Search form

Esegiël 35

Die Here sal die land Edom verwoes

1Ek het gehoor die Here sê vir my: 2“Mens, jy moet jou gesig na die land Edom draai en jy moet my boodskap teen hulle bring. 3Jy moet sê: Die Here, Hy wat Here is, sê: Seïr-berg, Ek is jou vyand. Ek sal my hand teen jou uitsteek en Ek sal jou *verwoes sodat niemand op jou kan woon nie. 4Ek sal jou stede hope klippe laat word, en jy sal ’n plek word waar niemand kan woon nie. Jy sal weet dat Ek die Here is. 5Ek sal dit doen omdat jy altyd ’n vyand van die volk Israel was, van die begin af. Jy het gehelp dat hulle vyande hulle doodmaak daardie dag toe dit met hulle baie sleg gegaan het, daardie tyd toe Ek hulle die laaste maal gestraf het.”

6Die Here, Hy wat Here is, sê: “Ek sal jou vol bloed laat word, daar sal altyd bloed op jou wees, want jy het gehou daarvan om mense dood te maak. Daar sal altyd bloed op jou wees. Dit is seker, so seker soos Ek lewe. 7Ek sal die Seïr-berg verwoes, niemand sal daar kan woon nie. Ek sal elkeen laat sterf wat op die berg loop. 8Die dooie mense sal oral op die berge van die land Edom lê, die dooie mense sal die berge toemaak. Die mense wat in die oorlog gesterf het, sal op jou heuwels lê en in jou valleie en in al jou waterslote. 9Ek sal Edom ’n plek maak waar mense nooit weer sal kan woon nie, niemand sal in jou stede woon nie. Julle sal weet dat Ek die Here is. 10Ek sal dit doen omdat jy gesê het: ‘Daardie twee volke en die twee lande Israel en Juda sal nou myne wees, ons sal dit vir onsself vat.’ Maar Ek, die Here, was daar by hulle.”

11Daarom sê die Here, Hy wat Here is: “Ek sal doen met jou soos jy met hulle gedoen het toe jy kwaad was en toe jy hulle lande vir jouself wou vat omdat jy hulle gehaat het. Hulle sal sien wie Ek is wanneer Ek jou straf. Dit is seker, so seker soos Ek lewe. 12Jy sal weet dat Ek die Here is. Ek het gehoor toe jy die berge van Israel *beledig het en gesê het: ‘Daar woon nou niemand nie, die Here het daardie berge vir ons gegee sodat ons hulle kan op-eet.’ 13Julle het gespog, julle het baie gepraat teen My, Ek het gehoor wat julle gesê het.”

14Die Here, Hy wat Here is, sê: “Edom, Ek sal jou ’n plek maak waar niemand kan woon nie. Wanneer Ek dit doen, dan sal die hele aarde bly wees. 15Jy was ook bly toe die land van die volk Israel ’n plek geword het waar niemand kan woon nie. Ek sal dieselfde doen met jou. Die Seïr-berg, die hele land Edom, sal ’n plek word waar niemand kan woon nie. Hulle sal weet dat Ek die Here is.”

Bybel vir almal

© 2007 Bybelgenootskap van Suid-Afrika. Gebruik met toestemming. Alle regte voorbehou.

More Info | Version Index