Search form

Actes 7

Vi Pur̂â I Sétéfano

1Na bör̂i êr̂ê yè-è na kâmö ka vi târ̂î pâi pa ar̂ii, êr̂ê «Na wêr̂êi na ûr̂û-ré na nô-ré?» 2Na bör̂i êr̂ê na Sétéfano, êr̂ê: «Pa kaavèâi-nya mâ pâ pevaa xi-nya, pwêr̂ê wîr̂î! Bâô né rhîrhér̂é, wè na tö vèa yè Abérahama pevaa xé-ré, na na mö tö Mésopotamia na ce, aè na da tö vi na Haran, 3na bör̂i êr̂ê yè-è, êr̂ê: “Kâyâi névâ xi-i, mâ mwââr̂ö xi-i, aè vi na névâ ré gö yè pèri yè-i.” 4Na bör̂i vi na ce xè-i névâ i pâi xè Kalédéa, mâ cuè rö Haran. Tèi nédèè ké pèii i pevaa xi-e, é bör̂i pè xi-e na névâ-â gëve tö-i xina. 5Aè na da nââ ki-e dèxâ kââ na Bâô rö-i, mâ na da nââ ka yè yâi â-ê, aè na êr̂ê baayê na ce, êr̂ê, nè yè mâ nââ yè-è cè ki ki-e, mâ pâr̂â mör̂u-é rhaadè, wè na mö ké yèri o xi-e. 6Aè na wê êr̂ê ûr̂û-ré na Bâô, êr̂ê: “Nè yè mâ vi na pâr̂â mör̂u-é na ka cuè rö névâ ka döwöö; aè, é yè mâ kâ vè maii-r̂é mâ waa vè yaané-r̂é rèi tâwarè kâmö kâmö nédö.” 7Na bör̂i êr̂ê yè-è na Bâô: “Gö yè mâ waa pè urhii yè névâ ré yè pè gu-r̂é rö-i, aè bör̂i tèi nédèè, wè, cér̂é yè wê kâyâi névâ-ré, mâ vi na ka kâmö yar̂i xi-nya rö névâ-â.” 8Aè na wê nââ vi kîbô né vâr̂â yêr̂ê yè Abérahama. Na bör̂i ër̂i Isaka na Abérahama, na bör̂i pè vâr̂â yêr̂ê rèi pèkanii nédaa xi-e na ma karir̂i, aè na ër̂i Iakobo na Isaka, aè Iakobo na ër̂i pâi pa pârör̂ö na ma kaar̂u pâr̂â bèmûû.»

9«Aè pâr̂â bèmûû, wè cér̂é vi yar̂ii wa Ioséfa, mâ vi rhöwöi-e na Aigupito, aè na bâ tö pwar̂a-è na Bâô. 10Na bör̂i pè mör̂u-é rai pâr̂â mârhër̂ë xi-e wânii, mâ na nââ yè-è vi méar̂i mâ gaamëë rö némèè Farao Ör̂ökau xè Aigupito. Na bör̂i pè tömâ-ê na ör̂ökau cè ki vi winô rö Aigupito mâ wêê mwâ xi-e. 11Na bör̂i pwa na aʼvè mêr̂ê mâ mârhër̂ë vè kau rö Aigupito wânii, mâ Kanana, wè na yèri êê ara i pâr̂â cî kani ka baayê xé-ré. 12Na bör̂i wê pwêr̂ê na Iakobo êr̂ê, na wii na êê ara rö Aigupito, na bör̂i tùr̂ùwaa na ce pâr̂â pevaa xé-ré. Ökâré ké vi baayê xé-r̂é. 13Aè tèi pèkaar̂u ké vi xé-r̂é, na bör̂i tö vèa yè pâi pâ kaavèâi-e na Ioséfa, mâ na tö vèa yè Farao na mwââr̂ö i Ioséfa. 14Na bör̂i nôâ nô na Ioséfa yè pevaa xi-e Iakobo mâ mwââr̂ö xi-e, wè cér̂é karir̂i kâmö na ma pârör̂ö na ma kanii na pâr̂â kâmö rö-i. 15Na bör̂i wê vi na Iakobo na Aigupito rèi céréé, na bör̂i wê pèii mé rö-i na ce, mâ pâr̂â cî kani ka baayêr̂î-r̂é; 16é bör̂i uyûi-r̂é rö Sikéma rö kaa vi uyû ré na wê urhii mâ' i mwâné na Abérahama rai pâlè Hamora, rö Sikéma.»

