Search form

Actes 28

Paulo Rö Néyî Rö Malita

1Aè gèvé wê mör̂u, gèvé bör̂i rhîâgür̂ü, êr̂ê, Malita na néé néyî-a. 2Aè cér̂é méar̂i-vé vè kau na pâi pa dö töö, wè, cér̂é kui kêmör̂u yè-vé, mâ rhau cëi-vé rö-i, wè na kau na kwa mâ rhâô. 3Na bör̂i yâ kêê na Paulo mâ nââ rö kêmör̂u, na bör̂i cêê mi na mârhùr̂ii ka vi kùxè, na ör̂ö i pixê, na bör̂i kè-ru rö néxar̂a â-ê. 4Cér̂é bör̂i tö rhûû mârhùr̂ii na pâi pa dö töö na na cör̂ö rö köwi-e, cér̂é bör̂i vi êr̂ê: «Na kâmö ka yö vè mii kâmö na wi-a, ré na wê mör̂u mi xè nérhëë, aè na da kâyâi-e na ka vi rhôôr̂u cè ki mör̂u.» 5Na bör̂i kwir̂è virai mârhùr̂ii-a na kêmör̂u na Paulo, aè na da yaané xè-i na ce. 6Cér̂é bör̂i târ̂î ké yè cùù rua na kar̂ö-è, mâ ké yè bèi xi-e na ki mé, aè na mwââ yéyé na ké târ̂î-e xé-r̂é, cér̂é bör̂i tö rhûû na na yèri nô ka yaané ka yè pwa yèr̂i-e, cér̂é bör̂i wê pugèwè pâr̂â vi tâ néxâi xé-r̂é, mâ êr̂ê, ce rö dèxâ bâô.

7Aè na tö vè ubwa rö-i na pâr̂â wêê mwâ i ör̂ökau né néyî-ré, néé-é na Pubilia, wè, na paur̂u-vé na wêê mwâ xi-e, na méar̂i-vé vè kau rö-i rèi karir̂i nédaa. 8Aè pevaa i Pubilia, wè na tö-a pèii xar̂a pixê mâ peer̂u war̂a, na bör̂i vi rhâi-e na Paulo, mâ pwaér̂ö, mâ yùù duö néxar̂a â-ê rö bwêêwé mâ waa-é e. 9Ökâré cér̂é bör̂i rhau pwa yèr̂i-e na pâr̂â kâmö paxa pèii rö néyî-ré, na bör̂i rhau pè mör̂u-r̂é bar̂ee na ce. 10Aè cér̂é pè kau-vé xè-i pâr̂â kââ ka e ka pôr̂ô yéyé, aè tèi ökâré gèvé yè wê lèè xè-i, cér̂é bör̂i nââ yè-vé pâr̂â kââ ka pâr̂i-vé.

Na Pwa Rö Roma Na Paulo

11Bör̂i tèi nédèè karir̂i var̂ui, gèvé bör̂i lèè rö dèxâ kwâ xè Alésanédia, ré tö ka wérâ rèi nékwénavö rö néyî, aè na «Duavividu» na néé-é kwâ. 12Gèvé bör̂i wê cir̂i rö Sirakusa mâ tö-i karir̂i nédaa. 13Gèvé bör̂i vi xè-i, gèvé tö-a yakar̂a vi mâ cir̂i rö Régio, aè tèi nédèè rha nédaa, na bör̂i ku mi na lëu, bör̂i kaar̂u tëë nédaa gèvé bör̂i cir̂i rö Putéoli. 14Gèvé bör̂i pwa yèr̂i pâi pâ kaavèâi rö-i, cér̂é bör̂i aʼyè-vé na ka cuè rö pwar̂a-r̂é kanii na ma kaar̂u nédaa, gèvé bör̂i vi na Roma. 15Cér̂é bör̂i wê pwêr̂ê-vé rö-i na pâi pâ kaavèâi, cér̂é bör̂i vi mâ pwa rö néjana rö Apio Foro, mâ rö Karir̂i Mwâ êê ara cè ké-r̂é vi javirù gèvé, na bör̂i wê tö rhûû-r̂é na Paulo, na bör̂i ëi yè Bâô, mâ mör̂ö na wêê nénââ. 16Gèvé bör̂i pwa rö Roma, na bör̂i kâyâi na kénéturio pâr̂â kâmö êê pö yè kavèè pâi pa vi târ̂î, aè é dè kâyâi yè Paulo cè ki dè cuè rhar̂i rö dèxâ mwâ, wè na wii na rha paa ka vi târ̂î-e.

