Search form

Hebreërs 13

Lewe soos mense wat dankbaar is voor God

1Julle is *gelowiges, julle moet aanhou om lief te wees vir mekaar. 2Julle moet aanhou om vriendelik te wees met *vreemdelinge, want party mense wat dit gedoen het, was vriendelik met *engele, maar hulle het nie geweet dat dit engele is nie. 3Julle moet aanhou dink aan die *gevangenes, julle moet voel soos mense wat self ook gevangenes is. Julle moet ook dink aan die mense wat swaarkry, julle moet self voel soos mense wat ’n liggaam het en wat swaarkry. 4Almal moet die huwelik respekteer, en mans en vrouens wat getroud is, moet net aan mekaar behoort, want God sal mense *oordeel wat *onsedelik lewe en *egbreuk pleeg. 5Julle moenie baie lief wees vir geld nie, julle moet tevrede wees met dit wat julle het. Want God het gesê: “*Ek sal jou nooit los nie, Ek sal nooit weggaan van jou nie.” 6Daarom moet ons nie moedeloos wees nie, ons moet sê:

*Die Here help my,

en ek sal nie bang wees nie.

Dan kan ’n mens niks sleg

aan my doen nie.

7Julle moet aanhou dink aan julle leiers, hulle wat vir julle die boodskap van God gebring het. Julle moet aanhou om te dink aan die einde van hulle lewe, en julle moet in God glo soos julle leiers geglo het. 8Jesus Christus is gister en vandag dieselfde, Hy bly altyd dieselfde. 9Julle moenie dat mense vir julle baie nuwe dinge wil leer en vir julle *verlei nie. Dit is goed wanneer die *genade van God julle geloof sterk maak, want die mense sê vir julle wat julle moet eet en wat julle nie moet eet nie, maar daardie dinge kan nie julle geloof sterk maak nie. Die wette wat hierdie mense vir julle geleer het, het nie vir hulleself gehelp nie. 10Maar ons wat in Christus glo, het ’n *altaar, en die *priesters wat in die *tempel-tent werk, mag nie eet van die *offers op die altaar nie. 11Want die *hoëpriester het die bloed van die diere wat hy ge-offer het, ingebring in die *hoog-gewyde kamer, dit was ’n offer om te betaal vir die sonde. Maar iemand het die liggame van die offer-diere wat die hoëpriester ge-offer het, buite die kamp verbrand. 12Daarom het ook Jesus buite die stad se *poort swaargekry en gesterf sodat Hy met sy eie bloed die volk kon *wy, ja, Hy het dit gedoen toe Hy vir ons gesterf het. 13Daarom moet ons uitgaan na Jesus toe, Hy is buite die kamp. Ons moet gaan terwyl die mense ook vir ons *beledig soos hulle vir Hom beledig het. 14Want hier op die aarde het ons nie ’n stad wat vir altyd daar sal wees nie, maar ons wil graag die stad hê wat later sal kom. 15Jesus help vir ons, en daarom moet ons aanhou om ’n offer vir God te bring, ons moet Hom prys sodat almal dit kan hoor. 16Julle moenie vergeet om baie goeie dinge te doen nie, julle moet graag van julle eie goed vir ander mense gee, want God is baie tevrede met daardie soort offers.

17Julle moet luister na julle leiers en julle moet doen wat hulle vir julle sê, want hulle hou aan om julle op te pas, hulle sal eendag vir God moet sê hoe dit met julle gaan. As julle luister na hulle, dan sal hulle bly kan wees terwyl hulle vir julle help, hulle sal dan nie kla en sug nie, want dit sal nie goed wees vir julle nie.

18Julle moet aanhou om vir ons te bid, want ons is seker dat ons goed weet wat is reg en wat is verkeerd, omdat ons heeltemal reg wil lewe. 19Daarom vra ek vir julle nog baie ernstiger om vir my te bid, sodat God vir my gouer kan terugstuur na julle toe.

Laaste gebed en groete

20Die God wat vrede gee, het ons Here Jesus, die groot *Herder van die skape, weer laat lewe. God het dit gedoen omdat Hy sy ewige *verbond met ons gemaak het toe die bloed van ons Here Jesus gevloei het. 21Ons bid dat God vir julle alles sal gee wat goed is, sodat julle kan doen wat Hy wil hê, en ons bid dat Jesus Christus vir julle sal help om die dinge te doen waarvan God baie hou. Daarom moet ons God altyd prys. Amen.

22Vriende, ek het julle *bemoedig en ek vra baie ernstig vir julle dat julle goed moet luister na my woorde, want ek het nie ’n lang brief vir julle geskryf nie. 23Julle moet weet dat ons vriend, Timoteus, nou nie meer in die tronk is nie. As hy gou kom, dan sal ek saam met hom na julle toe kom.

24Sê groete vir al julle leiers en al die *gelowiges. Die gelowiges van Italië stuur groete vir julle. 25Ek bid dat God *genadig sal wees vir julle almal.

Bybel vir almal

© 2007 Bybelgenootskap van Suid-Afrika. Gebruik met toestemming. Alle regte voorbehou.

More Info | Version Index