17«Aè na wê tö vè ubwa na nédaa ré na wê êr̂ê baayê na Bâô yè Abérahama, na bör̂i tuö mâ pôr̂ô vi na ba xè Israèl rö Aigupito, 18kwéyë rua rèi ökâré na wê pwa na dèxâ ör̂ökau ka wê da tâwai Ioséfa. 19Ökâré kâmö ka vi gii wa pâ ker̂e-ré, mâ waa vè yaané yè pâr̂â cî kani ka baayêr̂î-r̂é, cè ké-r̂é virai pâr̂â pâlè-r̂é, êr̂ê, wi wii na mör̂u-r̂é. 20Ökâré nédaa ré é ër̂i Mosé, mâ na dö e aau na ce yè Bâô, aè na karir̂i var̂ui né ké ër̂i-e rö wêê mwâ i pevaa xi-e. 21Na bör̂i wê cowa kâyâi-e, na bör̂i pè xi-e na pûr̂ûbwè i Farao mâ ër̂i-e ûr̂û o xi-e. 22Aè é wê aʼpâgür̂ü yè Mosé pâr̂â gaamëë i pâi xè Aigupito, mâ na wii na awir̂è né ké tëvë xi-e mâ pâr̂â nêr̂ê-ê. 23Na wê kaar̂u kâmö na pâr̂â nédö xi-e, na bör̂i tuö rö wêê nénââ xi-e na ké yè vi na ka pwa yèr̂i pâr̂â pâ kaavèâi-e, wè pâr̂â pâlè Israèl. 24Na bör̂i tö rhûû dèxâ na ce na é waa vè yaané-é, na bör̂i vi rheè wa-è, mâ nââbéé köwi-e, mâ ya mâ yö vè mii kâmö xè Aigupito. 25Aè na wê tâ néxâi na ce êr̂ê, cér̂é yè wê rhîâgür̂ü-é na pâr̂â pâ kaavèâi-e, êr̂ê, nè yè mâ pè mör̂u-r̂é na Bâô xè-i duö néxar̂a â-ê, cér̂é da rhîâgür̂ü-é rö. 26Aè gaar̂a, na bör̂i pwa yèr̂i bar̂ee kaar̂u na cur̂u vi camü, na bör̂i aʼrhua-r̂u cè ku-r̂u wê cowa, mâ êr̂ê: “Koa yè vi ya-u, wè göu dui duarii, göu waa vè yaané-u xi-yé?” 27Aè ö kâmö ré waa vè yaané kâmö ker̂e-é, wè na ii-e na ce, mâ êr̂ê, êr̂ê: “Wîr̂î ré pè tömâ-i cè gèi vi winô yè-vu mâ vi rhôôr̂u? 28Ö jië gè bar̂i yö vè mii-nya ûr̂û ké waa xi-i xöömwê na gè i yö vè mii dèxâ kâmö xè Aigupito?” 29Na wê pwêr̂ê nô-ré na Mosé, na bör̂i ör̂ö, mâ tö vè kâmö döwöö rö névâ rö Madian; na bör̂i ër̂i kaar̂u dui dulè-è rö-i.»

