Search form

Jeremia 23

Die regte koning van die nageslag van Dawid

1Die Here sê: “Dit sal sleg gaan met die *herders van die skape wat aan My behoort. Hierdie herders het die skape laat wegraak en hulle het die skape na al die kante toe gejaag. 2Daarom sê Ek oor die herders wat regeer oor my volk, Ek, die Here, die God van Israel sê: Julle het my skape na al die kante toe gejaag, julle het hulle nie opgepas nie. Ek sal julle nou straf oor die slegte dinge wat julle gedoen het. 3Ek het my skape na ander lande laat gaan, maar Ek sal self my skape wat nog lewe, bymekaarmaak uit daardie lande. Ek sal hulle terugbring na hulle eie veld waar hulle gewei het. Hulle sal *vrugbaar wees en baie word. 4Ek sal herders kies en aanstel om oor hulle te regeer. Hulle sal nie weer bang word en wegraak nie.”

Dit sê die Here. 5Die Here sê: “Julle moet dit weet, Ek sal eendag iemand kies en aanstel wat die regte koning sal wees van die *nageslag van Dawid. Hy sal ’n *wyse koning wees wat reg sal regeer en reg sal doen aan almal in die land. 6In die tyd wanneer hierdie koning regeer, sal die mense van *Juda weer vry word, en die mense van *Israel sal veilig woon. Die naam van die koning sal wees: Die Here doen reg aan ons.”

7Die Here sê: “Daarom sê Ek: Die mense het altyd gesê: ‘So seker soos die Here lewe, die Here wat die Israeliete uit Egipte gebring het.’ Maar later sal hulle dit nie meer sê nie. 8Hulle sal sê: ‘So seker soos die Here lewe, die Here wat die *nageslag van die volk Israel gebring het uit die land in die noorde.’ Hulle sal terugkom na hulle eie land, hulle sal kom uit al die lande waarnatoe Ek hulle laat gaan het.”

Profete wat lieg

9Nou praat ek, Jeremia, oor die *profete.

My hart voel stukkend, my hele liggaam bewe.

As ek dink aan die Here, aan wat Hy sê,

dan word ek dronk, so dronk soos ’n man

wat te veel gedrink het.

10Want die hele land is vol mense wat *afgode dien,

ja, dit is hulle skuld dat die land droog geword het,

en daarom is die veld waar die diere wei,

nou ’n woestyn.

Die profete doen slegte dinge,

hulle dink hulle kan doen wat hulle wil omdat hulle sterk is.

11Die Here sê: “Ja, die profete en ook die *priesters is *ontwy,

Ek het gesien hulle doen die slegte dinge ook in my *tempel.

12Daarom sal Ek hulle laat loop op gladde klippe,

en hulle sal gly.

Ek sal hulle instamp in donker plekke,

en hulle sal val.

Ja, Ek sal dit sleg laat gaan met hulle,

Ek sal hulle straf.

13Ek het gesien die profete van Samaria

doen dinge waarvan Ek nie hou nie.

Hulle was profete vir *Baäl, hulle het my volk *bedrieg.

14Maar Ek het gesien die profete van Jerusalem

doen nog slegter dinge,

hulle doen dinge wat Ek haat.

Hulle pleeg *egbreuk en hulle bedrieg mense

en hulle help mense wat verkeerd doen.

Daarom hou niemand op om verkeerd te doen nie.

Jerusalem en sy mense het vir My geword

*soos Sodom en Gomorra.”

15Die Here wat oor alles regeer, sê oor die profete:

“Omdat hulle dit doen, sal Ek hulle

*wilde-als laat eet

en Ek sal hulle water laat drink wat giftig is.

Ek sal dit doen omdat die profete van Jerusalem

die hele land ontwy het.”

16Die Here wat oor alles regeer, sê:

“Julle moenie doen wat die profete vir julle sê nie.

Hulle laat julle glo in wind,

in dinge wat niks beteken nie.

Hulle sê Ek het vir hulle gewys wat sal gebeur,

maar hulle vertel hulle eie stories,

hulle het dit nie by My gehoor nie.

17Hulle hou aan om te sê: ‘Die Here sê

dit sal goed gaan met julle.’

Hulle sê dit vir die mense wat dink

dat Ek nie belangrik is nie.

En hulle sê vir elkeen wat hardkoppig is

en wat lewe soos hy self besluit:

‘Dit sal nie sleg gaan met jou nie.’ ”

18Maar wie was daar toe die Here dit besluit het?

Wie van hulle het gesien en gehoor wat Hy sê?

