Search form

Actes 27

É Tùr̂ùwaa Paulo Na Roma

1Na wê tâ mwér̂é rö-i, êr̂ê, gèvé yè lèè na Itali, cér̂é bör̂i wê kâyâi Paulo mâ bör̂i kâmö êê pö yè dèxâ kénéturio né cî paa i Auguste, néé-é na Julio. 2Gèvé bör̂i oè dèxâ kwâ xè Adramutio, ré yè rhâmâ na bör̂i ékar̂a névâ rö Asia, gèvé bör̂i lèè; na vi gèvé Arétaka, kâmö xè Makédonia, na mi xè Tèsalonika. 3Aè gaar̂a, gèvé bör̂i cir̂i rö Sidona; na waa e yè Paulo na Julio, na bör̂i kâyâi-e cè ki vi cêmèèr̂i rö-i pâr̂â pâ ker̂e-é, mâ cëi vi méar̂i xé-r̂é. 4Gèvé bör̂i wê vi, gèvé bör̂i vi yakar̂a Kupéro, wè, kayâ na tö mèè kwâ. 5Aè gèvé wê cowa tawarher̂e nérhëë rö Kilikia mâ Paméfulia, gèvé bör̂i cir̂i rö Mura rö Lukia. 6Na bör̂i wê pwa yèr̂i dèxâ kwâ na kénéturio ka mi xè Alésanédia, nè yè lèè na Itali, na bör̂i kai-vé rö-i na ce.

7Aè na pôr̂ô na pâr̂â nédaa né rhâmâ yidöö xé-vé, aè na kau na nêr̂ê-vé cè gèvé wê vi vè pâr̂i Nido, na bör̂i bâ tepèr̂è vé na kayâ rai ké yè cir̂i rö-i. Gèvé bör̂i yakar̂a rö é ria né Kérété tö vè pâr̂i Salémoné. 8Aè na kau na nêr̂ê-vé né ké yè wê vi kwaayi i, gèvé bör̂i pwa rö ékar̂a névâ é ye néé-é êr̂ê: “Wêê rhëë ka dö e aau”, na tö vè ubwa rö-i na névâ rö Laséa.

9Bör̂i tèi nédèè bör̂i nédaa ka pôr̂ô, na wê pwa na nédaa ka yaané wîî ké yè lèè, wè na wê cowa na nédaa né tö mêr̂ê. 10Na bör̂i aʼvè néxâi yè-r̂é na Paulo, êr̂ê: «Pâ ör̂ökau, gö tâ néxâi êr̂ê, nè yè kau na nô ka yaané, mâ nè yè pôr̂ô na pâr̂â kââ é yè kâ vè bwir̂i rö-i lèè-a, wè nè yè da ki rhar̂i rö pwar̂a êê kwâ mâ kwâ, aè ki mör̂u xé-r̂é bar̂ee.» 11Aè na dè pwêr̂êwaa kâmö ka vi pè kwâ, mâ kâmö kaavûû kwâ na kénéturio, na bör̂i da cëi nô i Paulo. 12Aè na da tö wêê rhëë-ré na wérâ tèi nékwénavö, cér̂é bör̂i êr̂ê vidù rhî vè e xé-r̂é na pâr̂â kâmö ké yè lèè xè-i, mâ tâwai ké yè cir̂i rö Féniki, tö ka wérâ rö-i rèi nékwénavö, wè dèxâ wêê rhëë rö Kérété ka tö vër̂ëë yè luétuu mâ dèèvë.

