Search form

Matiu 5

ꞌIa Jisas ꞌA Haꞌausuriraaui Rongoiusuri Naꞌi Hungahunga

(Luk 6:20-23)

1ꞌOha ꞌia Jisas ꞌa reꞌiai rago diꞌu adaaui sae nara hano suria, ꞌa hane araꞌa naꞌi gere hungahunga ma heinagu auru. ꞌIraaui rongoiusuri anaꞌi rau heinagu garigaria 2ma haꞌausuriraau oꞌani,

3“ꞌIa God ꞌai haꞌagorohiraaui nei ra ꞌuꞌuria suriꞌi mwani maho ꞌonaai sae na pohara.

ꞌIraau rai awa naꞌi bahainai heimarungi ana God na awa naꞌi aro.

4ꞌIa God ꞌai haꞌagorohiraaui nei ra ahutotou.

ꞌIa God ꞌai haꞌa-aroꞌi ahudaaꞌi.

5ꞌIa God ꞌai haꞌagorohiraaui nei ra awa manego.

Rai daaꞌi mwani mareho goro na duruduru ꞌinia God.

6ꞌIa God ꞌai haꞌagorohiraaui nei nara huunai raba awa odo-odo naꞌi maana,

ꞌinia ꞌia God ꞌai haua tanaraau i taha nara ꞌirisiasi.

7ꞌIa God ꞌai haꞌagorohiraaui nei rau ahu taꞌahira i nei nara awa ha-haꞌarohaꞌa,

ꞌinia ꞌia God ꞌai ahu taꞌahiraau roꞌu.

8ꞌIa God ꞌai haꞌagorohiraaui nei na tahingadaaꞌi ra odo-odo,

ꞌinia rai reꞌia God.

9ꞌIa God ꞌai haꞌagorohiraaui nei nara haꞌa-hagugoniraau goro i noni.

ꞌIa God ꞌai ꞌunuraau ꞌiniꞌi gare anaꞌi.

10ꞌIa God ꞌai haꞌagorohiraaui nei ra nora taꞌairaau ꞌiniai haua adaaui taha na ꞌirisia God.

ꞌIraau rai awa naꞌi bahainai heimarungi ana God na awa naꞌi aro.

11“ꞌIa God ꞌai haꞌagorohiꞌamou naꞌi ꞌoha ra haꞌatee haꞌa-taꞌaiꞌamou, mara nora taꞌaiꞌamou mara ꞌunuꞌi mwane maho pwariꞌi ꞌiniꞌamou, suria ꞌiꞌamou raꞌi rongoiusuri aguꞌi. 12ꞌOha na oꞌasi, moi abui ahutotou, maꞌata moi waꞌewaꞌe, ꞌinia ꞌe heitahari na raha na ꞌia God ꞌa haꞌaagau mamasiꞌamou ꞌinia naꞌi aro. Mamoi abui kakuꞌaa do ra bwane nora taꞌairaau oꞌasiꞌa roꞌu i rarabea naꞌi ꞌohabwani.”

Solt Mana Marewa

(Mak 9:50; Luk 14:34-35)

13“ꞌIꞌamou mou ꞌonaai solt tanaraaui inoni nai marewana. ꞌOnaa i solt ꞌagu bwaꞌi ngau asiꞌaꞌa, ꞌagu bwaꞌi hereꞌa roꞌu naraigui haua ꞌanai haꞌa-asiꞌaa ahoꞌi roꞌu! ꞌA goro dorai rasahaꞌinia huraꞌa i ꞌomaa marai buu hunia.

14“ꞌIꞌamou mou ꞌonaai raita na bewaasiraaui inoni nai marewana na ꞌiraau hako i sae ra reꞌia ꞌonaai ꞌomaa nara tauꞌarona naꞌi hunganai hungahunga. 15Bwaꞌi sae nai suungiai raita maigui nugaa naꞌi bahainai raboꞌo. ꞌAi nugaa maꞌata naꞌi dora ꞌana mai marewasiraau hakoi sae naꞌi raronai ruma. 16ꞌA oꞌasi roꞌu, moi abui giruꞌi baaniraaui noni here goro namou haaꞌi. Maꞌata moi haꞌataꞌiniꞌi huraꞌa ꞌonaai marewa marai reꞌiꞌi marai haꞌa-aneanea Amamoou araꞌai aro ꞌinia.”

