Search form

Lolmav 14

Khali yaq nail gaiqlaq bhai oeqbal thaq halpov

1Neema thaqtsaol nail phaq gaq bhaq nail tsaol-aq juq bhai hav bhiq yaoq. Thailhai ngaol-aoq, maq dul lai nail aol juq nail ganl bhai jil pheel jil lul jaq nail dai khi, hav nail phaq thaq bhi pevq. 2Neema thaqtsaol nail tsaol-aq teevq pav ganav juq neq, “Ngal yaoq phaq yaoq-ao nee jaq kivq nail ngaol” dai, noeq nail ngaol. Thailhai ngaol-aoq, neema thaqtsaol nail phaq gaq bhaq nail tsaol-aq juq neq, jaltsoiq aqpavq taivq-ail jaq nail ngaol. 3Yaoq phaq yaoq-ao nee jaq nail tsaol-aq, yaoq phaq yaoq-ao nee maq jaq nail tsaol-aq juq bhai maq ya thaqtheq-ail. Yaoq phaq yaoq-ao nee maq jaq nail tsaol-aq iqsanl, jaq nail tsaol-aq juq bhai oeqbal maq ya thaq-ail. Khul khi mail dai ngal-aq neq, Miqyail aqyu juq bhai hav bhoel-ai thaq nail ngaol. 4Yu nail yaqkav bhai oeqbal thaq nail gaq-ol. Naol neq, khalheel nail tsaol-aq pevq nail-aiq. Aivq bhai bhi jaol nail maqkhaiq, the ha nail maqkhaiq, aivq nail ilheel gaq pevq nail Miqyail bhai jiav nail ngaol. Aivq nail ilheel gaq neq, aivq bhai bhi jaol nail ngaol. Khul khi mail dai ngal-aq neq, aivq jaol nia dai nl nia nail bhaqaoq Miqyail jiav nail ngaol.

5Tsaol-aq teevq gaq ganav neq, aqn niil n neq, aqn yaoq n yaoq nee maqtsil meeq jaiq nail ngaol dai, thaqeeq nail ngaol. Tsaol-aq teevq gaq ganav neq, yaoq n yaoq n nee teevq gaq kheel ngaol dai, noeq nail ngaol. Khul gaq maqkhaiq, yovqgavq nail neema lavqkhoel bhai tsaq naol dai, noeqceiv-ai thaq nail phaq bhai ivqdao dai, nieivq thaiq-ai thaq yaoq. 6Aqn teevq n ganav bhai thaqeeq nail tsaol-aq, Heeqphaq Yeiqsul bhai noeq kev khi thaqeeq nail ngaol. Yaoq phaq yaoq-ao nee jaq nail tsaol-aq iqsanl, Yeiqsul bhai noeq kev khi jaq nail ngaol. Khul khi mail dai ngal-aq neq, aqyu juq Miqyail bhai tsiqeeq khi jaq nail ngaol. Yaoq phaq yaoq-ao nee maq jaq nail tsaol-aq iqsanl, Yeiqsul bhai noeq kev nail ngel-i mail maq jaq dai, Miqyail bhai tsiqeeq nail ngaol. 7Ngadao yaoq gaq yaoq-ao nee, yovqgavq nail haqbhoil yovqgavq doevq nail maq ngel. Yovqgavq nail haqbhoil yovqgavq sil nail maq ngel. 8Ngadao doevq nail neq, Yeiqsul nail haqbhoil ngaol. Ngadao sil khi ngaol-aoq, Yeiqsul nail haqbhoil ngaol. Alheel ngel-i mail, doevq nail maqkhaiq, sil nail maqkhaiq, ngadao aivq nail tsaol-aq ngaol.

9Khul khi mail dai ngal-aq neq, sil nail tsaol-aq bhai iqsanl, doevq nail tsaol-aq bhai iqsanl Heeqphaq jiovq nail dai khi, Khali khanq sil khi gaoq doevq kovq lal-a nail ngaol. 10Alheel ngel-i mail, naol khul khi mail naoq nail aqivq jaqbheq juq bhai oeqbal gaoq thaq nail-aiq. Khul khi mail naoq nail aqivq jaqbheq juq bhai gaoq thaqtheq nail-aiq. Ngadao iqsanl mail, Miqyail yalkhaq dal nail doiqbev bev ma nail sivtavq bhai ya kev lai nail ngaol. 11Jalliq lavqkhoel bhai gevq-ai thaq nail khe-ai,

“Heeqphaq Miqyail

ge nail:

‘Ngal neq,

maldil aqdoevq

doevq nail Miqyail

pevq nail khe-ai,

tsaol-aq yaq

yaoq gaq yaoq-ao

nee mail,

ngaq nail sivtavq bhai

peevqceevq kovdoiq

ya doiq khi,

moeqthaoq yaoq thaoq

yaoq-ao nee mail

ngaq bhai ya

tsiq eeq nail ngaol’ ” dai,

gevq-ai thaq nail ngaol.

