Search form

Marc 4

Yeyèè Né Kâmö Ka Yer̂e Pwêê

Mat 13.1-9; Luk 8.4-8

1Na wê vi aʼpâgür̂ü tëë mwâr̂â rö pwar̂awiè na Ièsu. Cér̂é bör̂i vi ya vèâi-r̂é rö pwar̂a-è na pâr̂â kâmö pa pôr̂ô yéyé, na bör̂i oè kwâ na ce mâ cuè rö-i ör̂ö rö nérhëë, aè cér̂é tö ka mèr̂i na pâr̂â kâmö rö kâr̂âwâ nérhëë. 2Na vi aʼpâgür̂ü yè-r̂é pâr̂â nô ka pôr̂ô rö-i yeyèè, mâ êr̂ê rö-i vi pur̂â xi-e, êr̂ê: 3«Tö pwêr̂ê na gëve! Tö rhûû, na vi na kâmö ka mar̂a na ka yer̂e pwêê. 4Na bör̂i yer̂e na ce, na bör̂i kè na bör̂i rö pâr̂â wêyê, cér̂é bör̂i pwa na pâr̂â mür̂ü mâ kâi. 5Na bör̂i maʼ na bör̂i, mâ kè rö népèyaa ka ar̂anabi na jë rö-i, na bör̂i tuö vi bèr̂éé, wè na da yivèè na jë rö-i, 6aè na tè na karèè, na bör̂i mür̂ü mâ pèii, wè na yèri kwèè. 7Na bör̂i maʼ na bör̂i, mâ kè rö néjêr̂ê pâr̂â kêê ka köyir̂ida, na bör̂i tuö rua na pâr̂â kêê ka köyir̂ida, na bör̂i vi yaako, mâ na yèri pwêê. 8Na bör̂i maʼ na bör̂i mâ kè rö néjë ka e, na bör̂i wii na pwêê ka yi mâ tuö, na bör̂i pwa, bör̂i wè kanii kâmö, bör̂i wè karir̂i kâmö, bör̂i wè tâwarè rha kâmö.» 9Na êr̂ê na Ièsu: «Ö kâmö ré wii na böödê cè ki pwêr̂ê, pwêr̂ê na ce!»

Ki-Yé Ré Na Bâ Tëvë Rö-I Pâr̂â Yeyèè Na Ièsu

Mat 13.10-17; Luk 8.9-10

10Na wê tö rhar̂i tëë na Ièsu, cér̂é bör̂i vi ërëwaa-è wa pâr̂â yeyèè na pâr̂â kâmö paxa tö cér̂é-é, mâ pâi pa pârör̂ö na ma kaar̂u. 11Na aʼcëi yè-r̂é na ce êr̂ê: «Gëve, wè é nââ yè-ve cè ke-ve rhîâgür̂ü pâr̂â kââ ka tö yêr̂ê né mwâcir̂i i Bâô; aè cér̂é pa döwöö, wè na rhau pwa yèr̂i-r̂é na nô né mwâcir̂i xè-i yeyèè; 12

“Na ké-r̂é rhûû, cér̂é bör̂i rhûû rö, aè cér̂é da rhîâgür̂ü

Mâ ké-r̂é pwêr̂ê, cér̂é pwêr̂ê rö, aè cér̂é da pwêr̂ê tâwai,

Wé-r̂é vipââr̂i yè Bâô nè yè bör̂i cöö nô ka yaané xé-r̂é!”»

Na Vi Yëwaa Na Ièsu Dö Êê Né Yeyèè Né Kâmö Ka Yer̂e Pwêê

Mat 13.18-23; Luk 8.11-15

13Na bör̂i êr̂ê yè-r̂é bar̂ee na ce, êr̂ê: «Gëve da rhîâgür̂ü nô né yeyèè-a? Gëve yè mâ rhîâgür̂ü tâîî vi pâr̂â yeyèè 14Wè na nai nô na kâmö ka nai. 15Aè bör̂i wê cér̂é töö arher̂e wêyê rö ka nai nô, aè na ké-r̂é wê pwêr̂ê, na bör̂i pwa na Satana mâ virai nô ka é nai rö xé-r̂é 16Na ûr̂û-ré na bör̂i, paxa cëi pwêê ka é nai rö népèyaa. Cér̂é wê pwêr̂ê nô mâ cëi vi bèr̂éé xar̂a vi or̂o, 17aè na yèri kwèè rö xé-r̂é, na bör̂i tuö pwâmii, nè yè pwa na pâr̂â mâ kôjuwaa xè-i nô, cér̂é yè bör̂i bèi. 18Aè bör̂i, wè cér̂é cëi pwêê ka é nai rö nékêê ka köyir̂ida; cér̂é wê pwêr̂ê nô, 19aè na tuö tawawir̂i-r̂é na pâr̂â kââ rö-a bwêê jë, mâ lèèwi, mâ vi uxo yè-r̂é, na bör̂i vi yaako na nô mâ na da pwa. 20Aè cér̂é ré cëi pwêê ka é nai rö néjë ka e, wè, cér̂é pwêr̂ê nô mâ cëi, mâ na pwa na pwêê-r̂é, bör̂i wè tâwarè rha kâmö na ma pârör̂ö, bör̂i wè karir̂i kâmö, bör̂i wè kanii kâmö.»

