Search form

Phaodaiq 16

Miqyail nail neema phail nail phaq aol nail iqlaoq sivq heeq nail ganl

1A bhai nee ngal-aq, uqhuq thaoq nail ilkhaol il ma al il nail lavqkhoel nee kav deedee nail aqthel niailhai gul dov-ai leevq-a nail bhai, ngal ya gaiq-a nail ngaol. “Miqyail neema phail nail phaq aol nail iqlaoq sivq heeq bhai miltsaq kovtavq bhai hoeldav ail bhiq yaoq” dai, nqtavq gaqkhoel al sivq gaq bhai, ge bhiq-a nail ngaol. 2A bhai nee ngal-aq, nqtavq gaqkhoel iqmoeq khe gaq aivq nail iqlaoq miltsaq kovtavq bhai hoeldav ail-a nail ngaol. Aq-u phao, haqeiv nail jaiqyaq al maol-i mail junq deeq-ai thaq nail juq khi mail, aivq nail maolkhoel bhai uqhuq thaoq nail tsaol-aq juq neq, doil deedee nail malyal daol lal bhiq-a nail ngaol.

3Nqtavq gaqkhoel nvq gaq teevq gaq iqsanl, aivq nail iqlaoq iqyaq iqma bhai hoel puvq-a nail ngaol. Aq-u phao, iqyaq iqma neq, sil-ai thaq nail tsaol-aq nail aqsivq khe-ai pevq lal khi, iqyaq iqma lavqkhoel khe khal doevq nail phaq iqsanl mail, sil gil-a nail ngaol.

4Nqtavq gaqkhoel hail gaq teevq gaq, aivq nail iqlaoq laoljaol juq khi mail ulcuvq eelbev juq bhai hoel bhoel gai-aivq-u phao, ulcuvq al juq aqsivq pevq-ail gil-a nail ngaol. 5Aq-u phao, ulcuvq bhai heldaiq nail nqtavq gaqkhoel al gaq niailhai ge nail ngaol:

“Aq-u iqsanl,

niil aq-il iqsanl,

doevq nail

meeq nail haol nail gaq-ol,

naol tsaol-aq al juq bhai

niailhai yalkhaq dal nail neq,

tsaq nail daol nail ngaol.

6Aqyu juq neq,

Miqyail nail tsaol-aq juq nail

aqsivq khi mail,

naoq nail haqbhoil gedan nail

juq nail aqsivq

bhi dov lee-a nail ngel-i mail,

naol aqyu juq bhai aqsivq

bhi daol-a nail ngaol.

Aqyu juq alhai

ya daq nail neq,

tsaq nail ngaol” dai,

ge nail bhai, ngal ya gaiq-a nail ngaol.

7Al ovqtavq, laol duq nee mail aqthel meel dol leevq khi ge nail:

“Ngel naol.

Iqsanl nail kovtavq bhai

uvthaiq nail bhaqaoq eeq nail

Heeqphaq Miqyail-ol,

naol yalkhaq dal nail neq,

maldil tsaq nail

daol nail ngaol” dai,

ge nail bhai ngal ya gaiq-a nail ngaol.

8A bhai nee ngal-aq, nqtavq gaqkhoel liq gaq teevq gaq, aivq nail iqlaoq nlma bhai hoel dav-a nail ngaol. Aq-u phao, nlma nail miqjaq al, tsaol-aq yaq bhai bhi laol lal nail aqkhaoqanq ya-a nail ngaol. 9Aqlaol haquvq khi laol deedee nail al, tsaol-aq yaq bhai bhi poiv khul laivq nail ngaol. Thailhai ngaol-aoq, khoeq nail jiovq nail niil juq nail kovtavq bhai bhaqaoq jiav nail Miqyail bhai, aqyu juq iqkhail yavq-a nail ngaol. Aqyu juq oeqbal maq noeq pov nail nee ovqtavq, Miqyail bhai maq tsiqeeq maq tsiqheel-ail.

10A bhai nee ngal-aq, nqtavq gaqkhoel ngaq gaq teevq gaq aivq nail iqlaoq haqeiv nail jaiqyaq al maol nail doiqbev bev ma bhai, hoel dav-a nail ngaol. Aq-u phao, haqeiv nail jaiqyaq al maol-i mail uvthaiq-ai thaq nail milkhaoq navtsee dai, pevq-ail khi, a bhai jaol nail tsaol-aq juq nal deedee nail ngel-i mail, moeqlal bhai keivq thaiq-ai thaq nail ngaol. 11Aqyu juq nal dee goel deedee nail phaq bhai maqkhaiq, malyal daol nail phaq bhai maqkhaiq, ya daq-a nail ngel-i mail, nqtavq kovtavq bhai jaol nail Miqyail bhai aqyu juq iqkhail yavq-a nail ngaol. Al ovqtavq, aqyu juq-i mail nl laiq hal laiq-a nail phaq bhai neq, maq noeq pov maq noeqphal-al.

