Search form

Levitikus 27

Mense of diere of dinge wat aan die Here gewy is

1Die Here het vir Moses gesê: 2“Jy moet vir die Israeliete sê: Iemand maak miskien ’n *gelofte aan die Here en hy *wy ’n persoon aan die Here. Dan moet julle sê hoeveel hy moet betaal om die persoon weer *los te koop. 3Dit is hoeveel hy moet betaal: Vir ’n man tussen 20 en 60 jaar moet hy 50 *tempel-sikkels silwer betaal, 4vir ’n vrou 30 *sikkels, 5vir ’n man of ’n seun tussen vyf en 20 jaar *20 sikkels, vir ’n vrou of ’n dogter *tien sikkels, 6vir ’n seun van ’n maand tot vyf jaar *vyf sikkels, vir ’n dogter *drie sikkels, 7vir ’n man van 60 jaar en ouer *15 sikkels, en vir ’n vrou tien sikkels.

8“En as iemand te arm is om hierdie geld te betaal, dan moet hy die persoon wat hy gewy het, na die *priester toe bring, en die priester moet besluit hoeveel die arm man kan betaal.

9“As iemand ’n dier bring om vir die Here te *offer, en dit is ’n dier wat hy mag offer, dan is die dier aan die Here *gewy. 10Hy mag nie die dier omruil of ’n ander dier gee nie. As hy dit doen, dan is altwee die diere aan die Here gewy. 11En as dit ’n *onrein dier is wat hy nie aan die Here mag offer nie, dan moet hy die dier na die priester toe bring. 12Die priester sal sê hoeveel hy moet betaal vir daardie dier. Miskien is dit ’n goeie dier of miskien is dit ’n slegte dier, dit maak nie saak nie. Die priester moet sê hoeveel die persoon moet betaal, en die persoon moet dit dan betaal. 13Maar as die persoon die dier wil *loskoop, dan moet hy een vyfde meer betaal.

14“Wanneer ’n persoon sy huis aan die Here wy, dan moet die priester sê hoeveel die persoon moet betaal. Miskien is dit ’n goeie huis, miskien is dit ’n slegte huis, dit maak nie saak nie. Die priester moet sê hoeveel die persoon moet betaal, en die persoon moet dit dan betaal. 15Maar as die persoon wat die huis gewy het, dit wil loskoop, dan moet hy een vyfde meer betaal, dan is dit weer sy huis.

16“As iemand ’n stuk van sy grond aan die Here wy, dan moet julle kyk hoeveel saad iemand op daardie grond kan saai. Hy moet *50 sikkels silwer betaal vir elke *gomer *gars wat hy op daardie grond saai. 17As die persoon die grond wy net ná die *Hersteljaar, dan moet hy alles betaal as hy dit wil loskoop. 18As hy die grond wy lánk ná die Hersteljaar, dan moet die priester sê die persoon mag minder betaal, die priester moet die jare tel wat oorbly tot die volgende Hersteljaar. 19As die persoon die grond wat hy gewy het, self wil loskoop, dan moet hy een vyfde bysit by die geld wat hy vir die priester moet gee, dan mag hy die grond hou. 20As hy nie self die grond loskoop nie en hy verkoop dit aan iemand anders, dan mag hy dit nie weer loskoop nie. 21Wanneer die eerste eienaar weer die grond kry in die Hersteljaar, dan is dit aan die Here gewy. Dit is soos grond wat net aan die Here mag behoort. Die priester moet die grond kry. 22As ’n persoon grond gekoop het wat nie aan hom behoort het nie, en hy wy die grond, 23dan moet die priester tel hoeveel jaar oorbly tot die Hersteljaar, en hy moet dan sê hoeveel die persoon moet betaal. Die persoon moet die geld dieselfde dag betaal, dit is aan die Here gewy. 24Die persoon wat die grond verkoop het, moet dit in die Hersteljaar terugkry, dit is sy grond.

25“Wanneer mense moet betaal om iets los te koop wat gewy is, dan moet hulle tempel-sikkels gebruik, daar is 20 *gera in ’n sikkel. 26Die eerste kalwers en lammers behoort aan die Here, niemand kan hulle wy nie, hulle behoort klaar aan die Here. 27Iemand kan die eerste kleintjie van ’n onrein dier loskoop. Die priester moet sê hoeveel die persoon moet betaal, en die persoon wat dit loskoop, moet een vyfde meer betaal. As iemand dit nie loskoop nie, dan moet die priester sê hoeveel iemand anders daarvoor moet betaal. 28Wanneer iemand vir die Here iets gegee het om net aan die Here te behoort, dan kan niemand dit koop of loskoop nie. Dit kan ’n mens of ’n dier of grond wees, as dit net aan die Here mag behoort, dan is dit *hoog-gewyd. 29As iemand ’n ander persoon so aan die Here gegee het, dan mag niemand die persoon loskoop nie. Julle moet hom doodmaak.

30“Al die *tiendes van koring of gars of vrugte behoort aan die Here, dit is aan die Here gewy. 31Wanneer iemand van die tiendes wil loskoop, dan moet hy een vyfde meer betaal. 32Al die tiendes van beeste of skape of bokke is aan die Here gewy. Julle moet elke tiende dier vang, dit behoort aan die Here. 33Julle mag nie kyk of die dier goed of sleg is nie en julle mag dit nie omruil vir ’n ander dier nie. As iemand dit doen, dan is altwee diere aan die Here gewy, niemand mag dit loskoop nie.”

34Dit is die *gebooie wat die Here op Sinai-berg vir Moses gegee het om vir die Israeliete te gee.

Bybel vir almal

© 2007 Bybelgenootskap van Suid-Afrika. Gebruik met toestemming. Alle regte voorbehou.

More Info | Version Index