Yeyèè Né Mwââ Kêmör̂u

Luk 8.16-18

21Na bör̂i êr̂ê yè-r̂é na ce êr̂ê: «Ârikéé, é yè pè mwââ kêmör̂u mâ nââ rö é ria böö kêê töwè na ki tö é ria né bwêêvè kaa kur̂u? Aè é yè dè nââ rö ka kaa tö xi-e. 22Wè na yèri dèxâ kââ ka tö yêr̂ê ré é yè da pwa yèr̂i, mâ dèxâ kââ ka é nââ uyûi ré é yè dè pè tö vèa. 23Ö kâmö ré wii na böödê ka pwêr̂ê, pwêr̂ê na ce.» 24Na êr̂ê yè-r̂é bar̂ee na ce, êr̂ê: «Waa tö rhûû ö kââ-ré gëve pwêr̂ê! Wè ö dâ ré gëve dâ-i, wè, é yè dâwaa-ve bar̂ee i mâ nââ bar̂ee dèxâ böömèè. 25Wè é yè nââ yè kâmö ré wii na ki-e, aè ö kâmö ré yèri ki-e, wè é yè pè bar̂ee rai-e ö kââ-ré nè ki-e.»

Yeyèè Né Pwêê Ka Tuö Rhar̂i

26Na êr̂ê bar̂ee, êr̂ê: «Mwâcir̂i i Bâô, wè na virù vèr̂i kâmö ka vi yer̂e pwêê rö néjë; 27nè kur̂u mâ nè tâ rhî, nè bwê mâ nè daa, nè bâ yi mâ tuö na pwêê, mâ na da tâwai na wi ré êr̂ê na tuö xè xi-yé. 28Wè na waa vè târ̂ââ pwêê na néjë, na waa baayê deewi, na bör̂i yer̂e é na pwêê, na bör̂i wii na êê vè bélé; 29aè nè târ̂â na pwêê, é bör̂i yörher̂e i pè öö, wè, na wê pwa na nédaa né vi yiur̂u.»

Yeyèè Né Pwêê Jâmâvu

Mat 13.31,32,34; Luk 13.18,19

30Na êr̂ê bar̂ee êr̂ê: «Gö yè pè virù mwâcir̂i i Bâô vèr̂i yè? Âri yeyèè ré gèré yè pèri vèa-i? 31Na ûr̂û pwêê jâmâvu, na ki mâ yer̂e rö néjë, wè pwêr̂ê mö pwêê ka yar̂i bor̂o rai pâr̂â pwêê wânii rö bwêê jë, 32aè é wê nai rö-i, na bör̂i tuö mâ kau vi rai pâr̂â kââ rö döwö, mâ tejî na pâr̂â jîî-e, cér̂é bör̂i pwa na pâr̂â mür̂ü mi xè rua wêêwa mâ tö ui-né»

33Rö-i pâr̂â yeyèè ka ûr̂û-ré, wè na bâ vi vaa na Ièsu i pâr̂â nô ka dè pâr̂i-r̂é. 34Na da tëvë yè-r̂é na ki yèri, aè na ki tö cér̂é rö pâi pa pâgür̂ü xi-e, na bör̂i pèri vèa nô né pâr̂â yeyèè-ré.

Na Aʼrhua Kayâ Ka Kau Na Ièsu

Mat 8.23-27; Luk 8.22-28

35Tèi ö nédaa-ré, na wê rhêêrè, na bör̂i êr̂ê na Ièsu yè pâi pa pâgür̂ü xi-e, êr̂ê: «Gèré tawarher̂e na dèxâ ékar̂aè nérhëë.» 36Cér̂é bör̂i virai pâr̂â kâmö mâ pèi Ièsu ö kwâ. Aè bör̂i kwâ bar̂ee, wè cér̂é vi vèâ cér̂é-é. 37Na bör̂i pwa na dömwââr̂i ka kau, na bör̂i yiarui böö kwâ na kwiè. 38Aè na wê tö-a kur̂u na Ièsu rö pè pavui gwâ-ê, rö bee kwâ. Cér̂é bör̂i ya vè tâ rhî-e, êr̂ê: «Ka vi pur̂â éé, gè wêr̂êi, na da dö kââ yè-i êr̂ê, gèré mû?» 39Na bör̂i tâ rhî na ce, mâ pè aʼ kayâ, mâ êr̂ê yè nérhëë, êr̂ê: «Aauu mâ tâdâ!» Na bör̂i tâdâ na kayâ mâ na kau na aauu. 40Na bör̂i êr̂ê yè-r̂é na Ièsu, êr̂ê: «Gëve bar̂a xi-yé? Na da tö wii na tâ néwèi xe-ve ra?» 41Aè cér̂é dö cêrhö mâ bar̂a, mâ vi êr̂ê yè-r̂é, êr̂ê: «Ö jië na ö kâmö-a, wè cur̂u pwêr̂ê-ê na kayâ mâ kwiè?»

Ajie New Testament

© The Bible Society in the South Pacific

More Info | Version Index