Ringe Anaꞌia Moses

17“Moi abui ꞌadomaꞌinia do ꞌinau ꞌau boi ꞌanai haꞌa-aiꞌaꞌi Ringe anaꞌia Moses mana haꞌausuringaꞌi adaaꞌi Rarabea. ꞌAu boi ꞌanai haꞌatoꞌoꞌi huunai ꞌadoꞌado ꞌadaꞌi. 18Aro mana ano ꞌai anoro ma bwaꞌi ta gere dora naꞌi Ringe anaꞌia Moses nai aiꞌaa. Mwane maho nara usuꞌi naꞌiei rai toꞌo hako. 19ꞌOnaa ꞌoi raesia ta gere dora naꞌi Ringe anaꞌia Moses maꞌoi haꞌausuriraau roꞌu taraꞌi nei ꞌanai haua ꞌonaai haua amua, ꞌo bwaꞌi ororiu moeꞌa naꞌi hourana ni aro. Ma ꞌonaa ꞌoi haꞌisuriꞌi hako maꞌoi haꞌausuriraaui sae ꞌanai haua ꞌonaai haua amua, ꞌia God ꞌai haꞌa-ororiuꞌo naꞌi hourana ni aro. 20ꞌIraaui Farisei miraaui Haꞌausuri ꞌanai Ringe rau ꞌadomaꞌinia dorau odo-odo naꞌi maana God ꞌiniai suriꞌi adaaꞌi Ringe anaꞌia Moses. Me ꞌonaa mou bwaꞌi odo-odo diꞌu baaniraau, mou bwaꞌi siri mwadaꞌu naꞌi hourana ni aro.”

Haꞌausuringaꞌi ꞌAbaiai Taesuꞌa

21Mia Jisas ꞌa oꞌani roꞌu, “ꞌIꞌamou mou bwane ꞌiraraai Ringe ana Moses na oꞌani, ‘Abui heingahu,+ ꞌinia ꞌia moꞌo nai heingahu ꞌai siri naꞌi hihiiri.’ 22Maꞌata, ꞌinau wai ꞌunua tanaꞌamou, ꞌiatei nai taesuꞌa ꞌana ta sae ꞌai siri naꞌi hihiiri. Ma ꞌonaa ꞌiatei nai ꞌunu bweu ꞌinia ta sae, rai waia naꞌi Kansol+ ꞌanai ꞌiꞌia. Ma ꞌiatei nai ꞌunu bwau kuhi ꞌinia ta sae ꞌa taꞌisada dorai gaasia siri naꞌi ꞌeu naꞌi dora ni rongomaataꞌi.

23“Naasi ꞌonaa ꞌo waai bane amua ꞌanai nugaa naꞌi hunganai dorani hoꞌasi naꞌi Ruma Maea ana God maꞌogu aidangisia doꞌe sae na taesuꞌa mumua, 24ꞌoi nugaa gaꞌu i bane amua, maꞌoi ahoꞌi ꞌanai hagu ahoꞌi beia moꞌo na taesuꞌa mumua maꞌoigui ahoꞌi roꞌu ꞌanai hauai bane amua tanaa God. 25Ma ꞌonaa na sae na taesuꞌa mumua ꞌa raba waiꞌo naꞌi kooti, ꞌoi bonasia haꞌa-arataraa raurau beia. ꞌA gasi tarangaꞌiniꞌo tanaai sae hihiiri, mana sae hihiiri ꞌai tarangaꞌiniꞌo tanaai sae heheiꞌoi mai gaasiꞌo naꞌi rumanihoꞌo. 26Wai ꞌunua haꞌa-momori tanaꞌo, ꞌoi awa ꞌisi tari ꞌoha ꞌoi horia hakoi siha haꞌa narai ꞌunua tanaꞌo doꞌoi horia.”

