Search form

Pillilpiv 4

Paolluv cavq bhiq cov bhiq nail daoq nail ganl

1Alheel ngel-i mail, ngal mao-ail gaiq-a khi moel movq deedee nail aqivq jaqbheq juq-ol, nuljuq neq, ngaq nail lavqkhiq tsail duq khi ngaq nail heel uqtsaoq ngaol. Ngal mao-ail gaiq-a nail aqtsaoq juq-ol, nuljuq Yeiqsul nail lavqkhoel bhai ivqdao dai, doevq yaoq.

2Nul-nq nvq gaq Yeiqsul nail lavqkhoel-ai tsaq lai jil lai yaoq dai, ngal Ilbhaoldil khi Sultuv bhai hal nail ngaol. 3Ngaq-ai nee mail teevq gaq khe-ai, ganl nl daiq-a nail gaq-ol, naol iqsanl yaqmai-aq al nvq gaq bhai tsaojao-ai bhiq yaoq dai, ngal naoq bhai hal nail ngaol. Khul khi mail dai ngal-aq neq, lavqkhiq tsail nail geeqlaoq daoq gaiq doi ail dai, aqyu nvq gaq ngaq-ai nee mail tsao nl lavq-a nail ngaol. Gaqleiqmeiq khi aqdoevq bhi doevq nail haoqgavq phaldoiq lavqkhoel bhai aqmil gevq bhoel-ai thaq nail yaoq juq yaoq iqsanl, ngaq-ai nee mail tsao nl lavq-a nail ngaol.

4Khaq mao iqsanl, Yeiqsul nail lavqkhoel bhai lavqkhiq tsail yaoq. Ngal teevq pov gaoq ge lavq bhel. Lavqkhiq tsail yaoq. 5Neema neenuq neebeiv aol nail tsaol-aq niil dai, tsaol-aq iqsanl mail naoq bhai heeq nia dai, doevq yaoq. Yeiqsul kev lee-aiq nail ngaol. 6Khul teevq phaq bhai iqsanl khaoq thaq laol. Nuljuq loq nail phaq bhai khaq mao iqsanl, geeqlaoq hal-u phao, khal hal movq nail khe-ai, Miqyail bhai tsiqeeq tsiqeeq-ail hal yaoq. 7Alhai hal haq neq, Miqyail nee mail dov lee-a nail tsaol-aq-i mail maq noeq dov tsaol nail neesal-ovq nail phaq nuljuq nail neema khi nuljuq nail neenoeq needul bhai Yeiqsul Khali nail lavqkhoel nee heldaiq phail lavq nail ngaol.

8Aqivq jaqbheq juq-ol, haoqnao naosaq khe daoq neq, niailhai ngaol. Maldil tsaq nail phaq, yu ev heeq phaq-ail pevq nail phaq, tsaq nail phaq, meeq nail haol nail phaq, yu heldaiq-u phao, gaiq-a lal bhiq nail phaq, heldaiq meeq nail phaq, aqmeeq phaq khi tsiqeeq heeq phaq-ail pevq nail phaq, niil juq bhai nuljuq khaq mao iqsanl, saol-nvq saol-nvq-ail jaol yaoq. 9Nuljuq ngaq nail lavqkhoel bhai ya saol oil, ya hav bhoel, ya gaiq ya moel-a nail juq bhai nl dal laivq yaoq. Alhai nl haq neq, neesal bhi ovq lavq nail Miqyail nuljuq nee mail jaol nail ngaol.