30«Bör̂i tèi nédèè kaar̂u kâmö nédö, na bör̂i tö vèa yè rö nékaê né gwêêwè rö Sinai na angéla rö mèèjar̂a kêmör̂u rö-i kêê ka köyir̂ida. 31Na bör̂i tö rhûû na Mosé, na bör̂i cêrhö na ce xè-i ké tö rhûû xi-e, aè na mö ké vi vè ubwa na ka tö rhûû, na bör̂i tö vèa na mêr̂ê aʼ i Ör̂ökau, êr̂ê: 32“Gènyâ Bâô i pevaa xi-i, wè Bâô i Abérahama, mâ Isaka, mâ Iakobo.” Na bör̂i cê keexer̂e na Mosé, mâ bar̂a rai tö rhûû. 33Na bör̂i êr̂ê yè-è na Ör̂ökau, êr̂ê: “Cöö duö mwâ néxar̂a â-i, wè, na ar̂ii na néjë ré gè tömâ rö-i. 34Gö wê tâ tö rhûû pâr̂â kââ ka é waa yè ba xi-nya rö Aigupito, wè gö wê pwêr̂ê ké cê aauu xé-r̂é, gö bör̂i vi ria mi na ka öxar̂a-r̂é. Aè kina, mi na gèi cè göi tùr̂ùwaa-i na Aigupito!”»

35«Ö Mosé ré cér̂é viö rai-e mâ', êr̂ê: “Wîr̂î ré pè tömâ-i cè gèi vi winô mâ vi rhôôr̂u nô?” Dè ce ré na tùr̂ùwaa-è na Bâô cè ki kâmö ka vi winô, mâ kâmö ka pè mör̂u xè-i köwi angéla ré tö vèa yè-è rö nékêê ka köyir̂ida. 36Dè ce ré pè xé-r̂é vi rèi nédèè pâr̂â pètâbâ, mâ pâr̂â ar̂inadö ré na waa rö Aigupito, mâ rö nérhëë ka mii, mâ rö bwêê dè tèi kaar̂u kâmö nédö. 37Dè ö Mosé ré êr̂ê yè pâr̂â pâlè Israèl, êr̂ê: “Nè yè mâ pè tö vèa yè-ve na Bâô dèxâ péröféta rai pâ kaavèâi-ve ûr̂û-nya.” 38Dè ce-ré rö vi kâ vèâi rö nékaê, cur̂u angéla ré pè aʼ-è rö gwêêwè rö Sinai, mâ cér̂é vèâ pâr̂â bèmûû-ré, dè ce ré wê cëi nô né mör̂u cè ki mâ nââ yè-ré. 39Aè pâr̂â bèmûû-vé wè cér̂é bör̂i viö rai pwêr̂ê-ê, cér̂é bör̂i kâyâi-e, aè na kè tëë na Aigupito na wêê nénââ xé-r̂é, 40cér̂é bör̂i êr̂ê yè Arona, êr̂ê: “Waa ké-vé Bâô cè ki vi baayêr̂î-vé, wè Mosé ré pè xé-vé mi xè Aigupito, wè gèvé da tâwai ö kââ-ré wê pwa yèr̂i-e.” 41Cér̂é bör̂i waa dèxâ olè pôr̂ômökau rèi ö nédaa-ré, cér̂é bör̂i vi ye êê pwaér̂ö yè kaxoo-é, mâ cér̂é vi or̂o wa kââ ka é waa i néxar̂a â-r̂é. 42Na bör̂i pugèwè na Bâô mâ vi törédèè yè-r̂é mâ kâyâi-r̂é cè ké-r̂é waa ar̂ii yè pâr̂â ba rö nékö, na ûr̂û ka yu rö pèci i pâr̂â péröféta, êr̂ê:

“Na wêr̂êi, gëve yâmar̂a i yè-nya

Pâr̂â bwâr̂âwê ka mé mâ pâr̂â vi ye êê pwaér̂ö

Rèi kaar̂u kâmö nédö ré gëve tö nékaê,

Gëve pâr̂â wêê mwâ rö Israèl éé?

43Aè gëve pè mwââ mwââlöö i Molok,

Mâ âr̂âwir̂è i bâô Réfan,

Wè, pâr̂â kaxoo-ré, gëve waa cè ke-ve tâ nôô yè-r̂é,

Aè gö yè mâ rhiè-ve xè-i na é ye vèr̂i né Babilona.”»