Haꞌausuringaꞌi ꞌAbaiai Haꞌiwai

27Mia Jisas ꞌa oꞌani roꞌu, “ꞌIꞌamou mou bwane ꞌiraraa i Ringe ana Moses na oꞌani, ‘ꞌOi abui taritariꞌa baaniai urao amua maꞌua mwane amua.’+ 28Maꞌata ꞌinau wai ꞌunua tanaꞌamou, ꞌiatei na reꞌiai urao ma ꞌadomaꞌi sisiwa ꞌinia, ꞌiia ꞌa bwane taritariꞌa beia naꞌi ꞌadomaꞌina. 29Naasi ꞌonaa na maa odomu nai haai maho naꞌo ora-oraꞌa ꞌinia, ꞌoi suki gaasia huraꞌa moi. ꞌA goro doꞌoi haꞌa-aiꞌaa ta taꞌi dorai abe moi, baaniai abemu hako nai siri naꞌi ꞌeu naꞌi dora ni rongomaataꞌi. 30Ma ꞌonaa na rima odomu nai haai maho naꞌo ora-oraꞌa ꞌinia, ꞌoi horosia maꞌoi gaasia. ꞌA goro doꞌoi haꞌa-aiꞌaa ta taꞌi dorai abe moi, baaniai abemu hako nai siri naꞌi ꞌeu naꞌi dora ni rongomaataꞌi.”

Haꞌausuringaꞌi ꞌAbaiai Haigaasi

(Matiu 19:9; Mak 10:11-12; Luk 16:18)

31Mia Jisas ꞌa oꞌani roꞌu, “ꞌIꞌamou bwane ꞌiraraai Ringe ana Moses na oꞌani, ‘ꞌIatei nai gaasiai urao ana ꞌai haua moi ta usu-usu ni haigaasi tanaa ma nugasiaꞌa.’+ 32Maꞌata ꞌinau wai ꞌunua tanaꞌamou, ꞌoi abui gaasiai urao amua ꞌonaa na aiꞌa taritariꞌa baaniꞌo. ꞌOnaa ꞌoi gaasia maꞌai waina ta saemwane heꞌeteꞌi, naia na gaasia amua nagu taritariꞌa ꞌinia beiai sae nagu waina roꞌu. I sae nagu waina roꞌu ꞌa taritariꞌa beiai urao anai sae heꞌeteꞌi.”

Haꞌausuringaꞌi ꞌAbaiai Herehere ꞌAnai Hauai Duruduru

33Mia Jisas ꞌa oꞌani roꞌu, “ꞌIꞌamou mou ꞌiraraa do ra haꞌa-aburaaui wauwa agaaꞌi ꞌanai horosiꞌi duruduru narau haaꞌi tanaa Araha God narau tohe ꞌiniꞌi naꞌi atana ꞌanai haaꞌi. Ra ꞌunua tanaraau do ꞌoha rai duruduru, rai araisuriꞌi maꞌata!+ 34Mawai ꞌunua tanaꞌamou, ꞌoha moi hauai duruduru, moi abui tohe ꞌinia ta maho. Moi abui tohe ꞌiniai aro, ꞌinia naasi dora ni heimarungi ana God, 35maꞌua tohe ꞌiniai marewana, ꞌinia marewana ꞌiia ana God, maꞌua tohe ꞌiniai Jerusalem ꞌinia naasi ꞌomaa ana God, i mwaeraha hauasa. 36Abu tohe oꞌani roꞌu, ‘ꞌOnaa wai horosiai duruduru agua, ni warihugu ꞌai mamaahui.’ ꞌInia iꞌoe aiꞌa toꞌo mena ꞌanai haꞌamamahuia maꞌua haꞌa-buruburuꞌaai warihumu. 37Naasi ꞌonaa ꞌoi hauai duruduru, ꞌoi ꞌunua odo-odo moi ꞌio maꞌua bwaꞌi ma hakoꞌa. ꞌOnaa ꞌoigui tohe ꞌinia ta maho roꞌu, ma naasi neisi ꞌa boiꞌa baania Saetan.”