12Nqtavq gaqkhoel kovq gaq teevq gaq, aivq nail heel iqlaoq Ulbhaqlal nail laoljaol jaol ma bhai hoel puvq-a nail ngaol. Aq-u phao, nlma dovkhoeq phao jaol nail heeqphaq juq nail haqbhoil gailkhaol daol lal dai, laoljaol al jaol sivq ail-a nail ngaol. 13Aq-u phao, baivyaovq nail moeqthaoq lavqkhoel nee maqkhaiq, haqeiv nail jaiqyaq al maol nail moeqthaoq lavqkhoel nee maqkhaiq, Miqyail nail haqbhoil gedan naol dai, ge khi ngaol-aoq, maldil maq ngel nail gaq nail moeqthaoq lavqkhoel nee maqkhaiq, neivq aqcavq hail maol dov lee nail bhai, ngal ya moel-a nail ngaol. Neivq al hail maol neq, phaqyaq khe-ai dul lai nail ngaol. 14Neivq al hail maol neq, bhi heeq bhi moel nail phaq nl daiq bhiq nail neivq al juq nail aqheel ngaol. Aqyu juq neq, Iqsanl nail kovtavq bhai uvthaiq nail bhaqaoq eeq nail Miqyail nail aqn n-gaol, genl dev nail haqbhoil, miltsaq doi dai jaol nail, heeqphaq juq bhai bhi jil lal nail dai khi, neivq al juq dov lee-a nail ngaol.

15Yeiqsul ge nail: “Naldaiq yaoq. Khoiqbhaoq bhaoq lee nail khe-ai, ngal lee naol dei-eiq. Aqgeel geel dai jaol khi, yovqgavq nail aqgaq aqdoi bhai heldaiq phail khi doi-nq thaq nail tsaol-aq neq, geeqlaoq eeq nail ngaol. Tsaol-aq maoldeq laqnel-ail maq jaol nail ngel-i mail, yu nail sivtavq bhai maq ya haqsil-ail” dai, ge bhiq-a nail ngaol.

16Neivq al hail maol neq, heeqphaq juq bhai, Aqmaqgeiqdoq dai khul nail dao bhai bhi jil lal-a nail ngaol. Aqmil al neq, Heiqbhail daoq ngaol.

17Nqtavq gaqkhoel sivq gaq teevq gaq, aivq nail iqlaoq lilmoel nail lavqkhoel bhai thaoq ha gai-aivq-a nail ngaol. Aq-u phao, uqhuq thaoq nail ilkhaol il ma lavqkhoel bhai jiav nail joiqjaq doiqbev bev ma nee mail kav deedee nail aqthel, “Gil-aoq naol” dai, gul dol-ai leevq-a nail ngaol. 18Aq-u phao, nqmeivq meivq lal khi nqjaiq jaiq nail aqthel mee nia phaq khi mail milluv luv deedee nail niil juq, pevq lal-a nail ngaol. Tsaol-aq yaq bhai teivq-u n-gaol nee yanqgaol kev dai, niidai dai-ail milluv teevq pov iqsanl, maq luv lal daiq haq-al. 19Meenq meenq ma al meenq hail pav pav ail-a nail ngaol. Milkhaoq yaoq khaoq yaoq-ao nee nail lavqkhoel bhai jiav nail meenq juq iqsanl, cov-ail gil-a nail ngaol. Miqyail neq, aivq neema phail deedee nail aqheeq tsilju nail ullul deq nail khaoqanq, aqmil dov nail Bhaqbhulloq meenq bhai bhi peivq gil-ail khi, teevq thal-iq maq nioilpeivq-ail. 20Eeljaol laol-n iqsanl mail peivq-ail gil khi, gaoqjaoq iqsanl teevq thal-iq maq jiav yaoq-aol. 21Hail tsel jao-ai jaiq dai bhee nail ollov aqheeq nee mail tsaol-aq yaq nail kovtavq bhai ga lee-a nail ngaol. Miqyail aqyu juq bhai ollov aqheeq bhi ga bav bhi ga bav-ail, khoeq bhiq jiovq bhiq-a nail ngel-i nail, aqyu juq Miqyail bhai iqkhail yavq-a nail ngaol. Khul khi mail dai ngal-aq neq, khoeq nail jiovq nail al phaq neq, haq deedee nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index