Search form

Maqthaiq 25

Yaqmai-aq yaqnoil tsel gaq nail ganl daoqma uqhuq daoq

1Yeiqsul gaoq ge nail: “Aq-u n-gaol kev lal haq neq, Nqtavq Milkhaoq neq, niailhai dul nail ngaol. Yovqgavq nail phalmanq tsiq khi, khaqma hevq nail gaq bhai hav laq ail nail yaqmai-aq yaqnoil al tsel gaq khe-ai dul nail ngaol. 2Aqyu juq nail lavqkhoel khe ngaq gaq neq, neenoeq neekha maq aol-ail. Ngaq gaq neq, neenoeq neekha aol nail ngaol. 3Neenoeq neekha maq aol nail juq neq, yovqgavq nail phalmanq tsil-aivq-u phao, aqtseel al jaiq maq tsil-aivq-al. 4Neenoeq neekha aol nail juq neq, yovqgavq nail phalmanq tsil-aivq-u phao, aqtseel al jaiq iqsanl tsil-aivq-a nail ngaol. 5Khaqma hevq nail gaq lavqtsail mail maq lal-a nail ngel-i mail, aqyu juq iqsanl mail iqthaiq nul lee bhiq khi, iqthaiq kol laivq-a nail ngaol.

6A bhai nee ngal-aq, ‘Khaqma hevq nail gaq lee-a nail ngaol. Aivq bhai hevq lal yaoq’ dai, hul-iq tsilma ma lal-u phao, yu khul nail ngaol.

7Aq-u phao, yaqmai-aq yaqnoil al juq tsaoq thul khi, yovqgavq nail phalmanq lav bhaol-a nail ngaol. 8Neenoeq neekha maq aol nail al ngaq gaq neq, ‘Nvjuq nail phalmanq miv-ail nail ngel-i mail, nuljuq nail aqtseel micil bivq lavq yaoq’ dai, neenoeq neekha aol nail ngaq gaq bhai hal-a nail ngaol.

9Thailhai ngaol-aoq, neenoeq neekha aol nail ngaq gaq ge kovq bhiq-a nail: ‘Nvjuq nail haqbhoil maq ngel nail neq, nuljuq nail haqbhoil maq lovq-ail jaol-aq. Nuljuq aqtseel gaoq nail tsaol-aq jaol nail bha ul ail yaoq’ dai, ge bhiq-a nail ngaol.

10Aqyu juq ul ail thailthaiq-u phao, khaqma hevq nail gaq kev lee-a nail ngaol. Lainq-ai thaq nail ngaq gaq neq, aivq nee mail khaqma hevq nail bha aol lai-a nail ngaol. A bhai nee ngal-aq neq, lolgov pheeqthaiq-a nail ngaol.

11Aq-u phao, yaqmai-aq yaqnoil al ngaq gaq kovq kev lal khi, ‘Heeqphaq-ol, heeqphaq-ol, nvjuq bhai lolgov phao lavq yaoq’ dai, hal nail ngaol.

12Thailhai ngaol-aoq, ‘Ngal nuljuq bhai maldil dai, ge lavq bhel. Ngal nuljuq bhai maq heeq kivq-ail’ dai, ge kovq bhiq-a nail ngaol.

13Alheel ngel-i mail, nuljuq aqn aqyanq bhai maq heeq nia nail ngel-i mail, aqgeel geel dai, jaol yaoq” dai, Yeiqsul ge bhiq-a nail ngaol.

Ilheel gaq yaqkav juq bhai phul av bhiq-ail ceevq-a nail ganl daoqma uqhuq daoq

14Yeiqsul gaoq ge nail: “Aqyanq al neq, tsaol-aq teevq gaq yaoq khaoq yaoq mil yaoq bhai ail nail dai khi-u phao, aivq nail yaqkav juq bhai khul khi aivq nail nlmaoq juq aqyu juq bhai av bhiq-ail ceevq-a nail khe-ai, dul nail ngaol. 15Aivq aqyu juq nl nia nail bhai heldaiq khi, teevq gaq bhai neq, heel ngaq jao-ai, teevq gaq bhai neq, nvq jao-ai khi mail teevq gaq bhai neq, teevq jao-ai bivq-ail ceevq khi, dov ail-a nail ngaol. 16Heel ngaq jao-ai ya-a nail gaq teevq pov taivq-ail jaiq gaiq gaiq-ail khi, ngaq jao-ai gaiq jeq-a nail ngaol. 17Alhai dul dai, heel nvq jao-ai ya-a nail gaq iqsanl, nvq jao-ai gaiq jeq-a nail ngaol. 18Thailhai ngaol-aoq, heel teevq jao-ai ya-a nail gaq, aivq nail ilheel gaq-i mail bivq-ail ceevq-a nail heel al oil khi miltsaq bhai duq pheeq ail-a nail ngaol.

