Search form

Maqthaiq 4

Yeiqsul jalmul mul nail bhai ya daq-a nail ganl

1A bhai nee ngal-aq, neivq heeqphaq jalmul mul nail bhai Yeiqsul ya daq dai, Aqhaqlal Miqyail aivq bhai haqtsoiq haqyal bhai, hel-aivq-a nail ngaol. 2Yeiqsul neq, liq tsel n liq tsel kivq khul iqsanl maq jaq dai, jaol-u phao, aoq moevq lal bhiq-a nail ngaol. 3Aq-u phao, neivq heeqphaq Yeiqsul jaol nail bha lee khi ge nail: “Naol Miqyail nail Yaqyov ngel haq neq, lovmav niil juq bhai, khaqmul pevq lal yaoq dai, daoq bivq-ai thoq” dai, ge bhiq-a nail ngaol.

4Thailhai ngaol-aoq, Yeiqsul aivq bhai ge bhiq-a nail: “Jalliq lavqkhoel bhai niailhai gevq-ai thaq nail ngaol: ‘Jaq nail phaq bhaqda nee taivq-ail, tsaol-aq yaq ya doevq nail maq ngel-ail. Miqyail nail moeqthaoq lavqkhoel nee mail dov lee-a nail daoq juq bhaqda nee iqsanl ya doevq nail ngaol’ ” dai, ge kovq bhiq-a nail ngaol.

5A bhai nee ngal-aq, neivq heeqphaq neq, Yeiqsul bhai meeq nail haol nail meenq pevq nail Yeiqlulsaqlaiq meenq bha hel-aivq khi, uqhuq thaoq nail ilkhaol il ma nail khaolpoiv bha hevq dal laivq bhiq-a nail ngaol. 6Aq-u phao, aivq ge nail: “Naol Miqyail nail Yaqyov ngel haq neq, niilniai nee tev kha ail yaoq. Khul khi mail dai ngal-aq neq, Jalliq lavqkhoel bhai niailhai gevq-ai thaq nail ngaol:

‘Naoq bhai bhi heldaiq

phail nail dai khi,

Miqyail aivq nail

nqtavq gaqkhoel bhai

aivq daoq bivq-ai

thaq nail ngaol.

Naoq nail aqkhil

lovmav bhai

maq ya ga yao-ail dai,

aqyu juq naoq bhai

tsiq nail ngaol’ ” dai,

ge bhiq-a nail ngaol.

7Thailhai ngaol-aoq, Yeiqsul aivq bhai ge bhiq-a nail: “ ‘Naol naoq nail Heeqphaq Miqyail bhai jalmul thaq mul’ dai, Jalliq lavqkhoel bhai gevq-ai thaq nail ngaol” dai, ge kovq bhiq-a nail ngaol.

8A bhai nee ngal-aq, neivq heeqphaq Yeiqsul bhai moe deedee nail gaoqjaoq teevq jaoq nail kovtavq bhai gaoq hevq dal laivq khi, miltsaq kovtavq bhai khal jaol khal jiav nail milkhaoq iqsanl khi mail, milkhaoq al juq nail seiqleiq khaoqsail iqsanl, aivq bhai cavq naq bhiq khi, bhi moel-a nail ngaol. 9Neivq heeqphaq ge nail: “Naol ngaq bhai peevqceevq kovdoiq doiq khi, uqhuq thaoq lavq haq neq, niil juq iqsanl mail naoq bhai bivq naol” dai, ge bhiq-a nail ngaol.

10Thailhai ngaol-aoq, Yeiqsul aivq bhai ge bhiq-a nail: “Neivq Saqdaq-ol, dov ail yaoq. Khul khi mail dai ngal-aq neq, ‘Naol naoq nail Heeqphaq Miqyail bhai taivq-ail uqhuq ya thaoq khi, aivq nail ganl taivq-ail ya nl nail ngaol’ dai, Jalliq lavqkhoel bhai gevq-ai thaq nail ngaol” dai, ge kovq bhiq-a nail ngaol.

11Aq-u phao, neivq heeqphaq aivq jaol nail nee dov ail-a nail ngaol. A bhai nee ngal-aq, nqtavq gaqkhoel aivq bhai bhi jaq bhi daol khi tsaojao-ai bhiq lee-a nail ngaol.

Gaqliqlail milkhaoq bhai Yeiqsul ganl iqmoeq ilmoeq nl-a nail ganl

12Yaolhaq bhai bhi nieivq-a nail ganl Yeiqsul ya gaiq-u phao, aivq Gaqliqlail milkhaoq bha ail-a nail ngaol. 13Aivq Naqsaqlail meenq nee dov ail khi, Gaqliqlail nail ngaqkha daolbhaq bhai jiav nail Gaqbheiqneiqoq meenq bhai jaol ail-a nail ngaol. Gaqliqlail nail ngaqkha neq, Seiqbhulloq khi mail Naqtaqlil nail jeq-e nail jaol duq + lavqkhoel bhai jiav nail ngaol. 14Ganl al ganl neq, Miqyail nail haqbhoil gedan nail Ilsaqyal-i mail ge-ai thaq nail daoq niil daoq bhee lal-a nail ngaol.