44«Na wii na mwââ mwââlöö pè ye vè avâr̂i yè pâr̂â pevaa xé-ré rö nékaê, ûr̂û ké vi câwâ xi-e yè Mosé cè ki waa ûr̂û dâ ré na wê tö rhûû. 45Cér̂é wê cëi, cér̂é bör̂i pè mi na pâr̂â pevaa xé-r̂é, cér̂é Iosua rö ka pè gu xé-r̂é pâi pa dö töö ré na yayâwâ-r̂é na Bâô rö némèè pâr̂â pevaa xé-r̂é, na bör̂i ûr̂û-ré kwéyë rua rèi ö nédaa i David. 46Wi ré pwa yèr̂i vi méa vi bwir̂i rö pwar̂a Bâô mâ pëër̂ii yè-è cè ki pè tömâ kaa töö ka ar̂ii vè ki pâr̂â mör̂u Iakobo. 47Aè bör̂i dè Solomona ré pè tömâ dèxâ mwâ vè ki-e. 48Aè na da tö mwâ ka é waa i néxar̂a â kâmö na Ka tö rua aau, na ûr̂û ké êr̂ê i pérövéta, êr̂ê:

49“Kaa cuè xi-nya, wè nékö,

Aè bwêê jë, wè ka tee i duö köwi-nya,

Aè âri kaa tâ mui xi-nya?

Aè na êr̂ê na Ör̂ökau êr̂ê,

Mwâ ka ûr̂û yé ré gëve yè pè tömâ vè ki-nya?

50Ö jië, gö da yaxai pâr̂â kââ wânii xè-i néxar̂a â-nya?”»

51«Gëve pâi pa mör̂ö na kwèègûr̂û-ve, mâ pa da wii na vâr̂â yêr̂ê i wêê nénââ mâ böödê! gëve bâ pè mör̂ö-ve rai Ko-Ar̂ii. Ké waa i pâr̂â pevaa xe-ve, wè na dè ûr̂û-ré bar̂ee na ké waa xe-ve. 52Âri pérövéta ré cér̂é da kôjuwaa-è na pâr̂â pevaa xe-ve? Aè cér̂é yö vè mii bar̂ee paxa êr̂ê vèa baayê ké yè pwa i kâmö ka târi, ré gëve ârui-e xina, mâ yö vè mii-e. 53Gëve ré wê cëi mââyöö rö-i ké vi wii i pâr̂â angéla, gëve bör̂i da köiwaa!»

Pèii Mé I Sétéfano

54Cér̂é bör̂i wê pwêr̂ê nô-ré, cér̂é bör̂i rhôê mâ mâxürü mèè-r̂é yè-è. 55Aè na wê rhâri xè-i Ko-Ar̂ii na Sétéfano, mâ baxagür̂ü pièmè-è na nékö, na bör̂i tö rhûû rhîrhér̂é i Bâô mâ Ièsu na na tömâ rö é gaamëë i Bâô. 56Na bör̂i êr̂ê na ce, êr̂ê: «Tö rhûû, gö tö rhûû nékö na é wê cîî, mâ O i kâmö na na tömâ rö é gaamëë i Bâô.» 57Cér̂é bör̂i rhau tëvë vè kau rua, mâ kâwîî pâr̂â böödê-r̂é, mâ rhau koyo yè-è, mâ rhèè-è rua xè névâ, mâ rhaxè-i pèyaa. 58Aè pâr̂â pâi pa vi ye vè vee i-e, wè cér̂é nââ pâr̂â mêr̂ê-r̂é rö pwar̂a duö köwi dèxâ wi dowa néé-é na Saulo. 59Cér̂é bör̂i rhaxè Sétéfano, na bör̂i pwaér̂ö na ce, êr̂ê: «Ör̂ökau Ièsu, cëi ko-nya.» 60Na bör̂i yùù béé â-ê, mâ aʼvè kau mâ êr̂ê: «Ör̂ökau, koa yè waa pè kwê yè-r̂é i nô ka yaané-a!» Na bör̂i wê cowa êr̂ê ûr̂û-ré, na bör̂i wê kur̂u na ce.

Ajie New Testament

© The Bible Society in the South Pacific

More Info | Version Index