Search form

Actes 5

Anania Mâ Safaira

Apos 4.34-37; Lév 10.1-5; 2Pâr̂â ör̂ök 5.20-27; Deut 23.21-23; Ios 7.19; Luk 12.1-5,15; 1Kor 5.13

1Aè na wii na dèxâ kâmö ré néé-é na Anania, mâ Safaira bwè xi-e, wè na vi rhöwöi dèxâ néjë, 2mâ yawir̂i xè-i bör̂i pè urhii, cur̂u vèâ bwè xi-e, aè, na vi xar̂a böömèè rö na ce mâ nââ rö pwar̂a pâr̂â aposetolo. 3Na bör̂i êr̂ê yè-è na Pètèru, êr̂ê: «Anania éé, na ya vè rhâri xi-yé pwéé-i na méavor̂a, cè gèi veevee yè Ko-Ar̂ii, mâ yawir̂i xè-i pè urhii néjë-ré? 4Na wêr̂êi, na da dö néki-i mâ' na ö kââ-ré, na gè da tö vi rhöwöi, aè gè wê cowa vi rhöwöi, gè yè bör̂i da tâwai vi câwâ ûr̂û rhî vè e xi-i? Gè wêr̂êi, gè tâ néxâi ûr̂û-ré rö pwéé-i? Gè da veevee yè kâmö, aè gè veevee yè Bâô.» 5Na bör̂i pwêr̂ê nô-ré na Anania, na bör̂i bèi mâ mé. Na bör̂i pwa na bar̂a ka kau yè pâr̂â kâmö wânii ré pwêr̂ê. 6Cér̂é bör̂i tömâ rua na pâi dowa mâ yayöu-é, mâ pè xi-e na ka kérui-e.

7Aè bör̂i tèi nédèè karir̂i pè mèèxa, na bör̂i xa vi ru na bwè xi-e, aè na da tâwai ö kââ-ré wê pwa. 8Na bör̂i êr̂ê na Pètèru, êr̂ê: «Êr̂ê yè-nya, wè, dè cé-a rö pè urhii néjë ré göu vi rhöwöi?» Na bör̂i êr̂ê yè-è na bwè-a êr̂ê: «Üüwa, dè cé-a rö.» 9Na bör̂i êr̂ê yè-è na Pètèru, êr̂ê: «Göu wêr̂êi, na rhaaxâ na wêê nénââ xi-u né ké yè waa yeyèè yè ko i Ör̂ökau? Tö rhûû, cér̂é te rö mèö mwâ na pâr̂â köwi pâi ré mi xè ka kérui kui-i, wè, cér̂é yè kérui-i bar̂ee.» 10Na bör̂i bèi ria rö duö köwi Pètèru mâ mé. Cér̂é bör̂i vi ru na pâr̂â pâi dowa mâ pwa yèr̂i-e na na wê mé; cér̂é bör̂i pè xi-e vi mâ kérui-e rö pwar̂a kui-e. 11Cér̂é bör̂i bar̂a vè kau na pâr̂â ékalésia, mâ pâr̂â kâmö wânii ré pwêr̂ê nô-ré.

Pâr̂â Ar̂inadö Ka Pôr̂ô Yéyé

12Aè na pôr̂ô yéyé na pâr̂â pètâbâ mâ pâr̂â nêr̂ê ka ar̂inadö ré é waa rö négowé né pâr̂â kâmö rö-i néxar̂a â pâr̂â aposetolo. Cér̂é rhau tö vè rhaaxâ rö bar̂aadè i Solomona; 13aè na da wii na dèxâ kâmö ka pè mör̂ö-è cè ki vi ua-r̂é, rhaaxâr̂ö cér̂é dè pè kau-r̂é na pâr̂â kâmö. 14Aè cér̂é bâ pôr̂ô vi na pâr̂â pa tâ néwèi Ör̂ökau, pâi mâ powè; 15pûû-é cér̂é bâ rhiè pâr̂â kâmö pa pèii na pâr̂â wêyê, mâ pè kur̂u-r̂é rö pâr̂â kaa kur̂u, mâ pâr̂â bwêêvè, cè ki vi na aʼvui Pètèru rö bwêêwé bör̂i na ki vi vè ubwa i-r̂é. 16Cér̂é pwa bar̂ee na pâr̂â kâmö pa pôr̂ô yéyé mi xè pâr̂â wêê mwâ pwânûr̂i Iérusalèm, cér̂é wê rhiè mi pâr̂â pa pèii, mâ pâr̂â kâmö ré oè-r̂é na u, cér̂é bör̂i rhau mör̂ö tëë.