Kayâ Ka Kau Rö Nérhëë Mâi

13Aè na wê kayâ wayéu, cér̂é bör̂i tâ néxâi, êr̂ê, na wê yexèvè vi tâ néxâi xé-r̂é, cér̂é bör̂i kui bwaxô, cér̂é bör̂i pè yakar̂a vè ubwa i vi Kérété na kwâ. 14Na bör̂i da mwââ, na bör̂i pwa na luétuu ka kau néé-é na «Eurokudo.» 15Na bör̂i pè aau kwâ, aè na da tâwai örua na kwâ, gèvé bör̂i wê kâyâi cè ki wê mwâr̂i. 16Gèvé bör̂i mwâr̂i vè ubwa i dèxâ néyî ka yar̂i néé-é na Kauda, aè gèvé dö bë vè rhö-vé, mâ bëur̂ubë-vé ka tuwir̂i kwâ yar̂i né kwâ. 17Cér̂é bör̂i rhèè-è rua, cér̂é bör̂i pè pâr̂â kââ pè nââbéé mâ pöi pwânûr̂i kwâ, aè cér̂é dö bar̂a êr̂ê wi kè na kwâ rö Suréto, cér̂é bör̂i kui virai pènââ, mâ dö kâyâi kwâ cè ki mwâr̂i. 18Aè na kau na ké rhavui-vé i kayâ, bör̂i gaar̂a cér̂é kai virai êê kwâ. 19Aè tèi pèkarir̂i nédaa, gèvé bör̂i virai i pâr̂â köwi-vé pâr̂â nékwêêr̂ê kwâ. 20Aè na pôr̂ô na pâr̂â nédaa na da tö vèa na mèèxa mâ âr̂âwir̂è, aè na bâ kau vi na kayâ yè-vé, na bör̂i wê yèri wêê nénââ xé-vé né ké yè mör̂u.

21Bör̂i tèi nédèè ké tö mêr̂ê vè mwââ, na bör̂i tömâ na Paulo rö négowé né-r̂é, mâ êr̂ê: «Névâi, gëve yè pwêr̂ê-nya mâ ké yè da lèè mi xè Kérété, nè da wii na pè yerii-a mâ kâ vè bwir̂i-a. 22Aè xina, wè, gö pur̂â-ve, êr̂ê, wè mör̂ö na gëve, wè, nè yè da bwir̂i na mör̂u i dèxâ kâmö rai-ve, aè dè kwâ rhar̂i rö. 23Wè na tö vèa yè-nya rèi bwê na angéla i Bâô ré gö kâmö xi-e mâ gö kâmö yar̂i xi-e. 24Na êr̂ê yè-nya: “Paulo éé, koa yè bar̂a; gè yè wê dè vi na ka tömâ rö némèè Kaisara, aè tö rhûû, wè, na wê nôâ yè-i röi na Bâô pâr̂â kâmö ré lèè vèâ gëve.” 25Tö ökâré, pâ ker̂e-nya, mör̂ö na gëve wè, gö tâ néwèi yè Bâô, êr̂ê, nè yè dè bâ yexèvè ö kââ-ré é wê êr̂ê vèa yè-nya. 26Rhaaxâr̂ö, é yè yer̂e-ré rö dèxâ néyî.»

27Bör̂i tèi bwê pè pârör̂ö na ma kavùè, wè, gèvé mwâr̂i bwir̂i rö nérhëë rö Adriatika, aè rèi goowé bwê, cér̂é bör̂i tâ néxâi na pâr̂â kâmö né kwâ, êr̂ê, cér̂é tö vè ubwa yè dèxâ ka mèr̂i. 28Cér̂é bör̂i dâwaa ka nénui, cér̂é bör̂i wê tâwai, êr̂ê, na tâwarè rha kâmö ké viâi; aè cér̂é rhâmâ bar̂ee na da tö vè mwâi, cér̂é bör̂i dâwaa tëë, mâ pwa yèr̂i, êr̂ê, na pârör̂ö na ma dèxâ é â na ké viâi. 29Cér̂é bör̂i bar̂a wi kè na kwâ xé-vé rö bwêê juu, cér̂é bör̂i yer̂e kavùè bwaxô rö bee kwâ, cér̂é bör̂i dö târ̂î yè daa. 30Aè cér̂é mö ké vi mè wêyê né ké yè ör̂ö na pâr̂â kâmö né kwâ, bör̂i tèi nédèè ké wê kâyâi ria xé-r̂é kwâ ka yar̂i na nérhëë, na ûr̂û cér̂é yè vi yer̂e bar̂ee bör̂i bwaxô ré tö é vè ye vèr̂i rai mèè kwâ. 31Na bör̂i êr̂ê na Paulo yè kénéturio mâ pâr̂â paa, êr̂ê: «Cér̂é yè da tö kwâ na cér̂é-a, gëve da tâwai yè mör̂u!» 32Cér̂é bör̂i yirher̂e pâr̂â kwé né kwâ yar̂i na pâr̂â paa, na bör̂i bèi ria na kwâ yar̂i.