Wie het geluister na wat Hy sê en dit gedoen?

19*Julle moet dit weet:

Die Here sal ’n stormwind stuur,

daar sal ’n wind kom wat alles *verwoes,

en dit sal waai oor die mense wat verkeerd doen.

20Die Here is kwaad, en Hy sal aanhou

om kwaad te wees totdat Hy gedoen het

wat Hy besluit het.

Julle sal dit later goed verstaan.

21Die Here sê:

“Ek het nie daardie profete

gestuur nie,

Ek het nie met hulle gepraat nie,

maar hulle kom en hulle sê hulle bring

boodskappe van My.

22As hulle daar was toe Ek dit besluit het,

dan moet hulle vir my volk sê wat Ek gesê het.

Hulle moet my volk laat terugkom van die verkeerde pad,

hulle moet my volk laat ophou om slegte dinge te doen.

23Dink julle Ek is ’n God wat net dinge sien wat naby is

en nie ook dinge wat ver is nie?

24“Niemand kan wegkruip waar Ek hom nie sien nie. Julle moet dit weet: Ek is oral in die hemel en op die aarde.”

Dit het die Here gesê. 25“Daar is profete wat lieg en wat sê Ek het hulle gestuur. Ek het gehoor wat hulle sê. Hulle sê hulle het gedroom en hulle vertel wat hulle gedroom het. 26Hoe lank sal daar nog profete wees wat lieg en wat self dinge uitdink, mense wat die volk bedrieg en sê Ek het hulle gestuur? 27Hulle vertel vir mekaar wat hulle gedroom het, hulle wil my volk laat vergeet wie Ek is. Hulle is soos hulle *voorvaders wat vir Baäl gedien het en vergeet het wie Ek is. 28Wanneer ’n profeet gedroom het, dan moet hy sê wat hy gedroom het. Maar wanneer hy gehoor het wat Ek gesê het, dan moet hy presies dieselfde sê.

*Kaf is nie koring nie en koring is nie kaf nie. Net so is my boodskap en die dinge wat hulle sê, nie dieselfde nie.”

29Die Here sê: “Die dinge wat Ek sê, is soos vuur. Dit is soos ’n hamer wat rotse stukkend slaan. 30Daarom is Ek teen die profete wat sê wat ander profete sê, en wat dan sê dat Ek dit gesê het. 31Ek is teen die profete wat self dinge uitdink, en dan sê hulle dit is Ek wat dit sê. 32Ek is teen die mense wat sê Ek het hulle gestuur, en dan vertel hulle drome wat nie waar is nie. Hulle vertel drome en hulle bedrieg my volk. Hulle lieg, en dit maak nie vir hulle saak wat gebeur nie. Ek het hulle nie gestuur nie, Ek het nie gesê wat hulle moet sê nie. Hulle help nie hierdie volk wanneer hulle dit sê nie. Dit is seker.”

33Die Here sê: “Wanneer hierdie volk of ’n profeet of ’n priester vir jou vra: ‘Wat het die Here gesê?’ dan moet jy vir hulle sê: ‘Hoekom vra julle wat die Here gesê het? Die Here wil nie meer met julle praat nie.’ 34Ek sal die profeet en die priester en die volk straf wat sê hy weet wat Ek gesê het. Ek sal die persoon straf wat dit sê, Ek sal ook sy familie straf. 35Julle mag vir mekaar vra: ‘Wat het die Here geantwoord? Wat het Hy gesê?’ 36Maar julle moet nooit weer sê julle weet wat Ek gesê het nie, want net iemand wat sê wat Ek sê, mag so praat.”

Maar julle verander die woorde van die God wat lewe, ons God die Here wat oor alles regeer.

37“Julle mag vir ’n profeet vra: ‘Wat het die Here geantwoord? Wat het die Here vir jou gesê?’ 38Maar as julle aanhou om te sê julle weet wat Ek gesê het, dan sê Ek vir julle: Julle het gesê julle weet wat Ek gesê het. Maar Ek het vir julle ’n boodskap gestuur en vir julle gesê julle moenie sê julle weet wat Ek gesê het nie. 39Daarom sal Ek julle heeltemal vergeet. Ek wil nie meer met julle praat nie, Ek sal die stad los wat Ek vir julle en julle *voorvaders gegee het. 40Ek sal julle vir altyd *verneder, julle sal dit nooit vergeet nie.”

Bybel vir almal

© 2007 Bybelgenootskap van Suid-Afrika. Gebruik met toestemming. Alle regte voorbehou.

More Info | Version Index