É Kôjuwaa Pâr̂â Aposetolo

Apos 12.3-11; 4.5-12,18-20; Is 65.13

17Na bör̂i tömâ rua na kâmö ka vi târ̂î pâi pa ar̂ii, mâ bör̂i kâmö pa nââbéé ökâré pâr̂â pâi pâ sadukaiö pâi pa oè vè rhâri-r̂é na vi yar̂ii, 18cér̂é bör̂i tuwir̂i pâr̂â aposetolo mâ nââ-r̂é rö mwâ pö kâmö rö névâ-ré. 19Aè tèi bwê na cî pâr̂â mèö mwâ né mwâ pö kâmö na dèxâ angéla i Ör̂ökau, mâ pè tù-r̂é, mâ êr̂ê, êr̂ê: 20«Vi na gëve, mâ tömâ rö mwâ ka ar̂ii, mâ vi vaa yè pâr̂â kâmö i pâr̂â nô né vi pè mör̂u-a.» 21Cér̂é bör̂i pwêr̂ê, cér̂é bör̂i vi ru rö mwâ ka ar̂ii tèi wêê daa mâ vi pur̂â.

Na bör̂i pwa na kâmö ka vi târ̂î pâi pa ar̂ii, cér̂é vèâ pâi pa nââbéé, mâ ka vèâi-r̂é vè rhaaxâ pâi paxa vi tëvë, mâ pâr̂â pâi béâr̂i i pâi pa mör̂u Israèl, cér̂é bör̂i vi tùr̂ù na mwâ pö kâmö na ka tâ rhîyè mi pâr̂â aposetolo. 22Cér̂é bör̂i pwa na pâr̂â kâmö yar̂i mâ rhî vè yèri-r̂é rö mwâ pö kâmö, cér̂é bör̂i vi tëë mâ vi yëwaa 23êr̂ê: «Gèvé wê mi xè ka tö rhûû mwâ pö kâmö na na wê yâwîî-e, mâ pâi pa vi târ̂î, wè cér̂é dè tömâ rö pâr̂â mèö mwâ; gèvé bör̂i wê cîî, gèvé bör̂i rhî vè yèri kâmö rö-i.» 24Na bör̂i wê pwêr̂ê nô ré na kâmö ka vi winô né mwâ ka ar̂ii, mâ pâi paxa nâânévâ pa vi kwéjî, na bör̂i vi wâré mâ wâré na wêê nénââ xé-r̂é wa nô ré yè pwa. 25Tèi ökâré, na bör̂i pwa na dèxâ kâmö ka vi yëwaa yè-r̂é, êr̂ê: «Tö rhûû pâr̂â kâmö ré gëve nââ-r̂é rö mwâ pö kâmö, wè cér̂é tömâ rö mwâ waa ar̂ii, mâ vi pur̂â yè pâr̂â kâmö!»

