Search form

Lolmav 2

Miqyail tsaq nail daol nail lavqkhoel nee yalkhaq dal nail ganl

1Alheel ngel-i mail, yu nail kovtavq bhai oeqbal thaq nail tsaol-aq juq-ol, naol khul teevq phaq-ail ge kovq duq maq jiav-ail. Khul khi mail dai ngal-aq neq, naol yu nail kovtavq bhai oeqbal thaq nail khe-ai, naol iqsanl nl thailthaiq-ail nial. Alheel ngel-i mail, yu nail kovtavq bhai oeqbal thaq-u phao, naoq nail kovtavq bhai naol oeqbal thaq nail khe-ai, dul nail ngaol. 2Miqyail alhai nl nail tsaol-aq juq bhai yalkhaq dal bhiq nail neq, tsaq nail ngaol dai, ngadao heeq kivq nail ngaol. 3Naol yu nail kovtavq bhai oeqbal thaq nail khe-ai, naol iqsanl nl thailthaiq haq neq, “Miqyail-i mail yalkhaq dal nail bhai ngal ya jel-ail naol” dai, naol noeq nail laiq. 4Maq ngel haq neq, Miqyail nail eeq dee meeq deedee nail aqmeeq phaq nl nail bhai maqkhaiq, ol nia nail phaq bhai maqkhaiq, neema heelma ma dai noeq nia nail phaq bhai maqkhaiq, naol khal nl movq-ail nl nail laiq. Naol oeqbal noeq pov noeqphal lal nia dai, gaoqhaq gaiq-a nia nail Miqyail naoq bhai hevqdaiq lavq nail bhai naol maq heeq kivq-ail laiq.

5Thailhai ngaol-aoq, naol neema gaol khi oeqbal maq noeq pov nail ngel-i mail, Miqyail neema phail nail phaq bhai naol halpov jil thailthaiq nail ngaol. Miqyail nail aqn al n kev lee haq neq, aivq tsaq nail daol nail lavqkhoel nee yalkhaq dal nail bhai naol bhaqlaoq kheq dai, ya moel naol. 6Aqn al n nail lavqkhoel bhai, tsaol-aq yaoq gaq yaoq-ao nee bhai, yovqgavq-i mail nl-a nail khe-ai geel-nvq dai, Miqyail dal bhiq nail ngaol. 7Tsaol-aq teevq pav ganav juq neq neema ivqdao dai aol nail lavqkhoel khaq mao iqsanl aqmeeq phaq nl khi, Miqyail-i mail bivq lavq nail seiqleiq khaoqsail bhai maqkhaiq, nqmaq maqluv halyeel doevq nail phaq bhai maqkhaiq, halpov nail ngaol. Alhai halpov nail tsaol-aq juq bhai Miqyail nqmaq maqluv halyeel doevq nail phaq bivq nail ngaol. 8Thailhai ngaol-aoq, yu nee jil pheel jil lul jaq nail tsaol-aq, maldil tsaq nail phaq bhai maq hav bhoel dai, maq tsaq maq daol nail phaq bhai hav bhoel khi nl nail juq nail kovtavq bhai Miqyail neema phail deedee nail phaq kev lee nail ngaol. 9Haqeiv nail phaq khal nl nail tsaol-aq iqsanl nail kovtavq bhai haq dee aoq deedee nail phaq khi mail noeq dee noeq deel nail phaq kev lee nail ngaol. Iqmoeq Yuldav nail tsaol-aq bhai kev lee khi, haoqnao yu nail jeq-e jaq-a nail kovtavq bhai kev lee nail ngaol. 10Thailhai ngaol-aoq, aqmeeq phaq khal nl nail tsaol-aq iqsanl mail Miqyail nail seiqleiq khaoqsail khi mail, neesal-ovq nail phaq ya nail ngaol. Iqmoeq Yuldav nail tsaol-aq ya khi, haoqnao yu nail jeq-e jaq-a ya nail ngaol. 11Khul khi mail dai ngal-aq, Miqyail neq, maivphaoq eeq nil maq tsel-ail.

12Molseiq nail Aoldaoq Kovqdaoq maq jiav-ail, oeqbal khal nl nail tsaol-aq, aoldaoq kovqdaoq bhai maq tavq-ail, ya luq ya seil ail nail ngaol. Aoldaoq kovqdaoq jiav nail bhai oeqbal khal nl nail tsaol-aq, aoldaoq kovqdaoq nail kov-uvq nee yalkhaq dal nail bhai ya daq nail ngaol. 13Aoldaoq Kovqdaoq bhai ya gaiq-a nail ngel-i mail, Miqyail nail sivtavq bhai tsaq nail daol nail tsaol-aq pevq lal nail maq ngel-ail. Aoldaoq kovqdaoq bhai hav bhoel khi nl nail tsaol-aq taivq-ail, tsaq nail daol nail tsaol-aq pevq lal nail ngaol. 14Aoldaoq Kovqdaoq maq jiav nail yu nail jeq-e jaq-a, aqyu juq yovqgavq bhai yovqgavq noeq heeq khi, aoldaoq kovqdaoq ge-ai thaq nail khe-ai nl haq neq, aqyu juq nail neema lavqkhoel bhai Aoldaoq Kovqdaoq jiav nail kheel ngaol. 15Aqyu juq doevq nail jaol nail al neq, aqyu juq nail neema lavqkhoel bhai Aoldaoq Kovqdaoq gevq bhoel-ai thaq nail khe-ai dul nail salkhil pevq nail ngaol. Aqyu juq nail heeq nia nail neema iqsanl, salkhil khanq nail ngaol. Khul khi mail dai ngal-aq neq, “Naol oeqbal aol nail laiq. Maq ngel haq neq, maq aol nail laiq” dai, aqyu juq nail noeq heeq noeq moel nia nail neema ge lal nail ngaol. 16Ngal lavqkhiq tsail nail geeqlaoq daoq cavq nail khe-ai, Miqyail Yeiqsul Khali bhai juq khi, tsaol-aq nail neema lavqkhoel bhai oil-uvq-ai thaq nail phaq bhai, yalkhaq dal-u n-gaol, alhai tsao tsel nail ngaol.