Kovpavq nail haqbhoil geeqlaoq eeq kovq nail ganl

10Niil aq-il iqsanl teevq pov, nuljuq ngaq bhai noeq kev lavq nail ngel-i mail, ngal Yeiqsul nail lavqkhoel-ai lavqkhiq tsail deedee-ail nial. Jel lal-u phao, nuljuq ngaq bhai noeq kev khi ngaol-aoq, ngaq bhai ya tsaojao-ai dai, gailkhaol maq daol lal haq-al. 11Ngal teevq phaq ganav loq nail ngel-i mail, niailhai ge nail maq ngel. Ngal khul phaq bhai ya thaoqphuq khi ngaol-aoq, al nail lavqkhoel bhai neekhaol sil dai heeq kivq lal-aoq nail ngaol. 12Haq deedee nail phaq bhai maqkhaiq, hulmeeq hulbhao bhao nail phaq bhai maqkhaiq, ngal khanqtsaol lal-aoq nail ngaol. Jaq lovq daol lovq nail phaq bhai maqkhaiq, moevq nail sivq nail phaq bhai maqkhaiq, bhao lee ya lee nail phaq bhai maqkhaiq, haq nail aoq nail phaq bhai maqkhaiq, ngal niil juq bhai khalhai khi daq tsaol nail ganl, yaoq phaq yaoq-ao nee bhai heeq kivq lal-aoq nail ngaol. 13Ngaq bhai gaq bivq lavq nail gaq bhai juq juq-ail, ngal iqsanl bhai nl kivq hal kivq nail ngaol.

14Thailhai ngaol-aoq, ngal haq dee aoq deedee nail phaq bhai ya daq thailthaiq-u phao, nuljuq tsaojao-ai lavq-a nail ngel-i mail, meeq deedee-ail nial.

15Pillilpiv meenq bhai jaol nail tsaol-aq juq-ol, ngal lavqkhiq tsail nail geeqlaoq daoq iqmoeq ilmoeq cavq lal khi, Maqgeiqdaolnil milkhaoq nee mail dov ail-u phao, bivq lavq khi tsaojao-ai lavq-a nail lavqkhoel nee aqtsaoq tsaoq lavq-a nail neq, nuljuq teevq-eel ngaol. Khali yaq munl yaoq juq yaoq neq, alhai teevq munl iqsanl maq nl lavq-a dai nuljuq heeq nia nail ngaol. 16Khul khi mail dai ngal-aq neq, ngal Theilsaqlolni meenq bhai jaol-u phao, ngal loq nail juq bhai nuljuq mee nia pov oil bhoel-ai leevq-a nail ngaol. 17Ngal kovpavq bhai oil movq nail ngel-i mail, niailhai ge nail maq ngel-ail dei-eiq. Nuljuq geeqlaoq teevq bhee ya dai ngal movq nail ngaol. 18Niil aq-il neq, ngal yaoq phaq yaoq-ao nee jiav lovq-ao nail nee ovqtavq, al jaiq iqsanl jiav nail ngaol. Nuljuq Ilbhaqphaoqdil bhai khoel khi bhi oil ha lee-a nail kovpavq al juq bhaqda nee ngal teevq bhee jiav nail ngaol. Kovpavq al juq neq, Miqyail neema tsaq nail tovq khi danq nail huqbhiq nil nail phaq khi laol bhiq nail phaq iqsanl ngel naol. Miqyail al juq bhai hav bhoel nail ngaol. 19Ngaq nail Miqyail neq, aivq nail mao-ail phoiq mao-ail laoq nail seiqleiq khaoqsail lavqkhoel nee, nuljuq khal loq nail yaoq phaq yaoq-ao nee, Yeiqsul Khali bhai juq juq-ail khi nuljuq bhai teevq bhee teevq lov bivq lavq nail ngaol.

20Ngadao nail Aqbhu Miqyail bhai nqmaq maqluv halyeel tsiqeeq bhel. Aqmiq.

Haoqnao naosaq khe daoq

21Yeiqsul Khali bhai neema thaqtsaol nail Miqyail nail tsaol-aq iqsanl bhai ngal noeq moel naol geiq dai, ge bhiq-ail dei-eiq. Ngaq-ai nee mail jaol nail aqivq jaqbheq Khali yaq juq, nuljuq bhai noeq moel naol dai, daoq cavq cavq bhoel-ai leevq-a nail ngaol. 22Niilniai jaol nail Khali yaq iqsanl mail, nuljuq bhai noeq moel naol dai, daoq cavq cavq bhoel-ai leevq-a nail ngaol. Yu nee maqtsil, heeqphaq Gailsaq nail haol bhai ganl nl nail Khali yaq juq nuljuq bhai noeq moel-ai bhiq nail ngaol.

23Ngadao nail Heeqphaq Yeiqsul Khali nail geeqlaoq eeljaol nuljuq nail neema lavqkhoel bhai aol dei-eiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index