Search form

Matiu 3

Heitarohaꞌi Ana Jon Bwareomaea

(Mak 1:1-8; Luk 3:1-18; Jon 1:19-28)

1Muridi taraꞌi harisi ra hako, ꞌia Jon Bwareomaea ꞌa taraawaꞌa tarohaꞌinia huraꞌai haꞌatee ana God naꞌi dora mangasara naꞌi Provensi Jiudea. 2ꞌA oꞌani, “Moi rihosi baaniꞌi ora-oraꞌa amooꞌi, ꞌinia ni madoraa na ꞌia God ꞌai marungiraaui noni anaꞌi ꞌa gaarangiꞌa.” 3ꞌIa Jon naasia moꞌo na ꞌia rarabea Aisaea ꞌa haꞌateengaꞌinia mau mai oꞌani naꞌi ꞌoha bwani,

“ꞌE nei nai totoro huraꞌa naꞌi dora mangasara. ꞌAi haꞌatee oꞌani,

‘Moi haꞌaagau! ꞌIa Araha ꞌa gaarangi boiꞌa. Moi haꞌa-odoodoai tara tanaa.’ ”+

4ꞌIa Jon ꞌa awa ꞌonaai huunai rarabea. ꞌA hoꞌowaꞌa ꞌiniꞌi bwana ra tauꞌarodi ꞌiniꞌi warihui kamel, ma rorowaꞌa ꞌiniai rorowaꞌa nara tauꞌarona ꞌiniai uri-uri mwamwaa mana mahoingau anaꞌi naasi ngabo mana modiꞌo ni hasimou. 5ꞌIraau saenai Jerusalem, ma raꞌi sae baaniai Provensi Jiudea mana ꞌomaa gaarangiai wai rahai Jodan rau boi beia Jon 6ꞌanai haꞌarangasiꞌi ora-oraꞌa adaaꞌi ma bwareomaearaau naꞌi wai Jodan.

7Naꞌi ꞌoha ꞌia Jon ꞌa reꞌiraaui Farisei miraaui Sadiusi rau boi beia ꞌanai bwareomaearaau, ꞌa oꞌani ꞌiniraau, “ꞌIꞌamou mwane mwaa taꞌaꞌi! ꞌA ꞌua? Mou ꞌadomaꞌinia doni bwareomaea moi nai ꞌaꞌauhiꞌamou ꞌanai bainihu baaniai haꞌa-mamaꞌai na ꞌia God ꞌai haꞌataaria mai? 8ꞌOnaa namou raba bwareomaea mamoi nugasiꞌi barongamooꞌi nara taꞌaꞌi, mamoi hauꞌi mareho goro nai haꞌataꞌinia domou rihosi baaniꞌi ora-oraꞌa amooꞌi. 9Mou gasigu ꞌadomaꞌinia doꞌia God ꞌa bwaꞌi haꞌa-mamaꞌaiꞌamou do ꞌiniai huta amoou mai ꞌonaai warowaronaꞌi a Ebraham. ꞌInau wai ꞌunua tanaꞌamou, ꞌia God ꞌa matai haꞌa-ahoꞌitaꞌiniꞌi hau ꞌini, marai haꞌi warowaronaꞌi a Ebraham. 10ꞌIa God ꞌa haꞌaagauꞌa ꞌanai haꞌa-mamaꞌairaaui nei nara aiꞌa ꞌadomaꞌi orisi. ꞌA ꞌonaai nei na haꞌaagau ꞌanai araiꞌi dioi mwane hasiꞌei. ꞌOnaa nara bwaꞌi hungu ꞌiniꞌi hua goro, ꞌai ara dio suriꞌi raridi mai gaasiꞌi araꞌai ꞌeu ꞌanai suu gataꞌiniꞌi.

11“ꞌInau ꞌau bwareomaeaꞌamou ꞌinia moi wai ꞌanai haꞌataꞌinia domou orisi. ꞌIa moꞌo nai boi murigu ꞌai bwareomaeaꞌamou ꞌiniai Hiꞌona Maea mana ꞌeu. ꞌIia ꞌa ororiu diꞌuau. ꞌInau aiꞌa arari ꞌanai daaꞌi tanaa i sandol anaꞌi ꞌonaai sae tatauꞌaro ana. 12ꞌIia ꞌa haꞌaagau ꞌanai hoairaaui noni goro baaniraaui nei taꞌaꞌi, ꞌonaai nei na hoaiꞌi koradi wiit anaꞌi baaniꞌi kahokahodi. ꞌIia ꞌai nugaraaui noni goro naꞌi dora goro, maꞌai haꞌa-mamaꞌairaaui noni taꞌaꞌi, ꞌonaai nei na nuga haꞌagorohiꞌi koradi wiit anaꞌi naꞌi dora ꞌadaꞌi mana kahokahodi ꞌa suu gataꞌiniꞌi naꞌi ꞌeu na bwarai kuru.”

ꞌIa Jon ꞌA Bwareomaea Jisas

(Mak 1:9-11; Luk 3:21-22)

13Mia Jisas ꞌa hano baaniai Galili ma ꞌari wai Jodan doꞌia Jon ꞌai bwareomaeaa naꞌiei. 14ꞌIa Jon ꞌa aiꞌa ꞌirisia oꞌasi ma oꞌani, “Ni ꞌuaana naꞌogu boi beiau ꞌinia ꞌanai bwareomaea? Iꞌoe naꞌo gaꞌi bwareomaeau!”

15Mia Jisas ꞌa oꞌani ꞌinia, “Nugaa mai ꞌonaai ꞌunua agua. ꞌIgaraa garai haua maꞌata i heiꞌirisina God.” Naasi mia Jon ꞌagu bwareomaeaa Jisas.

16Naꞌi ꞌoha na ꞌia Jisas ꞌa araꞌa baaniai wai, i aro ꞌa heihoa ma ꞌomesiai Hiꞌona Maea ana God ꞌa dio naꞌi hungana ꞌonaai waibora. 17Maꞌe ringe na ao mai baaniai aro ꞌa oꞌani, “Naani gare agua nau taꞌahia ororiu mau ahugoro ꞌinia.”

Taroha Goro Mana Usuusu Maea

© Wycliffe Bible Translators, Inc. All rights reserved.

More Info | Version Index