Yuldav nail tsaol-aq khi mail aoldaoq kovqdaoq nail ganl

17Ngal Yuldav nail tsaol-aq ngaol dai, naol ge nail ngaol. Naol aoldaoq kovqdaoq bhai juq juq-ail, Miqyail bhai tavq lai nail phaq bhai neema eeq nail ngaol. 18Naol Miqyail-i mail bhi nl movq nail phaq heeq nia nail ngaol. Naol aoldaoq kovqdaoq bhai ya saol-a nail ngel-i mail, aqmeeq phaq bhai tselpav bhoilpav nia nail tsaol-aq ngaol. 19Naol maivpeivq peivq nail tsaol-aq bhai gailkhaol hevqdaiq bhiq nail gaq jiovq khi, aqnav nail lavqkhoel bhai jaol nail tsaol-aq bhai aqbhaq bhaq bhiq nail gaq jiovq naol dai, naol noeq-ai thaq nail ngaol. 20Al ovqtavq, yaqjaoq khaqlal miqthoi bhai gailkhaol hevqdaiq nail gaq jiovq khi, yaqnoil juq bhai cavq bhiq cov bhiq nail gaq jiovq naol dai iqsanl, naol noeq-ai thaq nail ngaol. Khul khi mail dai ngal-aq neq, neenoeq neekha maqkhaiq, maldil tsaq nail phaq maqkhaiq, aoldaoq kovqdaoq nail lavqkhoel bhai aol nail ngaol dai, naol heeq nia nail ngel-i mail, alhai noeq thaq-ai thaq nail ngaol. 21Alheel ngel-i mail, naol yu bhai cavq bhiq cov bhiq-u phao, yovqgavq bhai yovqgavq maq cavq maq cov-ail laiq. Yu nail nlmaoq maq ya khoiq-ail dai, cavq bhiq cov bhiq-u phao, naol khoiq thailthaiq nail laiq. 22“Yu nail miqyaq khaqma bhai thaq nl bheeq thaq nl leel” dai, naol ge khi ngaol-aoq, naol nl bheeq thailthaiq nail laiq. Naol thaoqphaoq aqma maolkhoel bhai bhe khi ngaol-aoq, thaoqphaoq aqma nail ilkhaol lavqkhoel bhai jiav nail nlmaoq juq bhai khoiq thailthaiq nail laiq. 23Naol aoldaoq kovqdaoq bhai juq juq-ail neema eeq khi ngaol-aoq, naol aoldaoq kovqdaoq bhai nl bheeq nl bheeq-ail Miqyail nail seiqleiq khaoqsail bhai khal nl movq-ail nl nail maq ngel laiq. 24Khul khi mail dai ngal-aq neq, Jalliq lavqkhoel bhai gevq-ai thaq nail khe-ai,

“Yu nail jeq-e jaq-a juq

nuljuq bhaqda nee

Miqyail nail aqmil bhai

khal ge movq-ail

ge nail ngaol” dai,

gevq-ai thaq nail ngaol.

25Naol aoldaoq kovqdaoq bhai naldaiq khi tsaothe haq neq, bavkov uqjaq oev nail aol al ganl tsoiq nail ngaol. Thailhai ngaol-aoq, naol aoldaoq kovqdaoq bhai nl bheeq haq neq, bavkov uqjaq oev nail aol naol nl khi ngaol-aoq, maq nl-a nail khe-ai dul nail ngaol. 26Alheel ngel-i mail, bavkov uqjaq oev nail aol maq nl-a nail tsaol-aq juq, aoldaoq kovqdaoq bhai naldaiq khi tsaothe haq neq, aivq aol al maq nl khi ngaol-aoq, aol al nl-a nail tsaol-aq khe-ai dul nail, maq ngel-ail laiq. 27Nuljuq neq, Molseiq nail aoldaoq kovqdaoq jiav khi, bavkov uqjaq oev nail aol thaoq-ai thaq khi ngaol-aoq, nuljuq aoldaoq kovqdaoq bhai nl bheeq-a nail ngaol. Alheel ngel-i mail, aqsivq haqjoil phao bavkov uqjaq oev nail aol maq nl khi ngaol-aoq, aoldaoq kovqdaoq bhai naldaiq khi tsaothe nail tsaol-aq juq nuljuq aoldaoq kovqdaoq bhai nl bheeq-a nail ngel-i mail, oeqbal thaq lal nail ngaol.

28Khul khi mail dai ngal-aq neq, lavqniil phao taivq-ail Yuldav nail tsaol-aq jiovq nail gaq neq, maldil Yuldav nail tsaol-aq maq ngel-ail. Lavqniil phao taivq-ail bavkov uqjaq oev nail aol nl nail phaq neq, maldil bavkov uqjaq oev nail aol nl nail maq ngel-ail. 29Lavqkhoel phao Yuldav nail tsaol-aq pevq nail gaq neq, maldil Yuldav nail tsaol-aq ngaol. Maldil bavkov uqjaq oev nail aol thaoq nail phaq neq, Molseiq nail aoldaoq kovqdaoq bhee lal dai taivq-ail nl nail maq ngel-ail. Aqhaqlal Miqyail bhaqda nee, neema lavqkhoel nee nl nail ngaol. Alhai nl nail tsaol-aq bhai, yu maq tsiqeeq khi ngaol-aoq, Miqyail tsiqeeq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index