26Na bör̂i vi na kâmö ka vi târ̂î cér̂é pâr̂â kâmö yar̂i xi-e, na ka pè xé-r̂é mi, aè cér̂é da pè mör̂ö-r̂é, wè cér̂é bar̂a i pâr̂â kâmö, wé-r̂é rhaxè-r̂é i pèyaa. 27Cér̂é bör̂i pè xé-r̂é mâ pè tömâ-r̂é rö némèè pâi pa vi rhôôr̂u nô. Na bör̂i êr̂ê na kâmö ka vi târ̂î-i pâi pa ar̂ii, 28êr̂ê: «Gèvé wê cowa yakoa vè mör̂ö yè-ve, êr̂ê koa yè vi pur̂â rö-i néé ré, aè tö rhûû, wè na wê rhâri na Iérusalèm xè-i vi pur̂â xe-ve. Aè gëve bar̂i cè ki bèi ö-ve na war̂a i ö kâmö-a!» 29Na bör̂i aʼcëi na Pètèru mâ pâr̂â aposetolo, êr̂ê: «Na e na ké yè pwêr̂êwaa Bâô rai kâmö. 30Bâô i pâr̂â pa pevaa xé-ré, wè na pè mör̂u tëë Ièsu ré gëve yö vè mii-e mâ pè cevè-è r̂ö kêê. 31Ce ré na pè kau-é na Bâô rö-i néxar̂a â-ê é gaamëë cè ki ör̂ökau, mâ ka vi pè mör̂u, cè ki nââ vipââr̂i yè pâi xè Israèl, mâ cöö virai pâr̂â nô ka yaané. 32Gèvé-a, pâi ré ye vè avâr̂i pâr̂â kââ-ré, na ûr̂û-ré bar̂ee na Ko-Ar̂ii ré na nââ na Bâô yè kâmö ka pwêr̂êwaa-è.»

33Cér̂é bör̂i wê pwêr̂ê nô-ré, cér̂é bör̂i wê rhôê vè kau aau, mâ bar̂i pè yerii-r̂é. 34Na bör̂i tömâ rua na dèxâ farésaiö rö ka vi vapââmu xé-r̂é, néé-é na Gamalièl, kâmö ka vi pur̂â rö néé mââyöö, wè cér̂é pwêr̂êwaa-è na pâr̂â kâmö wânii, na bör̂i êr̂ê xina, pè tù rua wîr̂î pâr̂â aposetolo. 35Na bör̂i êr̂ê na ce, êr̂ê: «Pâi xè Israèl éé, koa rö pâr̂â kââ ré gëve yè waa yè pâr̂â kâmö-a. 36Wè na wê pwa xiréé na Tèuda, mâ êr̂ê, êr̂ê, na vi kwéjî na ce, cér̂é bör̂i vi kâ vèâi yè-è na pâr̂â kâmö pa pôr̂ô yéyé, na ûr̂û rha kâmö kâmö, é bör̂i yö vè mii-e, aè pâr̂â kâmö ré pwêr̂êwaa-è, wè, cér̂é rhau vi vidù, mâ wê döwi. 37Tèi nédèè kâmö-ré, na bör̂i tö vèa na Iuda, wi xè Galilé, tèi nédaa né ké yu néé pâr̂â kâmö, mâ yörhèè yè pâr̂â kâmö pa pôr̂ô yéyé, na bör̂i wê mé bar̂ee na ce, é bör̂i pè vidù pâr̂â kâmö ré pwêr̂êwaa-è. 38Aè kina, wè gö êr̂ê yè-ve, êr̂ê, tö vè mwâi vèr̂i rai pâr̂â kâmö-a, mâ wê kâyâi-r̂é wîr̂î. Wè nè yè kèi kâmö na câwâ-â mâ nêr̂ê-â, nè yè bör̂i dö yèri ria; 39aè nè yè kèi mi Bâô, nè yè bör̂i da tâwai yèri, koa-wi tö vèa êr̂ê gèré vi paa yè Bâô!» 40Cér̂é bör̂i wê cëi nô xi-e. Cér̂é bör̂i aʼyè pâr̂â aposetolo mâ kurhauʼ-r̂é vè yaané, cér̂é bör̂i yakoa yè-r̂é, êr̂ê, koa yè vi vaa i tëë néé Ièsu, cér̂é bör̂i wê kâyâi-r̂é. 41Cér̂é bör̂i tù rua xè kaa vi tëvë xar̂a vi or̂o rö némèè-è, wè na wê pâr̂i-r̂é na ké pè miir̂i-r̂é wa néé Ièsu. 42Aè cér̂é da tâ mui rèi pâr̂â nédaa rö ka vi pur̂â, mâ vi vaa i Ièsu Kérisö rö mwâ ka ar̂ii mâ pâr̂â wêê mwâ.

Ajie New Testament

© The Bible Society in the South Pacific

More Info | Version Index