12Ngadao yaoq gaq yaoq-ao nee mail, yovqgavq-i mail khal nl khal hal-a nail ganl, yovqgavq Miqyail bhai ya ge dov gil bhiq nail ngaol.

Khali yaq nail gaiqlaq bhai tsuq-ail dai, thaq nl

13Alheel ngel-i mail, ngadao teevq gaq nee teevq gaq oeqbal thaq nail phaq bhai khaonq ha bhel. Yovqgavq nail aqivq jaqbheq phaqthiq thiq khi oeqbal nail lavqkhoel bhai bhi laiq bhi tsa-ail dai, teevq phaq-ail maq nl yaoq-aol dai, noeqceiv nail, meeq jaiq nail ngaol. 14Jaq nail khul phaq maqkhaiq, aivq bhai aivq aqjiivq aqcavq teevq phaq-ail maq jiav-ail dai, Heeqphaq Yeiqsul bhaqda nee ngal heeq kivq khi neema thaqtsaol nail ngaol. Thailhai ngaol-aoq, al phaq niil phaq neq, aqjiivq aqcavq ngaol dai, teevq gaq ganav saol-nvq haq neq, aivq nail haqbhoil neq, aqjiivq aqcavq ngaol. 15Naoq-i mail jaq daol-a nail bhaqda nee, naoq nail aqivq jaqbheq ya noeqhaq haq neq, naol goil nail gaiq-a nail lavqkhoel bhai doevq nail maq ngel-ail. Naol jaq nail daol nail bhaqda nee, naoq nail aqivq jaqbheq bhai thaq lav cov. Aivq nail haqbhoil iqsanl, Khali khanq sil-a nail ngaol. 16Naoq nail haqbhoil aqmeeq phaq bhai, yu ge duq thaq bhi jiav. 17Khul khi mail dai ngal-aq, Miqyail Milkhaoq neq, jaq nail daol nail phaq pevq nail maq ngel-ail. Miqyail Milkhaoq neq, Meeqnail Haolnail Aqhaqlal bhaqda nee, tsaq nail daol nail phaq, neesal-ovq nail phaq khi mail lavqkhiq tsail nail phaq pevq nail ngaol. 18Khali nail haqbhoil alhai nl nail tsaol-aq bhai Miqyail neekhaol sil khi, tsaol-aq iqsanl, aivq bhai neema tsaq nail ngaol.

19Alheel ngel-i mail, khaq mao iqsanl tsaq lai jil lai dai, nl bhel. Eeq lal heel lal dai iqsanl, teevq gaq nee teevq gaq tsaojao-ai bhel. 20Jaq nail daol nail phaq bhaqda nee Miqyail nail ganl bhai thaq lav cov. Jaq nail daol nail phaq neq, iqsanl mail aqhaol ngaol. Thailhai ngaol-aoq, tsaol-aq teevq gaq teevq phaq ganav jaq nail bhaqda nee, yu laiq-ail tsa-ail haq neq, jaq nail al gaq nl laiq-a nail ngaol. 21Haqjoil jaq nail maqkhaiq, aqheeq tsilju nail ullul daol nail maqkhaiq, khul phaq nl khi ngaol-aoq, naoq nail aqivq jaqbheq bhai bhi laiq bhi tsa-ail haq neq, teevq phaq-ail nl nail maq tsaq ail.

22Naol neema thaqtsaol nail phaq, Miqyail khi mail naoq nail gaiqlaq bhai taivq-ail bhi jiav yaoq. Tsaq-ail nial dai, noeq khi, yovqgavq-i mail nl nail hal nail phaq, yovqgavq nail kovtavq bhai oeqbal maq thaq lal haq neq, lavqkhiq tsail nail ngaol. 23Thailhai ngaol-aoq, yovqgavq jaq nail phaq bhai yovqgavq nail neema lavqkhoel bhai maq haol haq neq, neema thaqtsaol nail lavqkhoel nee nl-a nail maq ngel nail ngel-i mail, Miqyail yalkhaq dal nail bhai ya daq nail ngaol. Neema thaqtsaol nail phaq maq aol dai, khal nl khal hal nail phaq neq, iqsanl mail oeqbal ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index