Haꞌausuringaꞌi ꞌIniai Heisuꞌusuꞌu ꞌIniai Taꞌaa

38Mia Jisas ꞌa oꞌani roꞌu, “ꞌIꞌamou mou bwane ꞌiraraai Ringe ana Moses na oꞌani, ‘ꞌIatei nai kaaniai maana ta sae, rai kaania roꞌu i maana. Mia tei nai rubu husiai rihona ta sae, rai rubu husia roꞌu i rihona.’+ 39Maꞌata, ꞌinau wai ꞌunua tanaꞌamou, moi abui heisuꞌusuꞌu ꞌiniai taꞌaa. ꞌOnaa ta sae na hidariai baba odomu, ꞌoi rihotaꞌi mai hida roꞌu naꞌi nata baba. 40ꞌOnaa ta sae nai raba waiꞌo naꞌi kooti ꞌanai rahia i toꞌoni abe amua ꞌanai suꞌuai mareho naꞌo haꞌatariꞌaa tanaa, ꞌoi haua roꞌu wou tanaa i toꞌoni tewa amua. 41ꞌOnaa ta sae heheiꞌoi nai haꞌa-ꞌusuꞌusuꞌo ꞌanai suruꞌia tanaa i anga ana suria ta taꞌi kilomita, ꞌoi waia suria ta rua kilomita. 42Naꞌi ꞌoha na sae ra haꞌangoni mareho, ꞌoi hisu. ꞌOha ra raba waia gaꞌu ta mareho amua suria moi ta gere madoraa, ꞌoi abui ruia.”

Haꞌausuringaꞌi ꞌAbaiai Heitaꞌahi

(Luk 6:27-28; 6:32-36)

43Mia Jisas ꞌa oꞌani roꞌu, “ꞌIꞌamou mou bwane ꞌiraraai Ringe ana Moses na oꞌani, ‘Moi taꞌahirai sae amooꞌi, mamoi ꞌutairaaui maerongamooꞌi.’+ 44Maꞌata, ꞌinau wai ꞌunua tanaꞌamou, moi taꞌahiraaui maerongamooꞌi mamoi haꞌarahesi taradaaui nei ra nora taꞌaiꞌamou. 45ꞌOnaa moi haua oꞌasi, naasi ꞌa haꞌataꞌinia do ꞌiꞌamou raꞌi gare anaꞌia Amamoou araꞌai aro. ꞌInia ꞌiia ꞌa hauai sina tanaraau hakoi sae goro mana sae taꞌaꞌi, ma haaꞌi rangi tanaraau hakoi sae odo-odo mana sae ora-oraꞌa. 46ꞌA ꞌua? ꞌOnaa mou taꞌahiraau moi nei ra taꞌahiꞌamou, mou ꞌadomaꞌinia doꞌia God ꞌai tahariꞌamou goro ꞌinia? Reiꞌuaa ꞌiraau sae ha-haꞌatakisi namou wana bodio ꞌiniraausi, marau haa moi roꞌu oꞌasi. 47Ma ꞌonaa mou goro moi ꞌiniraaui nei ra goro ꞌiniꞌamou, naa ꞌiꞌamou mou aiꞌa heꞌeteꞌita baania namoiwou ta sae. ꞌInia ꞌiraaui sae ahurodo ra goro moi roꞌu ꞌiniraaui nei ra goro ꞌiniraau. 48Naasi ꞌiꞌamou moi goro tatarasi ꞌonaaia Amamoou na goro tatarasi.”

Taroha Goro Mana Usuusu Maea

© Wycliffe Bible Translators, Inc. All rights reserved.

More Info | Version Index