19Aqyanq maoq lal-u phao, yaqkav al juq nail ilheel gaq kovq lal khi, aivq aqyu juq nee mail teevq gaq khe-ai, phul heel saol-nvq daiq-a nail ngaol. 20Heel ngaq jao-ai ya-a nail yaqkav al gaq, jailjeq ngaq jao-ai iqsanl oil lavq khi, ‘Heeqphaq-ol, naol ngaq bhai heel ngaq jao-ai bivq-ail ceevq-a nail ngaol. Heldaiq, ngal ngaq jao-ai gaiq jeq-a nail ngaol’ dai, ge bhiq-a nail ngaol.

21Ilheel gaq ge nail: ‘Aqmeeq nial. Saljial ivq nail yaqkav aqmeeq gaq-ol, saljial ivq nail lavqkhoel naol ganl ganl yaq bhai nl-a nail ngel-i mail, ngal naoq bhai ganl ganl ma bhi nl nail ngaol. Ngaq-ai nee mail teevq gaq khe-ai, lavqkhiq tsao tsail lal yaoq’ dai, ge bhiq-a nail ngaol.

22Heel nvq jao-ai ya-a nail al gaq iqsanl lal khi, ‘Heeqphaq-ol, naol ngaq bhai heel nvq jao-ai bivq-ail ceevq lavq-a nail ngaol. Heldaiq, ngal nvq jao-ai gaiq jeq-a nail ngaol’ dai, ge bhiq-a nail ngaol.

23Ilheel gaq ge nail: ‘Aqmeeq nial. Saljial ivq nail yaqkav aqmeeq gaq-ol, saljial ivq nail lavqkhoel naol ganl ganl yaq bhai nl-a nail ngel-i mail, ngal naoq bhai ganl ganl ma bhi nl naol. Ngaq-ai nee mail teevq gaq khe-ai, lavqkhiq tsao tsail lal yaoq’ dai, ge bhiq-a nail ngaol.

24Heel teevq jao-ai ya-a nail al gaq iqsanl lal khi, ‘Heeqphaq-ol, naol neq, mao-ail yanvq nail teevq gaq ngaol dai, ngal heeq kivq nail ngaol. Naoq-i mail maq haiq-a nail bhai naol gaiq khi, naoq-i mail maq kha-a bhai naol oil jil nail ngaol dai, ngal heeq kivq nail ngaol. 25Ngal naoq bhai geesil nail ngel-i mail, naoq nail heel duq pheeq-ai thaq nail ngaol. Thoiq, naoq nail nlmaoq naoq bhai bivq kovq naol’ dai, ge bhiq-a nail ngaol.

26Ilheel gaq ge nail: ‘Mao-ail haqeiv, mao-ail doil nail yaqkav-ol, ngaq-i mail maq haiq-a nail bhai ngal gaiq khi, ngaq-i mail maq kha-a nail bhai ngal oil jil nail ngaol dai, naol heeq kivq nail phal-iq neq, 27ngaq nail phul thoil oil khi, phul phal nail tsaol-aq bhai phal bhiq nail tsaq nail ngaol. Alhai phal bhiq-a nail nul neq, ngal kovq lal-u phao, ngaq nail phul thoil khi jailjeq iqsanl, ngal ya nail ngaol.

28Aivq nail lavqkhoel khe aol nail heel teevq jao-ai oil kovq khi, heel tsel jao-ai jiav nail gaq bhai bivq yaoq. 29Khul khi mail dai ngal-aq neq, jiav nail tsaol-aq yaoq gaq yaoq-ao nee bhai bivq laoq khi, aqyu juq maodai jiav lal nail ngaol. Maq jiav nail tsaol-aq bhai aqyu juq-i mail khal jiav nail juq bhai oil dov gil nail ngaol. 30Khul nail ganl maq tsoiq nail yaqkav thoil gaq bhai lavqniil phao navtsee deel jaol duq bhai he ha ail yaoq. A bhai khal jaol nail tsaol-aq, noeqhaq deedee nail lavqkhoel nioil khi, haoq gil keivq nail ngaol’ ” dai, ge bhiq-a nail ngaol.

Jeq-e jaq-a iqsanl bhai yalkhaq dal nail ganl

31Yeiqsul gaoq ge nail: “Tsaol-aq nail Yaqyov, aivq nail seiqleiq khaoqsail doi khi yavq kha lee nail ngaol. Nqtavq gaqkhoel iqsanl mail aivq nee mail yavq kha lee nail ngaol. Aq-u phao, aivq aivq nail seiqleiq khaoqsail jiav nail Heeqphaq nail doiqbev bev ma bhai jaoldeel nail ngaol. 32A bhai nee ngal-aq, jeq-e jaq-a iqsanl mail aivq nail sivtavq bhai bhi jil lal nail ngaol. Yaol lovq nail gaq, yaol khi civqmeiv bhai bhoilpav nail khe-ai, aivq aqyu juq bhai bhoilpav nail ngaol. 33Yaol juq bhai aivq nail lavqmal phao bhi jaol khi, civqmeiv juq bhai neq, lavqtsel phao bhi jaol nail ngaol.

