Search form

Tiltuv 2

Maldil tsaq nail neema thaqtsaol nail phaq

1Thailhai ngaol-aoq, naol neq, maldil tsaq nail phaq bhai taivq-ail ya cavq ya cov bhiq nail ngaol. 2Aqbhal joiqmaoq juq bhai, yaolphaol nia nail neema aol lal nia dai maqkhaiq, yu ev heeq phaq-ail doevq nia dai maqkhaiq, neema ivqdao dai, thaq nia dai maqkhaiq, maldil tsaq nail neema thaqtsaol nail phaq aol lal dai maqkhaiq, goil nail gaiq-a nail phaq aol lal dai maqkhaiq, daq tsaol ol tsaol nail neema aol lal nia dai maqkhaiq, cavq bhiq cov bhiq yaoq.

3Alhai dul dai aqphiq joiqmaoq juq bhai iqsanl, Miqyail bhai ev nail lavqkhoel bhai doevq nia jaol nia dai, cavq bhiq cov bhiq yaoq. Yu nail ganl ge doil nail tsaol-aq khi mail aqheeq tsilju nail ullul al jaiq daol jel nail tsaol-aq maq ya pevq-ail. Aqmeeq phaq cavq bhiq cov bhiq nia nail tsaol-aq ya pevq nail ngaol. 4Aqyu juq alhai nl haq neq, aqkovq maq jiav lal-a nail yaqmai-aq juq bhai yovqgavq nail yovjil khi mail yaq juq bhai gaiq-a nia lal dai, cav bhiq cov bhiq nail tsaol-aq pevq lal nail ngaol. 5Al ovqtavq, yaqmai-aq al juq, yovqgavq nail neema bhai gaq lai nia nail tsaol-aq, haol nail tsaol-aq, yovqgavq nail ildaoq bhai heldaiq phail nia nail tsaol-aq, neema meeq nail tsaol-aq khi mail yovqgavq nail yovjil nail kov-uvq bhai jaol nia nail tsaol-aq pevq lal nail ngaol. Aqyu juq alhai pevq lal haq neq, yu Miqyail nail daoq bhai khal ge movq-ail maq ge nia-ail.

6Alhai dul dai, aqkovq maq jiav lal-a nail yaqyov-aq juq bhai iqsanl, yovqgavq nail neema bhai gaq lai nia dai, gaq bivq yaoq. 7Aqyu juq saol oil nia dai, yaoq phaq yaoq-ao nee nail lavqkhoel, aqmeeq phaq nl daiq bhiq yaoq. Cavq bhiq cov bhiq-u phao, yu ev heeq phaq-ail aqhaol haol dai, cavq bhiq cov bhiq yaoq. 8Yu oeqbal thaq duq maq jiav dai, maldil tsaq nail phaq bhai tavq nail daoq cavq bhiq cov bhiq yaoq. Alhai cavq bhiq cov bhiq haq neq, ngadao bhai neejiav jiav nail tsaol-aq ngadao bhai khul teevq phaq iqsanl ge doil nail phaq maq jiav dai, ya haqsil nail ngaol.

9Yaqkav juq bhai iqsanl, ilheel gaq nail kov-uvq bhai aqmeeq-ai jaol khi, yaoq phaq yaoq-ao nee nail lavqkhoel ilheel gaq neekhaol sil dai, nl bhiq khi, daoq pov maq ya kovq lai dai, cavq bhiq cov bhiq yaoq. 10Al ovqtavq, ilheel gaq nail yalkav maq ya khoiq ail. Aqyu juq bhai, “Saljial ivq nail lavqkhoel nee nuljuq nail ilheel gaq nail ganl bhai aqmeeq-ail nl yaoq” dai iqsanl, cavq bhiq cov bhiq yaoq. Alhai nl haq neq, ngadao bhai Hevqkovq nail gaq pevq nail Miqyail nail ganl cavq bhiq cov bhiq nail phaq neq, yaoq phaq yaoq-ao nee mao-ail meeq lao thaq nial dai, bhaqlaoq kheq dai, dov lal nail ngaol.

11Khul khi mail dai ngal-aq, tsaol-aq iqsanl bhai hevqkovq nail dai khi, Miqyail nail geeqlaoq eeljaol dov lee-a nail ngaol. 12Geeqlaoq eeljaol al, ngadao bhai niailhai cavq lavq cov lavq-a nail ngaol. Miqyail bhai maq ev nail phaq bhai iqsanl, yeel niil yeel khe maivjeel jeel nail juq bhai iqsanl khaonq ha yaoq dai, cavq lavq cov lavq-a nail ngaol. Miltsaq kovtavq bhai jaol-u phao, yovqgavq nail neema bhai gaq lai nia nail tsaol-aq, aqsee aqdaol daol dai, doevq nail tsaol-aq khi mail Miqyail bhai ev nail tsaol-aq pevq yaoq dai iqsanl, cavq lavq cov lavq-a nail ngaol. 13Ngadao nail eeq dee heel deedee nail Miqyail pevq nail Hevqkovq nail gaq Yeiqsul Khali seiqleiq khaoqsail nail lavqkhoel nee dov lee nail geeqlaoq eeq nail aqn al n bhai noeqthunq khi daonq nail haqbhoil cavq lavq cov lavq nail ngaol. 14Yeiqsul neq, oeqbal yaoq phaq yaoq-ao nee nail lavqkhoel nee ngadao bhai ul kovq lavq-a nail nee ovqtavq, aivq nail haqbhoil meeq nail haol nail tsaol-aq bhiq pevq lal dai, aivq nail aqmaol laol bhiq-a nail ngaol. Tsaol-aq al neq, aqmeeq phaq nl movq deedee nail neema aol nail ngaol.

15Ganl niil juq aqmeeq-ai cavq bhiq cov bhiq yaoq. Bhaqaoq teevq bhee aol nail lavqkhoel aqyu juq bhai gaq bivq khi, aqyu juq-i mail nl laiq-a nail juq bhai cavq navq bhiq yaoq. Tsaol-aq teevq gaq iqsanl naoq bhai khal ge movq-ail, thaq bhiq ge.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index