Search form

1 Corinthiens 5

Câwâ Ka Miir̂i Rö Ékalésia

1Na mâ pwânûr̂i, êr̂ê, na tö pwar̂a-ve na miir̂i, miir̂i ka yèri ka ûr̂û-ré rö pwar̂a pâi pa dö töö, ökâré na pè bwè i pevaa xi-e na dèxâ. 2Aè gëve bör̂i vi pè kau-ve! Aè gëve da vi nénââwêr̂ê rö, cè ke-ve yayâwâ rai-ve kâmö ré waa kââ ka ûr̂û-ré! 3Gènyâ, wè gö da tö pwar̂a-ve rö-i kar̂ö, aè gö tö pwar̂a-ve rö-i ko, gö bör̂i wê rhîrhér̂é rö-i kâmö ré waa kââ ka ûr̂û-ré, na ûr̂û gö dè tö-ré. 4Rö-i néé Ör̂ökau Ièsu, wè gëve kâ vèâi gëve ko-nya, xar̂a awir̂è i Ör̂ökau xé-ré Ièsu. 5Na e na ki yè kâyâi kâmö ka ûr̂û-ré yè méavor̂a, cè ki wê kâ vè yèri kar̂ö-è, aè cè ki wê mör̂u na ko-é rèi nédaa i Ièsu!

6Na da e na ké vi êr̂ê ke-ve xe-ve! Na wêr̂êi, gëve da tâwai: «Nêr̂ê lévèn ka yar̂i cè ki pè cùù var̂awa wânii?» 7Virai lévèn mâ' xiréé, cè ke-ve nêr̂ê var̂awa ka mö ké döwöö, wè gëve pa yèri lévèn rö xé-r̂é. Wè é wê cowa ye vè êê pwaér̂ö Paséka xiréé, ökâré Kérisö. 8Tö ökâré, na e na ki gèré waa bwêê, na da kèi lévèn mâ' xiréé, mâ na da kèi bar̂ee lévèn né veevee, mâ yaané, aè na e rö xè-i ka yèri lévèn rö-i, ökâré var̂awa né e mâ avâr̂i.

9Gö wê cowa yu yè-ve rö-i pèci xi-nya, êr̂ê, koa tö vèâi gëve pâr̂â kâmö pa vi yôôbö, 10gö da êr̂ê xè-i pâr̂â kâmö pa vi yôôbö rö-a bwêê jë, mâ pâr̂â pa wêêgûr̂û-r̂é, mâ pâr̂â kâmö pa vi öxar̂a lèèwi, mâ pâr̂â kâmö pa waa ar̂ii yè kaxoo-é, wè nè yè ûr̂û-ré, na e na ki gëve vi xè-a bwêê jë. 11Aè xina, wè gö wê yu vèr̂i yè-ve, êr̂ê, gëve yè da tö vèâ gëve kâmö ré é vi aʼyè, êr̂ê, kaavèâi-ré, aè kâmö ka vi yôôbö rö, wi yè kâmö ka wêêgûr̂û-é, wi yè kâmö ka waa ar̂ii yè kaxoo, wi yè kâmö ka vâpèr̂u, wi yè kâmö ka wâyö vi bwir̂i, wi yè kâmö ka vi öxar̂a lèèwi, koa yè ara vèâ gëve pâr̂â kâmö pa ûr̂û-ré.

12Na wêr̂êi, dè nêr̂ê-nya na ké yè kâ vè târi pâr̂â kâmö ré da tâ néwèi ra? Aè, na da nêr̂ê-ve na ké yè kâ vè târi pâr̂â kâmö ré tö léwé Ékalésia? 13Nè yè kâ vè târi na Bâô pâr̂â kâmö ré da tâ néwèi. Yayâwâ rai-ve kâmö ka miir̂i.

Ajie New Testament

© The Bible Society in the South Pacific

More Info | Version Index