-ail’ dai, neema lavqkhoel bhai noeq noeq-ail, 49aivq nail aqtsaoq yaqkav yaoq juq yaoq bhai deeq nail nee ovqtavq, jaq bov daol bov nail tsaol-aq juq nee mail, jilpheeq daol bov khi jaol haq neq, 50yaqkav al gaq maq noeq maq dul-ail jaol-u phao, maq heeq nia nail aqyanq lavqkhoel bhai, aivq nail ilheel gaq kovq kev lal nail ngaol. 51A bhai nee ngal-aq, aivq bhai sil heeq phaq-ail deeq khi, goiqbhaoq bhaoq nail juq bhi jaol nail jaol duq bhai bhi jaol ail-a nail ngaol. A bhai khal jaol nail tsaol-aq juq, noeq haq deedee nail lavqkhoel nioil khi, haoqgil keivq nail ngaol” dai, ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index