Search form

Phaodaiq 15

Khoeq nail jiovq nail sivq phaq khi nqtavq gaqkhoel sivq gaq nail ganl

1Aq-u phao, noeq-u maq dov nail bhi heeq bhi moel nail eeq nail phaq nqtavq bha, ngal ya moel-a nail ngaol. Bhi heeq bhi moel nail al phaq neq, khoeq nail jiovq nail sivq phaq aol nail nqtavq gaqkhoel sivq gaq ngaol. Khoeq nail jiovq nail al juq neq, haoqnao naosaq khe juq ngaol. Al juq gil haq neq, Miqyail neema phail nail phaq gil-aoq nail ngaol. 2A bhai nee ngal-aq, miqjaq khi ulcuvq lav kheq-ai thaq nail phaoqdaiq nail ngaqkha khe-ai dul lai nail teevq phaq bhai, ngal ya moel-a nail ngaol. Haqeiv nail jaiqyaq al maol bhai maqkhaiq, aivq nail maolkhoel bhai maqkhaiq, aivq nail nanqpav bhai maqkhaiq, gaq lai nail tsaol-aq juq Miqyail nail dil-nvq bavq khi, ngaqkha al kha nail jail-nq bhai thulphaol-nvq thaq nail ngaol. 3Aqyu juq Miqyail nail yaqkav Molseiq nail daoqsel khi mail Yaolyaq nail daoqsel gul gul-ail khi ge nail:

“Iqsanl nail kovtavq bhai

uvthaiq nail bhaqaoq eeq nail

Heeqphaq Miqyail-ol,

naoq-i mail nl-a

hal-a nail phaq neq,

eeq dee heel

deedee nail ngaol.

Jeq-e jaq-a

iqsanl nail Heeqphaq-ol,

naoq nail gailkhaol neq,

tsaq dee daol deedee nail ngaol.

4Heeqphaq Miqyail-ol,

naoq bhai maq geesil dai,

naoq nail aqmil bhai

maq tsiqeeq nail

khaq sil gaq jaol nail-aiq.

Khul khi mail dai

ngal-aq neq,

naol teevq gaq taivq-ail

meeq nail haol nail ngaol.

Jeq-e jaq-a iqsanl mail

naol jaol nail bha lal khi,

naoq bhai uqhuq

thaoq lal nail ngaol.

Khul khi mail dai

ngal-aq neq,

naoq-i mail aqtsaq aqdaol dai

nl-a hal-a nail juq,

bhaqlaoq kheq dai,

dov lal-a nail ngaol” dai,

ge bhiq-a nail ngaol.

5A bhai nee ngal-aq, ngal heldaiq gai-aivq-u phao, salkhil pevq nail uqhuq thaoq nail ilkhaol il ma nqtavq kovtavq bhai phao-ai thaq nail bhai, ya moel-a nail ngaol. Uqhuq thaoq nail ilkhaol il ma al neq, haqphal saiqgov gov ma ngaol. 6Khoeq nail jiovq nail sivq phaq aol nail nqtavq gaqkhoel sivq gaq uqhuq thaoq nail ilkhaol il ma al il nee dov lee-a nail ngaol. Aqyu juq neq, haoltaiv deel haqphal aqphul doi-nq thaq nail ngaol. Aqyu juq nail neema bhai heel nail jiovqpavq pavq-nvq thaq nail ngaol. 7Aqdoevq phaq al liq maol nail lavqkhoel khe teevq maol neq, nqtavq gaqkhoel sivq gaq bhai teevq gaq-ai, heel nail iqlaoq teevq heeq tsiq bhiq-a nail ngaol. Heel iqlaoq al juq nail lavqkhoel bhai nqmaq maqluv halyeel doevq nail Miqyail nail neema phail nail phaq, teevq bhee aol nail ngaol. 8Aq-u phao, Miqyail nail seiqleiq khaoqsail khi mail aivq nail bhaqaoq bhaqda nee, uqhuq thaoq nail ilkhaol il ma al il nail lavqkhoel, miqkhoiq teevq bhee aol nail ngaol. Nqtavq gaqkhoel al sivq gaq nail khoeq nail jiovq nail sivq phaq maq gil-u kev dai, tsaol-aq teevq gaq iqsanl, uqhuq thaoq nail ilkhaol il ma al il bhai maq aol lai nia-ail.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index