Search form

Phaodaiq 12

Yaqmai-aq teevq gaq khi baivyaovq teevq maol nail ganl

1A bhai nee ngal-aq, bhi heeq bhi moel nail eeq deedee nail phaq nqtavq bha, ngal ya moel-a nail ngaol. Yaqmai-aq teevq gaq nlma doi khi, bhala bhai naoqthaiq-ai thaq nail ngaol. Aivq neq, aqgil tsel-nvq heel covq nail uqtsaoq tsaoq-nq thaq nail ngaol. 2Yaqmai-aq al gaq yaqbeiv uvq thailthaiq nail ngaol. Aivq yaq tsiq nail dai khi, nal deedee nail ngel-i mail, gul thailthaiq nail ngaol. 3Bhi heeq bhi moel nail yaoq phaq yaoq nqtavq bha, ngal gaoq ya moel-a nail ngaol. Neltsaiq deel baivyaovq maol ma teevq maol dov lee-a nail ngaol. Aivq neq, uqhuq sivq huq covq khi, uqkheel tsel kheel covq nail ngaol. Aivq nail uqhuq bhai heel uqtsaoq sivq tsaoq tsaoq-nq thaq nail ngaol. 4Aivq nail daoqmiq-i mail nqtavq bha jiav nail aqgil hail bhoil teevq bhoil bhai jiivq jil khi, miltsaq kovtavq bhai liv bhoel-ai leevq-a ngaol. Yaq tsiq nail dai, lainq-ai thaq nail yaqmai-aq al gaq nail yaq doevq lee-u phao, yaq al gaq bhai ya jaq dai, baivyaovq al maol yaqmai-aq al gaq nail sivtavq bhai thulphaol-nvq thaq nail ngaol. 5Yaqmai-aq al gaq yaqyov tsiq-a nail ngaol. Yaqyov niil gaq neq, yaqhao hail nail joiqniovq nee milkhaoq iqsanl bhai, uvthaiq nail gaq ngaol. Yaqyov al gaq bhai Miqyail jaol nail bha khi Miqyail nail joiqjaq doiqbev bev ma bhai teevq pov taivq-ail tsiq dal laivq-a nail ngaol. 6Yaqmai-aq al gaq haqtsoiq haqyal bha tsaol-aivq-a nail ngaol. A bhai, teevq hinl nvq yal kovq tsel n bhee dai, aivq bhai heldaiq phail bhiq nail dai, Miqyail aivq nail haqbhoil jaol duq lav sav-ai thaq nail ngaol.

7Aq-u phao, nqtavq kovtavq bhai genl genl ma dev nail thaiq lal-a nail ngaol. Milgeiqlal khi aivq nail nqtavq gaqkhoel juq baivyaovq al maol bhai dev pheeljaq-a nail ngaol. Baivyaovq al maol khi aivq nail nqtavq gaqkhoel iqsanl, aqyu juq bhai genl dev lal-a nail ngaol. 8Thailhai ngaol-aoq, baivyaovq al maol khi aivq nail nqtavq gaqkhoel juq maq gaq lai-ail khi, aqyu juq nqtavq kovtavq bhai jaol duq maq jiav yaoq-aol. 9Aq-u phao, neivq heeqphaq maq ngel haq neq, Saqdaq dai mil-ai thaq nail baivyaovq maol ma al maol bhai, miltsaq kovtavq bhai bavq ha-ai leevq-a nail ngaol. Aivq neq, milnee uqnee khe haqeiv nail eellel al maol iqsanl, ngel nail ngaol. Aivq bhai miltsaq kovtavq bhai bavq ha-ai leevq-u phao, aivq nail nqtavq gaqkhoel bhai iqsanl, aivq nee mail teevq gaq khe-ai, bavq ha-ai leevq-a nail ngaol.

10Nqtavq kovtavq bhai aqthel meel deedee nail bhai, ngal niailhai ya gaiq-a nail ngaol:

“Niil aq-il ngadao nail Miqyail

hevqkovq nail yanq

kev lee-aoq nail ngaol.

Niil aq-il aivq bhaqaoq

kav deedee nail lavqkhoel nee

uvthaiq nail yanq

kev lee-aoq nail ngaol.

Niil aq-il aivq nail Khali

uvthaiq nail yanq

kev lee-aoq naol.

Khul khi mail dai

ngal-aq neq,

Miqyail nail sivtavq bhai

ngadao nail aqivq jaqbheq

Khali yaq juq bhai

nqkiv n-gaol maqkhaiq

oeqbal thaq nail gaq bhai,

gaq lai-aoq nail ngaol.

11Yaolyaq nail aqsivq

bhaqda nee maqkhaiq,

aqyu juq-i mail

salkhil khanq nail

bhaqda nee maqkhaiq,

aqyu juq oeqbal thaq nail

al gaq bhai

gaq lai-a nail ngaol.

Khul khi mail dai

ngal-aq neq,

aqyu juq neq,

al nail haqbhoil sil iqsanl,

sil tseq nail ngaol.

12Alheel ngel-i mail,

nqtavq khi mail

nqtavq kovtavq bhai

jaol nail juq-ol,

lavqkhiq tsail yaoq.

Thailhai ngaol-aoq,

miltsaq khi iqyaq iqma neq,

geeqlaoq aqdoil ya nail ngaol.

Khul khi mail dai

ngal-aq neq,

neivq heeqphaq neq,

nuljuq nee mail

jaol nail ngaol.

Aivq nail haqbhoil aqyanq

micil maq ngel nail neq,

maq jiav yaoq-aol dai,

heeq nia nail ngel-i mail,

neema phail

deedee nail ngaol” dai,

ge nail bhai, ngal ya gaiq-a nail ngaol.

13“Ngaq bhai miltsaq kovtavq bhai bavq ha-ai leevq thaq nail niil” dai, baivyaovq al maol heeq nia-u phao, yaqyov tsiq-a nail yaqmai-aq al gaq bhai khoeq bhiq jiovq bhiq nail khi the thailthaiq nail ngaol. 14Yaqmai-aq al gaq, baivyaovq al maol nail aqlavq lavqkhoel bhai ya jel-ail dai, joelma maol ma nail aqdaol nvq daol ya-a nail ngaol. Aqdaol al-i mail haqtsoiq haqyal bha bhail-aivq khi, a bhai hail kovq ovqtavq teevq pav, Miqyail aivq bhai heldaiq phail bhiq-a nail ngaol. 15Yaqmai-aq al gaq bhai bhi daq jal-aiq nail dai khi, baivyaovq al maol aivq nail moeqthaoq nee mail ulcuvq laoljaol jaol ma khe-ai yaqmai-aq al gaq nail haoqnaol phao peivq ha gaiq-a nail ngaol. 16Thailhai ngaol-aoq, miltsaq neq, yaqmai-aq al gaq bhai tsaojao-ai bhiq-a nail ngaol. Miltsaq pav lal khi, baivyaovq-i mail peivq ha-ai leevq-a nail ulcuvq al bhai suv gee gil-a nail ngaol. 17Baivyaovq al maol, yaqmai-aq al gaq bhai neema phail deedee lal bhiq khi, jaol-ail ceevq-a nail aivq nail yaq juq bhai genl dev ail-a nail ngaol. Yaq al juq neq, Miqyail-i mail bivq-a nail daoq bhai naldaiq khi, Yeiqsul nail ganl salkhil khanq nail tsaol-aq ngaol. 18Baivyaovq al maol, iqyaq iqma nail daolbhaq haqaiq mildai daikhaoq bhai thulphaol-nvq thaq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index