33Na bör̂i wê daa, na bör̂i wapaur̂u-r̂é wânii na Paulo na kaa ara, êr̂ê: «Ökââ nédaa pè pârör̂ö na ma kavùè ré gëve târ̂î mâ tö mêr̂ê, mâ na yèri dèxâ kââ ré gëve wê ara. 34Tèi ökâré, gö wapaur̂u-ve na ka ara, wè na pè mör̂u-ve na êê ara, aè na yèri dèxâ pûr̂û gwâ dèxâ rai-ve ka yè bwir̂i.» 35Na wê cowa êr̂ê ûr̂û-ré, na bör̂i pè var̂awa mâ ëi yè Bâô rö némèè-r̂é wânii; na bör̂i wê kâvii röi, na bör̂i dè rhavûû ké ara na ce. 36Cér̂é bör̂i rhau cê mör̂ö tëë, mâ tö vi ara bar̂ee. 37Aè na kaar̂u kâmö kâmö na ma karir̂i kâmö na ma pârör̂ö na ma dèxâ é â na ma rhaaxâ na ké pôr̂ô xé-r̂é rö kwâ. 38Cér̂é bör̂i wê kiè xèi ké ara xé-r̂é, cér̂é bör̂i virai pâr̂â bélé rö nérhëë cè ki pè mâmâ kwâ.

Na Rhavii-E Na Kwâ

39Na wê daa, aè cér̂é da rhîâgür̂ü névâ; rhaaxâr̂ö, cér̂é tö rhûû dèxâ wêê rhëë ka wii na bwêê dââwê rö-i, cér̂é bör̂i tâ néxâi ké yè kâyâi kwâ nai na ké-r̂é tâwai. 40Cér̂é bör̂i yörher̂e virai pâr̂â bwaxô na nérhëë, mâ cöö virai pâr̂â pè mör̂ö pâr̂â voé, mâ lèè rua yè kayâ nôô pè yùù kwâ, mâ vèr̂i na bwêê dââwê. 41Aè cér̂é bör̂i pwa rö kaa vi ya vèâi-e duö jêr̂ê, na bör̂i kè na kwâ, na bör̂i mör̂ö na mèè kwâ, na da vi tëë, aè na rhavii-e na bee kwâ xè-i pâr̂â kwiè ka pwi vè mör̂ö. 42Cér̂é bör̂i tâ néxâi na pâr̂â paa ké yè yö vè mii pâr̂â kâmö êê pö, koa-wi ûû na dèxâ mâ ör̂ö. 43Aè na wê rhî vè e na kénéturio ké yè pè mör̂u Paulo, na bör̂i aʼrhua-r̂é tëë, mâ êr̂ê yè pâr̂â kâmö paxa tâwai ûû cè ké-r̂é koyo ria baayê, mâ ûû na ka mèr̂i. 44Aè pâr̂â kâmö pa da tâwai ûû, wè, cér̂é yè te ö pâr̂â pârê kêê, töwè cér̂é yè te ö pâr̂â kwêêr̂ê kwâ. Ökâré cér̂é bör̂i rhau pwa, mâ mör̂u rö ka mèr̂i.

Ajie New Testament

© The Bible Society in the South Pacific

More Info | Version Index