34A bhai nee ngal-aq neq, lavqmal phao jaol nail tsaol-aq juq bhai Heeqphaq niailhai ge bhiq nail ngaol: ‘Ngaq nail Aqbhu nail geeqlaoq ya-a nail tsaol-aq juq-ol, lal yaoq. Miltsaq teivq-u n-gaol nee nuljuq nail haqbhoil lav sav-ai thaq nail milkhaoq bhai jaol lal yaoq. 35Khul khi mail dai ngal-aq neq, ngal aoq moevq-u phao, nuljuq ngaq bhai aoq bhi jaq lavq-a nail ngaol. Ngal ulcuvq moevq-u phao, nuljuq ngaq bhai ulcuvq bhi daol lavq-a nail ngaol. Ngal daq-i pevq-u phao, nuljuq ngaq bhai hav lavq-a nail ngaol. 36Ngal aqgaq aqdoi maq jiav-u phao, nuljuq ngaq bhai aqgaq aqdoi bhi doi lavq-a nail ngaol. Ngal nal-u phao, nuljuq ngaq bhai lav sav lavq-a nail ngaol. Ngal thaonq bhai aol-u phao, nuljuq ngaq bhai heldaiq lee-a nail ngaol’ dai, ge bhiq nail ngaol.

37Aq-u phao, tsaq nail daol nail tsaol-aq al juq niailhai ge kovq bhiq nail ngaol: ‘Heeqphaq-ol, naol aoq moevq-u phao, nvjuq moel khi, aoq bhi jaq-a nail khaq mao jiav nail-aiq. Naol ulcuvq moevq-u phao, nvjuq ya moel khi, ulcuvq bhi daol-a nail khaq mao jiav nail-aiq. 38Naol daq-i pevq-u phao, nvjuq ya moel khi hav-a nail, khaq mao jiav nail-aiq. Naol aqgaq aqdoi maq jiav-u phao, nvjuq ya moel khi aqgaq aqdoi bhi doi-a nail, khaq mao jiav nail-aiq. 39Naol nal-u phao maqkhaiq, thaonq bhai aol-u phao maqkhaiq, nvjuq ya moel khi naoq bhai heldaiq lee-a nail, khaq mao jiav nail-aiq’ dai, ge kovq bhiq-a nail ngaol.

40Aq-u phao, Heeqphaq niailhai ge kovq bhiq nail ngaol: ‘Ngal nuljuq bhai maldil dai, ge lavq bhel. Nuljuq ngaq nail aqivq jaqbheq niil juq nail lavqkhoel khe, yu nee maqtsil theq jaiq nail teevq gaq bhai nl bhiq-a nail ngel-i mail, ngaq bhai nl lavq-a phaq pevq nail ngaol’ dai, aqyu juq bhai ge kovq bhiq nail ngaol.

41A bhai nee ngal-aq neq, lavqtsel phao jaol nail tsaol-aq juq bhai aivq niailhai ge bhiq nail ngaol: ‘Geeqlaoq aqdoil ya nail tsaol-aq juq-ol, ngaq-ai nee gaoq ail ceiv ceiv khi, neivq heeqphaq nail haqbhoil khi aivq nail gaqkhoel juq nail haqbhoil lav sav-ai thaq nail, nqmaq maqluv halyeel tovq nail miqjaq lavqkhoel bhai aol ail yaoq. 42Khul khi mail dai ngal-aq neq, ngal aoq moevq-u phao, nuljuq ngaq bhai aoq maq bhi jaq lavq-al. Ngal ulcuvq moevq-u phao, nuljuq ngaq bhai ulcuvq maq bhi daol lavq-al. 43Ngal daq-i pevq-u phao, nuljuq ngaq bhai maq hav lavq-al. Ngal aqgaq aqdoi maq jiav-u phao, nuljuq ngaq bhai aqgaq aqdoi maq bhi doi lavq-al. Ngal nal-u phao maqkhaiq, thaonq bhai aol-u phao maqkhaiq, nuljuq ngaq bhai maq heldaiq lee-al’ dai, ge bhiq nail ngaol.

44Aqyu juq niailhai ge kovq bhiq nail ngaol: ‘Heeqphaq-ol, naol aoq moevq nail, ulcuvq moevq nail, daq-i pevq nail, aqgaq aqdoi maq jiav nail, nal nail, thaonq bhai aol nail bhai nvjuq ya moel khi naoq bhai maq tsaojao-ai bhiq-a nail, khaq mao jiav nail-aiq’ dai, aivq bhai naldaiq bhiq nail ngaol.

45Aq-u phao, aivq niailhai ge kovq bhiq nail ngaol: ‘Ngal nuljuq bhai maldil dai, ge lavq bhel. Ngaq nail aqivq jaqbheq niil juq nail lavqkhoel khe, yu nee maqtsil theq jaiq nail teevq gaq bhai nuljuq maq nl bhiq-a nail ngel-i mail, nuljuq ngaq bhai maq nl lavq-a nail phaq pevq nail ngaol’ dai, aqyu juq bhai ge kovq bhiq nail ngaol.

46Alheel ngel-i mail, aqyu juq neq, nqmaq maqluv halyeel khoeq nail jiovq nail lavqkhoel bhai ya aol ail nail ngaol. Thailhai ngaol-aoq, tsaq nail daol nail tsaol-aq nqmaq maqluv halyeel doevq nail bhai ya aol lai nail ngaol” dai, Yeiqsul ge bhiq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index