15“Seiqbhulloq nail

jeq-e nail jaol duq

khi mail Naqtaqlil

jeq-e nail jaol duq bhai

jaol nail juq,

ngaqkha daol jail nail

gailkhaol bhai

jaol nail juq khi mail

Yaoldaq laoljaol a phao

lelkhel bhai jaol nail juq,

yu nail jeq-e jaq-a

jaol nail Gaqliqlail

milkhaoq bhai

jaol nail juq,

nuljuq iqsanl mail

naldaiq yaoq.

16Aqnav nail

lavqkhoel bhai

jaol nail tsaol-aq,

kav deedee nail

aqbhaq bhai

ya moel nail ngaol.

Sil nail milkhaoq

khi mail

sil nail aqhaiq

lavqkhoel bhai

jaol nail

tsaol-aq nail haqbhoil,

aqbhaq bhaq

dov lee-a nail ngaol” dai,

ge-ai thaq nail ngaol.

17Yanq al yanq nee mail dan khi Yeiqsul neq, “Nqtavq Milkhaoq kev lee-aiq nail ngel-i mail, oeqbal noeq pov yaoq” dai, daoq cavq cavq bhiq-a nail ngaol.

Delgil nieivq nail tsaol-aq liq gaq bhai Yeiqsul khul-a nail ganl

18Yeiqsul Gaqliqlail ngaqkha daolbhaq bhai ail thailthaiq-u phao, Bheiqtuvluv dai khul nail Silmoq khi aivq nail jaqbheq Aqdaiqlaiq aqyu nvq mail ngaqkha lavqkhoel bhai ovjeel joe thailthaiq nail bhai ya moel-a nail ngaol. Aqyu nvq mail neq, delgil nieivq nail tsaol-aq ngaol. 19“Ngaq nail haoqnao tsaothel lavq yaoq. Ngal nul-nq nvq mail delgil nieivq nail khe-ai, tsaol-aq bhai halpov kovq nail tsaol-aq bhi jiovq naol” dai, Yeiqsul aqyu nvq mail bhai ge bhiq-a nail ngaol. 20Aqyu nvq mail teevq pov taivq-ail ovjeel khaonq ha-ail ceevq khi, Yeiqsul nail haoqnao tsaothel-aivq-a nail ngaol.

21Yeiqsul iqmoeq phao gaoq ail-u phao, Seiqbheiqdail nail yaqyov Yaqkov khi aivq nail jaqbheq Yaolhaq bhai ya moel-a nail ngaol. Aqyu nvq mail neq, aqyu nvq mail nail aqbhu Seiqbheiqdail nee mail, laovq lavqkhoel bhai ovjeel bhuq thailthaiq nail ngaol. Yeiqsul aqyu nvq mail bhai iqsanl, khul-a nail ngaol. 22Aqyu nvq mail iqsanl teevq pov taivq-ail laovq khi mail aqyu nvq mail nail aqbhu bhai khaonq ha-ail ceevq khi, Yeiqsul nail haoqnao tsaothel-aivq-a nail ngaol.

Yeiqsul nal nail goel nail juq bhai lav meeq bhiq-a nail ganl

23A bhai nee ngal-aq, Yeiqsul Gaqliqlail milkhaoq doi dai tsao tsao-ail, aqyu juq nail uqhuq thaoq nail ilkhaol juq nail lavqkhoel bhai cavq bhiq cov bhiq-a nail ngaol. Nqtavq Milkhaoq nail ganl lavqkhiq tsail nail geeqlaoq daoq cavq bhiq khi, nalgoel mee nia phaq nal nail tsaol-aq juq bhai iqsanl, bhi meeq lai-a nail ngaol. 24Aq-u phao, Yeiqsul nail ganl Sulliv milkhaoq khaoq lao gaiq doi ail-a nail ngaol. Alheel ngel-i mail, nalgoel mee nia phaq nal nail juq bhai aivq jaol nail bha hel lavq-a nail ngaol. Neivq aol nail tsaol-aq, bhi bhaoq ga nail tsaol-aq, khil sil lavq sil sil nail tsaol-aq, nal nail tsaol-aq iqsanl bhai aqyu juq Yeiqsul jaol nail bhai hel lavq khi, aivq aqyu juq bhai bhi meeq lai-a nail ngaol. 25Alheel ngel-i mail, Gaqliqlail milkhaoq, Deiqgaqbhaollil milkhaoq, Yeiqlulsaqlaiq meenq, Yuldav milkhaoq khi mail, Yaoldaq laoljaol a phao lelkhel nee lal-a nail tsaol-aq munl munl ma juq, Yeiqsul nail haoqnao tsaothel-aivq-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index