Search form

2 Timothée 2

Kâmö Né Paa Ka Avâr̂i I Ièsu Kérisö

1Gèi o xi-nya éé, pè mör̂ö-i rö-i vi méar̂i vi bwir̂i ka tö Kérisö Ièsu. 2Aè pâr̂â kââ ré gè wê pwêr̂ê rai-nya tö pwar̂a pâr̂â kâmö pa pôr̂ô pa ye vè avâr̂i, wè vi nââ yè pâr̂â kâmö pa avâr̂i pa tâwai yè vi pur̂â yè bör̂i bar̂ee.

3Tö vi pè mör̂ö-i göru-nya rai pâr̂â bwêêpë, na ûr̂û kâmö ka vi paa i Kérisö Ièsu. 4Na yèri kâmö ka vi paa ré waa pè rhèwir̂i-e i pâr̂â kââ né mör̂u rö-a, na ki bar̂i pè vi or̂o kâmö ré pâbir̂i-e vè pè vi paa; 5dèxâ, nè yè da cëi pè urhii ké yè bar̂i i bwaar̂a kör̂öna na kâmö ré waawaa rö vi kwa, na ki da köiwaa rö-i dâ né vi kwa. 6Na e na kâmö ka mar̂a cè ki mar̂a vè kau baayêr̂î ké yè vi yiur̂u xi-e. 7Rhîâgür̂ü ké êr̂ê xi-nya, wè nè yè nââ yè-i ké yè tâ pâgür̂ü pâr̂â kââ na Ör̂ökau.

8Tâ néxâi Ièsu Kérisö xè-i mi mör̂u-i David, é pè mör̂u-é xè ka pèii mé, ûr̂û vi rherhî xi-nya ka e, 9ré gö vi bwêêpë xè-i mâ é pöi-nya xè-i, ûr̂û kâmö ka yaané. Aè é da pöi rö nô i Bâô! 10Tö ökâré, gö pè mör̂ö-nya rai pâr̂â kââ wânii vè ki pâr̂â kâmö ré é pâbir̂i, cè ké-r̂é cëi vi pè mör̂u ré tö Kérisö Ièsu mâ rhîrhér̂é ka yè da tâwai yèri. 11Ökââ goowé nô ka avâr̂i, êr̂ê:

«Gèré yè mé vèâ gèré-é, mâ gèré yè rhau mör̂u vèâ bar̂ee gèré-é.

12Gèré yè pè mör̂ö-ré, gèré yè bör̂i vi winô vèâ bar̂ee gèré-é;

Aè gèré yè vi yiâ xi-e, nè yè mâ' vi yiâ i-ré bar̂ee na ce.

13Gèré yè da avâr̂i, aè na dè bâ avâr̂i na ce,

Wè na da tâwai dè vi yiâ xi-e na ce.»

Kâmö Yar̂i Ka É AʼVè Târi E

14Aʼvè néxâi-r̂é xè-i pâr̂â kââ-ré, mâ yakoa yè-r̂é rö némèè Ör̂ökau, cè ké-r̂é da vi caa-r̂é xè-i pâr̂â nô ka yèri pè kwê, wè pè vi mür̂ü pâr̂â kâmö ré tö pwêr̂ê pâr̂â nô-ré. 15Mör̂ö vèr̂i cè ki gèi dè êr̂ê vèa-i, êr̂ê, na cëi-i e na Bâô cè gèi kâmö ka waa nêr̂ê, mâ ka yèri pè aʼvè köö, mâ ka êr̂ê vèa vè târi nô ka avâr̂i. 16Aè tö vè mwâi vèr̂i rai pâr̂â nô ka yaané mâ ka yèri ka yè bar̂a yè Bâô rö-i, wè nè yè bâ vi na ké da tâ nôô yè Bâô i pâr̂â kâmö pa tëvë ûr̂û-ré, 17nè yè bör̂i arai na nô xé-r̂é, na ûr̂û juuri. Cur̂u tö pwar̂a pâi-ré na Hyménaio mâ Filéto, 18wè cur̂u teyâ rai nô ka avâr̂i mâ êr̂ê, êr̂ê, na wê cowa na ké wê mör̂u tëë, cur̂u bör̂i yapurhâi virai vi tâ néwèi i bör̂i. 19Aè na dè tömâ vè mör̂ö na kavèè i Bâô ka mör̂ö ka wii na ka rhùvia pètâbâ rö-i, êr̂ê: «Na wê rhîâgür̂ü na Ör̂ökau pâr̂â kâmö xi-e»; aè: «Nêr̂ê-r̂é wânii pa aʼyè néé Ör̂ökau na ka tö koa rai câwâ ka yaané.»

20Na da pâr̂â mwâ rhëë mwâné mii mâ mwâné mè rö ré tö wêê mwâ ka tâ mwér̂é, aè dè pâr̂â rhëë kêê bar̂ee mâ pâr̂â rhëë jë; bör̂i, wè pè dö kââ, aè bör̂i, wè ka da dö kââ. 21Tö ökâré, nè yè dè waa na dèxâ kâmö cè ki korhî na wêê nénââ xi-e na ki tö koa rai pâr̂â kââ-ré, nè yè bör̂i mwâ rhëë ka dö kââ ré aʼvè e, mâ ar̂ii, mâ ka tâ mwér̂é yè kaavûû, mâ ka pâr̂i pâr̂â nêr̂ê ka e.

22Ör̂ö rai pâr̂â rhî vè e i pâr̂â paxa dowa, aè vi ua câwâ ka târi, mâ tâ néwèi, mâ vi méar̂i, mâ nâânévâ, gëve vèâ pâr̂â kâmö ré aʼyè néé Ör̂ökau xar̂a wêê nénââ ka korhî. 23Aè virai pâr̂â vi tëvë ka da dö kââ mâ ka döwi, wè gè tâwai êr̂ê ka pè tuö vi caa na pâr̂â kââ-ré, 24na bör̂i da pâr̂i yè kâmö yar̂i i Ör̂ökau ké yè wii na vi caa rö pwar̂a-è; aè na e na ki vië na câwâ xi-e yè pâr̂â kâmö wânii, mâ na e na ki kâmö ka tâwai yè vi aʼpâgür̂ü na ce mâ ka kièo e; 25nè pâgür̂ü xar̂a yör̂a ka e yè pâr̂â pa vi rhîaa, nè mâ nââ yè-r̂é vipââr̂i na Bâô cè ké-r̂é rhîâgür̂ü avâr̂i, 26mâ tâ néxâi rö-i gaamëë, mâ ör̂ö rai wêê goo i méavor̂a ré wê öxar̂a-r̂é cè ké-r̂é waa rhî vè e xi-e.

Ajie New Testament

© The Bible Society in the South Pacific

More Info | Version Index