Search form

Phaodaiq 20

Teevq hinl kovq uvthaiq nail ganl

1A bhai nee ngal-aq, nqtavq gaqkhoel teevq gaq nqtavq kovtavq nee yavq kha lee nail bhai, ngal ya moel-a nail ngaol. Aivq neq, mao-ail navq nail khaqduq nail taovq taovqphoil khi mail hailcav deeq ma, oil-nq thaq nail ngaol. 2Nqtavq gaqkhoel al gaq, neivq heeqphaq khi mail neivq Saqdaq dai khul nail baivyaovq al maol bhai nieivq khi, teevq hinl kovq bhee dai khil cuvq lavq cuvq cuvq khi, pheethaiq-ai thaq nail ngaol. (Baivyaovq al maol neq, aq-u khe haqeiv nail eellel al maol ngaol.) 3Teevq hinl kovq maq bhee lal-a nail gaiqlaq bhai, aivq jeq-e jaq-a juq bhai jalmul maq ya mul ya nia-ail dai, mao-ail navq nail khaqduq al duq nail lavqkhoel nqtavq gaqkhoel al gaq aivq bhai bavq bhoel khi, taovq taovq thaiq khi mail, al nail kovtavq bhai junq deeq-ai thaq nail ngaol. Teevq hinl kovq bhee lal haq neq, teevq yanq taivq-ail aivq bhai phaiq dov bhiq nail ngaol.

4Aq-u phao, ngal doiqbev bev ma juq bhai ya moel-a nail ngaol. Doiqbev bev ma al juq bhai jaoldeel-nvq thaq nail tsaol-aq juq neq, yalkhaq dal nail aqkhaoqanq ya-a nail ngaol. Yeiqsul nail ganl salkhil khanq nail nee ovqtavq, Miqyail nail daoq cavq nail bhaqda nee, uqhuq bhi tsilceiv nail bhai ya daq-a nail tsaol-aq juq nail aqhaqlal bhai iqsanl, ngal ya moel-a nail ngaol. Aqyu juq neq, haqeiv nail jaiqyaq al maol bhai maqkhaiq, maolkhoel bhai maqkhaiq, uqhuq maq thaoq-al. Al ovqtavq, yovqgavq nail neeqthel bhai maqkhaiq, yovqgavq nail aqlavq bhai maqkhaiq, haqeiv nail jaiqyaq al maol nail junq maq deeq-ai thaq-al. Aqyu juq gaoq doevq kovq lal khi, Khali nee mail teevq hinl kovq bhee dai, uvthaiq-a nail ngaol. 5Jail nail sil-a nail tsaol-aq yaoq juq yaoq neq, teevq hinl kovq maq bhee lal-u neq, maq doevq kovq lal-ail. Niil neq, iqmoeq ilmoeq khe gaoq doevq kovq lal-a nail pov ngaol. 6Iqmoeq ilmoeq khe pov doevq kovq lal-a nail bhai aol lai-a nail tsaol-aq juq neq, geeqlaoq eeq deedee khi, meeq nail haol nail tsaol-aq ngaol. Nvq pov teevq pov sil nail phaq, aqyu juq nail kovtavq bhai bhaqaoq maq jiav yaoq-aol. Aqyu juq neq, Miqyail khi mail Khali nail Philma pevq khi, Khali nee mail teevq hinl kovq bhee dai, ya uvthaiq nail ngaol.

Neivq Saqdaq bhai ga lai-a nail ganl

7Teevq hinl kovq bhee lal haq neq, thaonq nee mail neivq Saqdaq bhai phaiq dov bhiq nail ngaol. 8Aivq dov ail khi milma liq phaoq liq khoel bhai jaol nail jeq-e jaq-a juq bhai hevq bheel-aivq khi genl dev nail haqbhoil bhi jil lal nail ngaol. Jeq-e jaq-a al juq bhai, Gaolgav khi mail Maqgaolgav dai khul nail ngaol. Aqyu juq neq, iqyaq iqma khe tsalhail khe-ai mao nail ngaol. 9Aqyu juq miltsaq kovtavq bhai jaol bhee gil khi, Miqyail nail tsaol-aq juq nail naq duq khi mail Miqyail mailma-ail gaiq-a nail meenq bhai ga jaoq-ai thaq nail ngaol. Thailhai ngaol-aoq, nqtavq nee miqjaq ga lee khi, aqyu juq bhai poiv jaq gil-a nail ngaol. 10Al ovqtavq, aqyu juq bhai hevq bheel-aivq-a nail neivq Heeqphaq bhai iqsanl miqjaq khi mail miqjal jalheel nail ngaqkha bhai bavq puvq nail ngaol. Ngaqkha al nail lavqkhoel haqeiv nail jaiqyaq al maol khi mail Miqyail nail haqbhoil gedan naol dai, ge khi ngaol-aoq, maldil maq ngel nail al gaq aol nail ngaol. Aqyu juq neq, nqmaq maqluv halyeel, nqkiv n-gaol maqkhaiq, khoeq nail jiovq nail bhai ya daq nail ngaol.

Phulleq deel doiqbev bev ma nail sivtavq bhai yalkhaq dal nail ganl

11A bhai nee ngal-aq, phulleq deel joiqjaq doiqbev bev ma khi a bhai jaoldeel-nvq thaq nail gaq bhai, ngal ya moel-a nail ngaol. Nqtavq khi miltsaq aivq nail sivtavq nee peivq-ail khi, teevq thal-iq maq ya moel dai, peiv ail-a nail ngaol. 12Sil-a nail eeq yaq nil yaq iqsanl mail, doiqbev bev ma al nail sivtavq bhai thulphaol-nvq thaq nail bhai, ngal ya moel-a nail ngaol. Aq-u phao, haoqgavq juq phao-ai thaq nail ngaol. Aqdoevq bhi doevq nail haoqgavq phaldoiq iqsanl phao-ai thaq nail ngaol. Sil-a nail tsaol-aq juq-i mail nl-a hal-a nail juq, haoqgavq al juq nail lavqkhoel bhai gevq bhoel-ai thaq nail khe-ai, gevq bhoel-ai thaq nail al juq bhai heldaiq heldaiq-ail, aqyu juq bhai yalkhaq dal bhiq nail ngaol. 13Iqyaq iqma neq, aivq nail lavqkhoel sil-ai thaq nail tsaol-aq juq bhai Miqyail nail aqlavq lavqkhoel bhai av bhiq nail ngaol. Sil nail phaq khi mail sil nail milkhaoq iqsanl, aqyu juq nail lavqkhoel bhai sil-ai thaq nail tsaol-aq juq bhai Miqyail nail aqlavq lavqkhoel bhai av bhiq nail ngaol. Tsaol-aq yaq yaoq gaq yaoq-ao nee mail, yovqgavq-i mail khal nl khal hal-a nail khe-ai, yalkhaq dal lavq nail bhai ya daq nail ngaol. 14Aq-u phao, Miqyail sil nail phaq bhai maqkhaiq sil nail milkhaoq bhai maqkhaiq, miqjaq nail ngaqkha bhai bavq puvq nail ngaol. Miqjaq nail ngaqkha al kha neq, nvq pov teevq pov sil nail phaq pevq nail ngaol. 15Aqdoevq bhi doevq nail haoqgavq phaldoiq lavqkhoel bhai aqmil gevq bhoel-ai thaq nail tsaol-aq iqsanl bhai, miqjaq nail ngaqkha bhai, bavq puvq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index