Na Vi Pur̂â Na Paulo Rö Roma

17Bör̂i tèi nédèè karir̂i nédaa, na bör̂i kâ vèâi pâr̂â dö kâmö i pâi xè Juda na Paulo, cér̂é bör̂i wê vi kâ vèâi-r̂é, na bör̂i êr̂ê yè-r̂é na ce «Pâ kaavèâi éé, na yèri nô ka yaané gö waa yè pâr̂â kâmö, mâ yè pâr̂â câwâ i pâr̂â pâi kau xé-r̂é, aè é kâyâi-nya mi tö êê pö mi xè Iérusalèm na néxar̂a â pâi xè Roma. 18Cér̂é wê cowa ërëwaa-nya, cér̂é bör̂i tâ néxâi ké yè kâyâi-nya tëë, wè, na yèri dèxâ pûû-é rai-nya ka yè pâr̂i ké yè mé. 19Aè cér̂é rhî vè döwi na pâi xè Juda, ökâré pûû ké aʼ vèr̂i xi-nya yè Kaisara, na da xè-i ké wii dèxâ nô ka yaané gö yè vi kââr̂â i wa névâ xi-nya. 20Aè xè-i rö nô-ré, gö bör̂i aʼyè-ve cè gèré vi javirù, mâ vi tëvë gèré-ve, wè, na pûû-é na vi târ̂î-i pâi xè Israèl na ké pöi-nya kwé vaö-a.» 21Cér̂é bör̂i êr̂ê yè-è, êr̂ê: «Gèvé da cëi pâr̂â pèci né-i mi xè Juda, aè na yèri bar̂ee dèxâ kâmö rai pâi pâ kaavèâi ka pûû vi êr̂ê vèa mâ êr̂ê dèxâ nô ka yaané xi-i. 22Aè gèvé rhî vè e ké yè tö pwêr̂ê rö-i vi tâ néxâi xi-i, wè gèvé wê tâwai, êr̂ê, é aʼvè yaané-i rö-a bwêê jë waa ar̂ii-a.»

23Cér̂é bör̂i vi aʼdâ dèxâ nédaa, na bör̂i wê pwa, cér̂é bör̂i pôr̂ô na pâr̂â kâmö pa vi pwa yèr̂i-e rö ökâré na tö-i, aè na êr̂ê vèa mâ ye vè avâr̂i mwâcir̂i i Bâô yè-r̂é na Paulo, mâ wapaur̂u-r̂é yè Ièsu rö-i mââyöö i Mosé mâ pâr̂â pérövéta, rhavûû rèi mélöö kwéyë rua tèi rhêêrè. 24Aè cér̂é cëi nô-ré na êr̂ê na bör̂i, aè cér̂é da cëi na bör̂i. 25Aè na da rhaaxâ na wêê nénââ xé-r̂é, cér̂é bör̂i wê vidù rhar̂i tèi nédèè ké êr̂ê i Paulo rhaaxâ rö nô, êr̂ê: «Na avâr̂i na ké êr̂ê mâ' i Ko-Ar̂ii yè pâr̂â pâi kau xe-ve, wêyê na Isaia pérövéta, mâ êr̂ê:

26“Vi êr̂ê yè névâ-ré, êr̂ê:

Gëve yè bâ pwêr̂ê rö, aè gëve yè da rhîâgür̂ü,

Gëve yè bâ tö rhûû rö, aè gëve yè da rhéwêr̂ê.

27Wè na wâréuu na wêê nénââ i pâr̂â kâmö-a,

Mâ cér̂é pè wâré mâ wâré pâr̂â böödê-r̂é,

Aè cér̂é rhîwir̂i pâr̂â pièmè-r̂é,

Wé-r̂é tö rhûû na pâr̂â pièmè-r̂é,

Mâ pwêr̂ê na pâr̂â böödê-r̂é,

Mâ rhîâgür̂ü,

Mâ vipââr̂i, koa wè-nya pè mör̂u-r̂é.”

28Tö ökâré, rhîâgür̂ü na gëve, êr̂ê, é tùr̂ùwaa vi pè mör̂u i Bâô yè pâr̂â névâ ka orê, aè cér̂é yè pwêr̂ê-ê.»

29Na wê êr̂ê röi pâr̂â nô-ré, cér̂é bör̂i vi na pâi xè Tuda mâ vi caawîî-r̂é na cér̂é xè-i.

30Aè na kaar̂u nédö wânii na ké tö-i Paulo rö dèxâ mwâ ré na wê urhii wîr̂î. Na rhau cëi röi pâr̂â kâmö ré wè pwa yèr̂i-e. 31Na vi vaa i mwâcir̂i Bâô, mâ aʼpâgür̂ü pâr̂â nô né Ör̂ökau Ièsu Kérisö, na tëvë vè târi, aè é da aʼrhua-è.

Ajie New Testament

© The Bible Society in the South Pacific

More Info | Version Index